अमृत महोत्सव- ई फोटो प्रदर्शनी
केंद्रीय सूचना अउ प्रसारण मंत्री अनुराग ठाकुर, अउ संस्कृति मंत्री किशन रेड्डी ह आज नई दिल्ली म चित्रांजलि एट सेवन्टी फाइव शीर्षक ले दू ठिन प्रदर्शनी के उद्घाटन करीन। पहिली ई-फोटो प्रदर्शनी संविधान निर्माण ले जुड़े हे, फेर दूसर फिल्म पोस्टर ले जुड़े वचुअर्ल प्रदर्शनी हे।
उद्घाटन के बाद श्री ठाकुर ह कीहिन हे कि भारतीय संविधान हमर अधिकारी अउ कर्त्तव्य के बारे म जाने म मदद करथे। ओमन कीहिन हे कि सरकार ह जल्दीच अपन संविधान जाने बर कार्यक्रम शुरू करही। ई प्रदर्शनी ग्यारा क्षेत्रीय भाषा म हे। श्री ठाकुर ह कीहिन कि ए प्रदर्शनी के माध्यम ले देश के युवा संविधान म दे गे अधिकार अउ कर्त्तव्य ल आसानी ले समझ सकही।
आजादी के अमृत महोत्सव के रूप म सूचना अउ प्रसारण मंत्रालय ह तेईस ले उनतीस अगस्त तक विशेष सप्ताह मनावत हे। एमा देशभर म आने आने मीडिया इकाई के माध्यम ले कई ठिन गतिविधि अउ कार्यक्रम चलाये जावत हे। गीत अउ नाटक प्रभाग देशभर म सौ ले जादा कार्यक्रम आयोजित करत हे।
अमृत महोत्सव कार्यक्रम
आजादी के अमृत महोत्सव के तहत आने आने कार्यक्रम के माध्यम ले महात्मा गांधी राष्ट्रीय ग्रामीण रोजगार गारंटी योजना-मनरेगा के मजदूर मन ल जोड़के जागरूकर करे काम करे जावत हे।
एखर तहत जांजगीर-चांपा जिला के जम्मों ग्राम पंचायत मन म आज ले पंजीकृत मजदूर मन ल उंखर अधिकारी के जानकारी देबर विशेष जागरूकता अभियान चलाये जावत हे। ये कार्यकम्र दू सितंबर तक चलही।
एति क्षेत्रीय लोकसंपर्क कार्यालय बिलासपुर, नेहरू युवा केंद्र अउ राष्ट्रीय सेवा योजना डहार ले आजादी के अमृत महोत्सव के तहत काली अठाईस अगस्त के फिट इंडिया फ्रीडम रन अउ आइकॅाप के आयोजन करे जाही।
अमृत महोत्सव-क्विज प्रतियोगिता
देश के आजादी के पचहत्तर बछर पूरा होय के मउका म आजादी के अमृत महोत्सव म प्रादेशिक समाचार एकांश, आकाशवाणी रायपुर डहार ले प्रश्नोत्तरी कार्यक्रम शुरू करे गेहे।
एमा छत्तीसगढ़ी बुलेटिन सुनइया मन बर आज के सवाल हे-
‘‘बछर उन्नीस सौ बाईस म पंडित सुंदरलाल शर्मा ह जेल म रहत जउन पत्रिका निकाले रीहिस हे, उंखर नाम का रीहिस।‘‘
श्रोता मन ह अपन जवाब ई-मेल आईडी – आर.ए.आई.पी.यू.आर. एस.ए.डब्लू. ए.एल. एट द रेट जीमेल डॅाट कॉम म या फोन नंबर 94242-08182 म एसएमएस ले भेज सकत हे। जउन श्रोता के सही जुवाब सबले पहिली मिलही ओला विजेता माने जाही अउ ओखर नाव के घोषणा काली के छत्तीसगढ़ी समाचार बुलेटिन म करे जाही। संगेसंग जीतइया प्रतिभागी ल प्रादेशिक समाचार एकांश डहार ले ई-प्रमाण पत्र घलो दे जाही।
राज्यपाल गुजरात प्रतिनिधि मंडल
राज्यपाल अनुसूइया उइके ह आज राजभवन म एक भारत-श्रेष्ठ भारत कार्यक्रम के तहत गुजरात विधानसभा के अध्यक्ष राजेन्द्र त्रिवेदी के अगवई म विधानसभा के प्रतिनिध मंडल ले भेंट करीन।
ए मउका म राज्यपाल प्रतिनिधि मंडल ले राज्य के पर्यटन जगा ल घुमे के आग्रह करीन। ओमन बताइन कि छत्तीसगढ़ के प्राकृतिक सौंदर्य अद्भुत हे। इंहा विश्व प्रसिद्ध चित्रकोट जलप्रपात अउ आने पर्यटन स्थल हे। गुजरात विधानसभा अध्यक्ष श्री त्रिवेदी ह राज्यपाल ल गुजरात आय के नेवता दीन। ए मउका म श्री द्विवेदी ह राज्यपाल ल शॉल, प्रतीक चिन्ह स्टेच्यू ऑफ यनिटी अउ पुस्तक देके सम्मानित करीन।
उंहें प्रतिनिधि मंडल ह छत्तीसगढ़ विधानसभा के अध्यक्ष डॅाक्टर चरणदास महंत ह घलो विधानसभा परिसर म भेंट करीन।
कोरोना टीका समाचार
राष्ट्रव्यापी टीकाकरण अभियान के तहत देश म अब तक इकसठ करोड़ बाईस लाख ले जादा टीका लगाए गेहे। पाछू चौबीस घंटा के दौरान उन्यासी लाख अड़तालीस हजार ले जादा लोगन मनके टीकाकरण करे गेहे।
