आज दिनभर के खबर ल अपन गुरतुर छत्तीसगढ़ी भाखा म पढ़व

केन्द्रीय मंत्री-फूडपार्क

केन्द्रीय जनजातीय कार्य मंत्री अर्जुन मुण्डा ह किहीन हे कि बस्तर जिला के बाबू सेमरा के ट्राईफूड पार्क जम्मों देस म आदर्श फूडपार्क के रूप म स्थापित होही। ओमन किहीन कि ए पार्क अपन ऊंचा गुणवत्ता के उत्पाद मनके सेती बस्तर के नाव ल जम्मों देस-दुनिया म परिचित कराय के संगेसंग स्व-रोजगार देवइया जरूरी केन्द्र बनही।
केन्द्रीय मंत्री श्री मुण्डा ह काली ट्राइफेड के वन-धन सम्मेलन कारीकरम म सामिल होय खातिर बस्तर जिला के सेमरा के फूडपार्क पहुंचे रिहीन। ए मउका म ओमन किहीन कि ट्राईफूड के माध्यम ले एथिनिक प्रोडक्ट, हैण्डीक्राफ्ट, हैंडलूम, आर्गेनिक फूड सप्लीमेंट जइसन लघु वनोपज उत्पाद मन ल पेस करे जाही। संगेसंग राष्ट्रीय अउ अंतर्राष्ट्रीय बाजार म वनोपज आधारित वैल्यू एडेड उत्पाद ल बढ़िया बाजार घलो मिलही।
उहें, केन्द्रीय मंत्री ह वनोपज प्रसंस्करण केन्द्र ग्राम धुरागांव, लोहंडीगुड़ा अउ चित्रकूट म वन-धन समिति के सदस्य मन ले गोठबात करीन अउ गांव म चलत इमली कैन्डी, इमली चटनी अउ टोरा तेल बनइया यूनिट मन ल घलो देखीन।

केन्द्रीय मंत्री-पत्रकारवार्ता

आज रईपुर म अपन छत्तीसगढ़ प्रवास के दउरान पत्रकार मन ले गोठबात करत केन्द्रीय जनजातीय कार्य मंत्री अर्जुन मुण्डा ह किहीन कि जनजातीय लोगन मन ल उंखर आजीविका के मुख्य साधन वनोपज के सही मूल्य मिलय, एखर सेती केन्द्र सरकार के पहल म वन-धन केन्द्र सुरू करे गेहे। ए केन्द्र मन म अब ले बड़ संख्या म स्व-सहायता समूह मन जुड़ गे हवय।
केन्द्रीय मंत्री ह बतईन कि पहिली तकरीबन 60 वनोपज मन खातिर न्यूनतम समर्थन मूल्य निर्धारित करे गे रिहीस। फेर, मोदी सरकार ह अब एखर संख्या ल बढ़ाके 87 कर दे हवय। ओमन बतईन कि केन्द्र सरकार ह जम्मों 87 वनोपज मन खातिर न्यूनतम समर्थन मूल्य निर्धारित कर दे हवय। श्री मुण्डा ह किहीन कि केन्द्र सरकार जनजाति वर्ग के जम्मों विकास खातिर प्रतिबद्धता के संग बूता करत हवय।

प्रधानमंत्री-जन धन योजना-फ्लैगशिप

केन्द्र सरकार के प्रमुख वित्तीय समावेशन कारीकरम प्रधानमंत्री जन-धन योजना के आज सात बछर पूरा होवत हे। ए योजना देस म जम्मों लोगन मन ल बैंकिंग सुविधा के दायरा म लाय के उद्देश्य ले बछर 2014 म आजेच के दिन सुरू करे गे रिहीस।
आज योजना के वर्षगांठ म प्रधानमंत्री नरेन्द्र मोदी ह जन-धन योजना ल सफल बनाय सेती काम करइया जम्मों लोगन मनके प्रयास के सराहना करीन हे। ओमन किहीन कि उंखर मनके प्रयास ह देसवासी मन खातिर अच्छा जीवन जीये बर सुनिश्चित करे हे।

