राजीव गांधी न्याय योजना-राशि
मुख्यमंत्री भूपेश बघेल ह आज सद्भावना दिवस के मउका म राखे गे कारीकरम म राज्य के धान अउ कुसियार उत्पादक करीबन इक्कीस लाख किसान मन ल राजीव गांधी किसान न्याय योजना म एक हजार पांच सौ बाईस करोड़ रूपिया के इनपुट सब्सिडी के भुगतान सोझे उंखर बैंक खाता म करीस। मुख्यमंत्री ह ए मउका म गोधन न्याय योजना म मवेसी पलइया मन ले बिसाय गे गोबर, गौठान समिति अउ महिला स्व-सहायता ल नौ करोड़ तीन लाख रूपिया ऑनलाइन भेजीन।
कारीकरम म मुख्यमंत्री ह राजीव आश्रय योजना के हितग्राही मन ल पट्टा घलो बांटीन। ए बेरा म विधानसभा अध्यक्ष डॉक्टर चरणदास महंत समेत मंत्रिमंडल के सदस्य अउ बड़का अधिकारी मौजूद रिहीन।
जवान-शहीद
नारायणपुर जिला म आज माओवादी हमला म भारत तिब्बत सीमा पुलिस-आईटीबीपी के दू जवान सहीद होगे।
बस्तर रेंज के पुलिस महानिरीक्षक सुंदरराज पी. ह घटना के पुष्टि करत बतईन कि आईटीबीपी के जवान नारायणपुर अउ बारसूर रद्दा म रोड ओपनिंग बर निकले रिहीन। इही बेरा घात लगाय बइठे माओवादी मन ह करियामेटा कैम्प ले थोरिक दुरिहा म एम्बुस लगा के जवान मन उपर फायरिंग सुरू कर दीन। ए हमला म आईटीबीपी के अस्टिंट कमांडेंट सुधाकर सिंदे अउ सहायक उप निरीक्षक गुरूमुख सिंह सहीद होगे। सहीद सुधाकर सिंदे महाराष्ट्र के नांदेड़ जिला अउ सहीद गुरूमुख सिंह पंजाब के रायकोट के रहवइया रिहीन। ए दूनों जवान आईटीबीपी के पैंतालीस बटालियन के ई-कंपनी म तैनात रिहीन। हमला के बाद माओवादी जवान मन ले एके-सैंतालीस राइफल, दू बुलेट प्रुफ जैकेट अउ वॉकीटॉकी लूट के भाग गे।
कोविड टीका-छत्तीसगढ़
कोविड टीकाकरण के मामला म छत्तीसगढ़ देस के पहिली पांच राज्य म सामिल होगे। प्रदेस म कोविड टीकाकरण राष्ट्रीय औसत ले जादा हवय। राज्य म कोरोना रोधी टीका लगाय के काम चलत हे। एमा साठ बछर ले जादा आयु वरग के चौहत्तर प्रतिसत अउ अट्ठारह बछर ले जादा आयु वरग के चौव्वन प्रतिसत लोगन ल कोरोना के पहिली टीका लग गेहे।
इही बीच, प्रदेस म कोरोना संक्रमण के स्थिति म सरलग सुधार होवत हे। अउ औसत पॉजिटीविटी दर शून्य दशमलव एक आठ म पहुंच गेहे। प्रदेस म काली कोरोना संक्रमण के इकसठ ठन नवा मामला आगू आईस। अभी नौ सौ उनसठ मरीज मनके इलाज आने-आने अस्पताल अउ होम आइसोलेशन म चलत हे।
राष्ट्रपति संविधान-संशोधन विधेयक
राष्ट्रपति रामनाथ कोविंद ह एक सौ पांचवां संविधान संशोधन अधिनियम ल मंजूरी दे देहे। ए अधिनियम सामाजिक अउ आर्थिक रूप ले पिछड़ा वरग के पहिचान बताय बर राज्य सरकार के सक्ती ल बहाल करथे। कानून अउ न्याय मंत्रालय ह ए संबंध म अधिसूचना जारी करे रिहीस।
राष्ट्रपति ह सामान्य बीमा व्यवसाय संसोधन अधिनियम ल घलो मंजूरी दे देहे। ए विधेयक ल लोकसभा ह तीन अगस्त के अउ राज्यसभा ह ग्यारह अगस्त के पारित करे रिहीस।
आकाशवाणी-समीक्षा
आकाशवाणी महानिदेशालय अउ समाचार सेवा प्रभाग के प्रधान महानिदेशक एन. वेणुधर रेड्डी ह आज लोक सेवा प्रसारक अधिकारी अउ करमचारी मन ल समय के संग चलय अउ जादा ले जादा श्रोता मन ल आकाशवाणी ले जोड़े खातिर विश्वसनीय सूचना अउ बने कारीकरम प्रसारित करे बर किहीन। आज आकाशवाणी हैदराबाद के कामकाज के समीक्षा करत श्री रेड्डी ह किहीन कि आकाशवाणी ल अभी दुनिया के कुछेक विश्वसनीय मीडिया संगठन के श्रेणी म सामिल होय के गौरव मिले हे। ओमन अधिकारी मन ले किहीन कि आजादी के अमृत महोत्सव के मउका म स्वतंत्रता संग्राम के नायक मनके परिचय अपन माध्यम ले श्रोता मन ल करवाय। संगेसंग पोषण के संबंध म लोगन म जागरूकता बढ़ाय के आह्वान घलो करीन।
