कोरोना समाचार
केंद्रीय स्वास्थ्य अउ परिवार कल्याण मंत्री मनसुख मांडविया ह कीहिन कि केंद्र सरकार ह राज्य अउ केंद्र शासित प्रदेश मन म सबो स्कूल के शिक्षक मन ल प्राथमिकता के आधार म टीका लगवाय के आग्रह करीन हे। एक ठिन ट्वीट म श्री मांडविया ह कीहिन कि राज्य अउ केंद्रशासित प्रदेश मन म पांच सितंबर ले शिक्षक दिवस के पहिली टीकाकरण करे बर केहे गेहे।
एति छत्तीसगढ़ म कोरोना ले बचाव बर अब तक एक करोड़ चालीस लाख ले जादा टीका लगाये जा चुके हे। एमा ले एक करोड़ नौ लाख पच्चीस हजार ले ज्यादा लोगन ल पहिली डोज अउ तीस लाख चौहत्तर हजार ले जादा लोगन ल दूसर डोज लगाय जा चुके हे।
इही बीच, प्रदेश म कोरोना संक्रमण के दर म सरलग कमी आवत हे। औसत पॉजीटीविटी दर शून्य दशमलव एक तीन प्रतिशत म आगे हे। काली प्रदेश म कोरोना संक्रमण के सैंतालीस नवा मामला आगू आइस। उहें, बारह जिला म कोरोना के एको झन मरीज नइ मिले हे। प्रदेश म ए बेरा करीबन छह सौ तिरपन मरीज के इलाज आने आने अस्पताल या होम आइसोलेशन म चलत हे।
मंत्रिमंडल गन्ना मूल्य
केंद्रीय मंत्रिमंडल ह गन्ना के लाभकारी मूल्य बढ़ाके दू सौ नब्बे रूपिया प्रति कुंटल कर देहे। जउन ह अब तक के सबले उचित मूल्य हे। केंद्रीय खाद्य अउ सार्वजनिक वितरण मंत्री श्री पीयूष गोयल ह कीहिन कि मंत्रिमंडल के ए फैसला ले पांच करोड़ गन्ना किसान अउ उंखर आश्रित मन ल लाभ पहुंचाही। मीडिया ले बातचीत म श्री गोयल ह कीहिन कि ए फैसला के लाभ चीनी मिल मनके पांच लाख श्रमिक अउ उंखर ले जुड़े लोगन मन ल घलो लाभ मिलही।
ई-श्रम पोर्टल
केंद्र सरकार काली असंगठित क्षेत्र के श्रमिक मन बर राष्ट्रीय डाटाबेस ई-श्रम पोर्टल शुरू करही। केंद्रीय श्रम अउ रोजगार मंत्री भूपेंद्र यादव ह ई-श्रम पोर्टल के लोगो ल जारी करत कीहिन कि असंगठित श्रमिक मनके पहिचान के मांग लंबा समय ले करे जात रीहिस। ओमन बताइन कि ये पोर्टल राष्ट्र निर्माता श्रमयोगी के डेटाबेस उपलब्ध कराही। एखर ले श्रमिक मन ल कल्याणकारी योजना के लाभ अपन स्थान म ही मिल सकही।
स्कूल-सूखा राशन
प्रदेश के सबो स्कूली लइका मन ल कोरोना काल म घलो मध्यान्ह भोजना म सूखा रासन दे जात हे। कोरोना संक्रमण के चलत स्कूल बंद रेहे के अवधि म घलो सोलह जून ले इकतीस जुलाई तक कुल अड़तीस दिन के मध्यान्ह भोजन के सूखा रासन स्कूली लइका मन ल खाद्य सुरक्षा भत्ता के रूप म बांटे जाही।
स्कूल शिक्षा मंत्री डॉक्टर प्रेमसाय सिंह टेकाम ह बतईन कि सूखा रासन सामग्री ल बांटे बर स्कूल या घर-घर जाके देके निरदेस दे गेहे। बांटे के दउरान लइका या पालक मनके बीच सामाजिक दूरी रखे जाही। ए संबंध म आयुक्त लोक शिक्षण डॉक्टर कमलप्रीत सिंह ह घलो जिला सिक्षा अधिकारी मन ल दिसा-निरदेस जारी करे हे।
उंहे कोरोना संक्रमण के दउरान शैक्षणिक सत्र दू हजार बीस-इक्कीस म एक मई ले पंद्रह जून तक उनतालिस कार्य दिवस के ग्रीष्म अवकाश अवधि म खाद्यान्न सुरक्षा भत्ता के रूप म कुकिंग कास्ट के राशि डीबीटी के माध्यम ले विद्यार्थी या पालक के बैंक खाता म जमा करे जाही। एखर तहत प्राथमिक स्कूल के लईका मन ल दू सौ दू रूपिया अउ मिडिल स्कूल के लईका मन ल दू सौ इंक्यानबे रूपिया दे जाही।
नेत्रदान पखवाड़ा
प्रदेश म आज ले नेत्रदान पखवाड़ा मनाये जात हे। जउन ह आठ सितंबर तक चलही। नेत्रदान ल महादान माने गेहे। एक झिन मनखे के आंखी ले दू झिन दृष्टिहीन मनखे फेर दुनिया ल देख सकथे। डॅाक्टर मनके मुताबिक आंखी के ऑपरेशन के बाद चश्मा पहनइया मनखे ह घलो नेत्रदान कर सकथे।
