आईसीएमआर-कोविड टीका
कोविड-नाइंटीन वैक्सीन के एक डोज महामारी ले होवइया मउत ल रोके म छियानवे दशमलव छह प्रतिसत प्रभावी हे अउ दूनों डोज लेके बाद प्रभाव संतानवे दशमलव पांच प्रतिसत तक हो जथे। भारतीय आयुर्विज्ञान अनुसंधान परिषद के महानिदेसक ह किहीन हे कि ए ह सुरक्षात्मक प्रभावसीलता कोविन अउ कोविड इंडिया पोर्टल के संगेसंग कोविड परीक्षण पोर्टल के आंकड़ा के माध्यम ले करे गे विश्लेषण म आगू आय हे।
डॉक्टर भार्गव के कहना हे कि एसो अट्ठारह अप्रैल ले पन्द्रह अगस्त के बीच आंकड़ा मनके विश्लेषण करे गीस, जेखर ले पता चलथे कि आबादी के जउन समूह मन म टीकाकरण नइ होय हे, उहां मृत्युदर जादा हे अउ जिहां टीका के दूनों डोज लगा दे गेहे, उहां मृत्यु दर नइ हे।
इही बीच, को-विन ह एक ठिन नवा एप्लीकेशन प्रोग्रामिंग विकसित करे हे, जेला ‘‘अपने ग्राहक के टीकाकरण की स्थिति को जानो‘‘ नाव दे गेहे। एखर परयोग करे बर जुड़े मनखे मन ल अपन मोबाइल नंबर अउ नाव दरज कराना होही। जेखर बाद ओमन ल एक ठिन ओटीपी मिलही, जेला दरज कराय बर पड़ही। एखर बाद टीकाकरण के स्थिति के जानबा दे जाही।
हाईकोर्ट-शिक्षक भर्ती
छत्तीसगढ़ उच्च न्यायालय ह आज अपन एक ठिन आदेस म चौदह हजार सिक्षक भर्ती प्रक्रिया उपर रोक लगा देहे। संगेसंग हाईकोर्ट ह राज्य सरकार ल नोटिस जारी करके जवाब मांगे हे।
जानबा के मुताबिक लोक सिक्षण संचालनालय ह बछर दू हजार उन्नीस म सिक्षक भर्ती के विज्ञापन जारी करे रिहीस। मामला के याचिकाकर्ता ह बस्तर संभाग बर अरजी करे रिहीस। याचिकाकर्ता के कहना हे कि जइसे छत्तीसगढ़ टेट परीक्षा पास होय लोगन मन ल सिथिलीकरण के अनुमति दे गेहे। वइसने केन्द्रीय सिक्षक पात्रता परीक्षा म घलो सिथिलीकरण के अनुमति दे जाय।
मुख्यमंत्री-मिलेट
मुख्यमंत्री ह किहीन हे कि प्रदेस ह अवइया बेरा म देस के मिलेट हब बनही। ओमन किहीन कि मिलेट मिशन के तहत किसान मन ल लघु धान्य फसल के सही कीमत देवाय, खरीदी के बेवस्था, प्रोसेसिंग अउ बिसेसज्ञ मनके बिसेसज्ञता के फायदा देवाय के पहल करे जात हे। ओमन किहीन कि सरकार ह लघु वनोपज जइसन लघु धान्य फसल ल घलो प्रदेस के ताकत बनाना चाहत हे।
मुख्यमंत्री ह आज अपन निवास कार्यालय म इंडियन इंस्टिट्यूट ऑफ मिलेट रिसर्च हैदराबाद अउ राज्य के मिलेट मिशन के तहत अवइया चौदह जिला के कलेक्टर मनके बीच एम.ओ.यू. उपर दस्तखत बर राखे गे कारीकरम ल संबोधित करत रिहीन। राज्य सरकार ह कोदो, कुटकी अउ रागी के समर्थन मूल्य तय करे के संगेसंग राजीव गांधी किसान न्याय योजना के दायरा म एला घलो सामिल करे हे।
