प्रधानमंत्री-योग
प्रधानमंत्री नरेन्द्र मोदी ह किहीन कि भारत के योग ज्ञान, इहां के स्थायी जीवन शैली अउ आयुर्वेद जइसन विज्ञान विश्वभर म फैले हुए हे। काली संझा श्रील भक्तिवेदांत स्वामी प्रभुपाद के एक सौ पच्चीसवां जयंती म वीडियो कान्फ्रेंस के माध्यम ले एक सौ पच्चीस रूपिया के एक स्मारक सिक्का जारी करत हुए प्रधानमंत्री ह किहीन कि स्वामी प्रभुपाद ह न केवल भगवान कृष्ण, बल्कि देश के महान भक्त घलो रिहीन।
अमृत महोत्सव-योग ब्रेक मोबाइल ऐप
स्वतंत्रता के पचहत्तरवां वर्षगांठ मनाय बर ‘आजादी के अमृत महोत्सव‘ म केन्द्रीय आयुष मंत्री सर्बानंद सोनोवाल ह काली संझा नई दिल्ली म योग-ब्रेक मोबाइल ऐप के सुरूवात करीन। पांच मिनट के ए योग-ब्रेक प्रोटोकाल म जरूरी योगासन सामिल करे गेहे, जउन कार्यक्षेत्र म तनाव ले मुक्ति, ताजगी महसूस करे अउ काम म फेर ध्यान केन्द्रित करे म मदद करही।
फिट इंडिया क्विज
केन्द्रीय शिक्षा मंत्री धर्मेन्द्र प्रधान अउ केन्द्रीय खेल मंत्री अनुराग ठाकुर ह काली देस के सबले बड़े क्विज प्रतियोगिता फिट इंडिया क्विज के सुरूवात करीन। फिटनेस अउ खेल उपर आधारित ए अपन तरह के पहिली राष्ट्रव्यापी क्विज प्रतियोगिता हरय। एखर उद्देश्य छात्र मन ल सारिरिक अउ मानसिक रूप ले फिट बनाना हे। श्री ठाकुर ह किहीन कि ए पहल ले स्कूल के छात्र मन ल अपन ज्ञान अउ फिटनेस देखाय के एक अच्छा मंच मिलही। ओमन ह किहीन कि फिट इंडिया क्विज बर पंजीकरण के प्रक्रिया तीस सितंबर तक जारी रइही। ए क्विज प्रतियोगिता के इनाम रासि तीन करोड़ पच्चीस लाख रूपिया हवय।
मुख्यमंत्री-घोषणा
मुख्यमंत्री भूपेश बघेल ह गौरेला-पेण्ड्रा-मरवाही जिला म बंद आश्रम छात्रावास ल खोले के घोसना करीन, जेखर उपर अमल घलो सुरू होगे हे। ए घोसना ले जिला के सुदूर अंचल म रहवइया गांव के छात्र-छात्रा मन ल जल्द ही अपन स्कूल म पढ़ाई करे के अवसर मिल सकही।
जिला के प्रवास के दउरान मुख्यमंत्री ग्राम पंचायत ठाड़पथरा के गांव राजमेरगढ़ पहुंचीन अउ ग्रामीण मन ले चरचा करीन। मुख्यमंत्री ह ए अवसर म किहीन कि राजमेरगढ़ ल तपोवन के रूप म विकसित करे जाही। संगेसंग इहां योग केन्द्र अउ सुविधा घलो विकसित होही, ताकि राजमेरगढ़ ल पर्यटन केन्द्र के रूप म पहिचान मिल सकय। ओमन ह किहीन कि राजमेरगढ़ म विकास बर होवइया निर्माण काम म सीमेंट के उपयोग नइ करे जाही, बल्कि आदिवासी मनके जीवनसैली के अनुरूप लकड़ी, बांस अउ मिट्टी के उपयोग करे जाही। ए दउरान मुख्यमंत्री ह गांव के बैंड बाजा दल अउ रोका-छेका दल ल पुरस्कार घलो दीन।
प्राथमिक/सामुदायिक स्वास्थ्य केन्द्र
