आज दिनभर के खबर ल अपन गुरतुर छत्तीसगढ़ी भाखा म पढ़व

प्रधानमंत्री-शिक्षक पर्व

प्रधानमंत्री नरेन्द्र मोदी ह निजी क्षेत्र ले शिक्षा के क्षेत्र म योगदान करे बर आह्वान करे हे। श्री मोदी ह किहीन कि सरकार शिक्षा के क्षेत्र म बदलाव बर प्रयास करत हे। ओमन किहीन कि ए क्षेत्र ल विश्व स्तरीय बनाय बर सीखे अउ सिखाय के प्रक्रिया ल फिर से परिभाषित अउ तैयार करे के जरूरत हे। प्रधानमंत्री ह ए बदलत बेरा म शिक्षक मन ल नवा प्रणाली अउ तकनीक तेजी ले सीखे उपर बल दीन।
प्रधानमंत्री ह आज शिक्षा पर्व के सुरूवाती सम्मेलन के बेरा कतकोन नवा पहल के सुरूवात घलो करीन।

भर्ती-तैयारी

मुख्यमंत्री भूपेश बघेल ह गृह, राजस्व अउ खाद्य विभाग के आने-आने पद मन म भर्ती के संबंध म विभागीय अधिकारी मन ल निर्देश देहे। ए विभाग मनके कुल 2492 पद मन म भर्ती प्रक्रिया के तैयारी सुरू कर दे गेहे। श्री बघेल ह ए विभाग मनके अलावा आने सबो विभाग मन म खाली पद मन म घलो भर्ती बर कार्ययोजना तैयार करे बर केहे हे।
गृह विभाग के अंतर्गत बस्तर फाइटर्स बल के गठन के मंजूरी जारी करे गेहे। ए बल म 2100 पद म भर्ती करे जाही। उहें, राजस्व विभाग म 301 पटवारी मनके पद मन म नवा भर्ती करे जाय के अनुमति दे गेहे। एखर अलावा, खाद्य विभाग म 24 खाद्य निरीक्षक मनके पद म भर्ती करे जाही। मुख्यमंत्री ह युवा मन ले आह्वान करे हे कि ओमन ह ए अवसर के लाभ उठाय बर अच्छा तैयारी करय।
इही बीच, छत्तीसगढ़ विद्युत वितरण कंपनी डहार ले घलो लाइन मैन के पद ल दुगुना करके भर्ती बर संसोधित विज्ञापन जारी करे गेहे। पाछु महीना म ही कंपनी ह 1500 लाइन मैन के पद मन म भर्ती ले जुड़े विज्ञापन जारी करे रिहीन। फेर, संविदा कर्मी मनके मांग उपर पद के संख्या ल बढ़ाके 3 हजार कर दे गेहे।

हिन्दी मीडियम स्कूल-तैयारी

प्रदेस के सब्बो जिला मुख्यालय मनके शासकीय बहुउद्देश्यीय उच्चतर        माध्यमिक विद्यालय मन ल स्वामी आत्मानंद हिन्दी माध्यम स्कूल के रूप म विकसित करे के तैयारी सुरू होगे हे। ए संबंध म स्कूल सिक्षा विभाग के प्रमुख सचिव डॉक्टर आलोक शुक्ला ह जिला कलेक्टर मन ल एक सप्ताह के भीतर स्कूल के चयन करके उन्नयन के योजना बनाय के निर्देश देहे। प्रमुख सचिव ह जिला कलेक्टर मन ल पत्र लिख के केहे हे कि योजना बनात समय ए बात के ध्यान राखे जाय कि अभी के स्कूल भवन ल तोड़े के बजाय पुनः निर्माण करे जाय। स्कूल म पढ़ईया मन बर फर्नीचर, खेल अउ कला सामग्री के संग कम्प्यूटर लैब जइसे आधुनिक सुविधा उपलब्ध कराय जाय।
जानकारी के अनुसार रायपुर के तीन स्कूल शासकीय जे.आर. दानी, शासकीय माधव राव सप्रे अउ शासकीय जे.एन. पांडेय स्कूल ल स्वामी आत्मानंद उत्कृष्ट हिन्दी माध्यम स्कूल के रूप म उन्नयन करे जाही।