पीएम-मन की बात

प्रधानमंत्री नरेन्द्र मोदी ह काली बिहनिया 11 बजे आकाशवाणी ले ‘‘मन की बात‘‘ कारीकरम म देस-बिदेस के लोगन मन ले अपन विचार साझा करही। ए मासिक रेडियो कारीकरम के 80वां कड़़ी होही। एला आकाशवाणी, दूरदर्शन नेटवर्क, आकाशवाणी समाचार वेबसाइट डब्ल्यू डब्ल्यू डब्ल्यू डॉट न्यूज ऑन एआईआर डॉट कॉम अउ न्यूज ऑन एआईआर मोबाइल ऐप म प्रसारित करे जाही। आकाशवाणी के यू-ट्यूब चैनल, दूरदर्शन समाचार, प्रधानमंत्री कार्यालय अउ सूचना प्रसारण मंत्रालय डहार ले घलो ए कारीकरम के लाइव स्ट्रीम करे जाही।

मुख्यमंत्री-रायपुर

मुख्यमंत्री भूपेश बघेल ह मंत्री, विधायक अउ पार्टी के आने-आने बड़का पदाधिकारी मन संग अपन एकदिवसीय दिल्ली दउरा के बाद आज राजधानी रईपुर लहुट आईन हे। नई दिल्ली प्रवास के दउरान ओमन कांग्रेस के पूर्व राष्ट्रीय अध्यक्ष राहुल गांधी ले भेंटवार्ता करीन।
आज रईपुर म माना विमानतल म पत्रकार मन ले गोठबात करत मुख्यमंत्री ह बतईन कि अवइया सप्ताह राहुल गांधी के छत्तीसगढ़ आय के कारीकरम हवय। श्री गांधी अपन प्रवास के दउरान बस्तर, सरगुजा के संगेसंग मध्य छत्तीसगढ़ घलो जाही, जिहां ओमन छत्तीसगढ़ मॉडल के अवलोकन करही।

कोविड टीका

देस म राष्ट्रव्यापी कोविड टीकाकरण अभियान म काली कोविड रोधी वैक्सीन के एक करोड़ ले जादा डोज दे गीस, जउन ह अभियान सुरू होय के बाद टीकाकरण के सर्वाधिक संख्या हवय।
प्रधानमंत्री नरेन्द्र मोदी ह किहीन हे कि काली एक दिन म कोविड रोधी वैक्सीन के एक करोड़ ले जादा डोज दे जाना बड़ उपलब्धि हवय। ओमन एक ठिन ट्वीट म डोज लेवइया अउ टीकाकरण अभियान सफल बनाय म सहयोग करइया मनखे मन ल बधाई दीन।
ऐति, छत्तीसगढ़ म घलो कोविड टीकाकरण अभियान जोरसोर ले चलत हवय। प्रदेस म कोविड ले बचाव खातिर अब तक 1 करोड़ 42 लाख ले जादा टीका लगाय जा चुके हवय।

हलषष्ठी

अपन लोक-लइका मनके लंबा उमर के कामना ले जुड़े तिहार हलषष्ठी ल आज जम्मों प्रदेस म पंरपरागत तरीका ले मनाय जावत हे। एला कमरछठ घलो केहे जाथे। ए मउका म माता मन उपवास राखीन अउ माटी के छोटकुन कुंड बनाके पूजापाठ करीन। पूजा सामान के रूप म महुआ, लाई अउ पसहर चाउर चढ़ाय गीस। संगेसंग उपवास रखइया माईलोगिन मन ह हलषष्ठी उपवास के कथा घलो सुनीन।
हलषष्ठी तिहार के मउका म राज्यपाल अनुसुईया उइके अउ मुख्यमंत्री भूपेश बघेल ह प्रदेसवासी मन ल, बिसेसकर माईलोगिन मन ल अपन सुभकामना दीन हे।