केन्द्रीय स्वास्थ्य मंत्रालय ह प्रदेस के एक सामुदायिक स्वास्थ्य केन्द्र अउ चार प्राथमिक स्वास्थ्य केन्द्र ल राष्ट्रीय गुणवत्ता आश्वासन मानक प्रमाण पत्र प्रदान करीन। केन्द्र सरकार डहार ले अब तक प्रदेस के अट्ठाईस सरकारी अस्पताल मन ल ए प्रमाण पत्र प्रदान करे जा चुके हे। एमा चौदह प्राथमिक स्वास्थ्य केन्द्र, सात सामुदायिक स्वास्थ्य केन्द्र अउ सात जिला अस्पताल सामिल हे।
मुख्यमंत्री भूपेश बघेल अउ स्वास्थ्य मंत्री टी.एस. सिंहदेव ह ए उपलब्धि बर सबो अस्पताल के अधिकारी अउ करमचारी मन ल बधाई दीन हे।
पीबाईबी-वेबीनार
छत्तीसगढ़ यूनिसेफ के प्रमुख जॉब जकारिया ह किहीन कि कुपोषण भारत के सबले बड़े चुनौती हे। रईपुर के पत्र सूचना कार्यालय अउ रीजनल आउटरीच ब्यूरो के संयुक्त तत्वावधान म आज राष्ट्रीय पोषण माह बिसय म राखे गे वेबीनार म ओमन बतईन कि स्तनपान, उपरी आहार, माता के पोषण म सुधार, लइका मनके पूर्ण टीकाकरण अउ लइका मन ल होवइया बीमारी ले बचा के कुपोषण ल रोके जा सकत हे।
वेबीनार ल संबोधित करत डॉक्टर प्रतिभा वाजपेयी ह किहीन कि कुपोषण कोन कारण ले होथे, एखर जानकारी होना जरूरी हे। ओमन किहीन कि पर्याप्त संतुलित आहार ले कुपोषण ल रोके जा सकत हे।
कारीकरम म पत्र सूचना कार्यालय के अपर महानिदेसक अभिषेक दयाल ह बतईन कि सात सिंतबर तक पोषण वाटिका के रूप म पौधारोपण कारीकरम चलाय जाही। उहें, आठ ले पन्द्रह सितंबर तक पोषण बर योग अउ आयुष कारीकरम के आयोजन करे जाही। चौबीस ले तीस सितंबर तक एस.ए.एम के लइका के पहिचान अउ पौष्टिक भोजन के वितरण करे जाही।
ओबीस-सर्वेक्षण
प्रदेस के जनसंख्या म अन्य पिछड़ा वर्ग अउ आर्थिक रूप ले कमजोर वर्ग के सर्वेक्षण के काम काली एक सितंबर ले सुरू होगे हे। एखर बर छत्तीसगढ़ क्वांटीफायबल डाटा आयोग के मोबाइल ऐप म व्यक्ति खुद अपन जानकारी डाल के पंजीयन करा सकत हे। एखर अलावा च्वॉइस सेंटर म वेबपोर्टल डब्ल्यू.डब्ल्यू .डब्ल्यू डॉट सीजी क्यू.डी.सी. डॉट इन के माध्यम ले घलो गणना बर जानकारी दर्ज कराय जा सकत हे।
सर्वेक्षण के काम बारह अक्टूबर तक चलही। एखर बाद ग्राम पंचायतवार अउ वार्डवार सूची के प्रारंभिक प्रकासन तीस अक्टूबर तक करे जाही। प्रारंभिक प्रकासन बर सोलह नवंबर तक दावा-आपत्ति प्रस्तुत करे जा सकत हे।
न्याय योजना-पंजीयन
प्रदेस म अब ग्रामीण कृषि भूमिहीन मजदूर मन ल घलो न्याय योजना के लाभ मिलही। एखर बर भूमिहीन मजदूर अउ पौनी पसारी ले जुड़े परिवार के मुखिया के पंजीयन सबो जिला म सुरू होगे हे। पंजीयन बर ग्राम पंचायत मन म बेवस्था करे गेहे। मजदूर परिवार के मुखिया योजना के लाभ ले बर तीस नंवबर तक पंजीयन करा सकत हे। एखर बर परिवार के मुखिया ल आधार कार्ड अउ बैंक पासबुक के फोटोकॉपी के संग पंचायत म आवेदन देना होही। आवेदन पत्र म मोबाइल नंबर घलो उल्लेख करना होही।
