प्रधानमंत्री उज्जवला योजना
प्रधानमंत्री ह उत्तर प्रदेश के मोहबा जिला म वीडियो कॉन्फ्रेसिंग के माध्यम ले उज्जवला योजना के दूसरा चरण के शुरूआत करत हितग्राही मन ल रसोई गैस सिलेण्डर अउ गैस के चूल्हा बांटीन। प्रधानमंत्री नरेंद्र मोदी ह कीहिन कि केंद्र सरकार के उज्जवला योजना ले देश म महिला सशक्तिकरण ल बढ़ावा मिले हे अउ माइलोगिन मन देश के विकास म अहम भूमिका निभात हे। ओमन कीहिन कि उज्जवला योजना के दूसरा चरण म रसोई गैस कनेक्शन के प्रक्रिया ल घलो अउ सरल बनाय गेहे।
प्रधानमंत्री खेलकूद प्रतियोगिता
प्रधानमंत्री नरेंद्र मोदी ह भाजपा सांसद मनले कीहिन कि अपन-अपन क्षेत्र मन म खेलकूद के गतिविधि मन ल बढ़ावा देवव अउ आने आने प्रतियोगिता मनके आयोजन करव। पार्टी के संसदीय दल के बैठक ल संबोधित करत श्री मोदी ह टोक्यो ओलंपिक म भाग लेवइया खिलाड़ी मनके सराहना करीन अउ ओमन ल बधाई दीन। बैठक के बाद पत्रकार मनले बातचीत म संसदीय कार्यमंत्री प्रहलाद जोशी ह बताइन कि टोक्यो ओलंपिक म भारत डहार ले भाग लेवइया खिलाड़ी मनके अब तक के ये सबले बड़े दल रीहिस अउ भारत ह सबले जादा पदक घलो इही दारी जीते हे।
संविधान संशोधन विधेयक
संविधान के 175 वां संशोधन विधेयक लोकसभा म पेश करे गीस। एमा राज्य अउ केंद्रशासित प्रदेश मन डहार ले अन्य पिछड़ा वर्ग के अपन सूची बनाये के अधिकार ल बहाल करे के प्रावधान हे। केंद्रीय सामाजिक न्याय मंत्री डॅाक्टर वीरेन्द्र कुमार ह सदन म विधेयक पेश करत कीहिन कि विपक्ष शासित राज्य मनके मुख्यमंत्री मन ह घलो ए कानून के मांग करे हे।
विदेशी नागरिक/कोविन पोर्टल
कोरोना ले बचाव बर अब भारत म रहइया विदेशी नागरिक मन घलो वैक्सीन लगवाये बर कोविड पोर्टल म पंजीयन करा सकही। केंद्रीय स्वास्थ्य मंत्रालय ह एखर बारे म विदेशी नागरिक मन ल पंजीयन के अनुमति देके फैसला लेहे। एखर बर ओमन अपन पासपोर्ट ल पहचान पत्र के रूप म उपयोग कर सकथे। पोर्टल म पंजीयन के बाद ओमन ल टीकाकरण बर समय दे जाही।
कोरोना समाचार
प्रदेस म कोरोना संक्रमण के दर लगातार कम होत जात हे। पाछू हफ्ता संक्रमण के दर अउ कम होके 0.29 प्रतिशत रहिगे हे। ए समय प्रदेश म सक्रिय मरीज मनके संख्या 1700 हे। सुखद बात ये हे कि काली प्रदेश के पांच जिला म एको झन नवा मरीज नइ मिलिस। एमा बालोद, कोण्डागांव, कबीरधाम, गौरेला -पेण्ड्रा-मरवाही अउ सुकमा जिला शामिल हे। प्रदेश म काली कोरोना संक्रमण ले एको झन के मउत नइ होय हे। इही बीच प्रदेश म कोरोना ले बचाव बर टीकाकरण अभियान सरलग जारी हे। अब तक 01 करोड़ 30 लाख ले जादा टीका लगाये जा चुके हे।
राज्यपाल उपराष्ट्रपति मुलाकात
राज्यपाल अनुसूइया उइके ह आज नई दिल्ली म उपराष्ट्रपति एम. वेंकैया नायडू ले मुलाकात करीन अउ ओमन ल राजभवन के कॉफी टेबल बुक ‘नई-सोच नई -पहल‘ भेंट करीन। राज्यपाल ह राजभवन डहार ले कोरोना काल म पाछू दू बछर म करे गे प्रयास अउ गतिविधि उपर आधारित पुस्तक घलो उपराष्ट्रपति ल भेंट करीन। ओमन ह उपराष्ट्रपति ले छत्तीसगढ़ म माओवाद समस्या अउ आने विषय मन उपर चर्चा करीन।
अमृत महोत्सव-रेलवे प्रदर्शनी