नंदकुमार बघेल-गिरफ्तार

मुख्यमंत्री भूपेश बघेल के पिता नंदकुमार बघेल ल 21 सितंबर तक न्यायिक रिमांड म जेल भेज दे गेहे। नंदकुमार बघेल ल काली पुलिस आगरा ले गिरफ्तार करे रिहीस। नंदकुमार बघेल ल आज मंझनिया रायपुर के जिला कोर्ट म पेश करे गे रिहीस, जिहां मुख्यमंत्री के पिता ह जमानत बर अरजी दे ले मना कर दीस। एखर बाद कोर्ट ह नंदकुमार बघेल ल 15 दिन बर न्यायिक हिरासत म भेज दीस।
बतादन कि जाति विशेष के खिलाफ कथित रूप ले विवादित बयान देके मामला म विरोध जतात हुए एक समुदाय के डहार ले रायपुर के डी.डी. नगर थाना म मुख्यमंत्री के पिता के खिलाफ एफ.आई.आर. दर्ज करे गे रिहीस।

राष्ट्रीय लोक अदालत

राष्ट्रीय विधिक सेवा प्राधिकरण डहार ले छत्तीसगढ़ सहित देसभर म 11 सितंबर के राष्ट्रीय लोक अदालत के आयोजन करे जाही। ए आयोजन ल लेके प्रदेश के सबो जिला मुख्यालय मन म लंबित प्रकरण मनके सूची तैयार करे जात हे। लोक अदालत म राजीनामा योग्य आपराधिक मामला, कुटुम्ब न्यायालय, श्रम विधि, बिजली कंपनी अउ मोटर दुर्घटना दावा अधिकरण के संग जन उपयोगी मामला मनके निराकरण करे जाही। एखर अलावा राजस्व न्यायालय, नगर निगम अउ नगर पालिका के जल कर अउ भवन कर के संग सखी वन स्पॉट सेंटर के मामला ल घलो लोक अदालत म प्रस्तुत करे जाही।
इही कड़ी म रायपुर जिला कलेक्टर सौरभ कुमार ह अधिकारी मन ल लोक अदालत म प्रस्तुत करे के लइक लंबित प्रकरण मनके सूची तुरते उपलब्ध कराय के निर्देश देहे।

राष्ट्रीय पोषण माह

राष्ट्रीय पोषण माह के अंतर्गत आजकाल छत्तीसगढ़ म सुपोषण के महत्व उपर आधारित आने-आने जन-जागरूकता कारीकरम के आयोजन करे जात हे। इही कड़ी म महिला अउ बाल विकास विभाग डहार ले 11 सितंबर के राजधानी रायपुर म एक साइकिल रैली निकाली जाही। तेलीबांधा स्थित मरीज ड्राईव ले सुरू होवइया ए रैली म जनप्रतिनिधि अउ आम जनता सामिल होही। 

कोविड-टीका

भारत ह आज कोविड रोधी टीका लगाय म बड़का उपलब्धि हासिल करे हे। केन्द्रीय स्वास्थ्य मंत्री मनसुख मांडविया ह किहीन कि देस म अब तक 70 करोड़ टीका लगाय जा चुके हे, जेमा ले 10 करोड़ ले जादा टीका पाछु 13 दिन म ही लगाय गेहे। श्री मांडविया ह ए उपलब्धि बर सबो स्वास्थ्य कर्मी अउ लोगन मन ल बधाई देहे।
ऐति, छत्तीसगढ़ म कोरोना ले बचाव बर अब तक 1 करोड़ 51 लाख ले जादा टीका लगाय जा चुके हे।
इही बीच, प्रदेस म कोरोना संक्रमण के दर म लगातार कमी आत जात हे। औसत पॉजिटीविटी दर 0.12 प्रतिसत म आ गेहे। प्रदेस म काली कोरोना संक्रमण के 33 नवा मामला आगू आईस। त उहें, 12 जिला मन म एको झिन नवा मरीज नइ मिले हे। प्रदेस म काली कोरोना संक्रमण ले 1 झन मनखे के मउत होईस।

