तोमर-कृषि अवसंरचना कोष
केंद्रीय कृषि मंत्री नरेंद्र सिंह तोमर ह राज्य मनले कृषि अवसंरचना कोष के लाभ उठाय बर कीहिन हे। एखर ले अइसे छोटे अउ सीमांत किसान मन ल लाभ मिल सकय। जेखर तीर गोदाम अउ कोल्ड स्टोरेज के सुविधा नइ हे। कृषि मंत्रालय के ए पहल अउ योजना मन उपर मुख्यमंत्री मनके सम्मेलन के दूसरा दिन काली श्री तोमर ह कीहिन कि बुनियादी निवेश ल बढ़ावा देबर कृषि अवसंरचना कोष के स्थापना करे गेहे। डिजिटल कृषि मिशन के बारे म कृषि मंत्री ह कीहिन कि किसान मनके डेटाबेस बड़का संपत्ति हरय। ओमन ह बताइन कि पांच करोड़ पचास लाख किसान मनके डेटाबेस तियार हे। एखरे आधार म नीति निर्माण अउ स्मार्ट खेती के शुरूआत करे जा सकथे।
गोधन न्याय योजना राशि अंतरण
मुख्यमंत्री भूपेश बघेल ह कीहिन कि छत्तीसगढ़ गोबर खरीदी करइया देश के पहिला राज्य होय के संगेसंग गोबर खरीदी ल लाभ म बदलइया पहिला राज्य घलो हरय। श्री बघेल ह आज अपन रायपुर स्थित निवास कार्यालय म आयोजित गोधन न्याय योजना के तहत राशि अंतरण कार्यक्रम ल संबोधित करत रीहिन। ए दउरान ओमन ह सत्ताईसवां किस्त के रूप म पशुपालक, संग्राहक, महिला स्व सहायता अउ गौठान समिति के खाता म पांच करोड़ तैंतीस लाख रूपिया के राशि के ऑनलाईन अंतरण करीन।
मुख्यमंत्री पोर्टल लांच
मुख्यमंत्री भूपेश बघेल ह आज एकीकृत किसान पोर्टल किसान डॅाट सीजी डॅाट एनआईसी डॅाट इन के शुरूआत करीन। कृषि विभाग डहार ले तियार करे गे ए पोर्टल म राजीव गांधी किसान न्याय योजना समर्थन मूल्य म धान खरीदी मुख्यमंत्री वृक्षारोपण प्रोत्साहन योजना अउ कोदो कुटकी, रागी उपार्जन योजना के लाभ लेबर किसान मन ल एके बार पंजीयन कराना होही।
अंतर्राष्ट्रीय साक्षरता दिवस
आज अंतर्राष्ट्रीय साक्षरता दिवस हरय। ए बछर अंतर्राष्ट्रीय साक्षरता दिवस के विसय – डिजिटल साक्षरता विभाजन ल कम करना – हरय । ए मउका म प्रदेशभर म कतकोन कार्यक्रम आयोजित करे जात हे। राज्यपाल अनुसूइया उइके अउ मुख्यमंत्री भूपेश बघेल ह प्रदेशवासी मनल साक्षरता दिवस के बधाई अउ शुभकामना दीन। राजपाल ह अपन संदेश म कीहिन कि साक्षरता समाज म जागरूकता लाये के सशक्त माध्यम हरय। उंहें मुख्यमंत्री ह कीहिन कि आज के दिन अक्षर मनके अलख जगाके अउ अक्षर ज्ञान के प्रकाश ले अपन अउ समाज के जीवन म चेतना, सुख, अउ समृद्धि के रोशनी बगराय के दिन हरय। ए मउका म मुख्यमंत्री ह आह्वान करीन कि प्रदेश ल शत प्रतिशत साक्षर बनाय बर सबो झन अपन योगदान देके संकल्प करय।
राष्ट्रीय रक्षा अकादमी-महिला प्रवेश
केंद्र सरकार ह उच्च्तम न्यायालय ल सूचित करे हे कि ओमन ह राष्ट्रीय रक्षा अकादमी म महिला मनके प्रवेश के निर्णय लेहे। सरकार ह कीहिन कि ये निर्णय सशस्त्र बल के संग परामर्श के बाद करे गेहे। न्यायालय ह अठारा अगस्त के फैसला सुनाये रीहिस कि राष्ट्रीय रक्षा अकादमी म महिला मनके प्रवेश के अनुमति दे जाना चाही। ए फैसला म महिला मन बर तीनों सेना म स्थायी कमीशन पाये के अवसर खुल जाही।
राष्ट्रीय पोषण माह
राष्ट्रीय पोषण माह के भीतर ए दिन छत्तीसगढ़ म सुपोषण के महत्ता उपर आधारित आने आने जन जागरूकता कार्यक्रम के आयोजन करे जात हे। इही कड़ी म महिला अउ बाल विकास विभाग डहार ले ग्यारा सितंबर के राजधानी रायपुर म सायकिल रैली निकाले जाही। तेलीबांधी तीर मरीन ड्राइव ले शुरू होवइया ये रैली म जन प्रतिनिधि अउ आम मनखे मन घलो शामिल होही।
