स्वतंत्रता दिवस-ध्वजारोहण
हमर देस ह काली 15 अगस्त के अपन पचहत्तरवां स्वतंत्रता दिवस मनाही। ए मउका म प्रधानमंत्री नरेन्द्र मोदी काली नई दिल्ली के लाल किला के प्राचीर ले राष्ट्र ल संबोधित करही। एखर पहिली, बिहनिया साढ़े सात बजे ओमन ह ध्वजारोहण करही अउ राष्ट्रपिता महात्मा गांधी के समाधि स्थल राजघाट म जाके पुष्पांजलि घलो अर्पित करही।
ऐति, छत्तीसगढ़ म घलो स्वतंत्रता दिवस समारोह गरिमा अउ उछाह के संग मनाय जाही। एखर बर सब्बो तियारी पूरा कर ले गे हवय। मुख्यमंत्री भूपेश बघेल काली राजधानी रईपुर के पुलिस परेड ग्राउंड म राखे गे मुख्य समारोह म झंडा फहराही। उहें, विधानसभा अध्यक्ष डॉक्टर चरणदास महंत ह कोरिया अउ उपाध्यक्ष मनोज सिंह मंडावी ह कोंडागांव जिला मुख्यालय म झंडा फहराही। गृहमंत्री ताम्रध्वज साहू महासमुंद, पंचायत मंत्री टी.एस. सिंहदेव कबीरधाम, कृषि मंत्री रविन्द्र चौबे रायगढ़, वन मंत्री मोहम्मद अकबर दुरूग अउ स्कूल शिक्षा मंत्री डॉक्टर प्रेमसाय सिंह टेकाम कोरबा म झंडा फहरा के परेड के सलामी लीहीं। अइसने, आबकारी मंत्री कवासी लखमा बस्तर, नगरीय प्रसासन मंत्री डॉक्टर शिवकुमार डहरिया सरगुजा, खाद्य मंत्री अमरजीत भगत राजनांदगांव, उच्च शिक्षा मंत्री उमेश पटेल बलौदाबाजार-भाटापारा, राजस्व मंत्री जयसिंह अग्रवाल बिलासपुर, ग्रामोद्योग मंत्री गुरू रूद्रकुमार मुंगेली अउ समाज कल्याण मंत्री अनिला भेंडिया ह कांकेर जिला मुख्यालय म राखे गे स्वतंत्रता दिवस समारोह म झंडा फहराही। ए मउका म मुख्यमंत्री के प्रदेस के नाम संदेस के वाचन घलो करे जाही।
ओति, छत्तीसगढ़ उच्च न्यायालय बिलासपुर म स्वतंत्रता दिवस के मउका म न्यायधीश प्रशांत कुमार मिश्रा डहार ले ध्वजारोहण करे जाही। उहें, दक्षिण पूर्व मध्य रेलवे रईपुर रेलमंडल के प्रबंधक श्याम सुंदर गुप्ता ह डीआरएम कार्यालय परिसर म झंडा फहराही।
पुलिसकर्मी-पदक
स्वतंत्रता दिवस के मउका म एक हजार तीन सौ अस्सी पुलिसकर्मी मन ल पदक दे जाय के घोसना करे गे हवय। एमा छत्तीसगढ़ के घलो बीस पुलिस जवान सामिल हे। अमर दीप अउ दिवंगत सुनील दत्तात्रे काले ल वीरता बर राष्ट्रपति के पुलिस पदक दे गे हवय।
छह सौ अट्ठाईस वीरता पदक लेवइया पुलिसकर्मी मन म तीन सौ अंठानवे जम्मू कश्मीर क्षेत्र म, एक सौ पचपन वामपंथी उग्रवाद प्रभावित क्षेत्र म अउ सत्ताईस पुलिस कर्मी मन ह पूर्वोत्तर क्षेत्र म वीरता के प्रदर्सन करीन। वीरता पुरस्कार पाने वाला दू सौ छप्पन जम्मू-कश्मीर पुलिस ले, एक सौ इंक्यावन केन्द्रीय रिजर्व पुलिस बल ले अउ तेईस झन भारत-तिब्बत सीमा पुलिस बल ले हवय।
