प्रधानमंत्री-शिक्षक पर्व
प्रधानमंत्री नरेन्द्र मोदी काली बिहनिया ग्यारह बजे शिक्षक पर्व के उद्घाटन सत्र ल वीडियो कान्फ्रेंसिंग के माध्यम ले संबोधित करही। ए मउका म प्रधानमंत्री, शिक्षा क्षेत्र म कई ठिन प्रमुख पहल के सुभारंभ घलो करही। श्री मोदी बधिर मन बर भारतीय संकेत भाषा शब्दकोष, दृष्टि बाधित मनखे मन बर श्रृव्य पुस्तक अउ सी.बी.एस.ई. के स्कूल क्वालिटी एश्योरेन्स अउ एसेसमेंट फ्रेम वर्क के घलो सुरूवात करही।
मुख्यमंत्री/तीजा-पोरा
तीजा-पोरा तिहार म मुख्यमंत्री भूपेश बघेल ह सब्बो महिला स्व-सहायता समूह मनके पुराना ऋण ल माफ करे के घोसना करे हे, जेखर ले ओमन फेर कर्ज लेके नवा आर्थिक गतिविध चालू कर सकय। ए घोसना ले समूह मनके करीबन बारह करोड़ सतत्तर लाख रूपिया के ऋण माफ करे गेहे। उहें, श्री बघेल ह महिला समूह मन ल हर बछर दे जाने वाला ऋण के बजट म घलो पांच गुना वृद्धि करे के ऐलान करे हे। मुख्यमंत्री के रईपुर स्थित निवास म आज तीजा-पोरा तिहार कारीकरम के दउरान राज्यसभा सांसद फूलोदेवी नेताम ह मुख्यमंत्री ले आग्रह करीन कि ओमन महिला स्व-सहायता समूह डहार ले पहिली के लेहे गे ऋण मन ल माफ करय, जेला मुख्यमंत्री ह उंखर आग्रह मानत ऋण माफी के घोसना करीन।
एखर पहिली, मुख्यमंत्री निवास म आज तीजा-पोरा तिहार धूमधाम ले मनाय गीस। कारीकरम स्थल म भगवान शिव, नंदियां बैला अउ चुकिया-पोरा के पूजा-अर्चना करे गीस। मुख्यमंत्री के नेवता म पारंपरिक वेशभूषा म महिला मन उत्साह के संग भाग लीन। ए मउका म राऊत नाचा दल अउ छत्तीसगढ़ी लोक कलाकार के दल मन छत्तीसगढ़ी गीत-संगीत के मनोरंजक कारीकर राखीन। कारीकरम स्थल म छत्तीसगढ़ी रोटी-पिठा के बेवस्था करे गे रिहीस।
उहें, तीजा-पोरा तिहार म मुख्यमंत्री ह आज महिला अउ बाल विकास डहार ले संचालित पोषण रथ ल घलो हरा झंडा दिखाके रवाना करीन। ए रथ आने-आने जिला मन म घूम-घूम के पोषण के संदेस दीही। रथ म सुपोषण उपर केन्द्रित फिलिम मनके प्रदर्सन घलो करे जाही। कारीकरम म मुख्यमंत्री अउ महिला तथा बाल विकास मंत्री ह पोषण प्रतिज्ञा म हस्ताक्षर करके कुपोषण रहित छत्तीसगढ़ के निर्माण बर प्रतिबद्धता व्यक्त करीन।
धर्मांतरण मामला
राजधानी रईपुर म हालेच म धार्मिक समुदाय के प्रमुख ले थाना म मनखे मन डहार ले कथित रूप ले मारपीट करे के मामला म पुलिस ह दू झिन आरोपी मन ल गिरफ्तार करे हे।
एखर पहिली, ए मामला म थाना प्रभारी ल लाइन अटैच कर दे गे रिहीस अउ पुरानी बस्ती सीएसपी ल कारण बताओ नोटिस घलो जारी करे गे रिहीस।
तबादला