केंद्रीय स्वास्थ्य मंत्री मनसुख मांडविया ह ट्वीटर म कीहिन कि देश ह पचास प्रतिशत पात्र आबादी के कोविड रोधी टीका लगाके विशेष उपलब्धि हासिल करे हे। टीकाकरण अभियान के तीसर चरण म अब तक अठारह ले चंवालिस बछर आयु के तेईस करोड़ लोगन मन ल पहिली डोज, फेर दू करेड़ ले जादा लेगन मन ल दूसर डोज दे जा चुके हे।
एति छत्तीसगढ़ म घलो कोरोना टीकाकरण के काम चलत हे। प्रदेश म कोरोना ले बचाव बर अब तक एक करोड़ इकतालीस लाख ले जादा वैक्सीन लगाये जा चुके हे।
उंहें महासमुंद नगरीय क्षेत्र म शत-प्रतिशत टीकाकरण के श्रेणी म आ गेहे। एखर पहिली जिला के पांच नगरीय निकाय क्षेत्र – सरायपाली, पिथौरा, बसना, तुमगांव अउ बागबाहरा म जम्मों पात्र लोगन मनके शत-प्रतिशत टीका लगाये जा चुके हे। एखरे संग जिला के तिरसठ ग्राम पंचायत म घलो शत-प्रतिशत टीकाकरण हो चुके हे।
इही बीच प्रदेश म कोरोना संक्रमण के दर म सरलग कमी आवत हे अउ औसत पॉजीटीविटी दर शून्य दशमलव एक-चार प्रतिशत म आ गेहे। काली प्रदेश म कोरोना संक्रमण के सैंतालिस नवा मामला आगू आए हे। अभी करीबन छै सौ मरीज मनके इलाज आने आने अस्पताल या होम आइसोलेशन म चलत हे।
तोमर-अनाज
केंद्रीय कृषि मंत्री नरेंद्र सिह तोमर ह कीहिन हे कि भारत ह अनाज के क्षेत्र म बड़का उपलब्धि हासिल करे हे। ओमन कीहिन कि देश के किसान अउ वैज्ञानिक मनके कोसिस के सेती भारत प्रतिस्पर्धा म जम्मों जिंस मनके मामला म विश्व म पहिली स्थान म पहुंच सकत हे।
श्री तोमर काली किसान मन बर राष्ट्रीय खाद्य अउ पोषण अभियान के शुभारंभ के मउका म बोलत रीहिन। एखर आयोजन भारतीय कृषि अनुसंधान परिषद ह करे रीहिस हे। ओमन कीहिन कि स्वतंत्रता के पचहत्तरवां वर्षगांठ के मउका म भारत ल अंतर मंथन करे अउ चुनौती के समाधान करे के जरूरत हे। श्री तोमर ह कीहिन कि किसान मन ल कीमती फसल अउ शिक्षित युवा मन ल पर्यावरण के मुताबिक खेती कोति धियान देना चाही।
खदान निरीक्षण
केंद्रीय कोयला मंत्रालय के संयुक्त सचिव विस्मिता तेज ह कोरबा जिला के मेगा माईस दीपका, गेवरा अउ कुसमुंडा के निरीक्षण करीन। ए दउरान ओमन व्यू-प्वॉइंट ले खदान म चलत काम के जायजा लीन अउ भविष्य के योजना मन संग ओमा आवत परेसानी के जानकारी लीन । बाद म श्रीमती तेज ह वृक्षारोपण घलो करीन।
ट्रेन परिचालन
दक्षिण पूर्व मध्य रेलवे नागपुर मंडल म मुसरा-बाकल-राजनांदगांव के बीच आटो स्रिग्नलिंग के काम करे जावत हे। ये काम अवइया तीस अगस्त तक चलही। एखर सेती ए रद्दा ले चलइया कुछ एक रेलगाड़ी के अवई जवई प्रभावित होही। दुर्ग अउ गोंदिया ले चलइया दुर्ग-गोंदिया मेमू अउ गोंदिया-इतवारी मेमू स्पेशल ट्रेन अवइया तीन दिन तक रद्द रीही। अइसने झारसुगुड़ा-गोंदिया स्पेशल ट्रेन उनतीस अगस्त तक नइ चलय। उंहें रायपुर-डोंगरगढ़ मेमू दुर्ग तक चलही। ए गाड़ी डोंगरगढ़ के बीच रद्द रीही।
उंहें रायपुर रेलमंडल के तिल्दा-बैंकुठ स्टेशन के बीच समपार फाटक तुलसी गेट म मरम्मत के सेती उनतीस अगस्त के बीहनिया आठ बजे ले पांच दिन तक ए फाटक ले अवई जवई बंद रीही।
मौसम
मौसम विभाग ह प्रदेश म अवइया चौबीस घंटा के दउरान गरज-चमक के संग एक दू जगा म भारी बरसा होय अउ बिजली गिरे के चेतावनी देहे।
मौसम विभाग ले मिले खबर के मुताबिक एक ठिन द्रोणिका दक्षिण पूर्व कोति ले उत्तर बंगाल के खाड़ी म बने हे। एखरे संग एक चक्रीय चक्रवाती घेरा उत्तर-पश्चिम बंगाल के खाड़ी अउ तटीय पश्चिम बंगाल के उपर बने हे। जेखर ले प्रदेश म बदली-बारिश के स्थिति बने हे।