राष्ट्रीय लोक अदालत
राष्ट्रीय विधिक सेवा प्राधिकरण डहार ले प्रदेस के संगेसंग देसभर म काली ग्यारह सितंबर के राष्ट्रीय लोक अदालत के आयोजन करे जाही। लोक अदालत म राजीनामा योग्य आपराधिक मामला, कुटुम्ब न्यायालय, श्रम विधि, बिजली कंपनी अउ मोटर दुर्घटना दावा अधिकरण के संग जन उपयोगी मामला के निपटारा करे जाही। एखर अलावा राजस्व न्यायालय नगर निगम अउ नगर पालिका के जल कर, भवन कर के संग सखी वन स्टाप सेंटर के मामला ल घलो लोक अदालत म पेस करे जाही।
रईपुर के जिला न्यायाधीश अरविंद कुमार वर्मा ह बतईन कि ए बार बिसेस रूप ले राष्ट्रीय लोक अदालत के आयोजन आजादी के अमृत महोत्सव के तहत करे जात हे।
लोकवाणी
मुख्यमंत्री भूपेश बघेल के मासिक रेडियोवार्ता ‘‘लोकवाणी‘‘ के इक्कीसवां कड़ी के प्रसारण इतवार बारह सितंबर के होही। लोकवाणी म ए बखत ‘‘जिला स्तर पर विशेष रणनीति से विकास की नई राह‘‘ बिसय उपर प्रदेस के लोगन मन ले गोठबात होही। लोकवाणी के प्रसारण प्रदेस स्थित आकाशवाणी के जम्मों केन्द्र, एफ.एम. रेडियो अउ क्षेत्रीय समाचार चैनल ले बिहनिया साढ़े दस बजे ले सुने जा सकथे।
फिट इंडिया फ्रीडम रन
आजादी के अमृत महोत्सव के तहत राजनांदगांव म काली फिट इंडिया फ्रीडम रन के आयोजन करे जाही, जेमा नेहरू युवा केन्द्र, राष्ट्रीय सेवा योजना, एनसीसी, स्काउट-गाईड अउ राजनांदगांव रनर्स, खेल संघ अउ खिलाड़ी के संगेसंग चार सौ ले जादा प्रतिभागी मन भाग लीहीं। ए मउका म पद्मश्री विजेता, स्वतंत्रता संग्राम सेनानी अउ अंतर्राष्ट्रीय खिलाड़ी मनके सम्मान करे जाही।
आयकर-विवरणी
केन्द्रीय प्रत्यक्ष कर बोर्ड-सी.बी.डी.टी. ह आयकर विवरणी दाखिल करे के आखिरी तारीख ल इकतीस दिसंबर तक बढ़ा देहे। आईटीआर पोर्टल म आवत दिक्कत के सेती एखर तारीख ल बढ़ाय गेहे। पहिली रिटर्न भरे के आखिरी तारीख तीस सितंबर राखे गे रिहीस।
राष्ट्रीय पोषण माह
राष्ट्रीय पोषण माह के तहत ए बेरा प्रदेस म सुपोषण के महत्व उपर आधारित कतकोन जन-जागरूकता कारीकरम चलत हे। महिला अउ बाल विकास विभाग डहार ले काली ग्यारह सितंबर के रईपुर म साइकिल रैली निकाले जाही। तेलीबांधा स्थित मरीन ड्राईव ले सुरू होवइया ए रैली म जनप्रतिनिधि अउ आम लोगन मन ह सामिल होही।
ऐति, महिला अउ बाल विकास मंत्री अनिला भेंडिया ह किहीन कि प्रदेस म कुपोषित लइका मनके संख्या म बत्तीस प्रतिसत के कमी आय हे अउ अस्सी हजार माईलोगिन मन ह एनीमिया ले मुक्त होगे हे। ओमन आम लोगन ले सुपोषित छत्तीसगढ़ के सपना ल पूरा करे म मदद करे के अपील करे हे।
