प्रधानमंत्री संवाद
प्रधानमंत्री नरेंद्र मोदी ह आज वीडियो कॅान्फ्रेसिंग के माध्यम ले टोक्यो 2020 पैरा ओलंपिक बर भारतीय पैरा एथलीट दल के सदस्य मनले गोठबात करीन। प्रधानमंत्री ह देश म खेल संस्कृति ल विकसित करे बर तकनीक मन म लगातार सुधार करे उपर जोर देत हे। श्री मोदी ह कीहिन कि राष्ट्रीय खेल, पारंपरिक भारतीय खेल मन ल नवा पहचान मिलही। प्रधानमंत्री ह कीहिन कि देश के 250 ले जादा जिला मन म 360 खेलो इंडिया केंद्र खोले गेहे अउ अवइया बेरा म ए केंद्र मनके संख्या बढ़ाके 1 हजार कर दे जाही। 09 स्पर्धा मन म भाग लेबर 54 सदस्य मनके पैरा एथलीट्स दल टोक्यो पैरा ओलंपिक म शामिल होही। ये पैरा ओलंपिक खेल मन म अब तक के भारत के सबले बड़े दल हरे।
कोरोना टीका समाचार
प्रदेश म कोरोना ले बचाव बर अब तक 01 करोड़ 35 लाख इक्कीस हजार ले जादा टीका लगाये जा चुके हे। एमा 01 करोड़ 06 लाख 07 हजार ले जादा डोज अउ 28 लाख 61 हजार ले जादा दूसर डोज शामिल हे। इही बीच प्रदेश म कोरोना संक्रमण के औसत पॉजीटिविटी दर गिरके 0.2 प्रतिशत म आगे हे। प्रदेश म काली कोरोना संक्रमण के 68 नवा मामला आगू आइस। काली प्रदेश के 06 जिला बालोद, बेमेतरा, कबीरधाम, गौरेला-पेण्ड्रा-मरवाही कोरिया अउ सुकमा म कोरोना के एको झिन मरीज नइ मिले हे।
प्रधानमंत्री आवास योजना
केंद्रीय आवास अउ शहरी कार्य मंत्रालय ह प्रधानमंत्री आवास योजना- शहरी के अंतर्गत 16 हजार 4 सौ 88 आवासीय इकाई तैयार करे के प्रस्ताव ल स्वीकार कर ले गेहे। केंद्रीय स्वीकृति अउ निगरानी समिति के 55 वां बैठक म ये निर्णय ले गेहे। ये सबो मकान किफायति आवास योजना के अंतर्गत तैयार करे जाही। एखरे संग प्रधानमंत्री आवास योजना-शहरी योजना के अंतर्गत स्वीकृत करे गे घर मनके संख्या 113 लाख ले घलो जादा होगे हे। एमा ले 51 लाख ले जादा मकान लाभार्थी मन ल दे जा चुके हे। नई दिल्ली म वीडियो कॅान्फ्रेसिंग के माध्यम ले बैठक के अध्यक्षता करत केंद्रीय आवास अउ शहरी कार्य मंत्रालय के सचिव दुर्गा शंकर मिश्रा ह ये जानकारी दीन।
मुख्यमंत्री पंजीयक कार्यालय
मुख्यमंत्री भूपेश बघेल ह कीहिन कि राज्य सरकार , आम जनता ले जुड़े सेवा मनके प्रक्रिया ल बेहतर बनाये बर काम करत हे। मुख्यमंत्री ह आज वीडियो कॉन्फ्रेसिंग के माध्यम ले नवा रायपुर के सेक्टर 29 म नवीन उप पंजीयक कार्यालय के शुभारंभ करीन। ए मउका म ओमन कीहिन कि ए पंजीयक कार्यालय के शुरू होय ले नवा रायपुर सहित आसपास के 41 गांव म लोगन मन ल पंजीयन के सुविधा मिलही। ए समय ओमन ल पंजीयन बर रायपुर आये बर पड़थे। कार्यक्रम म श्री बघेल ह पंजीयन विभाग के बैकलॉग दस्तावेज मनके स्कैनिंग अउ डिजिटलाइजेशन के काम अउ डिजिटल ई-स्टॉम्प सुविधा के घलो शुरूआत करीन। जानकारी के अनुसार छत्तीसगढ़ म अभी के बेरा म 98 पंजीयन कार्यालय हे। नवा रायपुर के ए कार्यालय ल मिलाके अब प्रदेश म 99 पंजीयन कार्यालय हो जाही।
गृहमंत्री योग
गृहमंत्री ताम्रध्वज साहू ह कीहिन हे कि योग हमर प्राचीन संस्कृति के हिस्सा हरे। एखर बर लोगन मन ल जागरूक करे के जरूरत हे। गृहमंत्री ह आज रायपुर म आयोजित एक ठिन कार्यक्रम म ‘डायबिटिज रोग निवारक योग‘ के वीडियो ब्लॉग के शुभारंभ करीन। ए वीडियो ल सोशल मीडिया म प्रसारित करे जाही। ए मउका म श्री साहू ह कीहिन कि योग बर जागरूक रेहे ले लोगन मन ल फायदा होही।
अमृत महोत्सव क्विज
