प्रधानमंत्री वाहन स्क्रैपिंग नीति
प्रधानमंत्री नरेंद्र मोदी ह गुजरात के गांधीनगर ले वीडियो कॅान्फ्रेसिंग के माध्यम ले आज राष्ट्रीय वाहन स्क्रैपिंग नीति अउ निवेशक सम्मेलन के विधिवत उद्घाटन करीन।
ए मउका म श्री मोदी ह कीहिन कि वाहन स्क्रैपिंग नीति भारत के विकास यात्रा म महत्वपूर्ण पड़ाव हरय। सम्मेलन ल संबोधित करत ओमन कीहिन कि नवा वाहन निस्तारण नीति ले हमर वाहन उद्योग ल नवा पहिचान अउ नवा उर्जा मिलही। श्री मोदी ह कीहिन कि ए बेवस्था ले वैज्ञानिक तरीका ले अनुपयोगी वाहन हटही, संगेसंग अर्थव्यवस्था म घलो तेजी आही।
अमृत महोत्सव-फिट इंडिया फ्रीडम
केंद्रीय खेल मंत्री अनुराग ठाकुर ह आज नई दिल्ली के मेजर ध्यानचंद नेशनल स्टेडियम ले फिट इंडिया फ्रीडम रन के दूसर चरण के राष्ट्रव्यापी कार्यक्रम के शुरूआत करीन।
ए कार्यक््रम आजादी के अमृत महोत्सव के अवसर उपर आयोजित करे जात हे। राजधानी दिल्ली के संग एतिहासिक रूप ले प्रसिद्ध देश के पचहत्तर आने जगा ले घलो एखर आयोजन करे जात हे।
श्री ठाकुर ह वीडियो कॉन्फ्रेंस के माध्यम ले पूरा देश म आयोजक मनले गोठबात करीन। ए मउका म श्री ठाकुर ह कीहिन कि शारीरिक रूप ले स्वस्थ रेहे बर तीस मिनट के ए अभ्यास के आह्वान करे गेहे।
आजादी के अमृत महोत्सव म छत्तीसगढ़ के अंबिकापुर अउ गौरेला-पेण्ड्रा-मरवाही जिला म फिट इंडिया फ्रीडम रन के आयोजन करे गीस। नेहरू युवा केंद्र संगठन अउ फिल्ड आउट रिच ब्यूरो अंबिकापुर डहार ले आयोजित कार्यक्रम म संत गहिरा गुरू विश्वविद्यालय के कुलपति प्रोफेसर अशोक सिंह अउ महापौर डॅाक्टर अजय तिर्की ह ए फ्रीडम रन ह हरा झण्डी दिखाके रवाना करीन।
खबर के मुताबिक प्रदेश के सबो जिला मन म अलग अलग तारीख म फिट इंडिया फ्रीडम रन के आयोजन दू अक्टूबर तक करे जाही।
पुलिस उत्कृष्ट विवेचना मेडल
केंद्र सरकार डहार ले छत्तीसगढ़ के तीन पुलिस अधिकारी मन ल उत्कृष्ट काम बर मेडल देके घोषणा करे गेहे। एमा बेमेतरा जिला के उप पुलिस अधीक्षक राजीव शर्मा, राजनांदगांव के उप निरीक्षक इंदिरा वैष्णव अउ बस्तर जिला म पदस्थ सहायक उप निरीक्षक इंदु शर्मा शामिल हे।
ए तीनों पुलिस अधिकारी मन ल अलग अलग प्रकरण म उत्कृष्ट विवेचना करे बर पुरस्कार दे जाही। गृहमंत्री ताम्रध्वज साहू अउ पुलिस महानिदेश डी.एम. अवस्थी ह ए अधिकारी मन ल बधाई अउ शुभकामना दीन।
विद्युत मंत्रालय प्रीपेड स्मार्ट मीटर
विद्युत मंत्रालय ह सबो केंद्रीय मंत्रालय मनले परामर्श जारी कर अपन प्रशासनिक नियंत्रण म अवइया संगठन मनले प्राथमिकता के आधार म प्रीपेड स्मार्ट मीटर के उपयोग करे बर केहे हे। मंत्रालय मनले ए संबंध म सबो जरूरी आदेश जारी करे बर घलो केहे गेहे। एखर बाद वित्त मंत्रालय ह निर्देश जारी करके सबो केंद्रीय मंत्रालय अउ केंद्रीय विभाग ल प्रीपेड मीटर के बिजली बर कोनो भी प्रकार के बैंक गारंटी उपर जोर दे बिना अग्रिम भुगतान करे के निर्देश देहे।
विद्युत कंपनी भर्ती
छत्तीसगढ़ राज्य विद्युत नियामक आयोग म पंद्रह सौ लाइन परिचारक के पद म सीधी भर्ती करे जाही। ए भर्ती म छत्तीसगढ़ मूल निवासी मन ल प्राथमिकता दे जाही।
बस्तर अउ सरगुजा क्षेत्र म उंहे के निवासी आवेदन कर सकत हे। लाइन परिचारक के पद उपर भर्ती बर ऑनलाईन आवेदन के प्रक्रिया इक्कीस अगस्त ले शुरू होही, जउन सितंबर तक चलही।
अमृत महोत्सव-क्विज प्रतियोगिता
देश के आजादी के पचहत्तर बछर पूरा होय के मउका म आजादी के अमृत महोत्सव के तहत प्रादेशिक समाचार एकांश, आकाशवाणी रायपुर डहार ले प्रश्नोत्तरी कार्यक्रम शुरू करे गेहे।