कोविड टीका समाचार
छत्तीसगढ़ म कोरोना ले बचाव बर अब तक एक करोड़ बावन लाख हजार ले जादा टीका लगाये जा चुके हे । उंहें स्वास्थ्य मंत्री टी.एस. सिंहदेव ह कोरोना टीकाकरण काम म तेजी लाने बर काली मोर जिम्मेदारी अभियान के शुरूआत करीन। चार महीना तक चलइया ये अभियान के भीतर राज्य भर म आदिवासी क्षेत्र के लोगन ल कोविड टीकाकरण बर प्रेरित करे जाही। ए मउका म श्री सिंहदेव ह कीहिन कि अभियान राज्य म आदिवासी समुदाय के टीकाकरण के दिशा म एक बड़का कदम हरय। संगेसंग सरकार के टीकाकरण ले जुड़े प्रयास म एक ठिन महत्वपूर्ण योगदान हरय। ये अभियान म यूनिसेफ अउ एकता परिषद के संग युवा, धार्मिक अउ आदिवासी नेता, निर्वाचित प्रतिनिधि संग सामाजिक संगठन मनके सहयोग ले जाही । इही बीच रायपुर कलेक्टर सौरभ कुमार ह टीकाकरण के गति बढ़ाय बर बूथ लेवल म अधिकारी मन ल घर-घर जाके सर्वे करके सूची तियार करे के निर्देश दीन हे। जेखर ले बांचे मनखे मनके टीकाकरण करे जा सके। ओति कोंडागांव जिला म घलो टीकाकरण अभियान म स्वास्थ्य कार्यकर्ता मन ह घर-घर जाके टीका लगावत हे। एति प्रदेश म कोरोना संक्रमण के दर म सरलग कमी आवत हे अउ औसत पॉजीटिव दर शून्य दशमलव एक आठ प्रतिशत म आगे हे। प्रदेश म काली जिहां कोरोना संक्रमण के छप्पन नवा मामला आगू आय हे, उंहें बारा जिला म एको झन मरीज नइ मिले हे। कोरोना संक्रमण म सुधार आय के बाद रायपुर कलेक्टर ह अवई जवई अउ सार्वजनिक गतिविधि म रतिहा दस बजे तक लगे रोक ल हटा देहे। एति दुर्ग जिला म स्वास्थ्य विभाग ह तीसरा लहर के आशंका ल देखत सबो जरूरी तियारी पूरा कर लेहे।
सरोज पांडेय सहप्रभारी
भारतीय जनता पार्टी ह अवइया पांच साल राज्य म होवइया विधानसभा चुनाव ल देखत चुनाव प्रभारी मनके नाव के घोषणा कर देहे। केंद्रीय मंत्री धर्मेन्द्र प्रधान ल उत्तरप्रदेश विधानसभा चुनाव बर प्रभारी नियुक्त करे गेहे। उंहें छत्तीसगढ़ के भाजपा नेत्री अउ राज्यसभा सांसद सरोज पांडेय ल सहप्रभारी बनाय गेहे।
माओवादी समाचार
बीजापुर जिला म सुरक्षा बल मन ह तीन झिन माओवादी मन ल गिरप्तार करे हे। जेमा ले एक झिन माओवादी ह स्मारक ल घलो ध्वस्त कर देहे। खबर के मुताबिक एसटीएफ सीआरपीएफ अउ कोबरा बटालियन के संयुक्त टीम बासागुड़ा थाना क्षेत्र म सर्चिंग म निकले रीहिस। इही दउरान तीन झिन माओवादी मन ल गिरप्तार करे गेहे। ए माओवादी मन उपर तीमापुर टेकड़ी म आईईडी विस्फोट के घटना म शामिल रेहे के आरोप हे।
अउ अब थोरकुन समाचार सार म-
– रायपुर रेल मंडल के तहत भिलाई-जी केबिन के बीच सिरसा रेलवे समपार फाटक म सुधार काम करे जात हे। एखर सेती काली बीहनिया आठ बजे ले बारा सितंबर के बीहनिया सात बजे तक ए रद्दा म गाड़ी के अवई जवई बंद रही।
– राजनांदगांव जिला के इंदावानी गांव के तीर चारपहिया वाहन ह मोटर सायकिल ल टक्कर मार दीस। ए हादसा म एक झिन माइलोगिन के मउकाच म मउत होगे। उंहे दू झन आने लोगन मन गंभीर रूप ले घायल होगे। अउ – गरियाबंद जिला म देवभोग पुलिस ह गांजा तस्करी के मामला म एक झिन माइलोगिन संग चार आरोपी ल गिरप्तार करके उंखर तीर ले इकसठ किलो गांजा बरामद करे हे। एमा ले तीन झिन आरोपी उत्तरप्रदेश अउ एक झिन उड़ीसा के रहइया हरय।