शिशु संरक्षण माह
प्रदेश म आज ले अठाईस सितंबर तक शिशु संरक्षण माह के आयोजन करे जात हे। ए दउरान टीकाकरण केंद्र अउ आंगनबाड़ी मन म नौ महीना ले पांच बछर के लगभग छब्बीस लाख चालीस हजार लईका मन ल विटामिन ए के सिरप पिलाये जाही। संगेसंग छै माह ले पांच बछर के लगभग सत्ताईस लाख साठ हजार लईका मन ल आयरन अउ फोलिक एसिड सिरप के खुराक दे जाही।
ए कार्यक्रम ल स्वास्थ्य सहायक, एएनएम अउ आंगनबाड़ी कार्यकर्ता के सहयोग ले हरएक मंगलवार अउ शुक्रवार के होवइया टीकाकरण दिवस के संग संचालित करे जाही। एखर अलावा टीकाकरण ले छूटे अउ नियमित टीकाकरण के लक्षित लईका मन ल प्रतिरक्षा बर बीसीजी, हेपेटाइटिस-बी अउ डीपीटी संग छै ठिन जरूरी टीका घलो लगवाये जाही।
कोरोना समाचार
छत्तीसगढ़ म कोरोना ले बचाव बर अब तक एक करोढ़ उनचालिस लाख उनसठ हजार ले जादा टीका लगाये जा चुके हे। इही बीच प्रदेश म राजस्व मंत्री जयसिंह अग्रवाल ह आज कोरोना वैक्सिन के दूसर डोज लगवाइन। ओमन ह कोरोना ले बचाव बर लोगन ल टीका लगवाये के अपील करे हे।
इही बीच प्रदेश म कोरोना संक्रमण के दर म सरलग कमी आवत हे। औसत पॉजीटीविटी दर शून्य दशमलव एक चार प्रतिशत म आगे हे। काली प्रदेश म कोरोना संक्रमण के उनचालिस नवा मामला आगू आइस।
उंहें बारा जिला म कोरोना के एको झन मरीज नइ मिले हे। प्रदेश म ए बेरा करीबन सात सौ नौ मरीज के इलाज आने आने अस्पताल या होम आइसोलेशन म चलत हे।
कोविड वैक्सीन वाट्स अप
केंद्र सरकार ह कीहिन कि कोविड वैक्सीन लगवइया बर अब वाट्स अप के माध्यम ले कोनो मनखे अपन बेरा अउ तिथि के बुकिंग करा सकथे। केंद्रीय स्वास्थ्य मंत्री मनसुख मांडविया ह ट्वीटर म कीहिन कि मोबाइल नंबर नौ शून्य एक तीन एक पांच एक पांच एक पांच के माध्यम ले वैक्सीन लगवाये बर स्लॉट बुक कर सकत हे। आमन ह कीहिन कि छै अंक के ओटीपी दर्ज करे के बाद मनखे अपन सुविधा ल देखत तारीख, जगा, पिनकोड अउ वैक्सीन चुन सकत हे।
राष्ट्रीय शिक्षा नीति कार्यक्रम
केंद्र सरकार ह शिक्षा ल जादा समावेशी बनाये अउ विद्यार्थी मन ल इक्कीसवीं सदी बर तियार करे बर आज राष्ट्रीय शिक्षा नीति दू हजार बीस के आने आने कार्यक्रम के शुरूआत करीन।
केंद्रीय शिक्षा मंत्री धर्मेन्द्र प्रधान संग सामाजिक न्याय अउ अधिकारिता मंत्री डॅाक्टर वीरेंद्र कुमार ह नई दिल्ली म ए कार्यक्रम के शुरूआत करीन। ए अवसर म राष्ट्रीय शिक्षा नीति लागू होय के एक बछर के उपलब्धि म एक ठिन पुस्तिका के विमोचन करे गीस।
एखर संगेसंग प्रिया-शीर्षक ले तियार बुकलेट, दीक्षा प्लेटफार्म म उपलब्ध डीजिटल सामग्री, राष्ट्रीय शैक्षिक अनुसंधान अउ प्रशिक्षण परिषद के वैकल्पिक शैक्षणिक कैलेण्डर घलो जारी करे गीस।
आईआईटी-मेडिकल कोचिंग
आईआईटी अउ मेडिकल जइसन तकनीकी संस्था म प्रवेश परीक्षा के तियारी बर अब राज्य के पढ़ईया लईका मन ल प्रदेश के बाहिर जाये के जरूरत नइ पड़ही। एखर बर राजधानी रायपुर म ही राष्ट्रीय स्तर के कोचिंग के शुरूआत करे जात हे। स्कूल शिक्षा मंत्री डॅाक्टर प्रेमसाय सिंह टेकाम ह एक प्रायवेट संस्था डहार ले चलाये जात आईआईटी अउ मेडिकल जोन कोचिंग सेंटर के आज शुभारंभ करीन।
अमृत महोत्सव विशेष सप्ताह
केंद्रीय सूचना अउ प्रसारण मंत्रालय डहार ले आजादी के अमृत महोत्सव के रूप म विशेष सप्ताह मनाये जात हे। ए कड़ी म दूरदर्शन डहार ले आज आजादी का सफर, स्वाधीनता संग्राम की गाथा, नए भारत का सफर और पूर्ण स्वराज विसय म वृत्तचित्र के प्रसारण करे जाही।
उंहें आकाशवाणी ले आजादी का सफर आकशवाणी के साथ, राष्ट्रीय अमृत महोत्सव क्विज और विशेष कार्यक्रम अपराजिता के प्रसारण होही।