जानबा के मुताबिक न्याय योजना म भूमिहीन कृषि मजदूर के अलावा, चरवाहा, बढ़ई, लोहार, मोची, नाई, धोबी पुरोहित अउ पौनी पसारी बेवस्था ले जुड़े परिवार के अलावा वनोपज संग्राहक परिवार लाभान्वित होही।
कोविड टीका
कोरोना वायरस ले बचाव बर छत्तीसगढ़ के स्वास्थ्य विभाग डहार ले प्रदेस के सब्बो सिक्षक, स्कूल करमचारी अउ उंखर परिवार के सदस्य जउन अट्ठारह बछर ले जादा के हे, ओमन ल पांच सितंबर तक टीका लगाय जाही।
उहें, प्रदेस म एक सितंबर तक एक करोड़ छियालीस लाख तेरह हजार ले जादा टीका लगाय जा चुके हे।
गणेशोत्सव-दिशा-निर्देश
कोरोना संक्रमण ले बचाव बर ए बछर घलो गणेश उत्सव तिहार के दउरान सार्वजनिक स्थल म गणेश प्रतिमा के स्थापना अउ विसर्जन बर जिला प्रसासन ले अनुमति लेना जरूरी होही।
जांजगीर-चांपा जिला कलेक्टर ह ए संबंध म दिसा-निरदेस जारी करे हे। ए साल भगवान गणेश के मूर्ति के ऊंचाई पांच फीट ले जादा नइ होही। उहें, मूर्ति स्थापना वाले पंडाल के आकार पन्द्रह बाई पन्द्रह फीट ले जादा नइ होही। संगेसंग पंडाल के सामने तीन हजार वर्गुफीट के खुल्ला जगह होना जरूरी हे। सार्वजनिक पंडाल म आयोजक मन बर कोरोना प्रोटोकॉल के पालन करना जरूरी होही। उहें, मूर्ति विसर्जन बर एक ले जादा गाड़ी अउ चार ले जादा व्यक्ति ल जाय के अनुमति नइ होही।
अमृत महोत्सव-क्विज
आजादी के अमृत महोत्सव म प्रादेशिक समाचार एकंाश, आकाशवाणी रायपुर कोति ले छै अगस्त ले एक प्रश्नोत्तरी कार्यक्रम शुरू करे गेहे। जेखर चलत एमा छत्तीसगढ़ म स्वतंत्रता संग्राम के बेरा होय घटना, राज्य के स्वतंत्रता सेनानी, अउ समाज सुधारक मनले जुड़े प्रश्न पूछे जात हे।
प्रश्नोत्तरी प्रतियोगिता के तहत काली तीन सितंबर के छत्तीसगढ़ी अउ हिंदी प्रादेशिक समाचार बुलेटिन म आने आने प्रश्न पूछे जाही अउ ये दूनो समाचार बुलेटिन म पूछे गे सवाल के आधार म सबले पहिली सही जवाब देवइया एक-एक विजेता मन ल चुने जाही।
पूरक परीक्षा-समय सारिणी
छत्तीसगढ़ माध्यमिक शिक्षा मंडल ह हायर सेकेंडरी अउ हायर सेकेंडरी व्यावसायिक पाठ्यक्रम पूरक परीक्षा के समय-सारिणी घोषित कर देहे। हायर सेकेंडरी के पूरक परीक्षा सत्रह ले तीस सितंबर तक अउ हायर सेकेंडरी व्यावसायिक पाठ्यक्रम के पूरक परीक्षा सत्रह ले उनतीस सितंबर तक आयोजित करे जाही। परीक्षा के समय बिहनिया साढ़े आठ बजे ले साढ़े ग्यारह बजे तक निर्धारित करे गेहे।
अउ अब थोरकुन समाचार सार म-
– स्कूल शिक्षा मंत्री डॉक्टर प्रेमसाय सिंह टेकाम ह सूरजपुर जिला के भटगांव थाना क्षेत्र म पुलिस सहायता केन्द्र के काली उद्घाटन करीन।
अउ
– बीजापुर जिला म माओवादी मन डहार ले करे गे बारूदी विस्फोट म सीआरपीएफ के एक जवान घायल होगे हे।