वन नेशन-वन राशनकार्ड
प्रदेस के खाद्य मंत्री अमरजीत भगत ह राज्य के जम्मों रासन कार्डधारी परिवार के सदस्य मन ल आधार लिंकिंग बर अधिकारी मन ल बिसेस अभियान चलाय के निरदेस देहे। मंत्रालय म राखे गे खाद्य अधिकारी मनके बइठका म ओमन किहीन कि अवइया अगस्त महीना ले वन नेशन-वन राशनकार्ड योजना लागू करे जाही, एखर बर जम्मों लोगन मनके आधार लिंकिंग जरूरी हे। श्री भगत ह दस ले इकतीस जुलाई तक बिसेस अभियान चलाके आधार लिंकिंग के काम पूरा करे के निरदेस अधिकारी मन ल दीन।
बइठका म श्री भगत ह किहीन कि खाद्यान्न सामान बांटे म पारदर्सिता जरूरी हे। ओमन राज्य के हरेक रासन कार्डधारी मन ल सार्वजनिक वितरण प्रणाली के दुकान ले रासन लेके के सूचना उंखर रजिस्टर्ड मोबाइल नंबर के माध्यम ले देके निरदेस दीन। ए नवा सुविधा ले अब रासन कार्डधारी मन ल हरेक महीना रासन बिसाय के बाद उंखर मोबाइल नंबर म सूचना मिल जही।
मुख्यमंत्री-ई काॅन्क्लेव
मुख्यमंत्री भूपेश बघेल ह किहीन हे कि अवइया बेरा म छत्तीसगढ़ के हरेक गांव म एक ठिन इंडस्ट्रीयल पार्क होही। रईपुर म राखे गे ई-काॅन्क्लेव के समापन मउका म वीडियो कान्फ्रेंसिंग के माध्यम ले कारीकरम ल संबोधित करत ओमन किहीन कि गांव म गौठान बर आरक्षित करे गे जमीन मन ले एक एकड़ जमीन कुटीर अउ छोटे उद्योग मन बर छोड़े जाही, जिहां महिला स्व-सहायता समूह के सदस्य मन डहार ले लघु वनोपज ले जुड़े काम करे जाही। श्री बघेल ह किहीन कि राज्य सरकार के प्राथमिकता जादा ले जादा लोगन मन ल रोजगार ले जोड़ना हे।
सीएम-गोधन न्याय योजना
मुख्यमंत्री भूपेश बघेल ह किहीन हे कि गोधन न्याय योजना ले प्रदेस के ग्रामीण अर्थव्यवस्था म बदलाव आही। अपन निवास कार्यालय म सर्व-समाज के प्रतिनिधिमंडल ले भेंट के दउरान ओमन किहीन कि गोधन न्याय योजना म किसान अउ पशुपालक मन ले सरकार निर्धारित कीमत म गोबर बिसाही। एखर ले राज्य म गाय के संरक्षण अउ संवर्धन के संगेसंग खाद उत्पादन ल बढ़ावा मिलही। श्री बघेल ह किहीन कि छत्तीसगढ़ म नरवा, गरूवा, घुरवा अउ बाड़ी कारीकरम के तहत गांव म गौठान बनाय के काम करे जावत हे। अब तक करीबन बाईस सौ गौठान बनाय गेहे। उहें, करीबन तीन हजार गौठान बनाय के काम चलत हे।
इही बीच, छत्तीसगढ़ विधानसभा म नेता प्रतिपक्ष धरमलाल कौशिक ह प्रदेस सरकार उपर किसान मनके अनदेखा करे के आरोप लगाईन हे। एक ठिन विज्ञप्ति म ओमन किहन कि प्रदेस म करा गिरे के, कराय गे सर्वे म राज्य के कई ठिन जिला छूट गेहे, जेखर चलत किसान मन ल परेसानी के सामना करना पड़त हे। ओमन जिला प्रसासन ले छूटे जिला म फेर ले सर्वे कराय के मांग करे हे।
मुख्यमंत्री सुगम सड़क योजना
मुख्यमंत्री सुगम सड़क योजना के तहत प्रदेस के अइसन जघा जिहां कच्चा सड़क हवय उहां के सरकारी भवन मन ल पक्का सड़क के माध्यम ले मुख्य रद्दा ले जोड़े बर चार करोड़ रूपिया ले जादा के रासि जारी करे गेहे। एला मिलाके दू किस्त म एक सौ सड़सठ काम खातिर नौ करोड़ रूपिया ले जादा के मंजूरी दे गेहे।
खबर के मुताबिक ए योजना म प्रदेस के जम्मों सरकारी स्कूल, अस्पताल, काॅलेज, आंगनबाड़ी भवन, उचित मूल्य के दुकान अउ आने-आने सैक्षणिक संस्था मन ल जउन अभी मुख्य रद्दा ले पक्का सड़क के माध्यम ले नइ जुड़े रिहीस, ओमन ल जोड़े जाही।
विशेष ई-लोक अदालत
प्रदेस म काली ग्यारह जुलाई के राज्य स्तरीय ई-लोक अदालत के आयोजन करे जाही। कोरोना संक्रमण ल देखत ए ई-लोक अदालत म पक्षकार अउ अधिवक्ता न्यायालय म मनखे के मौजदूगी के बजाय वीडियो कान्फ्रेंसिंग के माध्यम ले पीठासीन अधिकारी के आगू अपन पक्ष रखही। रईपुर जिला न्यायालय म चैबीस खंडपीठ बनाय गेहे, जेमा करीबन नौ सौ प्रकरण के सुनवाई होही। उहें, बिलासपुर जिला न्यायालय म नौ खंडपीठ के माध्यम ले पांच सौ ले जादा मामला ल सुने जाही।
