शिक्षक-सम्मान
राष्ट्रपति रामनाथ कोविंद ह सिक्षक दिवस के मउका म काली 05 सितंबर के सिक्षा के क्षेत्र म बढ़िया सेवा देवइया 44 गुरूजी मन ल वर्चुअल रूप ले आयोजित समारोह म राष्ट्रीय सिक्षक पुरस्कार ले सम्मानित करही। पुरस्कार पवइया सिक्षक मन म छत्तीसगढ़ के बस्तर जिला के करपावंड एकलव्य आदर्श आवासीय विद्यालय के सिक्षक प्रमोद कुमार शुक्ला ह घलो सामिल हवय। श्री शुक्ला नवा रईपुर स्थित मंत्रालय म वर्चुअल माध्यम ले अपन राष्ट्रीय सिक्षक पुरस्कार प्राप्त करही।
उहें, काली राजभवन म राज्य स्तरीय सिक्षक सम्मान समारोह आयोजित करे जाही। राज्यपाल अनुसुईया उइके, समारोह म प्रदेस के 58 झिन सिक्षक मन ल सम्मानित करही। एमा ले 54 झिन सिक्षक मन ल राज्य सिक्षक सम्मान अउ 4 झिन सिक्षक मन ल प्रदेस के महान साहित्यकार मनके नाव म स्मृति पुरस्कार ले सम्मानित करे जाही। समारोह म राज्य सिक्षक पुरस्कार बर चुने गे सिक्षक मन ल 21-21 हजार रूपिया अउ प्रसस्ति पत्र दे जाही। संगेसंग प्रदेस के महान विभूति मनके सुरता म दे जाने वाला पुरस्कार ले सम्मानित होवइया सिक्षक मन ल 50-50 हजार रूपिया के संग प्रसस्ति पत्र दे जाही।
समारोह के अध्यक्षता मुख्यमंत्री भूपेश बघेल करही। उहें, विशिष्ट अतिथि स्कूल सिक्षा मंत्री डॉक्टर प्रेमसाय सिंह टेकाम होही।
राज्यपाल अनसुईया उइके, मुख्यमंत्री भूपेश बघेल अउ स्कूल सिक्षा मंत्री डॉक्टर प्रेमसाय सिंह टेकाम ह सिक्षक दिवस के मउका म जम्मों गुरूजन अउ प्रदेसवासी मन ल अपन बधाई अउ सुभकामना दीन हवय।
कोविड टीका
छत्तीसगढ़ म टीकाकरण अभियान म कोविड ले बचाव बर अब तक 1 करोड़ 48 लाख 36 हजार ले जादा टीका लगाय जा चुके हे।
इही बीच, प्रदेस म कोरोना संक्रमण के दर म लगातार कमी आवत हे अउ एखर औसत पॉजीटिविटी दर घटके शून्य दशमलव एक-चार प्रतिशत म आ गे हवय। प्रदेस म काली कोरोना संक्रमण के जिहां 37 ठिन नवा मामला आगू आय हे। उहें, 17 ठिन जिला मन म एको नवा मरीज नइ मिले हे।
हाईकोर्ट-रोक
छत्तीसगढ़ उच्च न्यायालय ह राज्य सासन के सात झिन प्रमुख अधिकारी मनके नवा सिरा ले डी.पी.सी. कराय जाय के आदेस म रोक लगा दीन हे, जेमा अवइया आदेस तक ओमन ल प्रमोसन नइ दे जा सकहीं।
जानबा के मुताबिक बछर 2003 म आयोजित पी.एस.सी. परीक्षा म चुने गे 7 झिन उप जिला कलेक्टर मन ल पाछु बछर प्रमोसन दे गे रिहीस। ए अधिकारी मनके प्रमोसन ल केन्द्रीय प्रसासनिक अधिकरण-कैट ह चुनौती देवत हाईकोर्ट म याचिका दायर करे रिहीस। कैट ह ए मामला म सुनवाई करत राज्य लोक सेवा आयोग ल फेर ए पद मन खातिर डी.पी.सी. कराय के आदेस दे रिहीन।