माओवादी मुठभ्ेड़
सुकमा जिला के कोंटा इलाका म आज बीहनिया सुरक्षा बल मनके संग होय मुठभेड़ म माओवादी मारे गीस। मारे गे दू झिन माओवादी जेमा ले एक झिन माओवादी उपर पांच लाख रूपिया के इनाम घोषित रीहिस जउन ह कोंटा क्षेत्र के कमांडर रीहिस। ए मुठभेड़ म सात आने माओवादी मन ल गोली लगे के घलो खबर हे।
जिला के पुलिस अधीक्षक सुनील शर्मा ह घटना के पुष्टि करत बताइन कि मारे गे दूनो माओवादी मनके शव बरामद कर ले गेहे। ओमन बताइन कि डीआरजी कोबरा बटालियन अउ सीआरपीएफ के संयुक्त दल तलाशी अभियान म निकले रीहिस, तभे गोमपाड़ के जंगल म ये मुठभेड़ होइस। मुठभेड़ के बाद आसपास के इलाका म गश्त अउ बढ़ा दे गेहे।
ओति दंतेवाड़ा जिला के किरंदुल इलाका म पुलिस ह दू-दू लाख रूपिया के दू इनामी माओवादी मन ल हिरोली के जंगल ले गिरप्तार करीन हे। पुलिस के अनुसार ये दूनो माओवादी कच्चा रद्दा म विस्फोटक लगाये बर आये रीहिस।
दुर्घटना
कोरबा जिला म कटघोरा थाना क्षेत्र के बरपाली म काली रतिहा कार अउ बस के टक्कर ले मरवाही विधायक डॅाक्टर के.के. ध्रुव के बेटा प्रवीण कुमार ध्रुव संग तीन झिन आने लोगन के मउत होगे।
प्रवीण कुमार ध्रुव बांगो विद्युत विभाग म सहायक अभियंता के रूप म कार्यरत रीहिन। उंखर संग एक झिन जूनियर इंजीनियर कुशल कंवर अउ ठेका मजदूर शंकर सिंह पोर्ते के घलो ए हादसा म मउत होगे।
राज्यपाल अनुसूइया उइके अउ मुख्यमंत्री भूपेश बघेल ह मरवाही विधायक के बेटा के मउत म दुख जताइन ।
ओति अंबिकापुर के तीर खैराढोढही नाला म एक झिन मोटर सायकिल के गिरे ले ओमा सवार माइलोगिन अउ लईका के मउत होगे। खबर के मुताबिक पथरी निवासी राजेश नायक अपन पत्नि अउ लईका संग रक्षाबंधन तिहार मनाके गांव लहुटत रीहिन, तभे अचानक नाला म बाढ़ आये के सेती ए दुर्घटना होगे।
रायगढ़-हत्या
रायगढ़ के एक ठिन सरकारी स्कूल म आज बीहनिया आपसी रंजिश के सती नवीं कक्षा म पढ़ईया विद्यार्थी के दू झिन आने विद्यार्थी मन ह हत्या कर दीन।
पुलिस अधीक्षक अभिषेक मीणा ह बताइन कि हत्या म शामिल दूनो झन छात्र आने स्कूल के रीहिस। ओमा ले एक झन ल तुरते घेराबंदी करके पकड़ ले गीस। उंहें दूसर आरोपी के तलाश करे जात हे।
खेलो इंडिया यूथ गेम्स-सम्मान
खेलो इंडिया यूथ गेम्स म बछर दू हजार उन्नीस सौ बीस म पदक विजेता खिलाड़ी मन ल राज्य शासन डहार ले पुरस्कार के रूप म नकद राशि देके सम्मान करे जाही। एखर तहत आवेदन जमा करे के तारीख पंद्रह सितंबर तक हे।
खेलो इंडिया यूथ गेम्स के विजेता खिलाड़ी मन ल आने आने खेल बर अलग-अलग आवेदन करना होही। आवेदन पत्र राज्य खेल संघ के अनुशंसा के संग खेल अउ युवा कल्याण विभाग के जिला कार्यालय या फेर संचालनालय म जमा करना होही। आवेदन पत्र मनके प्रारूप विज्ञापन विभाग के वेबसाईट ले डाउनलोड करे जा सकथे।
प्रोत्साहन राशि के रूप म यूथ गेम्स म व्यक्तिगत खेल मन म स्वर्ण पदक विजेता मन ल दू लाख रूपिया, रजत पदक विजेता मन ल डेढ़ लाख रूपिया, अउ कांस्य पदक विजेता मन ल एक लाख रूपिया दे जाही।
मौसम
अवइया अड़तालिस घंटा के दउरान प्रदेश के कतकोन जगा म हल्का ले मध्यम बरसा होय अउ गरज-चमक के संग बौछार पड़े के संभावना हे।
रायपुर स्थित मौसम विज्ञान केंद्र के अनुसार ए बेरा एक ठिन द्रोणिका बने हे, जेखर प्रभाव ले अवइया दू दिन तक छत्तीसगढ़ म कुछएक जगा मन म हल्का ले मध्यम बरसा होय के आसार हे।
उंहें आज मंझनियां बाद राजधानी रायपुर समेत प्रदेश के कुछएक जगा म मध्यम ले तेज बरसा होइस हे। मौसम वैज्ञानिक मनके अनुसार प्रदेश के अधिकतम तापमान म अभी बदलाव होय के संभावना नइ हे।