राष्ट्रपति-राज्यपाल मुलाकात
राज्यपाल अनूसुइया उइके ह अपन नई दिल्ली प्रवास के बेरा म आज राष्ट्रपति रामनाथ कोविंद ले भेंट करीन। ए बेरा म राज्यपाल ह राष्ट्रपति ले अनुसूचित क्षेत्र म प्रशासन अउ पांचवा अनुसूची के अलावा आदिवासी मनके कल्याण ले जुड़े विषय म गोठबात करीन। राज्यपाल ह राष्ट्रपति ले कीहिन कि कुछु संस्था ह ज्ञापन देके ए आग्रह करीन हे कि राष्ट्रीय आदिवासी परिषद के जइसन प्रदेश स्तर म राज्य आदिवासी परिषद अउ जिला स्तर म जिला स्वायत्त परिषद के गठन करे जाना चाही। संगेसंग राज्यपाल ह राष्ट्रपति ले जनजाति क्षेत्र म संविधान के पांचवा अनुसूची के प्रावधान ल प्रभावी तरीका ले लागू करे के बात घलो कीहिन।
प्रधानमंत्री नारी शक्ति संवाद
प्रधानमंत्री नरेंद्र मोदी ह कीहिन कि देशभर म माइलोगिन मन बर अवसर ह बाढ़े हे अउ सरकार ह उंखर मनके शिक्षा, स्वास्थ्य, टीकाकरण अउ आने आने जरूरत ल पूरा करे के खातिर गंभीरता ले काम करत हे। ओमन ह कीहिन कि माइलोगिन मन बर मकान, शौचालय, बिजली, पानी अउ गैस जइसे सुविधा उपलब्ध कराय जात हे। प्रधानमंत्री ह वीडियो कॅान्फ्रेंस करत हुए आत्मनिर्भर नारी शक्ति से संवाद कार्यक्रम म कीहिन कि सरकार ह अइसे माहौल बनात हे। जेखर ले माइलोगिन मन ह गांव के समृद्धि म अपन योगदान दे संकय। ओमन ह कीहिन हे कि पाछू सात बछर म माइलोगिन मनके समूह ह अपन कर्जा ल लौटाके एक ठिन अच्छा मिसाल पेश करीन हे। ए बेरा म प्रधानमंत्री ह माइलोगिन मनले आजादी के पचहत्तर बछर पूरा होय म बछर भर म पचहत्तर घंटा निकाल के सफाई, पानी बचाये के आग्रह करीन। ए बेरा म प्रधानमंत्री ह चार लाख ले जादा माइलोगिन मनके समूह के आर्थिक मदद खातिर एक हजार छै सौ पच्चीस करोड़ रूपिया के राशि जारी करीन।
प्रधानमंत्री आजादी का अमृत महोत्सव
प्रधानमंत्री नरेंद्र मोदी ह कीहिन हे कि आजादी के अमृत महोत्सव के अवसर म आत्मनिर्भर भारत के सपना ल पूरा करे के बड़का जिम्मेदारी उद्योग जगत उपर हवय। वीडियो कॅान्फ्रेसिंग के माध्यम ले भारतीय उद्योग परिसंघ – सीआईआई – के सालाना बइठका ल संबोधित करत प्रधानमंत्री ह कहिन कि कोविड महामारी के बेरा म देश ह देखे हे कि कौन तरीका ले सरकार अउ उद्योग जगत ह जुरमिल के काम करीन हे। ओमन ह कीहिन हे कि भारतीय उद्योग के नवा लक्ष्य बर ए नवा संकल्प के एक ठिन बड़का अवसर हवय।
अमृत महोत्सव-फिट इंडिया फ्रीडम
आजादी के अमृत महोत्सव के तहत केंद्रीय खेल अउ युवा कार्यक्रम मंत्रालय अउ नेहरू युवा केंद्र संगठन डहार ले फिट इंडिया फ्रीडम रन के आयोजन काली तेरा अगस्त ले करे जाही। केंद्रीय युवा कार्यक्रम अउ खेल मंत्री अनुराग ठाकुर काली ए आयोजन के दूसर चरण के शुभारंभ करहीं। नेहरू युवा केंद्र संगठन के क्षेत्रीय निदेशक श्रीकांत पांडे ह आज पत्रकार मन ल बताइन कि छत्तीसगढ़ म ए दउड़ के शुरूआत काली तेरा अगस्त के सरगुजा अउ गौरेला-पेण्ड्रा-मरवाही जिला ले करे जाही। काली सरगुजा जिला के अंबिकापुर म ए दौड़ के शुरूआत कलेक्ट्रेट परिसर ले बीहनिया दस बजे ले होही। एमा नेहरू युवा केंद्र संगठन अउ राष्ट्रीय सेवा योजना एनएसएस के स्वयं सेवक मन भाग लीहीं। प्रदेश के सबो जिला भर म आने-आने दिन म ए दौड़ के आयोजन करे जाही। जेखर समापन दू अक्टूबर के होही अउ आखरी दिन रायपुर, नारायणपुर अउ रायगढ़ जिला म एखर आयोजन करे जाही। आजादी के अमृत महोत्सव के देशव्यापी आयोजन के संगेसंग राष्ट्रगान म केंद्रित एक ठिन विशेष कार्यक्रम घलो जोड़े गेहे।
अमृत महोत्सव – वेबिनार