देस के पचहत्तरवां स्वाधीनता दिवस समारोह के उपलक्ष्य म आजादी के अमृत महोत्सव के तहत केंद्र सरकार ह कतकोन आयोजन करत हे। अइसने जन उत्सव के रूप म आकाशवाणी समाचार ह स्वाधीनता संग्राम अउ उंखर गौरवशाली इतिहास उपर 16 अगस्त ले विशेष प्रश्नोत्तरी के शुरूआत करे हे। ए प्रश्नोत्तरी प्रतियोगिता 15 अगस्त 2022 तक हर सोमवार अउ मंगलवार के समाचार प्रभात म शामिल होही। आज के प्रश्न हे – भारत के आखरी अउ सबले पहिली भारतीय गवर्नर जनरल कोन रीहिन ? श्रोता मन अपन जवाब अमृत महोत्सव क्विज एट द रेट जी मेल डॅाट कॅाम म ई-मेल म भेज सकत हो। आप मन जवाब के संग अपन नाव, पता अउ फोन नंबर घलो भेजव। विजेता के घोषणा काली के समाचार प्रभात म करे जाही।
माशिमं-परीक्षा
छत्तीसगढ़ माध्यमिक शिक्षा मंडल डहार ले संचालित हायर सेकण्डरी मुख्य परीक्षा म अनुपस्थित या अनुत्तीर्ण पढ़ईया मन बर परीक्षा के आयोजन आज ले 31 अगस्त तक करे जात हे। जउन परीक्षार्थी सैद्धांतिक प्रायोगिक अउ प्रायोजना परीक्षा म फेल होय हे। ओमन ल पूरक परीक्षा म शामिल होना जरूरी हे। एखरे संग यदि कोनो छात्र सिरिफ प्रायोगिक अउ प्रायोजना परीक्षा म अनुपथित रेहे के सेती फेल होगे हे। ओमन ल अवइया बछर 2022 म मुख्य परीक्षा म शामिल होय के मउका दे जाही।
मौसम
मौसम विभाग ह अवइया चौबीस घंटा म प्रदेश के बिलासपुर अउ सरगुजा संभाग म एक-दू जगा मन म भारी ले अतिभारी बरसात होय के चेतावनी देहे। उंहें प्रदेश के कतकोन इलाका मन म गरज-चमक के संग हल्का ले मध्यम बरसात होय के संभावना जताय हे।
फ्लैगशिप-स्वच्छता अभियान
जशपुर जिला के गम्हरिया गांव खुला म शौचमुक्त गांव के संग प्लास्टिक अउ कूड़ा करकट मुक्त ग्राम पंचायत बन गेहे। ये बदलाव इंहा के सूरज स्व सहायता समूह के स्वच्छता दीदी मनके जागरूकता ले आय हे। समूह के ए महिला मन ह मनरेगा अउ स्वच्छ भारत मिशन के अंतर्गत गली, सड़क अउ चौक चौराहा म फेके गे कचरा ल इकट्ठा करके अलग-अलग निस्तारी करे के काम करीन। शुरूआत म महिला मन घर ले कचरा इकट्ठा करीन बाद म ग्रामीण अपन घर के कचरा ल ठोस अउ तरल अपशिष्ट प्रबंधन केंद्र म जमा करे बर शुरू कर दीन। ए कचरा म पॉलीथिन, खाये के सामान के रैपर, प्लास्टिक के सामान, लोहा के कबाड़ अउ कांच जइसे अपशिष्ट मन ल ए महिला मन ह अलग करके बेचीस। सूरजपुर स्व सहायता समूह के सचिव सुनीता कुजूर ह बताइस कि कचरा संग्रहण केंद्र म समूह के 12 महिला मन ह 2020 ले जुड़े हे। ये महिला मन ह घर ले कचरा इकट्ठा करके हर घर ले हर महीना 10 रूपिया अउ दुकानदार मनले 20 रूपिया के स्वच्छता शुल्क लेथे। एक साल म समूह करा 35 हजार रूपिया के स्वच्छता शुल्क जमा होय हे। गम्हरिया गांव के सरपंच विलियम कुजूर ह बताथे कि ग्राम पंचायत के प्रस्ताव म ग्राम सभा के अनुमोदन के बाद मनरेगा ले 2 लाख 69 हजार अउ स्वच्छ भारत मिशन ले 85 हजार रूपिया मिले हे। एखर ले 6 परिवार मनके 11 लोगन मन ल रोजगार मिले हे। संगेसंग समूह के बारा महिला मन ल अतिरिक्त आमदनी होवत हे।
अउ अब थोरकुन समाचार सार म-
हेमचंद यादव विश्वविद्यालय, दुर्ग म आयोजित 51 म ले 21 वार्षिक परीक्षा के परिणाम घोषित कर दे गेहे। संगेसंग एम.कॉम पहिली सेमेस्टर म प्रवेश बर पोर्टल खोल दे गेहे। – यात्री मनके सुविधा ल धियान म राखत रायपुर रेल मंडल ह पुरी-दुर्ग-पुरी स्पेशल ट्रेन के परिचालन 21 अगस्त ले फेर शुरू करे के फैसला लेहे। ए ट्रेन म 20 कोच के सुविधा रीही। – राजनांदगांव जिला म छुरिया अउ चिचोला ब्लॉक के सैकड़ों ग्रामीण मन ह बिजली आपूर्ति बहाल करे के मांग ल लेके मुख्य मार्ग म चक्का जाम करीन। बाद म अपर कलेक्टर के समझाइश के बाद ग्रामीण मन ह चक्का जाम खतम करीन। – चिटफंड कंपनी मनले धन वापसी बर निवेशक मन अपन आवेदन पत्र बीस अगस्त के मोहर्रम अवकाश के बाद घलो जमा कर सकथे। अउ – कबीरधाम जिला के लोहारा क्षेत्र के जंगल म जुंआ खेलइया 22 लोगन मन ल पुलिस ह गिरप्तार करे हे। उंखर मन करा ले 01 लाख 09 हजार रूपिया नकद बरामद करे गेहे।