शिक्षक दिवस
आज शिक्षक दिवस हे। ये दिन पूर्व राष्ट्रपति अउ महान शिक्षाविद् डॅाक्टर सर्वपल्ली राधाकृष्णन के जयंती म मनाये जाथे। ए मउका म छत्तीसगढ़ समेत देशभर म कतकोन कार्यक्रम करे जात हे। नई दिल्ली म शिक्षक दिवस कार्यक्रम म राखे गे वचुअर्ल समारोह म राष्ट्रपति रामनाथ कोविंद शामिल होइन। ओमन कीहिन कि शिक्षा प्रणाली के जरिया ले लईका मन म देशप्रेम के भावना अउ जादा बाढ़ही।
ए मउका म राष्ट्रपति ह देश के चौवांलिस बढ़िया काम करइया शिक्षक मन ल वर्चुअल माध्यम ले राष्ट्रीय पुरस्कार ले सम्मानित करीन। श्री कोविंद ह छत्तीसगढ़ के बस्तर जिला के एकलव्य आदर्श आवासीय विद्यालय करपावंड के शिक्षक डॅाक्टर प्रमोद कुमार शुक्ला ल घलो सम्मानित करीन।
एति छत्तीसगढ़ म घलो राजभवन म राखे गे राज्य स्तरीय शिक्षक सम्मान समारोह म राज्यपाल अउ मुख्यमंत्री ह अंठावन शिक्षक मन ल सम्मानित करीन।
एमा ले चौवन झिन ल राज्य शिक्षक सम्मान अउ चार झिन शिक्षक ल प्रदेश के बड़का साहित्यकार मनके नांव म स्मृति पुरस्कार ले सम्मानित करे गीस। राज्य शिक्षक पुरस्कार बर इक्कीस हजार रूपिया त उंहें स्मृति पुरस्कार बर पचास हजार रूपिया के संग प्रशस्ति पत्र घलो दे गीस।
ए मउका म राज्यपाल ह कीहिन कि देश अउ प्रदेश के प्रगति म शिक्षक मनके महत्वपूर्ण योगदान रहिथे। उंहें मुख्यमंत्री ह कीहिन कि राष्ट्र निर्माण म शिक्षक के महत्वपूर्ण योगदान रहिथे। कोरोना काल म शिक्षक मनके महत्ता अउ बाढ़ गीस हे। स्कूल शिक्षा मंत्री ह कीहिन कि कोरोना काल म प्रदेश के लईका मनके शिक्षा बर करे गे नवाचार के तहत पढ़ई तुंहर दुआर अउ मोहल्ला क्लास शामिल हे। जेखर सराहना जम्मों देश म करे गीस।
मुख्यमंत्री-शिक्षा मड़ई
मुख्यमंत्री भूपेश बघेल ह शिक्षक दिवस के मउका म आज रायपुर के आर.डी. तिवारी स्वामी आत्मानंद सरकारी अंग्रेजी स्कूल के नवा स्वरूप के लोकार्पण करीन। ए मउका म ओमन ह आत्मानंद के नाव ले संचालित अंग्रेजी माध्यम स्कूल के जइसे अब हर जिला म एक-एक हिंदी माध्यम स्कूल खोले के घोषणा करीन।
ओमन कीहिन कि छत्तीसगढ़ के महापुरूष के नाव ले संचालित होवइया स्कूल, राज्य के पहिचान हे। ये स्कूल मनके विकास बहुउद्देशीय शाला के रूप म करे जाही।
मुख्यमंत्री ह आर.डी. तिवारी अंग्रेजी माध्यम स्कूल के खेल मैदान बर दू करोड़ रूपिया मंजूर करीन। ओमन ह कोरोना काल म लईका मन ल शिक्षा ले जोड़े राखे बर नवा प्रयोग करइया बीस झिन शिक्षक मन ल सम्मानित करीन।
इही बीच मुख्यमंत्री ह स्कूल म राखे गे शिक्षा मड़ई प्रदर्शनी म नवाचारी शिक्षक मनके प्रदर्शित काम के अवलोकन घलो करीन। मुख्यमंत्री ह विद्यार्थी अउ शिक्षक मनले पढ़ई लिखई अउ स्कूल म विकसित करे गे सुविधा के जानकारी लीन। ओमन कीहिन कि कोरोना काल म लईका मनके पढ़ई ह झन रूकय, एखर बर शिक्षक मन डहार ले करे गे कतकोन प्रयास ल राष्ट्रीय अउ अंतर्राष्ट्रीय स्तर म संहराय गीस।
राज्यपाल-डाक विभाग
राज्यपाल अनुसूइया उइके ह आज राजभवन म राखे गे एक समारोह म छत्तीसगढ़ के तीन जी.आई. टैग्ड उत्पाद, बस्तर के आयरन क्राफ्ट, वूडेन क्राफ्ट अउ जीराफूल चांउर उपर भारतीय डाक विभाग डहार ले करे जावत विशेष आवरण के विमोचन करीन।