मधुमेह के मरीज घलो नेत्रदान कर सकथे। कहूं कोनो मनखे अपन जीवन म नेत्रदान के घोषणा नइ करे हे तभो ले उखर रिश्तेदार ह मृत मनखे के नेत्रदान कर सकथे। नेत्रदान बर अपन तीर के नेत्र बैंक, मेडिकल कॉलेज, अस्पताल अउ जिला चिकित्सालय म संपर्क कर सकथे।
शिशु संरक्षण माह
प्रदेस म ए दिन सिसु संरक्षण माह मनाय जात हे। इही कड़ी म रायगढ़ जिला के खरसिया के सिविल अस्पताल म जिला स्तरीय कारीकरम के आयोजन करे गीस। ए मउका म जिला टीकाकरण अधिकारी ह नौ महिला ले पांच बछर तक के लइका अउ गर्भवती माता मन ल जानलेवा बीमारी अउ टिटनेस ले बचाव बर टीका लगवाय के अपील करीन।
अट्ठाईस सितंबर तक चलइया शिशु संरक्षण माह के दउरान टीकाकरण केन्द्र अउ आंगनबाड़ी मन म नौ महिना ले पांच बछर के लइका मन ल विटामिन ‘ए‘ के सिरप पिलाय जाही। संगेसंग छह माह ले पांच बछर के लइका मन ल आयरन अउ फोलिक एसिड सिरप के खुराक दे जाही।
अमृत महोत्सव कार्यक्रम
आजादी के अमृत महोत्सव के तहत छत्तीसगढ़ संग देशभर म आने-आने कार्यक्रम आयोजित करे जात हे। इही कड़ी म गरियाबंद जिला के कतकोन गांव मन म आउटरिच ब्यूरो डहार ले नुक्कड़ नाटक अउ रंगारंग कार्यक्रम के आयोजन करके गांव वाले मन ल आजादी के महत्ता, अउ स्वतंत्रता संग्राम सेनानी मनके योगदान के बारे म बताय जात हे। ए दउरान रंग सागर ग्रुप के लोगन मन ह गांव वाले मन ल केंद्र सरकार के योजना के बारे म विस्तार ले जानकारी दीन।
उंहें कोरिया जिला म घलो आजादी के अमृत महोत्सव के तहत अलग-अलग गतिविधि के माध्यम ले मनरेगा श्रमिक मन ल जोड़के जागरूक करे के काम करे जात हे। इही कड़ी म जिल के सबो ग्राम पंचायत मन म सत्ताईस अगस्त ले तीन सितंबर तक मनरेगा श्रमिक मनके बीच उंखर अधिकारी मनके जानकारी देबर एक ठन विशेष जागरूकता अभियान चलाये जाही।
लोकवाणी
मुख्यमंत्री भूपेश बघेल अपन मासिक रेडियो कार्यक्रम लोकवाणी म ए दारी जिला स्तर म विशेष रणनीति ले विकास की नइ राह विसय उपर गोठबात करही। ए संबंध म इच्छुक मनखे आकाशवाणी रायपुर के दूरभाष नंबर शून्य सात सात एक- दू चार तीन शून्य पांच शून्य एक, दू चार तीन शून्य पांच शून्य दू, दू चार तीन शून्य पांच शून्य तीन म छब्बीस अउ सत्ताईस अगस्त के मंझनियां तीन ले चार बजे के बीच फोन करके अपन सवाल रिकार्ड करा सकत हे।
लोकवाणी के ईक्कीसवां कड़ी के प्रसारण बारा सितंबर के होही। एखर प्रसारण छत्तीसगढ़ स्थित आकाशवाणी के सबो केंद्र एफ.एम. रेडियो अउ क्षेत्रीय समाचार चैनल मनले बीहनिया साढ़े दस बजे ले ग्यारा बजे तक करे जाही।
अउ अब थोरकुन समाचार सार म-
– राज्य शासन ह भारतीय प्रशासनिक सेवा के अधिकारी अउ राजस्व मंडल के सदस्य उमेश कुमार अग्रवाल ल राजस्व मंडल के अध्यक्ष के अतिरिक्त प्रभार सौपे हे, उंहें रायगढ़ के सहायक कलेक्टर प्रतिष्ठा ममगाई ल बलौदाबाजार म अनुविभागीय अधिकारी राजस्व के पद म पदस्थ करे गेहे।
– आयुष्मान भारत प्रधानमंत्री जन आरोग्य योजना अउ डॅाक्टर खूबचंद बघेल स्वास्थ्य सहायता योजना के तहत धमतरी जिला म अब तक दू लाख तेरा हजार ले जादा परिवार मनके कम से कम एक सदस्य ह आयुष्मान कार्ड बनवा लेहे।
– चिटफंड कंपनी अनमोल इंडिया के खिलाफ कार्रवाई के मांग ल लेके अभिकर्ता मन ह राजनांदगांव जिला कलेक्टर के नाम ज्ञापन सौंपिन।
– जांजगीर-चांपा जिला म जेसीबी के टक्कर ले मोटर सायकिल सवार एक झिन मनखे के मउत होगे। उंहें एक झिन आने मनखे ह गंभीर रूप ले घायल होगे।
अउ
– राजधानी रायपुर म दुर्ग के एक झिन कारोबारी के अपहरण के मामला म सिविल लाईन पुलिस ह तीन आरोपी मन ल गिरप्तार करे हे।