एमा छत्तीसगढ़ी बुलेटिन सुनइया मन बर आज के सवाल हे-
‘‘सन 1825 म अंग्रेज मनके खिलाफ जनजाती मनके परलकोट सशस्त्र संघर्ष के नेतृत कौन करे रीहिन।‘‘
श्रोता मन ह अपन जवाब ई-मेल आईडी – आर.ए.आई.पी.यू.आर.एस.ए. डब्लू. ए.एल. एट द रेट जीमेल डॅाट कॉम म या फोन नंबर 94242-08182 म एसएमएस के माध्यम ले भेज सकत हे। जउन श्रोता के सही जवाब सबले पहिली मिलही ओला विजेता माने जाही अउ ओखर नाव के घोषणा काली के छत्तीसगढ़ी समाचार बुलेटिन म करे जाही। संगेसंग ओला प्रादेशिक समाचार एकांश डहार ले प्रमाण पत्र घलो जारी करे जाही।
अमृत महोत्सव-क्विज प्रतियोगिता
आकाशवाणी के समाचार सेवा प्रभाग ह आजादी के अमृत महोत्सव समारोह के भीतर बछर भर चलइया अमृत महोत्सव क्विज के आयोजन करे हे। आकाशवाणी समाचार के संग अमृत महोत्सव क्विज शीर्षक ले ये कार्यक्रम सोमवार सोला अगस्त ले शुरू होवत हे। एला एफ.एम. गोल्ड चैनल म सुने जा सकही।
कार्यक्रम के उद्देश्य देश के स्वतंत्रता आंदोलन एखर गौरवशाली इतिहास, कला संस्कृति अउ धरोहर के संग पाछू पचहत्तर बछर म जीवन के आने आने क्षेत्र म आये बदलवा के बारे म लोगन ल जागरूक करना हे। हरएक सोमवार अउ मंगलवार के बीहनिया आठ बजे समाचार प्रभाग अउ बीहनिया साढ़े आठ बजे मॉर्निंग न्यूज के शुरूआत म हिंदी अउ अंग्रेजी म एक-एक सवाल पूछे जाही। ए सवाल दूनो समाचार बुलेटिन के आखरी म दोहराये जाही।
श्रोता मन ह ई-मेल या अमृत महोत्सव क्विज एट द रेट जी मेल डॅाट कॅाम म अपन जवाब भेज सकही। सही जवाब देवइया मनले एक झिन भाग्यशाली प्रतिभागी ल उही दिन के क्विज के विजेता घोषित करे जाही। विजेता के नाम के घोषणा अवइया दूसर दिन के बीहनिया आठ बजे अउ साढ़े आठ बजे समाचार बुलेटिन म करे जाही। एला हमर ट्विटर हैंडल म घलो फ्लैश करे जाही। विजेता ल ई-सर्टिफिकेट अउ टोकन प्राइज दे जाही।
भाजपा वंदे मातरम कार्यक्रम
भारतीय जनता पार्टी सांस्कृतिक प्रकोष्ठ के प्रदेश इकाई डहार ले पचहत्तरवां स्वतंत्रता दिवस के मउकाम काली चौदा अगस्त के रंगारंग कार्यक्रम-वंदे मातरम – के आयोजन करे जाही। ए मउका म छत्तीसगढ़ के सुप्रसिद्ध कलाकार गायक, गायिका अउ फिल्म कलाकार डहार ले देश भक्ति उपर आधारित सांस्कृतिक कार्यक्रम प्रस्तुत करे जाही।
कुशाभाउ ठाकर स्मृति परिसर म भाजपा कार्यालय के सभागार म आयोजित ए कार्यक्रम म भाजपा के राष्ट्रीय उपाध्यक्ष अउ पूर्व मुख्यमंत्री डॅाक्टर रमनसिंह मुख्य अतिथि होही। कार्यक्रम के अध्यक्षता पार्टी के प्रदेश अध्यक्ष विष्णुदेव साय करहीं। कार्यक्रम के मुख्य वक्ता के रूप म नेता प्रतिपक्ष धरमलाल कौशिक शामिल होही।
वन मंत्री समीक्षा
वन अउ आवास मंत्री मोहम्मद अकबर ह सबो सरपंच मन ले कीहिन कि ओमन अपन अपन ग्राम पंचायत म चलत योजना अउ अच्छा ढंग ले करके ग्रामीण मन ल जादा ले जादा लाभ देवावय। श्री अकबर ह काली वीडियो कॉन्फ्रेसिंग के माध्यम ले कबीरधाम जिला के बोड़ला जनपद पंचायत के भीतर इकतालिस ग्राम पंचायत मनके सरपंच मनले विकास काम के समीक्षा करत रीहिन।
नागपंचमी
नाग पंचमी के तिहार आज राजधानी रायपुर संग प्रदेशभर म पारंपरिक रूप ले मनाये जात हे। ए मउका म शहर ल लेके गांव मन म नाग देवता के प्रतिमा बनाके पूजा अर्चना करे जात हे।
धमतरी जिला के नागदेव हटकेश्वर महादेव मंदिर म नागपंचमी के मउका म विशेष पूजा अर्चना करे जात हे। उंहें आने शिव मंदिर मन म घलो कोरोना गाईड लाइन के पालन करत श्रद्धालु मन ह नागपंचमी के तिहार मनावत हे।
एति मुंगेली जिला म श्री लोकनाथ साव बजरंग अखाड़ा समिति डहार ले नाग पंचमी के अवसर म कुश्ती के आयोजन करे गीस।