खबर के मुताबिक ई-लोक अदालत के माध्यम ले लंबित सिविल वाद, मोटर दुर्घटना दावा, पारिवारिक अउ आपराधिक मामला के संगेसंग जउन मामला म राजीनामा हो सकही, ओखर निपटारा करे जाही।
कोरोना-मरीज
दंतेवाड़ा जिला म आज नौ झिन नवा कोरोना संक्रमित मरीज के चिन्हारी होय हे। एमा केन्द्रीय रिजर्व पुलिस बल-सीआरपीएफ के आठ झिन जवान अउ एक झिन गांव वाले मनखे हरय। एखरे संग जिला म संक्रमित मरीज मनके आंकड़ा बाढ़ के इकचालीस होगे हे। एमा ले चैबीस झिन मरीज मन ल ठीक होय के बाद अस्पताल ले छुट्टी दे दे गेहे। उहें, सत्रह झिन मरीज के इलाज चलत हे।
ऐति, रायगढ़ जिला म आज छह झिन नवा कोरोना पाॅजिटिव मरीज मिले हे। एमा लैंलूगा ब्लाॅक ले तीन, बरमकेला, तमनार अउ धरमजयगढ़ ले एक-एक मरीज पाय गेहे।
उहें, प्रदेस म पाछु रतिहा तक एक सौ छियालीस नवा कोरोना संक्रमित मरीज के चिन्हारी करे गे रिहीस।
मनरेगा-एड्स
महात्मा गांधी राष्ट्रीय ग्रामीण रोजगार गारंटी योजना-मनरेगा के मजदूर मन ल अब एड्स बीमारी के बारे म जागरूक करे जाही। मनरेगा आयुक्त कार्यालय ह ए संबंध म जम्मों जिला कलेक्टर मन ल चिट्ठी जारी करे हे। ए चिट्ठी म जिला स्तर म स्वास्थ्य विभाग ले तालमेल बनाके कोरोना संक्रमण के संग एड्स ले बचाव खातिर मजदूर मन ल जागरूक करे जाही। एखर बर ग्राम पंचायत स्तर म ग्रामसभा के बइठका अउ रोजगार दिवस के मउका म जानकारी देके फइलसा ले गेहे।
मलेरिया-प्रचार रथ
बस्तर जिला के जम्मों विकासखंड मन म मलेरिया के रोकथाम अउ बचाव खातिर संदेस दे बर प्रचार रथ भेजे गेहे। ए रथ के माध्यम ले मलेरिया, डेंगू, उल्टी-दस्त, कोरोना संक्रमण, मातृ शिशु स्वास्थ्य के संगेसंग परिवार कल्याण विभाग के आने-आने योजना के जानकारी स्थानीय बोली – हल्बी, गोंडी अउ हिन्दी म दे जाही। संगेसंग संदेस पत्र ल मितानिन, आंगनबाड़ी कार्यकर्ता, कोतवार, रोजगार सहायक, पंचायत सचिव अउ सरपंच मनके मदद ले प्रचार करे जाही। ए प्रचार रथ जिला म पड़त गांव के हाट बाजार ले होवत जाही।
कृषि विवि-परिणाम
रईपुर के इंदिरा गांधी कृषि विश्वविद्यालय ह आंतरिक मूल्यांकन के आधार म परीक्षा के रिजल्ट घोसित करना चालू कर देहे। विश्वविद्यालय डहार ले स्नातक स्तर के चैथा बछर के कक्षा के रिजल्ट घोसित करे गेहे। उहें, स्नातक स्तर के पहिली, दूसर अउ तीसर बछर के परीक्षा परिणाम के संगेसंग स्नातकोत्तर अउ पीएचडी कक्षा के रिजल्ट अवइया सोमवार के घोसित करे जाही।
सीआईएससीई-परिणाम
काउंसिल फाॅर इंडियन स्कूल सर्टिफिकेट एग्जामिनेशन-सीआईएससीई ह आज आईसीएसई के दसवीं अउ बारहवीं के रिजल्ट के घोसना कर देहे। काउंसिल ह किहीन कि दसवीं कक्षा म पास होय विद्यार्थी मनके संख्या निन्यानवे दशमलव तीन-चार प्रतिसत हे। उहें, बारहवीं कक्षा के छियानवे दशमलव आठ-चार प्रतिसत विद्यार्थी पास होय हे।
लूट-आरोपी गिरफ्तार
कबीरधाम जिला म काली होय करीबन बहत्तर लाख रूपिया के लूट के मामला म पुलिस ह दू झिन संदिग्ध मन ल हिरासत म लेहे। उहें, आरोपी मनके पूछताछ म एक घर ले लूट के करीबन साढ़े नौ लाख रूपिया घलो बरामद करे गेहे।
खबर के मुताबिक पांडातराई थाना के अंतर्गत कुंडा अउ जंगलपुर के बीच काली राईस मिलर्स के कमरचारी मनके आंखी म अज्ञात आरोपी मन ह मिरचा पाउडर डार के उंखर तीर राखे करीबन इकहत्तर लाख छप्पन हजार रूपिया लूट के भगा गे रिहीन।
मौसम
प्रदेस म अवइया चैबीस घंटा के दउरान कुछेक जघा म गरज-चमक के संग थोरबहुत पानी गिर सकत हे।
मौसम विभाग ले मिले जानकारी के मुताबिक प्रदेस के सीमावर्ती राज्य म बने कमती दबाव के क्षेत्र के सेती प्रदेस के उत्तरी भाग म आज कतकोन जघा म गरज-चमक के संग हल्का ले मध्यम बरसा होय के संभावना हे। उहें, एक-दू जघा म भारी बरसा के संग गाज गिरे के चेतावनी घलो दे गेहे।