स्कूल संचालन
प्रदेश म काली ले छठवीं, सातवीं, नौवीं अउ ग्यारहवीं के ऑफलाइन कक्षा शुरू करे जाही। एखर पहिली पहिली ले पांचवीं, आठवीं, दसवीं अउ बारहवीं के कक्षा दू अगस्त ले चलत हे।
स्कूल शिक्षा विभाग के प्रमुख सचिव कमलप्रीत सिंह ह बताइन कि ऑफलाइन कक्षा शुरू करे बर ग्रामीण क्षेत्र म ग्राम पंचायत अउ स्कूल के पालक समिति के अनुशंसा लेना जरूरी होही। उंहें शहरी क्षेत्र म संबंधित वार्ड पार्षद अउ स्कूल के पालक समिति के अनुशंसा ले कक्षा संचालित करे जाही।
ये कक्षा उहीं जिला म लगाए जाही, जिहां कोरोना के पॉजीटिवीटी दर सात दिन तक एक प्रतिशत ले कम होही। ओमन कीहिन कि विद्यार्थी ल कक्षा म एक दिन के अंतर म बुलाये जाही, यानि रोज आधा संख्या म ही विद्यार्थी मन कक्षा म बइठ सकत हे। सबो विद्यार्थी अउ शिक्षक मन ल कोरोना नियम के पालन करना जरूरी होही।
पोषण माह-महिला और बाल विकास
केंद्रीय महिला अउ बाल विकास मंत्री स्मृति इरानी ह कीहिन कि पौष्टिक आहार कम कीमत म अउ जरूरतमंद लोगन मन ल स्थानीय स्तर म मिलना चाही। ओमन ह कीहिन कि प्रधानमंत्री मातृ वंदना योजना के तहत आठ हजार आठ सौ करोड़ रूपिया गर्भवती महिला अउ धात्री माइलोगिन मनके खाता म सोझे भेजे गेहे।
अखिल भारतीय आयुर्वेद संस्थान म पोषण माह शुरू होय म नई दिल्ली म एक समारोह म ओमन ह कहिन कि स्वस्थ रेहे के पुराना भारतीय परंपरा आज विश्व के जीवन शैली बन गेहे।
इही बीच प्रदेश के महिला अउ बाल विकास मंत्री अनिला भेंडिया ह गुजरात के नर्मदा जिला के केवड़िया म आयोजित राष्ट्रीय पोषण कार्यशाला म शामिल होइन। ए दउरान ओमन ह केंद्रीय मंत्री स्मृति इरानी ले प्रदेश के आंगनबाड़ी भवन बनाये बर राश उपलब्ध कराय अउ आने मुद्दा उपर गोठबात करीन।
ओति धमतरी जिला म राष्ट्रीय पोषण माह के तहत पोषण जागरूता रैली निकाले गीस। संगेसंग माह भर तक जिला म आने आने कार्यक्रम के आयोजन करे जाही।
भाजपा चिंतन शिविर
भारतीय जनता पार्टी के तीन दिवसीय चिंतन शिविर जगदलपुर म चलत हे। आज प्रदेश प्रभारी डी. पुरंदेश्वरी ए बइठका म शामिल होइन । ए बेरा म ओमन कीहिन कि भाजपा वनवासी समाज के हित के संग सबो समाज के लोगन के समग्रता बर काम करत हे। ओमन ह कीहिन कि भाजपा कार्यकर्ता पूरा निष्ठा अउ समर्पण ले संगठन ल मजबूत बनाय म लगे हे।
बइठका के दूसरइया दिन आज चिंतन शिविर म प्रदेश भाजपा सह प्रभारी नीतिन नबीन, प्रदेश अध्यक्ष विष्णुदेव साय, पूर्व मुख्यमंत्री डॅाक्टर रमन सिंह, केंद्रीय मंत्री रेणुका सिंह, नेता प्रतिपक्ष धरमलाल कौशिक के संग कोर ग्रुप के पदाधिकारी अउ वरिष्ठ नेता शामिल होइन।
ओबीसी मोबाइल ऐप शुभारंभ
प्रदेश म अन्य पिछड़ा वर्ग अउ आर्थिक रूप ले कमजोर वर्ग के गणना बर मुख्यमंत्री भूपेश बघेल ह आज रायपुर म छत्तीसगढ़ क्वांटीफायबल डाटा आयोग के मोबाइल एप अउ वेब पोर्टल लांच करीन। ओमन ह ए एप म खुद ले जुड़े जानकारी दर्ज करके सर्वे काम के शुभारंभ करीन। सीजीक्यूडीसी मोबाइल एप प्ले स्टोर ले डाउनलोड करे जा सकत हे। संगेसंग चॉईस सेंटर म वेब पोर्टल डब्लू.डब्लू.डब्लू. डॅाट सीजीक्यूडीसी डॅाट इन के माध्यम ले घलो गणना बर अपन जानकारी दर्ज कराये जा सकत हे।
ए बेरा म मुख्यमंत्री ह कीहिन हे कि सबो वर्ग बर हर तरह के अवसर के समानता देवाना राज्य सरकार के सबले बड़े प्राथमिकता हे। प्रदेश म अन्य पिछड़ा वर्ग के आरक्षण 14 प्रतिशत ले बढ़ाके 27 प्रतिशत करे गेहे। संगेसंग आर्थिक रूप ले कमजोर वर्ग के लोगन बर घलो दस प्रतिशत आरक्षण के प्रावधान करे गेहे।
ओमन ह अन्य पिछड़ा वर्ग अउ आर्थिक रूप ले कमजोर वर्ग के लोगन मनले गणना काम म सहयोग करे के अपील करीन हे।