अमृत महोत्सव-क्विज प्रतियोगिता
देश के आजादी के पचहत्तर बछर पूरा होय के मउका म आजादी के अमृत महोत्सव म प्रादेशिक समाचार एकांश, आकाशवाणी रायपुर डहार ले प्रश्नोत्तरी कार्यक्रम शुरू करे गेहे।
एमा छत्तीसगढ़ी बुलेटिन सुनइया मन बर आज के सवाल हे-
‘‘बस्तर म सन 1878 म कोन रानी ह अंग्रेज मनके खिलाफ विद्रोह के बिगुल फुंके रिहीस।‘‘
श्रोता मन ह अपन जवाब ई-मेल आईडी – आर.ए.आई.पी.यू.आर. एस.ए.डब्लू. ए.एल. एट द रेट जीमेल डॅाट कॉम म या फोन नंबर 94242-08182 म एसएमएस ले भेज सकत हे। जउन श्रोता के सही जुवाब सबले पहिली मिलही ओला विजेता माने जाही अउ ओखर नाव के घोषणा काली के छत्तीसगढ़ी समाचार बुलेटिन म करे जाही। संगेसंग जीतइया प्रतिभागी ल प्रादेशिक समाचार एकांश डहार ले ई-प्रमाण पत्र घलो दे जाही।
स्कूल-समीक्षा
प्रदेस म चलत स्वामी आत्मानंद अंग्रेजी माध्यम सासकीय विद्यालय के पढ़ईया लइका मनके ऑनलाइन जांच करे जात हे। ए जांच विज्ञान, गणित अउ अंग्रेजी विषय के ओलम्पियाड ले होवत हे। स्कूल सिक्षा मंत्री डॉक्टर प्रेमसाय सिंह टेकाम ह काली अपन निवास कार्यालय ले ऑनलाइन आंकलन बर ओलम्पियाड के सुरूवात करीन। विज्ञान विषय म सात हजार दू सौ बत्तीस पढ़ईया लइका संघरीन। ए बेरा म डॉक्टर टेकाम ह किहीन कि आंकलन के पहिली ऑनलाइन परीक्षा बर हरेक विषय के विद्यार्थी मन ल मॉक टेस्ट के अभ्यास कराय जात हे।
ग्राम सभा
प्रदेस के जम्मों पंचायत म आज ले ग्राम सभा के आयोजन सुरू होगे हे। ग्रामसभा के बेरा कोरोना ले बचाव संबंधी दिसा-निरदेस के पालन करे जात हे। ग्राम सभा म कृषि, स्वास्थ्य, पीये के पानी, साफ-सफाई, पोषण अउ बाल संरक्षण के जइसन मुद्दा म सरकार के योजना म गोठबात करे जाही। संगेसंग ग्राम विकास के योजना के प्रस्ताव घलो पारित करे जाही। ए संबंध म पंचायत विभाग ह जम्मों कलेक्टर मन ल दिसा-निरदेस जारी कर देहे।
राजीव गांधी जयंती
राष्ट्र आज पूर्व प्रधानमंत्री भारत रत्न स्वर्गीय राजीव गांधी के आज जयंती म श्रद्धांजलि देवत हे। ए बेरा म उपराष्ट्रपति एम. वेकैंया नायडू अउ प्रधानमंत्री नरेन्द्र मोदी ह पूर्व प्रधानमंत्री ल श्रद्धांजलि दीन।
ऐति, छत्तीसगढ़ म घलो पूर्व प्रधानमंत्री राजीव गांधी के जयंती ल सदभावना दिवस के रूप मनाय जात हे। ए मउका म प्रदेसभर म कतकोन कारीकरम होवत हे। मुख्यमंत्री भूपेश बघेल ह रईपुर म अपन निवास कार्यालय म स्वर्गीय राजीव गांधी के चित्र म फूलमाला चढ़ाके सुरता करीन। ए बेरा म मुख्यमंत्री अउ विधानसभा अध्यक्ष डॉक्टर चरणदास महंत समेत मंत्रिमंडल के सदस्य मन ह सदभावना दिवस के सपथ लीन। मुख्यमंत्री ह किहीन कि राष्ट्र के नव-निर्माण म राजीव गांधी के योगदान ल भुलाय नइ जा सकय।
मोहर्रम
आसुरा ए-मोहर्रम आज छत्तीसगढ़ समेत देसभर म सांति अउ सद्भावना के संग मनाय जात हे। ए दिन ल पैगम्बर मोहम्मद के नवासा हजरत इमाम हुसैन अउ उंखर साथी के सहादत के सुरता म मनाय जाथे। वैश्विक महामारी कोरोना ल देखत एसो ताजिया जुलूस बड़े पैमाना नइ निकाले जावत हे।
नरेगा-प्रशिक्षण
महात्मा गांधी राष्ट्रीय ग्रामीण रोजगार गारंटी अधिनियम-मनरेगा म नरेगा सॉफ्ट अउ आने एप्लीकेशन एमा होय संशोधन के संबंध म प्रदेसभर के ग्राम रोजगार सहायक अउ जम्मों जिला म काम करत डाटा एंट्री ऑपरेटर मन प्रसिक्षण दे जाही। एखर बर ठाकुर प्यारेलाल राज्य पंचायत अउ ग्रामीण विकास संस्थान निमोरा म अवइया चौबीस अगस्त ले सात सितंबर तक कार्यशाला राखे जाही।