आज दिनभर के खबर ल अपन गुरतुर छत्तीसगढ़ी भाखा म पढ़व

अमृत महोत्सव-प्रदर्शनी

केन्द्रीय सूचना अउ प्रसारण मंत्रालय डहार ले आजादी के अमृत महोत्सव के रूप म ए महीना के 23 ले 29 तारीख तक बिसेस सप्ताह मनाय जाही। ए दउरान आकाशवाणी के समाचार सेवा प्रभाग अउ एखर क्षेत्रीय इकाई मन ह धरोहर, निशान अउ अपराजिता जइसन बिसेस कारीकरम के प्रसारण करही। दूरदर्शन, घलो देशभक्ति म आधारित फिल्म महोत्सव आयोजित करही। ए दउरान स्टार्टअप, डिजिटल क्रांति, अनुच्छेद-370 के निष्प्रभावी होय अउ रक्षा, अंतरिक्ष जइसन बिसय म दूरदर्शन बिसेस कारीकरम प्रसारित करही।
ऐति, छत्तीसगढ़ म प्रादेशिक लोकसंपर्क कार्यालय-आर.ओ.बी. रईपुर डहार ले 25 अगस्त ले 5 ठिन जिला मन म प्रचार कारीकरम आयोजित करे जाही।

फिट इंडिया फ्रीडम रन

देस के स्वतंत्रता के 75वां बछर के मउका म सुरू करे गे आजादी के अमृत महोत्सव म छत्तीसगढ़ म कतकोन आयोजन करे जावत हे। इही कड़ी म दुरूग म आज ‘‘फिट इंडिया फ्रीडम रन‘‘ के आयोजन करे गीस। एमा नेहरू युवा केन्द्र दुरूग अउ हेमचंद यादव विश्वविद्यालय के राष्ट्रीय सेवा योजना के विद्यार्थी मन सामिल होईन। ए दउड़ सरदार वल्लभ भाई पटेल मैदान ले सुरू होके आने-आने रद्दा ले होवत वापस स्टेडियम पहुंचीस। ए दउरान जनप्रतिनिधि मन ह स्वतंत्रता सेनानी मनके योगदान ल याद करत, युवा मन ले फिटनेस ल बढ़ावा दे खातिर अपील करीन।

कोरोना समाचार

छत्तीसगढ़ म कोरोना ले बचाव खातिर अब तक 1 करोड़ 38 लाख 92 हजार ले जादा टीका लगाय जा चुके हे।
इही बीच, प्रदेस म कोरोना संक्रमण के दर म लगातार सुधार होवत हे अउ औसत पॉजिटीविटी दर शून्य दशमलव तीन प्रतिशत म आ गे हवय। काली प्रदेस म कोरोना संक्रमण के 74 ठिन नवा मामला आगू अईस। उहें, 16 ठिन जिला मन म कोरोना के एको ठिन मरीज नइ मिले हे। प्रदेस म ए बेरा करीबन 9 सौ मरीज मनके इलाज आने-आने अस्पताल या होम आइसोलेशन म चलत हवय।

रक्षाबंधन-01
भाई बहिनी के पवित्र स्नेह के प्रतीक रक्षाबंधन के तिहार आज जम्मों देस म बड उछाह के संग मनाय जावत हे। राखी तिहार, बहन के प्रति अपन भाई के प्रेम अउ कर्तव्य के प्रतीक हवय। आज के दिन बहिनी मन अपन भाई मनके हाथ म रक्षासूत्र बांधते अउ मिठाई खवाथे। भाईमन घलो अपन बहिनी मन के रक्षा के संकल्प लेके ओमन ल उपहार देथे। राष्ट्रपति रामनाथ कोविंद अउ प्रधानमंत्री नरेन्द्र मोदी ह रक्षाबंधन के मउका म लोगन मन ल अपन बधाई दीन हे।
रक्षाबंधन के तिहार छत्तीसगढ़ म घलो बड़ खुसी अउ उछाह के संग मनाय जावत हे। ए मउका म प्रजापिता ब्रम्ह्ाकुमारी ईश्वरी विश्वविद्यालय के क्षेत्रीय निदेशिका ब्रम्हाकुमारी कमला दीदी के संग ब्रम्हाकुमारी सविता दीदी अउ आने-आने बहिनी मन ह मुख्यमंत्री ल राखी बांधीन।
उहें, राज्यपाल ह मुख्यमंत्री भूपेश बघेल, पूर्व मुख्यमंत्री डॉक्टर रमन सिंह, विधानसभा अध्यक्ष डॉक्टर चरणदास महंत, नेता प्रतिपक्ष धरमलाल कौशिक, उच्च न्यायालय के कार्यवाहक न्यायाधीश प्रशांत मिश्रा ल राखी के संग उपहार भेज के रक्षाबंधन के अपन सुभकामना दीन। अइसने, रक्षाबंधन के मउका म राजभवन म पहिली बार आयोजित कारीकरम म राज्यपाल ह अधिकारी अउ करमचारी मन ल राखी बांधीन।
इही बीच, राज्यसभा सांसद छाया वर्मा अउ छत्तीसगढ़ राज्य महिला आयोग के अध्यक्ष डॉक्टर किरणमयी नायक समेत महिला जनप्रतिनिधि मन ह मुख्यमंत्री ल राखी बांधीन।
उहें, प्रयास एजुकेशन सोसायटी टिकरापारा रईपुर के पढ़ईया नोनी मन ह घलो मुख्यमंत्री के रईपुर स्थित उंखर निवास पहुंचके ओमन ल राखी बांधीन। इही बीच, मुख्यमंत्री ह लइका मनके मांग म प्रयास संस्था खातिर खेल सामग्री अउ डिजिटल ब्लैकबोर्ड बर दस लाख रूपिया के रासि स्वीकृत करीन हे।