अमृत महोत्सव-कार्यक्रम

आजादी के अमृत महोत्सव के तहत प्रदेस म ए बेरा आने-आने कारीकरम आयोजित करे जावत हे। इही कड़ी म दुरूग जिला म आज बिहनिया सेंट थॉमस महाविद्यालय म ‘‘फिट इंडिया फ्रीडम रन‘‘ म मैराथन दउड़ के आयोजन करे गीस। एमा प्रतिभागी मन ल पुरस्कृत कर ओमन ल सम्मानित करे गीस।
ओति, जांजगीर-चांपा जिला म मनरेगा के श्रमिक मन ल उंखर अधिकार खातिर जागरूक करे जावत हे, जेमा काली ग्राम पंचायत कुरमा म पढ़ईया लइका मन ह मनरेगा के कामबूता ल पेंटिंग बनाके दरसईन।
अइसने, महासमुंद जिला म घलो मनरेगा के पंजीकृत मजदूर मन बर उंखर मनके अधिकार के जानकारी खातिर बिसेस जागरूकता अभियान चलाय जावत हे।

अमृत महोत्सव-प्रदर्शनी

स्वतंत्रता के 75वां बछर के दउरान चलत आजादी के अमृत महोत्सव के तहत भारतीय पुरातत्व विभाग ह भारत छोड़ो आंदोलन के बारे म नई दिल्ली म प्रदर्सनी आयोजित करे हवय। ए प्रदर्सनी म देस के स्वाधीनता संग्राम म भारत छोड़ो आंदोलन के जरूरी भूमिका दर्साय गेहे। प्रदर्सनी ए बछर 8 नवंबर तक खुले रइही। एमा भारत छोड़ो आंदोलन ले जुड़े जम्मों सार्वजनिक रिकार्ड, निजी पत्र, नक्सा, फोटू अउ आने-आने वस्तु मन ल राखे गे हवय।

अमृत महोत्सव-क्विज विजेता

आजादी के अमृत महोत्सव म प्रादेशिक समाचार एकांश, आकाशवाणी, रईपुर डहार ले राखे गे ‘‘प्रश्नोत्तरी प्रतियोगिता म हमर श्रोता मन ह बड़ उछाह के संग भाग लेवत हे। काली ए प्रश्नोत्तरी के चौथा अंक म छत्तीसगढ़ी बुलेटिन म प्रश्न रिहीस- ‘‘बछर 1922 म पंडित सुंदरलाल शर्मा ह जेल म रहत जउन पत्रिका निकाले रीहिस हे, उंखर नाव काय रीहिस हे।‘‘ एखर सही जवाब हे- कृष्ण जन्म स्थान पत्रिका। सवाल के जवाब म बड़ संख्या म सुनइया मन ह अपन जवाब भेजीन। फेर, सबले पहिली जवाब भेजइया विजेता हवय – जांजगीर-चांपा जिला के ग्राम- कोटमी सोनार निवासी संजय कुमार पटेल। आकाशवाणी परिवार डहार ले संजय कुमार पटेल ल हमन हार्दिक बधाई अउ सुभाकामना देवत हन।

विशेष साक्षात्कार

आजादी के अमृत महोत्सव के तहत प्रादेशिक समाचार एकांश, आकाशवाणी, रायपुर डहार ले छत्तीसगढ़ म स्वतंत्रता संग्राम ले जुड़े घटना अउ इहां के स्वतंत्रता सेनानी मन ले जुड़े विशेष कारीकरम मनके श्रृंखला प्रसारित करे जावत हे। एही श्रृंखला के चौथा कड़ी म स्वतंत्रता संग्राम के दउरान 1857 ले 1920 के कालखंड के दउरान छत्तीसगढ़ म आने-आने आंदोलन अउ स्वतंत्रता सेनानी मनके बारे म आकाशवाणी समाचार ह वरिष्ठ इतिहासकार आचार्य रमेन्द्रनाथ मिश्र ले गोठबात करीन। ए बिसेस वार्ता के पहिली अंक के प्रसारण आकाशवाणी केन्द्र, रईपुर डहार ले काली इतवार 29 अगस्त के बिहनिया साढ़े नौ बजे ले करे जाही। एला छत्तीसगढ़ स्थित आकाशवाणी के जम्मों केन्द्र एके संघरा रिले करही।