भूमिहीन कृषि मजदूर न्याय योजना
प्रदेश म राजीव गांधी ग्रामीण भूमिहीन कृषि मजदूर न्याय योजना बर पंजीयन के प्रक्रिया आज ले शुरू होगे हे, जउन ह तीस नवंबर तक चलही। ए योजना के लाभ प्रदेश के करीबन दस लाख ले जादा भूमिहीन कृषि मजदूर परिवार ल मिलही।
एखर तहत हरएक मजदूर परिवार ल हर बछर छै हजार रूपिया अनुदान दे जाही। ए राशि उंखर बैंक खाता म सोझे जमा करे जाही। एखर बर हरएक परिवार ल कृषि मजदूर न्याय योजना के पोर्टल म अपन पंजीयन कराना जरूश्री होही।
मुख्यमंत्री भूपेश बघेल ह भूमिहीन कृषि मजदूर परिवार ले ए योजना के लाभ लेबर पंजीयन कराय के अपील करे हे।
कोविड टीका
देशभर म काली एक दिन म सबले जादा एक करोड़ तैंतीस लाख ले जादा कोविड रोधी टीका लगाये गीस। एक सप्ताह म ये दूसरइया बार हे जब एक करोड़ ले जादा टीका लगाये गीस। केंद्रीय स्वास्थ्य अउ परिवार कल्याण मंत्रालय ह बताइन कि देश म अब तक पैंसठ करोड़ इक्चालिस लाख ले जादा टीका लगाए गेहे।
एति छत्तीसगढ़ म कोरोना लेबचाव बर अब तक एक करोड़ चौंवालिस लाख उन्यासी हजार ले जादा टीका लगाए जा चुके हे।
इही बीच प्रदेश म कोरोना संक्रमण के दर म लगातार कमी आवत हे। अउ औसत पॉजीटिवीटी दर शून्य दशमलव एक शून्य प्रतिशत म आगे हे। काली प्रदेश म कोरोना संक्रमण के इकतीस नवा मामला आगू आय हे ।
मुख्य सचिव बैठक
मुख्य सचिव अमिताभ जैन ह रायपुर म वीडियो कॉन्फ्रेंस के माध्यम ले सबो संभाग आयुक्त अउ कलेक्टर मनके बइठका लीन अउ ओमन ल गिरदावरी काम के निगरानी करे बर कीहिन । ओमन ह अनियमित अउ खंड बरसा ले फसल के उत्पादन के प्रभावित होय के बारे म घलो जानकारी लेके फसल के नुकसान होय के स्थिति म सर्वे कराय के निर्देश अधिकारी मन ल दीन।
श्री जैन ह कलेक्टर मनले कीहिन कि वोमन गांव म जरूरतमंद लोगन ल रोजगार उपलब्ध कराय बर जरूरी कार्ययोजना तियार करें। संगेसंग मनरेगा, कैम्पा अउ आने योजना मनके माध्यम ले काम के उपलब्धता सुनिश्चित करंय। मुख्य सचिव कोरोना संक्रमण के रोकथाम बर प्रोटोकॅाल के कड़ाई ले पालन करे अउ स्थिति म नजर राखे के घलो निर्देश दीन।
मौसम
प्रदेश म पांच सितंबर के बाद जादा बरसा होय के संभावना हे। रायपुर स्थित मौसम विभाग ले मिले जानबा के मुताबिक एक द्रोणिका दक्षिण गुजरात ले दक्षिण तटीय आंध्रप्रदेश तक बने हे। एखर असर ले अवइया चौबीस घंटा के दउरान प्रदेश म कुछ जगा म हल्का ले मध्यम बरसा अउ गरज-चमक के संग छींटा पड़े के संभावना हे।
अउ अब थोरकुन समाचार सार म-
– दुर्ग के हेमचंद विश्वविद्यालय म स्नातक अउ स्नातकोत्तर के पहिली बछर म प्रवेश बर पोर्टल ल दुबारा खोले गेहे। एमा छात्र सात सितंबर तक अपन ऑनलाइन आवेदन प्रस्तुत कर सकत हे।
– यात्री मनके सुविधा ल देखत रेलवे प्रशासन ह दक्षिण पूर्व मध्य रेलवे ले होके चलइया ओखा-हावड़ा-ओखा साप्ताहिक पूजा स्पेशल अउ पोरबंदर-हावड़ा-पोरबंदर द्वि-साप्ताहिक स्पेशल ट्रेन के परिचालन म विस्तार करे हे।
– राजनांदगांव जिला म इंटरलॉकिंग काम के सेती चार दिन पहिली लोकल ट्रेन के परिचालन रोक दे गे रीहिस। जेला फेर ले शुरू कर दे गेहे।
– प्रदेश म सतरा आने वन मंडल के अंदर अवइया दू सौ पांच किलोमीटर लंबा सड़क के किनारे एक लाख संतावन हजार ले जादा पौधा लगाए जावत हे।
– शिक्षक दिवस के बेरा मरायपुर म पांच सितंबर के नवाचारी शिक्षक के काम उपर आधारित प्रदर्शनी शिक्षा मंड़ई के आयोजन करे जाही।
अउ
– दुर्ग जिला म बढ़त अपराध ल रोके खातिर किरायादार मनके थाना म पंजीयन करवाना जरूरी कर दे गेहे। पंजीयन करवाय बर पंद्रह दिन के समय दे गेहे।