अमृत महोत्सव-क्विज प्रतियोगिता
देश के आजादी के पचहत्तर बछर पूरा होय के मउका म आजादी के अमृत महोत्सव म प्रादेशिक समाचार एकांश, आकाशवाणी रायपुर डहार ले प्रश्नोत्तरी कार्यक्रम शुरू करे गेहे।
एमा छत्तीसगढ़ी बुलेटिन सुनइया मन बर आज के सवाल हे-
‘‘धमतरी के तीर नगरी म बछर 1922 म कोन से आंदोलन होय रिहीस।‘‘
सवाल ल एक घांव अउ सुन लेवव।
श्रोता मन ह अपन जवाब ई-मेल आईडी – आर.ए.आई.पी.यू.आर. एस.ए.डब्लू. ए.एल. एट द रेट जीमेल डॅाट कॉम म या फोन नंबर 94242-08182 म एसएमएस ले भेज सकत हे। आप अपन जवाब के संग अपन नाव, पता अउ फोन नंबर घलो जरूर भेजव, जेखर ले विजेता बने म आप मन ले संपर्क करे जा सकय।
जउन श्रोता के सही जुवाब सबले पहिली मिलही ओला विजेता माने जाही अउ ओखर नाव के घोषणा काली के छत्तीसगढ़ी समाचार बुलेटिन म करे जाही। संगेसंग जीतइया प्रतिभागी ल प्रादेशिक समाचार एकांश डहार ले ई-प्रमाण पत्र दे जाही।
गणेश-चतुर्थी
प्रदेस के संगेसंग पूरा देस म आज गणेश चतुर्थी के परब भक्तिभाव अउ उछाह के संग मनाय जात हे। बुद्धि, विवेक अउ सौभाग्य-समृद्धि के प्रतीक गणपति के ग्यारह दिन के उत्सव आज ले सुरू होके चतुर्दशी के दिन सिराही।
प्रदेस के कतकोन जघा म घर मन म भगवान गणेश के बढ़िया मूर्ति राखे गेहे। मूर्ति अउ पूजापाठ के जिनीस खरीदे बर लोगन मनके भीड़ बाजार म दिखत हे। प्रसासन डहार ले गणेश मूर्ति के स्थापना अउ उत्सव के दउरान कोरोना संक्रमण ले बचाव के उपाय अउ दिसा-निरदेस के पालन करे बर केहे गेहे।
मौसम
प्रदेस ले मानसून के बिदाई देरी ले होय के संभावना हे। मौसम विभाग ले मिले जानबा के मुताबिक देस म दक्षिण-पूर्व मानसून के बिदाई राजस्थान ले इकतीस अगस्त ले सुरू होथे। फेर एसो अभी मानसून के बिदाई सुरू नइ होय हे।
ऐति, प्रदेस के कोनों-कोनों जघा म अवइया चौबीस घंटा के दउरान हल्का ले मध्यम बरसा होय के संभावना बताय गेहे। त उहें, प्रदेस के दक्षिणी भाग के एक-दू जघा म गाज गिरे अउ भारी बरसा के चेतावनी दे गेहे।
अउ अब थोरकुन समाचार सार म-
– मुख्यमंत्री ह आज राजनांदगांव जिला ल सवा तीन करोड़ रूपिया के विकास काम के सौगात दीन।
– आज विश्व आत्महत्या रोकथाम दिवय हरय। ए मउका म दुरूग जिला म कतकोन कारीकरम होवत हे।
अउ
– फ्रेंचाइजी के नाव म साढ़े पांच लाख रूपिया के ठगी करइया एक ठिन गिरोह के दू झिन सदस्य मन ल गरियाबंद जिला के देवभोग पुलिस ह गिरफ्तार करे हे।