ए मउका म राज्यपाल ह डाक विभाग ल बधाई देत कीहिन कि छत्तीसगढ़ के माटी ल जम्मों देश म एक आने चिन्हारी मिलही। ओमन ह कीहिन कि केंद्र सरकार के आत्मनिर्भर भारत अभियान के जइसे डाक विभाग ह प्रदेश के तीन जी.आई. टैग्ड धरोहर उपर विशेष आवरण जारी करके सराहनीय काम करे हे। ओमन कीहिन कि छत्तीसगढ़ डाक अवइया बेरा म घलो राज्य के भौगोलिक, ऐतिहासिक, सांस्कृतिक गौरव अउ धरोहर के देश-विदेश म अइसने प्रचार-प्रसार म योगदान देत रीही।
शासकीय कर्मचारी महंगाई भत्ता
मुख्यमंत्री भूपेश बघेल ह राज्य के सरकारी कर्मचारी अउ पेंशनधारी मनके महंगाई भत्ता म पांच प्रतिशत बढ़ाय के घोषणा करीन हे। ये महंगाई भत्ता ल पाछू एक जुलाई ले दे जाही।
अब सरकारी कर्मचारी मनके महंगाई भत्ता 12 ले बढ़ाके 17 प्रतिशत हो जाही। मुख्यमंत्री के ये घोषणा ले राज्य के लगभग 4 लाख सरकारी कर्मचारी अउ एक लाख 25 हजार पेंशनधारी मन ल लाभ मिलही। एखर ले राज्य सरकार उपर एक हजार 20 करोड़ रूपिया के उपराहा भार पड़ही।
श्री बघेल ह काली रायपुर स्थित अपन निवास कार्यालय म छत्तीसगढ़ कर्मचारी-अधिकारी फेडरेशन के प्रतिनिधि मंडल ले गोठबात के बाद ए घोषणा करीन। मुख्यमंत्री ह कीहिन कि अधिकारी कर्मचारी मनके बाकी मांग के परीक्षण कराय बर प्रमुख सचिव स्तर के अधिकारी के अध्यक्षता म कमेटी बनाये जाही।
कोविड टीका
छत्तीसगढ़ म टीकाकरण अभियान म कोरोना ले बचाव बर अब तक एक करोड़ उनचास लाख इकहत्तर हजार ले जादा टीका लगाये गीस हे।
इही बीच प्रदेश म कोरोना संक्रमण के दर म सरलग कमी देखे जावत हे अउ औसत पॉजीटिव दर शून्य दशमलव एक छै प्रतिशत म आगे हे। प्रदेश म काली जिहां कोरोना के छियांलिस नवा मामला आगू आय रीहिस हे, त उंहें ग्यारा जिला म एको नवा मरीज नइ मिलीस।
नंदकुमार बघेल-एफआईआर
मुख्यमंत्री भूपेश बघेल के पिता नंदकुमार बघेल के खिलाफ सर्व बा्रम्हण समाज के सिकइत म रायपुर के डीडी नगर थाना म मामला दर्ज करे गीस हे। उंखर खिलाफ समुदाय के बीच सामाजिक तनाव बढ़इया बयान देके सेती मुकदमा दर्ज करे गेहे।
एखर पहिली मुख्यमंत्री ह कीहिन ओमन ल जानकारी मिले हे कि उंखर पिता के बयाल ले एक वर्ग विशेष के भावना ल ठेस पहुंचे हे । उंखर ए बयान ले ओमन ल घलो दुख पहुंचे हे। श्री बघेल ह कीहिन कि एखर बारे म पुलिस डहार ले नियमानुसार कार्रवाई सुनिश्चित करे जाही।
सक्ती नया जिला
जांजगीर-चांपा जिला ले अलग होके बने नवा जिला सक्ती के प्रशासनिक क्षेत्र के प्रस्ताव तियार होगे हे। ए प्रस्ताव ल जिला प्रशासन डहार ले राज्य सरकार ल भेजे जावत हे। प्रस्ताव के अनुसार नवा जिला म सक्ती, मालखरौदा, जैजैपुर, डभरा अउ नवा बाराद्वार पांच ठिन तहसील अउ चंद्रपुर, हसौद, भोथिया उप तहसील होही।
उंहें, सक्ती, जैजैपुर, मालखरौदा अउ डभरा विकासखंड होही। जिला म दू उपखंड – सक्ती अउ डभरा होही। नवा जिला म अठारा राजस्व निरीक्षक मंडल, एक सौ तिरपन पटवारी हल्का अउ चार सौ पैंसठ गांव शामिल होही। जिला म तीन सौ उन्नीस ग्राम पंचायत अउ छै ठिन नगरीय निकाय शामिल होही।
दुर्घटना
सूरजपुर जिला के भटगांव क्षेत्र म एसईसीएल कोयला खदान म काम करइया कर्मचारी मन ल लेके जावत एक बस ह फुलझर नदिया उपर बने पुलिया ले खाल्हे गिर गीस। ए हादसा म एक कर्मचारी के मउत होगे, उंहें करीबन चालीस आने कर्मचारी मन घायल होगिन। सबो घायल मन ल भटगांव के अस्पताल म भर्ती कराय गेहे। घायल मन म पांच झिन कर्मचारी मनके हालत गंभीर बताय गेहे।
ओति जांजगीर-चांपा जिला के गांव मेंहदी म तेज रप्तार चार पहिया गाड़ी के अंते-तंते होके पलटे ले एक मनखे के मउत अउ दू झिन आने लोगन ह घायल होगिन। घायल मन ल प्राथमिक उपचार के बाद बिलासपुर भेज दे गेहे।