प्रधानमंत्री-संस्कृत सप्ताह
प्रधानमंत्री नरेन्द्र मोदी ह आज ले शुरू होय संस्कृत सप्ताह के अवसर म लोगन मन ल एखर बधाई दीन। जानबा के अनुसार संस्कृत भाखा ल बढ़ावा दे अउ लोकप्रिय बनाये खातिर आज ले पच्चीस अगस्त तक संस्कृत सप्ताह के आयोजन करे जात हे।
प्रधानमंत्री ह अपन संदेश म कीहिन कि ए ह खुशी के बात हे कि संस्कृत भाषा आधुनिक प्रौद्योगिकी के माध्यम ले जादा ले जादा मनखे तक पहुंचत हे।
राष्ट्रीय शिक्षा नीति
राष्ट्रीय शिक्षा नीति के तहत अब प्रदेश म घलो स्कूल शिक्षा विभाग डहार ले स्कूली लईका मन ल पढ़ई के संगेसंग हुनरमंद बनाये के तियारी करे जात हे। एखर चलत कक्षा छठवीं ले आठवीं तक के लईका मन ल कम से कम दस दिन शिल्प अउ व्यावसायिक कौशल के प्रशिक्षण दे जाही।
एमा मूर्तिकला, चित्रकला, संगीत, लोकनृत्य, बांस शिल्प, बिजली के काम, माटी के बर्तन बनाये जइसन काम शामिल हवय।
सड़क परिवहन-अधिसूचना
केंद्रीय सड़क परिवहन अउ राजमार्ग मंत्रालय ह सड़क सुरक्षा ल देखत राष्ट्रीय अउ राज्य के प्रमुख राजमार्ग म इलेक्ट्रॅानिक उपकरण के बउरे ले जुड़े एक अधिसूचना जारी करे हे। राजमार्ग म जादा खतरा वाले जगा अउ एक सौ बत्तीस शहर समेत दस लाख ले जादा आबादी वाले प्रमुख शहर के मुख्य जगा म ए सबो इलेक्टॅ्रानिक उपकरण ल लगाये जाही। एमा स्पीड कैमरा, क्लोज सर्किट टेलिविजन कैमरा, स्पीड गन, अउ आने आने बिजली के उपकरण शामिल हे।
मुख्यमंत्री नये जिले
मुख्यमंत्री भूपेश बघेल ह प्रदेश के नवा बने चार ठिन जिला म अपन प्रतिक्रिया दीन। ओमन कीहिन कि नवा जिला बर अधिकारी मनके नियुक्ति करे के संगेसंग अधिसूचना निकाले जाही अउ ओखर बाद दावा आपत्ति लेके काम होही।
ओमन ह कीहिन कि प्रशासनिक इकाई ल छोटे करे जात हे, ताकि प्रशासन ह आम मनखे तक पहुंच सके। मुख्यमंत्री ह काली रायपुर म नवगठित सक्ति जिला अउ बलौदाबजारा-भाटापारा जिला के सुहेला तहसील ले आये मनखे मन ल संबोधित करत ए जानकारी दीन।
नदी तट रोपण
प्रदेश म नदिया के तट ल हरा-भरा बनाये खातिर नदी-तट वृक्षारोपण कार्यक्रम चलाये जात हे। जेखर तहत ए मानसून म प्रदेश के प्रमुख अठाईस ठिन नदिया के तट म करीबन ग्यारा लाख ठिन पौधा लगाये जाय के लक्ष्य राखे गेहे। नदिया के तट म वृक्षारोपण कार्य कैम्पा, मनरेगा अउ जिला खनिज न्यास निधि ले करे जात हे।
इही बीच छत्तीसगढ़ विधानसभा आवासीय परिसर म आज वृक्षारोपण कार्यक्रम के आयोजन करे गेहे । ए कार्यक्रम म विधानसभा के प्रमुख सचिव चंद्रशेखर गंगराड़े अउ आवासीय परिसर के अधिकारी अउ कर्मचारी मन डहार ले पौधा लगाये गीस।
स्वीप कोर कमेटी
मतदान के प्रति जागरूकता बढ़ाये खातिर छत्तीसगढ़ के मुख्य निर्वाचन पदाधिकारी के अध्यक्षता म राज्य स्तरीय स्वीप कोर कमेटी के गठन करे गेहे। ए कमेटी म अतिरिक्त मुख्य निर्वाचन पदाधिकारी, संयुक्त मुख्य निर्वाचन पदाधिकारी अउ उप मुख्य निर्वाचन पदाधिकारी ह सदस्य होही।
कमेटी म आरओबी अउ पीआईबी रायपुर के एडिशनल डॉयरेक्टर जनरल, दूरदर्शन अउ आकाशवाणी रायपुर के निदेशक ल घलो सदस्य के रूप म शामिल करे गेहे।
कोविड टीका
देश म कोरोना संक्रमण ले बचे खातिर अब तक छप्पन करोड़ चौसठ लाख ले जादा टीका लगाये गेहे। स्वास्थ्य मंत्रालय ह बताइन कि पाछू चौबीस घंटा के बेरा म छप्पन लाख छत्तीस हजार ले जादा मनखे मनके टीकाकरण करे गेहे।
