बारिश-मौसम
मौसम विभाग ह कोरिया, सरगुजा, जशपुर, रायगढ़, जांजगीर-चांपा, कबीरधाम, बिलासपुर, बीजापुर समेत प्रदेस के चौदह जिला म अवइया चौबीस घंटा बर रेड अलर्ट जारी करे हे। एखर तहत ए जिला मन म अति भारी बरसा के चेतावनी ल देखत अउ जादा सतर्कता बरते के हिदायत दे गेहे।
मौसम विभाग के अनुसार निम्नदाब के क्षेत्र तटीय ओड़िसा अउ ओखर आसपास स्थित हवय। उहें, एक द्रोणिका दक्षिण मध्यप्रदेश, छत्तीसगढ़ होवत एक दशमलव पांच किलोमीटर ले पांच दशमलव आठ किलोमीटर के ऊंचाई म स्थित हे। एखर असर ले प्रदेस म बदली-बारिस के स्थिति बने हुए हे। राजधानी रईपुर म आज बिहनिया ले रूक-रूक के हल्का ले मध्यम बरसात होवत हे।
इही बीच, प्रदेस म पाछु दू दिन ले होवत लगातार बरसा के कारण कई ठिन नदिया-नाला मन उफान म हे। जलस्तर बाढ़े ले अउ पुलिया के उपर ले पानी बहे के कारण कई ठिन गांव मनके सड़क संपर्क मुख्यालय ले टूट गेहे।
राजनांदगांव जिला म पाछु चार दिन ले रूक-रूक के बरसा होय के कारण बागनदी के जलस्तर बाढ़ गेहे, जेखर कारण टाटेकसा-कनेरी के बीच रपटा पुल डूब गेहे, जेखर ले ए रस्ता उपर आवागमन पूरी-पूरा बंद होगे हे। उहें, सीतागोटा रोड के दस ठिन ले जादा गांव मनके सड़क संपर्क मुख्यालय ले टूट गेहे। सरलग बारिस अउ तेज हवा के चलत कई ठिन गांव मन म बिजली घलो बाधित होय हे। उहें, मोबाइल नेटवर्क घलो दू दिन ले ठप्प पड़े हे।
ऐति, गरियाबंद जिला म घलो लगातार बरसात के कारण नदिया-नाला उफान म हे। पैरी, सोंढूर अउ महानदी के जलस्तर बाढ़ गेहे। उहें, नागाबुड़ा-नहरगांव छमासी नाला के पुलिया उपर पानी बहत हे, जेखर ले स्थानीय लोगन मन ल दिक्कत होवत हे।
फिट इंडिया क्विज
केन्द्रीय युवा कार्य अउ खेल मंत्रालय ह राष्ट्रव्यापी फिट इंडिया क्विज के पहिली दू लाख स्कूली विद्यार्थी मन बर निःशुल्क पंजीकरण के घोसना करे हे। मंत्रालय ह बतईन कि पहिली दू लाख छात्र मन अब ले दू सौ पच्चीस रूपिया के भागीदारी सुल्क के बजाय क्विज बर मुफ्त पंजीकरण कर सकत हे।
केन्द्रीय युवा कार्य अउ खेल मंत्री अनुराग सिंह ठाकुर ह स्कूली लइका मन म फिटनेस अउ खेल बर जागरूकता बढ़ाय के उद्देश्य ले सुल्क माफ करे के निर्णय के घोसना करीन हे। राष्ट्रव्यापी क्विज म तीन करोड़ पच्चीस लाख रूपिया के पुरस्कार रासि राखे गेहे।
मुख्यमंत्री-बैडमिंटन अकादमी
मुख्यमंत्री भूपेश बघेल ह राजधानी रईपुर म बैडमिंटन अकादमी सुरू करे के घोसना करीन हे। श्री बघेल ह आज अपन निवास कार्यालय म आने-आने खेल संघ के प्रतिनिधि अउ खिलाड़ी मन संग एक बइठका करीन। ए दउरान ओमन प्रदेस म खेल मन ल बढ़ावा दे बर, खेल सुविधा के विकास अउ खेल प्रतिभा मन ल निखारे ले जुड़े बिसय उपर बिस्तार से चर्चा करीन।
बइठका म ओमन बतईन कि प्रदेस म खेल सुविधा ल बढ़ाय अउ खिलाड़ी मनके प्रतिभा ल निखारे के उद्देश्य ले छत्तीसगढ़ खेल विकास प्राधिकरण के गठन करे गेहे। ए प्राधिकरण के समिति म जल्द ही खिलाड़ी मनके नियुक्ति करे जाही। श्री बघेल ह यहू किहीन कि सी.एस.आर. फंड ले राज्य के बड़का उद्योग मन ल स्टेडियम के रखरखाव अउ कोच के नियुक्ति समेत खिलाड़ी मन बर आवासीय सुविधा अउ डायट के जिम्मेदारी दे जाही। मुख्यमंत्री ह किहीन कि उद्योग मनके माध्यम ले राष्ट्रीय अउ अंतर्राष्ट्रीय स्तर के कोच मन ल कॉन्ट्रेक्टबेस उपर राखे जा सकत हे। ओमन जम्मों खेल संघ मन ले ओ मनके खेल ले जुड़े कोच राखे के आग्रह घलो करीन।
बइठका म म खेल मंत्री उमेश पटेल वर्चुअल रूप ले सामिल होईन।
अमृत महोत्सव-क्विज