फिट इंडिया फ्रीडम रन

आजादी के अमृत महोत्सव के अंतर्गत आज सूरजपुर म फिट इंडिया फ्रीडम रन के आयोजन करे गीस। कार्यक्रम म मुख्य अतिथि के रूप म केन्द्रीय राज्यमंत्री रेणुका सिंह सामिल होईन। ओमन ह आज बिहनिया कलेक्ट्रेट परिसर म एक दौड़ ल हरा झंडी दिखाके रवाना करीन। ए मउका म ओमन देस के स्वतंत्रता संग्राम म योगदान देवइया बस्तर के आदिवासी नेता वीर नारायण सिंह अउ गुण्डाधूर ल सुरता करीन। ए दौड़ के उद्देश्य लोगन मन ल अच्छा स्वास्थ्य, योग अउ सारीरिक गतिविधि मन बर जागरूक करना हे। ए मउका म सांस्कृतिक कारीकरम के आयोजन घलो करे गीस।
जिला स्तरीय दौड़ के आयोजन करे संग विकाखंड स्तर म घलो जिला के 75 गांव मन म घलो फ्रीडम रन के आयोजन करे जात हे।

अमृत महोत्सव-क्विज

आजादी के अमृत महोत्सव म आकाशवाणी समाचार स्वाधीनता संग्राम अउ ओखर गौरवसाली इतिहास उपर अमृत महोत्सव क्विज आयोजित करे जात हे। ‘‘अमृत महोत्सव क्विज आकाशवाणी के साथ‘‘ म आज के हमर सवाल हे –
‘‘अंग्रेज मन ले बछर 1824 म वीरता के संग संघर्ष करइया कित्तूर के महरानी कोन रिहीस‘‘ ?
श्रोता मन अपन उत्तर ‘‘अमृत महोत्सव क्विज एट द रेट जीमेल डॉट कॉम‘‘ म ई-मेल भेज सकत हे। आप मन अपन जवाब हमर वाट्सऐप नंबर – 8 8 2 6 5 4 6 2 6 2 म घलो भेज सकथो। एक भाग्यशाली प्रतियोगी ल विजेता के रूप म चुने जाही अउ काली समाचार प्रभात म विजेता के नाव के घोसना करे जाही। विजेता ल ई-प्रमाण पत्र अउ एक सांकेतिक पुरस्कार दे जाही।

लोकवाणी

मुख्यमंत्री भूपेश बघेल के मासिक रेडियो वार्ता ‘‘लोकवाणी‘‘ के 21वां कड़ी के प्रसारण रविवार 12 सितंबर के होही। मुख्यमंत्री, लोकवाणी म ए बार ‘‘जिला स्तर पर विशेष रणनीति से विकास की नई राह‘‘ विषय उपर प्रदेशवासी मन ले गोठबात करही। लोकवाणी के प्रसारण छत्तीसगढ़ स्थित आकाशवाणी के सबो केन्द्र, एफ.एम. रेडियो अउ क्षेत्रीय समाचार चैनल मन म बिहनिया साढ़े 10 बजे ले 11 बजे तक होही।

कोचिंग-आवेदन

युवा कैरियर निर्माण योजना के अंतर्गत संघ अउ राज्य लोक सेवा आयोग डहार ले आयोजित सिविल सेवा परीक्षा के निःशुल्क कोचिंग बर अनुसूचित जाति, जनजाति अउ अन्य पिछड़ा वर्ग के उम्मीदवार मन ले 13 सितंबर तक आवेदन आमंत्रित करे गेहे।
उहें, आदिम जाति अउ अनुसूचित जाति विकास विभाग डहार ले विज्ञान अउ गणित के संग बारहवीं के कक्षा पास करइया विद्यार्थी मन बर घलो इंजीनियरिंग अउ मेडिकल प्रवेस परीक्षा के निःशुल्क तैयारी कराय जाही। इच्छुक उम्मीदवार मन ह 17 सितंबर तक आवेदन जमा कर सकथे।

मौसम

एक सुस्पष्ट निम्नदाब के क्षेत्र प्रदेस के दक्षिणी भाग ल स्थित हे। एखर असर ले राज्य के अधिकतर इलाका म बरसात होवत हे। राजधानी रायपुर म घलो बीते रात ले रूक-रूक के तेज बरसात होत हे।
मौसम विभाग के अनुसार अवइया 24 घंटा म प्रदेस के कुछु जगह मन म हल्का ले मध्यम बरसा होय के या गरज-चमक के संग छींटा पड़े के संभावना हे। उहें, राज्य के एक-दू जगह मन म गरज-चमक के संग आकाशीय बिजली गिरे के चेतावनी दे गेहे।