एति छत्तीसगढ़ म घलो टीकाकरण के काम सरलग जारी हे। अब तक एक करोड़ छत्तीस लाख अठासी हजार ले जादा टीका लगाये जा चुके हे। इही बीच प्रदेश म कोरोना ले संक्रमित मरीज मनके संख्या एक हजार ले कमती होगे हे। राज्य के आठ ठिन जिला म काली कोरोना संक्रमण के एक भी मामला आगू नइ आय हे। एमा बालोद, बेमेतरा, कबीरधाम, मुंगेली, गौरेला-पेण्ड्रा-मरवाही, सूरजपुर, कोंडागावं अउ नारायणपुर जिला शामिल हवय। उंहें काली राज्य म कोरोना संक्रमण ले कोनो भी मनखे के मउत नइ होय हे।
राज्यपाल- स्व सहायता समूह
दुर्ग जिला के कुकरेल गांव के नव ज्योति स्व सहायता समूह अउ उमरकोटि के रिद्धि सिद्धि स्व सहायता समूह के माइलोगिन मन ह राजभवन पहुंच के राज्यपाल अनुसूइया उइके ले मुलाकात करीन।
माइलोगिन मन ह अपन हाथ ले बनाये गे राखी ल राज्यपाल ल भेंट करीन। राज्यपाल ह ओमन ल बधाई देत कीहिन कि ए ह बहुत अच्छा प्रयास हे अउ ए काम ले जादा ले जादा माइलोगिन मन ल जोड़े के जरूरत हवय।
प्रमोद शुक्ला राष्ट्रीय पुरस्कार
बस्तर जिला के करपावंड-बकावंड के एकलव्य आदर्श आवासीय विद्यालय के व्याख्याता प्रमोद कुमार शुक्ला ल बछर दू हजार इक्कीस के राष्ट्रीय पुरस्कार दे जाही। ए पुरस्कार ह केंद्रीय शिक्षा मंत्रालय के स्कूल शिक्षा अउ साक्षरता विभाग डहार ले दे जात हे। मुख्यमंत्री भूपेश बघेल अउ स्कूल शिक्षा मंत्री डॅाक्टर प्रेमसाय सिंह टेकाम ह प्रमोद कुमार शुक्ला ल बधाई अउ शुभकामना दीन हे।
दंतेवाड़ा पुल
दंतेवाड़ा जिला म पहिली घांव अंदरूनी इलाका म लोहा के पुल बनाये जात हे। ताकि ए इलाका के रद्दा ह मुख्यालय ले जुड़ सकय। जिला म अइसने सात ठिन पुल बनाया जाना हे, जेमा पहिली पुल कुआकोंडा ब्लॉक के बर्रेम ले मलगेर नाला म बनके तियार होगे हे।
विशेष योगाभ्यास कार्यक्रम
छत्तीसगढ़ योग आयोग डहार ले यूनिसेफ के सहयोग ले गर्भवती माइलोगिन मन बर एक ठिन विशेष योगाभ्यास कार्यक्रम चलाये जाही। एखर शुरूआत कोंडागांव जिला ले होवइया हे।
योग आयोग के अध्यक्ष ज्ञानेश शर्मा के अध्यक्षता म रायपुर म आयोजित योग प्रभारी मनके एक ठिन बइठका म ये जानकारी दे गीस।
अमृत महोत्सव-क्विज प्रतियोगिता
देश के स्वतंत्रता के पचहत्तर बछर पूरा होय के मउका म आजादी के अमृत महोत्सव म प्रादेशिक समाचार एकांश, आकाशवाणी रायपुर कोति ले छै अगस्त ले एक प्रश्नोत्तरी कार्यक्रम शुरू करे गेहे। जेखर चलत एमा छत्तीसगढ़ म स्वतंत्रता संग्राम के बेरा होय घटना, राज्य के स्वतंत्रता सेनानी, अउ समाज सुधारक मनले जुड़े प्रश्न पूछे जात हे।
ए प्रतियोगिता के तहत काली बीस अगस्त के छत्तीसगढ़ी अउ हिंदी प्रादेशिक समाचार बुलेटिन म आने आने सवाल पूछे जाही अउ ये दूनो समाचार बुलेटिन म पूछे गे सवाल के आधार म सबले पहिली सही जवाब देवइया एक-एक विजेता मन ल चुने जाही।
श्रोता मन ल ई-मेल या फिर एसएमएस ले जवाब देना हे। ये जवाब ई-मेल आईडी आर.ए.आई.पी.यू.आर.एस.ए.डब्लू.ए.एल एट द रेट जीमेल डॅाट कॉम- म या फेर फोन नंबर 94242-08182 म एसएमएस ले भेजे जा सकथे।
ये प्रतियोगिता म वाट्सअप म भेजे गे जवाब मान्य नइ होही। जउन श्रोता के सबले पहिली सही जवाब मिलही ओला विजेता माने जाही अउ उंखर नाव के घोषणा अवइया समाचार बुलेटिन म करे जाही। संगेसंग प्रादेशिक समाचार एकांश कोति ले डिजिटल प्रमाण पत्र घलो जारी करे जाही।