अमृत महोत्सव-फ्रीडम रन
आजादी के अमृत महोत्सव के तहत ए बेरा प्रदेस म कतकोन कारीकरम आयोजित करे जावत हे। इही कड़ी म आज दुरूग, जांजगीर-चांपा, धमतरी अउ दंतेवाड़ा जिला म ‘‘फिट इंडिया फ्रीडम रन‘‘ के आयोजन करे गीस।
दुरूग जिला म आजादी के अमृत महोत्सव ‘‘फिटनेस की डोज-आधा घंटा रोज‘‘ कारीकरम म भिलाई के सेंट थॉमस महाविद्यालय म आज साइकिलिंग प्रतियोगिता के आयोजन करे गीस, जउन म प्रोफेसर अउ करमचारी मन भाग लीन।
उहें, जांजगीर-चांपा जिला ‘‘फिट इंडिया फ्रीडम रन‘‘ कारीकरम म युवा मन बढ़-चढ़के भाग लेके देशभक्ति के जज्बा दिखईन। ए आयोजन नेहरू युवा केन्द्र संगठन अउ जिला राष्ट्रीय सेवा योजना के संयुक्त तत्वाधान म आयोजित करे गीस।
ऐति, धमतरी जिला म घलो ‘‘फिट इंडिया फ्रीडम रन‘‘ के तहत कोरोना जागरूकता रैली अउ दउड़ के आयोजन करे गीस। एमा प्रसासनिक अधिकारी मनके अलावा, जिला खेल अधिकारी, लायंस क्लब अउ रोटरी क्लब के पदाधिकारी मनके संगेसंग पढ़ईया लइका मन घलो हिस्सा लीन। उहें, जिला के रूद्री स्कूल म अमृत महोत्सव के तहत कोरोना जागरूकता रैली अउ दउड़ के आयोजन करे गीस। एमा करीबन 125 छात्र-छात्रा मन सामिल होईन।
ओति, दंतेवाड़ा जिला म आयोजित ‘‘फिट इंडिया फ्रीडम रन‘‘ म नेहरू युवा केन्द्र के स्वयंसेवक, राष्ट्रीय सेवा योजना के कार्यकर्ता अउ राष्ट्रीय कैडेट कोर के करीबन 150 युवा अउ लइका मन हिस्सा लीन। ए दउड़ दंतेश्वरी मंदिर ले सुरू होके अंबेडकर पार्क म खतम होईस, जिहां प्रतिभागी मन ल स्वस्थ्य रेहे के सपथ दिलाय गीस।
केन्द्रीय विवि-रिक्त पद
केन्द्रीय शिक्षा मंत्री धर्मेन्द्र प्रधान ह केन्द्रीय विश्वविद्यालय मन म 6 हजार खाली पद मन ल ए बछर अक्टूबर माह तक भरे जाय खातिर तेजी ले कार्य करे बर किहीन हे। श्री प्रधान ह काली वीडियो कांफ्रेंसिंग के माध्यम ले केन्द्रीय विश्वविद्यालय मनके कुलपति मनके संग बैठक करीन। ओमन विश्वविद्यालय मन ले भारतीय भाखा मन ल सीखे बर प्रोत्साहित करे के संगेसंग एखर सांस्कृतिक विरासत के प्रचार अउ संवर्धन करे के अपील करीन।
महासमुंद-खेल गतिविधि
महासमुंद म खेल विभाग, जिला खेल संघ अउ जिला प्रसासन डहार ले लोगन मन ल उंखर स्वास्थ्य के प्रति जागरूक करे खातिर अउ रोग-प्रतिरोधक क्षमता ल मजबूत करे के उद्देश्य ले आज आने-आने खेल गतिविधि आयोजित करे गीस। स्थानीय मिनी स्टेडियम म आयोजित ए कारीकरम म योग, जुंबा, कराटे, बास्केटबॉल, वालीबॉल अउ क्रिकेट जइसन खेल म कतकोन लइका अउ स्थानीय लोगन मन ह बढ़-चढ़के हिस्सा लीन।