राज्य सरकार ह काली देर रात रईपुर अउ दुरूग जिला के वरिष्ठ पुलिस अधीक्षक समेत तीन झन पुलिस अधिकारी मनके नवा पदस्थापना के आदेस जारी कर देहे। दुरूग के एसएसपी प्रशांत अग्रवाल ल रईपुर के एसएसपी बनाय गेहे। उहें, रईपुर म पदस्थ अजय यादव ल डीआईजी के तौर म पुलिस मुख्यालय भेजे गेहे। उहें, एसएसपी प्रशांत अग्रवाल के जगह म दुरूग म बद्रीनारायण मीणा ल पदस्थ करे गेहे।
इही बीच, लोक निर्माण मंत्री ताम्रध्वज साहू ह बिलासपुर के प्रभारी कार्यपालन अभियंता के.आर. गंगेश्री ल निलंबित कर देहे। गंगेश्री के खिलाफ आर्थिक अनियमितता के सिकायत मिले रिहीस। निलंबन के दउरान उंखर मुख्यालय जगदलपुर राखे गेहे।
मन की बात
प्रधानमंत्री नरेन्द्र मोदी छब्बीस सितंबर के आकाशवाणी ले ‘‘मन की बात‘‘ कारीकरम म देस-बिदेस के लोगन मन ले विचार साझा करही। प्रधानमंत्री ह ए कारीकरम बर लोगन मन ले विचार आमंत्रित करे हे, जेखर उपर चरचा करे जा सकय। मनखे मन नमो ऐप या माई जीओवी ओपन फोरम उपर विचार या सुझाव भेज सकत हे। ओमन टोल फ्री नंबर- एक आठ शून्य-शून्य एक-एक सात आठ शून्य-शून्य म फोन करके हिन्दी या अंग्रेजी म प्रधानमंत्री बर संदेस रिकार्ड घलो करवा सकत हे। एखर बर फोनलाइन चौबीस सितंबर तक खुल्ला रइही। एक नौ दो दो म मिस्ड कॉल देके एस.एम.एस. म प्राप्त लिंक ल फॉलो करके सीधा प्रधानमंत्री ह सुझाव घलो भेजे जा सकत हे।
गणेशोत्सव-दिशा-निर्देश
कोरोना संक्रमण ले बचाव ल देखत इहू बछर गणेश उत्सव परब के दउरान सार्वजनिक स्थान मन म गणेश प्रतिमा के स्थापना अउ विसर्जन बर जिला प्रसासन ले अनुमति लेना जरूरी होही।
इही कड़ी म रईपुर जिला प्रसासन डहार ले जारी दिसा-निरदेस अनुसार ए दरी पंडाल मन म चार फीट के बजाय अधिकतम आठ फीट के मूर्ति स्थापित करे जा सकही। लेकिन पीओपी ले बने मूर्ति मनके बिक्री अउ स्थापना उपर पूरी-पूरा रोक रइही। बतादन कि मूर्तिकार मन ल राहत देके उद्देश्य ले जिला प्रसासन ह मूर्ति के आकार म बदलाव करे हे। उहें, गणेश उत्सव के दउरान धुमाल बजाय बर घलो अनुमति दे गेहे। लेकिन, पंडाल स्थलेच म धुमाल बजाय जा सकही। मूर्ति स्थापना अउ विसर्जन के दउरान धुमाल बजाय के अनुमति नइ होही। एखर अलावा सार्वजनिक पंडाल मन म आयोजक मन बर पहिली जइसे कोरोना प्रोटोकॉल के पालन करना अनिवार्य होही।
कोविड टीका
छत्तीसगढ़ म टीकाकरण अभियान के तहत कोरोना ले बचाव बर अब तक करीबन एक करोड़ पचास लाख पच्चीस हजार टीका लगाय जा चुके हे।
इही बीच, प्रदेस म कोरोना संक्रमण के दर म सरलग कमी होवत हे अउ औसत पॉजिटीविटी दर शून्य दशमलव एक-दो प्रतिशत म आ गेहे। प्रदेस म काली जिहां कोरोना संक्रमण के चौबीस ठन नवा मामला आगू आईस, उहें, सत्रह जिला म एको ठिन नवा मरीज नइ मिलीस।
दुर्ग-नशीली दवा