पुलिस सेवा-पदक
पुलिस सेवा के क्षेत्र म स्वतंत्रता दिवस के मउका म देवइया पदक के घोसना कर दे गेहे। पुलिस वीरता पदक ले छत्तीसगढ़ के इक्कीस झिन पुलिसकर्मी मन ल सम्मानित करे जाही। एमा विशिष्ट सेवा बर राष्ट्रपति पदक ले एक अउ सराहनीय सेवा बर पुलिस पदक ले दस पुलिसकर्मी मन ल सम्मानित करे जाही।
विभाजन विभीषिका स्मृति दिवस
प्रधानमंत्री नरेन्द्र मोदी ह किहीन हे कि देस के बंटवारा के दुख ल कभू भूलाय नइ जा सकय। काबर कि उन्माद म होय हिंसा अउ घृणा के लाखों भाई-बहिनी मन विस्थापित होगे रिहीन अउ कतकोन मन ह जान गंवाय रिहीन। श्री मोदी ह किहीन कि उंखर संघर्ष अउ बलिदान के सुरता म चौदह अगस्त के ‘‘विभाजन विभीषिका स्मृति दिवस‘‘ के रूप म मनाय जाही। ओमन किहीन कि हमन कामना करथन कि एखर ले लोगन ल ए समझे म मदद मिलही कि सामाजिक विभाजन अउ दुर्भावना के जहर ल जड़ ले खतम करना जरूरी हे।
अमृत महोत्सव-क्विज विजेता
आजादी के अमृत महोत्सव म प्रादेशिक समाचार एकांश, आकाशवाणी, रईपुर डहार ले आयोजित करे जावत ‘‘प्रश्नोत्तरी प्रतियोगिता म हमर श्रोता मन ह बड़ उछाह के संग भाग लेवत हे। काली ए प्रश्नोत्तरी श्रृंखला के दूसर अंक म छत्तीसगढ़ी बुलेटिन म प्रश्न पूछे गे रिहीस कि ‘‘सन् 1825 म अंग्रेज मनके खिलाफ जनजातीय मनके परलकोट सशस्त्र संघर्ष के नेतृत्व कोन करे रीहिन। एखर सही जवाब हे- गेंदसिंह। सवाल के जवाब म बड़ संख्या म लोगन जवाब भेजीन हे। फेर, सबले पहिली जवाब भेजइया विजेता हवय – मुंगेली जिला के जरहागांव निवासी श्री राकेश कुमार साहू। आकाशवाणी परिवार डहार ले श्री साहू ल हमन हार्दिक बधाई अउ सुभाकामना देवत हन।
सुनइया मन ल बतादन कि राकेश कुमार साहू ह आकाशवाणी समाचार ल बतईन कि ए प्रतियोगिता ले ओमन ल बहुत जानकारी मिलत हे अउ ज्ञान बाढ़त हे। ओमन ह किहीन कि जबले छत्तीसगढ़ी बुलेटिन के सुरूवात होय हे, हर दिन समाचार ल सुनथे, जेखर ले ओमन ल आसपास होय घटना के अउ जरूरी सूचना के जानकारी मिलथे।
विशेष साक्षात्कार
देस के आजादी के पचहत्तर बछर पूरा होय के मउका म आजादी के अमृत महोत्सव म प्रादेशिक समाचार एकांश, आकाशवाणी रईपुर डहार ले एक ठन बिसेस श्रृंखला प्रसारित करे जावत हे। एखर दूसर कड़ी के रूप म वरिष्ठ पत्रकार अउ विश्लेषण शशांक शर्मा ले गे बिसेस साक्षात्कार के प्रसारण आकाशवाणी केन्द्र रईपुर डहार ले काली रविवार पन्द्रह अगस्त के बिहनिया नौ बजके तीस मिनट ले करे जाही। एला सब्बो केन्द्र मन ह एके संघरा रिले करही।