आजादी के अमृत महोत्सव के तहत प्रादेशिक लोक संपर्क कार्यालय, पत्र सूचना कार्यालय रायपुर अउ क्षेत्रीय लोक संपर्क कार्यालय बिलासपुर डहार ले एक वेबिनार के आयोजन करे गीस। एमा अटल बिहारी बाजपेयी विश्वविद्यालय के कुलपति डॅाक्टर अरूणनाथ दिवाकर बाजपेयी, प्रोफेसर माण्डवी सिंह अउ प्रोफेसर तरूणधर दीवान मन प्रमुख वक्ता रीहिन। ए जम्मों वक्ता मन कीहिन कि आजादी ल बनाये राखे बर हमन ल एकजुट होके संकल्प लेके जरूरत हे।
अंतर्राष्ट्रीय युवा दिवस
आज अंतर्राष्ट्रीय युवा दिवस हरय। ए अवसर म देशभर म युवा मनके प्रोत्साहन खातिर आने-आने कार्यक्रम आयोजित करे जात हे। इही कड़ी म केंद्रीय खेल अउ युवा कार्यमंत्री अनुराग ठाकुर ह आज नई दिल्ली म होय एक ठिन कार्यक्रम म आने-आने क्षेत्र ले अच्छा काम करइया मनखे अउ संस्था ल राष्ट्रीय युवा पुरस्कार दीन हे। एमा दुर्ग के इंजीनियर उत्कर्ष वत्स समेत देश के बाईस युवा मन ल पुरस्कार ले सम्मानित करे गीस। उत्कर्ष अउ उंखर संगवारी मन ह फसल ल कीड़ा मकोड़ा ले बचाय के काम बर एक नवा किसम के उपकरण बनाय हवय।
कोरोना समाचार/टीका
प्रदेश म कोरोना संक्रमण के दर अब कम होके शून्य दशमलव एक नौ प्रतिशत होगे हे। काली प्रदेश म होय बंयालिस हजार सात सौ तिरसठ सैंपल मनके जांच म सिर्फ तिरासी मनखे मन ह संक्रमित पाये गीन। राज्य के सबो जिला भर म संक्रमण के दर एक प्रतिशत ले कम होगे हे। प्रदेश के बालोद, बेमेतरा, गरियाबंद, गौरेला-पेण्ड्रा-मरवाही, सूरजपुर अउ नारायणपुर जिला म काली कोरोना संक्रमण के एक भी मामला आगू नइ आय हे। ए बेरा म राज्य म सक्रिय मरीज मनके संख्या डेढ़ हजार ले थोरकुन जादा हे। महासमुंद जिला के सुखरी-डबरी गांव के सरकारी स्कूल के एक झिन लईका ह कोरोना ले संक्रमित होगे हे। क्षेत्र के विकासखंड शिक्षा अधिकारी ह बताइन कि एखर सेती स्कूल ल एक हफ्ता बर बंद कर दे गेहे। इही बीच प्रदेश म कोरोना ले बचे बर टीकाकरण अभियान सरलग जारी हे । अब तक एक करोड़ इकतीस लाख सतरा हजार ले जादा टीका लगाये जा चुके हे।
अमृत महोत्सव-क्विज प्रतियोगिता
देश के स्वतंत्रता के पचहत्तर बछर पूरा होय के मउका म आजादी के अमृत महोत्सव म प्रादेशिक समाचार एकांश, आकाशवाणी रायपुर कोति ले छै अगस्त ले एक प्रश्नोत्तरी कार्यक्रम शुरू करे गेहे। जेखर चलत एमा छत्तीसगढ़ म स्वतंत्रता संग्राम के बेरा होय घटना, राज्य के स्वतंत्रता सेनानी, अउ समाज सुधारक मनले जुड़े प्रश्न पूछे जात हे। प्रश्नोत्तरी कार्यक्रम ल लेके लोगन के उछाह ल देखत प्रादेशिक समाचार एकांश ह ये फैसला लेहे कि ये शुक्रवार यानि काली तेरा अगस्त ले छत्तीसगढ़ी अउ हिंदी प्रादेशिक समाचार बुलेटिन म आने आने प्रश्न पूछे जाही अउ ये दूनो समाचार बुलेटिन म पूछे गे सवाल के आधार म सबले पहिली सही जवाब देवइया एक-एक विजेता मन ल चुने जाही। श्रोता मन ल ई-मेल या फिर एसएमएस ले जवाब देना हे। ये जवाब ई-मेल आईडी आर.ए.आई.पी.यू.आर.एस.ए.डब्लू.ए.एल एट द रेट जीमेल डॅाट कॉम- म या फेर फोन नंबर 94242-08182 म एसएमएस ले भेजे जा सकथे। ये प्रतियोगिता म वाट्सअप म भेजे गे जवाब मान्य नइ होही। जउन श्रोता के सबले पहिली सही जवाब मिलही ओला विजेता माने जाही अउ उंखर नाव के घोषणा अवइया समाचार बुलेटिन म करे जाही। संगेसंग प्रादेशिक समाचार एकांश कोति ले डिजिटल प्रमाण पत्र घलो जारी करे जाही। ये प्रश्नोत्तरी कार्यक्रम म हरएक शुक्रवार के प्रश्न पूछे जाही।
मुख्यमंत्री योगेंद्र शर्मा जयंती
रायपुर जिला के धरसींवा म संचालित सामुदायिक स्वास्थ्य केंद्र अउ तीर के गांव टेकारी के शासकीय उच्चतर माध्यमिक शाला के नाव शहीद योगेंद्र शर्मा के उपर होही। झीरम कांड म शहीद कांग्रेस पदाधिकारी स्वर्गीय योगेंद्र शर्मा के जयंती के कार्यक्रम म वीडियो कॉन्फ्रेसिंग के माध्यम ले शामिल होत मुख्यमंत्री भूपेश बघेल ह ए घोषणा करीन। ए बेरा म मुख्यमंत्री ह योगेंद्र शर्मा के सुरता म प्रकाशित- नमन अंचल के शहीदों को- पुस्तक के विमोचन घलो करीन।