रक्षाबंधन-02

प्रदेस के माओवाद प्रभावित इलाका म कार्य करइया अर्द्धसैनिक बल के जवान मन ल रक्षाबंधन के मउका म आने-आने सामाजिक संगठन मन के माईलोगिन मन ह राखी बांधीन। इही कड़ी म दुरूग जिला म अर्द्धसैनिक बल के संग रक्षाबंधन के तिहार मनाय खातिर आने-आने संगठन मनके माईलोगिन मन पहुंचीन अउ जवान मनके कलाई म रक्षासूत्र बांधीन।
उहें, दंतेवाड़ा जिला म आत्मसमर्पित माओवादी मन ह मुख्यधारा ले जुड़के पहिली बार रक्षाबंधन के तिहार मनाईस। ओमन ल दंतेश्वरी फाइटर्स के महिला कमांडो मन ह राखी बांधीन। अइसने, बस्तर जिला म आज पुलिस अधीक्षक जितेन्द्र सिंह मीणा अउ आने जवान मन ल माओवाद पीड़ित माईलोगिन अउ महिला पुलिस करमचारी मन ह राखी बांधीन।  
ओति, कोंडागांव जिला म ‘‘वृक्ष रक्षासूत्र एक संकल्प वृक्ष को बचाने का‘‘ कारीकरम आयोजित करे गीस, जेमा प्रदेस के कांग्रेस अध्यक्ष मोहन मरकाम ह वनमंडल कार्यालय म साल के वृक्ष ल बड़का राखी बांधीन। ए परिक्षेत्र म वनप्रबंधन समिति के सदस्य मन डहार ले हरेक बछर वृक्ष मन ल बचाय खातिर ‘‘वृक्ष रक्षा-जीवन सुरक्षा‘‘ कारीकरम के तहत ग्रामीण मन ल जागरूक करे जाथे।

दुर्गा फाइटर्स-गठन

छत्तीसगढ़ के माओवाद प्रभावित सुकमा जिला म रक्षाबंधन के मउका म दुर्गा फाइटर्स नाव के महिला कमांडो मनके नवा टीम के गठन करे गे हवय। ए टीम माओवादी मनके खिलाफ कार्रवाई म सामिल होही।
जिला के पुलिस अधीक्षक सुनील शर्मा ह ए कमांडोज मन ले भेंट करके उंखर मनके हौसत अफजाई करीन। ए दउरान दुर्गा फाइटर्स के ए महिला कमांडोज मन ह क्षेत्र ल माओवाद ले मुक्त करे के सपथ घलो लीन।

विश्व संस्कृत दिवस

आज विश्व संस्कृत दिवस के मउका म प्रधानमंत्री नरेन्द्र मोदी ह संस्कृत म जम्मों मनखे मन ल अपन सुभकामना संदेस अउ बधाई दीन हे। ओमन किहीन कि संस्कृत भाषा पुराना होय के संगेसंग आधुनिक घलो हवय। एमा गहन तत्व, ज्ञान के संग तरूण काव्य घलो हवय। श्री मोदी ह किहीन कि एखर अभ्यास सरलता ले करे जा सकथे अउ संस्कृत भासा ह परम श्रेष्ठदर्शन ले युक्त घलो हवय। एखर सेती भाषा ल जादा ले जादा लोगन मन ल पढ़ना चाही।  

मनेन्द्रगढ़-चिरमिरी-भरतपुर

प्रदेस म हालेच म घोषित नवा जिला मनेन्द्रगढ़ अब मनेन्द्रगढ़-चिरमिरी-भरतपुर नाव ले जाने जाही। ए घोसना मुख्यमंत्री भूपेश बघेल ह काली रईपुर म सक्ती अउ मनेन्द्रगढ़ जिला ले आय प्रतिनिधिमंडल ले भेंट के दउरान करीन। श्री बघेल ह किहीन कि प्रदेस म ‘‘राजीव गांधी ग्रामीण भूमिहीन कृषि मजदूर न्याय योजना‘‘ जल्दी सुरू करे जाही। एखर खातिर 01 सितंबर ले ऑनलाइन अउ ऑफलाइन आवेदन के प्रक्रिया सुरू होही। ए योजना के लाभ कृषि मजदूर अउ पौनी पसारी ले जुड़े लोगन मन ल मिलही।  

दुर्घटना

बस्तर जिला म काली देर साम होय सड़क दुर्घटना म चार झिन महिला मनके मउत होगे अउ तीन झिन आने माईलोगिन मन गंभीर रूप ले घायल होगीन। ए हादसा जिला के भनपुरी थाना क्षेत्र के देवड़ा-चमिया मार्ग म पिकअप वाहन अउ ऑटो रिक्सा के आपस म टकराय ले होईस। टक्कर अतका जबरदस्त रिहीस कि मउकाच म चार झिन महिला मनके तुरते मउत होगे। जेमा गंभीर रूप ले तीन महिला मनके इलाज डिमरापाल के अस्पताल म चलत हवय। मृत महिला मन ह चमिया अउ सिवनी गांव के रहइय्या रिहीन।
मुख्यमंत्री भूपेश बघेल ह ए सड़क हादसा म चार झिन माईलोगिन मनके मउत म दुख जताईन। ओमन के परिजन ल जिला प्रसासन डहार ले 25-25 हजार रूपिया के सहायता रासि तुरते उपलब्ध करईन।