आजादी के अमृत महोत्सव म आकाशवाणी समाचार स्वाधीनता संग्राम अउ ओखर गौरवसाली इतिहास उपर बिसेस अमृत महोत्सव क्विज आयोजित करत हे। सुनइया मन ल बतादन कि ए प्रश्न राष्ट्रीय स्तर म आयोजित क्विज के तहत पूछे जाही। एखर सेती एखर जवाब प्रादेशिक बुलेटिन के क्विज बर निर्धारित ई-मेल या मोबाइल नंबर के बजाय आज के प्रश्न के बाद बताय जाने वाला वाट्एऐप नंबर अउ ई-मेल म भेजना हे। ‘‘अमृत महोत्सव क्विज आकाशवाणी समाचार के संग‘‘ के आज के प्रश्न हे-
‘‘मद्रास म होम रूल लीन के स्थापना करने वाला आयरिस महिला के का नाव हरय।‘‘
श्रोता मन अपन उत्तर वाट्एऐप नंबर – 8 8 2 6 5 4 6 2 6 2 म या ई-मेल ‘‘अमृत महोत्सव क्विज एट द रेट ई-मेल डॉट कॉम‘‘ म भेजय। एक झिन भाग्यसाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाम के घोसना करे जाही। विजेता ल ई-प्रमाण पत्र अउ एक ठिन प्रतीक पुरस्कार दे जाही।
राष्ट्रीय कृमि मुक्ति दिवस
प्रदेस म आज ले राष्ट्रीय कृमि मुक्ति दिवस कारीकरम राखे जात हे। बीस सितंबर तक चलइया ए कारीकरम के तहत एक ले उन्नीस बछर तक के जम्मों लइका अउ किशोर-किशोरी मन ल एल्बेंडाजॉल के खुराक दे जाही। मितानिन अउ आंगनबाड़ी कार्यकर्ता घर-घर जाके लइका मन ल कृमिनाशक के निःशुल्क दवा दीहीं। एमा ले छूटे लइका मन ल इक्कीस ले तेईस सितंबर तक मॉपअप दिवस म कृमि के दवा दे जा सकही।
हाथी हमला-मौत
महासमुंद जिला के सिरपुर क्षेत्र म पाछु रतिहा दूसर-दूसर जगह म हाथी के हमला म दू झिन ग्रामीण मनके मउत होगे। मिले जानकारी अनुसार जिला के तीन ग्रामीण एक मोटरसाइकिल म सवार होके महादेव पठार ले अपन गृहग्राम गौरखेड़ लहुटत रिहीन। इही दउरान अचानक सड़क उपर हाथी के आय ले मोटरसाइकिल सवार ये सब्बो मनखे मन गिर गे। एमा ले एक झिन मनखे ल हाथी ह कुचल के मार डरीस। उहें, दू झिन दूसर ग्रामीण मन भाग के अपन जान बचईन।
उहें, जिला के झालखम्हरिया गांव म मूंगफली के फसल के रखवाली करत एक किसान उपर हाथी ह हमला कर दीस, जेमा ओखर घटनास्थलेच म मउत होगे। हाथी मनके के आतंक अउ विचरण ल देखत वन विभाग के अधिकारी मन गांव म मुनादी करा के ग्रामीण मन हाथी मन ले सतर्क रेहे के अउ जंगल करा नइ जाय के हिदायत दीन।
सिविल सर्विसेस खेल प्रतियोगिता
अखिल भारतीय सिविल सर्विसेस खेल प्रतियोगिता दू हजार बीस-इक्कीस म राज्य दल के गठन बर चयन प्रतियोगिता राखे जाही। ए प्रतियोगिता के आयोजन राजधानी रईपुर के आने-आने जगह मन म काली चौदह ले सोलह सितंबर तक करे जाही। ए संबंध म खेल अउ युवा कल्याण विभाग डहार ले प्रदेस के जम्मों सासकीय विभाग के विभागाध्यक्ष अउ सासकीय अधिकारी-कर्मचारी मन ल खेल प्रतियोगिता म सामिल होय बर पत्र जारी करे गेहे। एखर तहत वॉलीबॉल, हॉकी, बैडमिंटन, टेबल टेनिस, लॉन टेनिस अउ कबड्डी जइसे खेल मन बर चयन प्रतियोगिता के आयोजन करे जाही।
बतादन कि सासकीय अधिकारी-कर्मचारी मन बर सिविल सेवा खेल प्रतियोगिता के आयोजन हर साल करे जाथे।
धमतरी-शालेय क्रीडा प्रतियोगिता
इक्कीसवां राज्य स्तरीय शालेय क्रीडा प्रतियोगिता आज ले धमतरी म सुरू होईस। ए प्रतियोगिता म प्रदेस के पांचों संभाग – रईपुर, बिलासपुर, सरगुजा, दुरूग अउ बस्तर के आठ सौ पचास खिलाड़ी मन हिस्सा लेवत हे। उहें, ए स्पर्धा म एक सौ पचास कोच मन घलो सामिल होवत हे। सोलह सितंबर तक चलइया ए प्रतियोगिता के तहत अलग-अलग आयु वर्ग म क्रिकेट नेटबॉल कुश्ती फ्री-स्टाइल अउ कुश्ती ग्रीको रोमन जइसे खेल मनके आयोजन करे जात हे।
राज्य स्तरीय शालेय क्रीडा प्रतियोगिता के सुभारंभ आदिवासी विकास प्राधिकरण के उपाध्यक्ष अउ अउ सिहावा विधायक डॉक्टर लक्ष्मी ध्रुव ह करीन। ए मउका म ओमन खिलाड़ी मन ले किहीन कि जीवन म लक्ष्य ल हासिल करे बर तन अउ मन के स्वस्थ होना बहुत जरूरी हे अउ एखर बर खेल एक बेहतरीन माध्यम हरय।