विशेष साक्षात्कार
आजादी के अमृत महोत्सव के तहत प्रादेशिक समाचार एकांश, आकाशवाणी, रायपुर डहार ले छत्तीसगढ़ म स्वतंत्रता संग्राम ले जुड़े घटना अउ इहां के स्वतंत्रता सेनानी मन ले जुड़े विशेष कारीकरम मनके श्रृंखला प्रसारित करे जावत हे। एही श्रृंखला के पांचवां कड़ी म स्वतंत्रता संग्राम के दउरान 1857 ले 1920 के कालखंड के दउरान छत्तीसगढ़ म आने-आने आंदोलन अउ स्वतंत्रता सेनानी मनके बारे म आकाशवाणी समाचार ह वरिष्ठ इतिहासकार आचार्य रमेन्द्रनाथ मिश्र ले गोठबात करीन। ए बिसेस वार्ता के दूसर अंक के प्रसारण आकाशवाणी केन्द्र, रईपुर डहार ले काली इतवार 05 सितंबर के बिहनिया साढ़े नौ बजे ले करे जाही। एला छत्तीसगढ़ स्थित आकाशवाणी के जम्मों केन्द्र एके संघरा रिले करही।
अमृत महोत्सव-क्विज विजेता
आजादी के अमृत महोत्सव म प्रादेशिक समाचार एकांश, आकाशवाणी, रईपुर डहार ले राखे गे ‘‘प्रश्नोत्तरी प्रतियोगिता म हमर श्रोता मन ह बड़ उछाह के संग भाग लेवत हे। काली ए प्रश्नोत्तरी के पांचवां अंक म छत्तीसगढ़ी बुलेटिन म प्रश्न रिहीस- ‘‘छत्तीसगढ़ अंचल म महात्मा गांधी ह पहिली घांव कोन बछर म पधारे रिहीन।‘‘ एखर सही जवाब हे- बछर 1920। सवाल के जवाब म बड़ संख्या म सुनइया मन ह अपन जवाब भेजीन। फेर, सबले पहिली जवाब भेजइया संयुक्त रूप ले विजेता हवय – बिलासपुर जिला के ग्राम- घुटकू निवासी नकुल सिंह लोनिया अउ कोरबा जिला के ग्राम- जोरहा डबरी निवासी ईश्वरी लाल पटेल। आकाशवाणी परिवार डहार ले श्री लोनिया अउ श्री पटेल ल हमन हार्दिक बधाई अउ सुभाकामना देवत हन।
नकुल सिंह लोनिया आकाशवाणी समाचार के 14-15 बछर ले नियमित श्रोता हरय अउ ओमन किहीन कि –
उहें, ईश्वरी लाल पटेल ह किहीन कि समाचार के माध्यम ले चलत आजादी के अमृत महोत्सव के तहत प्रश्नोत्तरी कारीकरम ले हमन ल जुन्ना अउ बड़ अकन बने ज्ञान मिलत हवय।
अउ अब सुनथन मौसम के हाल..
प्रदेस म मानसून के गतिविधि एक घांव फेर तेज होवत हे। मौसम विभाग के मुताबिक अवइया 24 घंटा के दउरान मुख्य रूप ले बस्तर संभाग अउ उंखर ले लगे जिला मन म एक-दू स्थान मन म भारी ले अति भारी बारिस होय के संभावना हवय। उहें, प्रदेस के ज्यादातर स्थान मन म हल्का ले मध्यम बरसा होय के संग गरज-चमक अउ छींटा पड़ सकत हे। अभी के बेरा म एक चक्रीय चक्रवाती घेरा दक्षिण छत्तीसगढ़ अउ उंखर तीर-तखार के क्षेत्र मन म स्थित हवय। एखर असर ले काली प्रदेस म बढ़िया बारिस होय के आसार बने हुए हे।