दुरूग पुलिस ‘‘जियो खुलकर अभियान‘‘ के तहत नसीला दवा मनके तस्करी करइया एक ठिन गिरोह के पर्दाफाश करे म सफलता हासिल करे हे। ए मामला म पुलिस ह करीबन बीस लाख रूपिया कीमत के प्रतिबंधित नसीला दवा जब्त करे हे। एमा टेबलेट अउ सिरप सामिल हवय। ए दवा मन ल धमतरी ले दुरूग जिला म लाय जात रिहीस। ए दवा मन ल आरोपी मन सहर म मोटर साइकिल ले फेरी लगाके बेचय। ए मामला म तीन आरोपी मन ल गिरफ्तार करे गेहे अउ मुख्य आरोपी के तलास जारी हे।
अमृत महोत्सव-क्विज
आजादी के अमृत महोत्सव म आकाशवाणी समाचार स्वाधीनता संग्राम अउ ओखर गौरवसाली इतिहास उपर बिसेस अमृत महोत्सव क्विज आयोजित करत हे। ‘‘अमृत महोत्सव क्विज आकाशवाणी समाचार के संग‘‘ के आज के प्रश्न हवय- ‘‘महात्मा गांधी ह असहयोग आंदोलन के सुरूवात कब करे रिहीन।
श्रोता अपन उत्तर वाट्सऐप नंबर आठ-आठ दू छह पांच चार छह दू छह दू म या ई-मेल अमृत महोत्सव क्विज एट द रेट जी-मेल डॉट कॉम म भेजय। एक भाग्यशाली प्रतिभाली ल विजेता के रूप म चुने जाही। अउ काली के समाचार प्रभात म विजेता के नाम के घोसना करे जाही। विजेता ल ई-प्रमाण पत्र अउ एक ठिन सांकेतिक पुरस्कार दे जाही।
फिट इंडिया फ्रीडम रन
आजादी के अमृत महोत्सव के तहत काली सूरजपुर म फिट इंडिया फ्रीडम रन के आयोजन करे जाही। कारीकरम म मुख्य अतिथि के रूप म केन्द्रीय मंत्री रेणुका सिंह सामिल होही। ओमन काली बिहनिया कलेक्टोरेट परिसर म ए दउड़ ल हरा झंडा दिखाके रवाना करही। ए दउड़ के उद्देश्य लोगन मन ल स्वस्थ सरीर बर योग अउ सारीरिक गतिविधि मनके प्रचार करना हरय। ए दउरान सांस्कृतिक कारीकरम घलो राखे जाही।
पोला पर्व
छत्तीसगढ़ के लोकपर्व पोला आज प्रदेसभर म पारंपरिक तरीका ले उछाह के संग मनाय जात हे। ए मउका म किसान मन अच्छा फलस के कामना के संगेसंग अपन बैला मन ल सुंदर सजाके ओमन के पूजा-अर्चना करीन। संगेसंग ओमन ल ठेठरी-खुरर्मी, चीला जइसे छत्तीसगढ़ी रोटी-पिठा के भोग घलो लगाईन।
पोला तिहार, कृषि संस्कृति म पशुधन के महत्व ल दर्साने वाला पर्व हरय। आज रईपुर समेत प्रदेस के ग्रामीण क्षेत्र मन म ए तिहार धूमधाम ले मनाय जाथे। लइका मन मिट्टी के बैला अउ दूसर खिलौना मनके आनंद लेवत हे।
मौसम
अवइया चौबीस घंटा के दउरान प्रदेस म एक-दू जगह म भारी बरसा होय के संभावना हे। उहें, राज्य के अधिकांश जगह म हल्का ले मध्यम बरसा होय के या गरज चमक के संग छींटा पड़े के घलो आसार हे।
मौसम विभाग के अनुसार उत्तर-पश्चिम बंगाल के खाड़ी म बने निम्नदाब के क्षेत्र अउ एक मानसून द्रोणिका के असर के कारण आज राज्य के कतकोन स्थान मन म गरज-चमक के संग तेज बरसा होय के समाचार मिले हे। राजधानी रईपुर म घलो दोपहर बाद तेज बरसात होईस।