स्वाधीनता के 75 वां वर्षगांठ के मउका म देशभर म आजादी के अमृत महोत्सव मनाये जाही। ए कड़ी म भारतीय रेल देशभर म 75 चुने हुए रेलवे स्टेशन मन म हथकरघा अउ खादी ले बने सामान मनके प्रदर्शनी लगाही। भारतीय रेलवे ह ए बछर 15 अगस्त ले 15 अगस्त 2022 तक ये महोत्सव मनाही। रेलवे ह देश म 75 स्टेशन मनके चुनाव करे हे। जेमा आत्मनिर्भर भारत के प्रतीक के रूप म हथकरघा अउ खादी के अस्थायी स्टॉल लगाही। एमा छत्तीसगढ़ के बिलासपुर अउ रायपुर रेलवे स्टेशन घलो शामिल हे।
अमेरिका मे भारत दिवस
अमेरिका के शिकागो म भारतीय समुदाय बर आयोजित भारत दिवस परेड म नॉर्थ अमेरिका छत्तीसगढ़ एसोसिएशन-नाचा ह छत्तीसगढ़ के प्रतिनिधित्व करत रायपुर के झांकी प्रस्तुत करीन। ए झांकी म रायपुर के नगर घड़ी के संग इंहा के पारंपरिक लोक नृत्य अउ गीत के झलक दिखाये गीस। तिरंगा के संग ‘छत्तीसगढ़िया सबले बढ़िया‘ अउ ‘भारत माता के जय‘ गूंज ह सात समुंदर पार छत्तीसगढ़ ल जीवंत बना दीस। मुख्यमंत्री भूपेश बघेल ह छत्तीसगढ़ के संस्कृति ल अंतर्राष्ट्रीय स्तर म प्रदर्शित करे बर नाचा संस्था ल धन्यवाद दीन अउ कीहिन कि छत्तीसगढ़ के झांकी ल अमेरिका के समारोह म देख के ओमन ल गर्व महसूस होत हे। नाचा संस्था के कार्यकारी अध्यक्ष गणेश कर ह बताइन कि भारतीय आजादी के 75 वां वर्षगांठ के अवसर म ए कार्यक्रम के आयोजन करे गीस।
डाक विभाग – राखी
रक्षाबंधन तिहार बर भारतीय डाक विभाग ह ए साल घलो विशेष पहल करे हे। एखर अंतर्गत डाकघर मन म राखी भेजइया लिफाफा इकट्ठा करे बर पीला रंग के पत्र पेटी लगाय गेहे। छत्तीसगढ़ म घलो डाक विभाग ह सबो शहरी अउ आने जगा मन म राखी वाला लिफाफा बर पीला रंग के पेटी उपलब्ध कराय हे। ए पेटी मन म बीहनिया आठ बजे ले रात आठ बजे तक राखे के लिफाफा छोड़े जा सकथे।
मिनीमाता-पुण्यतिथि
छत्तीसगढ़ के पहिली महिला सांसद मिनीमाता के काली पुण्यतिथि हे। मुख्यमंत्री भूपेश बघेल ह मिनीमाता के योगदान ल सुरता करत ओमन ल अपन श्रद्धांजलि दीन। मुख्यमंत्री ह कीहिन कि असम म जन्मे मिनीमाता बिहाव के बाद छत्तीसगढ़ के जन जीवन म रच-बस गे रीहिन हे। संसद के सामाजिक उत्थान ले जुड़े बहुत से कानून मन ल बनवाय म ओमन ह सक्रिय भूमिका निभाइन। खास करके दलित मनके नागरिक अधिकार मनके रक्षा बर अस्पृश्यता निवारण कानून ल संसद म पारित कराय म ओमन भूमिका निभाइन।
एम्स कैंसर शिविर
रायपुर के अखिल भारतीय आयुर्विज्ञान संस्थान – एम्स के स्त्री रोग विभाग डहार ले काली स्तन कैंसर अउ सर्वाइकल कैंसर जांच बर निःशुल्क शिविर लगाये जाही। स्त्री रोग विभाग के प्रमुख प्रोफेसर डॅाक्टर सरीता अग्रवाल ह बताइन कि शिविर के उद्देश्य आम लोगन मन म ए रोग के प्रति जागरूकता लाना हे। ओमन बताइन कि पाछू कुछु साल म कैंसर मरीज मनके संख्या तेजी ले बाढ़े हे। देश म हर साल कैंसर के 8 ले 9 लाख मामला आगू आथे। ओमन बताइन कि छत्तीसगढ़ म घलो पाछू कुछु साल ले कैंसर मरीज मनके संख्या म बढ़ोत्तरी देखे गेहे।
मौसम
प्रदेस म अवइया चौबीस घंटा म अलग-अलग जगा मन म हल्का ले मध्यम बरसात होय के या गरज-चमक के संग छींटा पड़े के संभावना हे। आज मंझनियां राजधानी रायपुर सहित कुछ आने जगा मन म मध्यम ले तेज बौछार पड़ीस। सरगुजा अउ बस्तर संभाग म घलो अलग-अलग जगा मन म बौछार पड़े के समाचार मिले हे।
अउ अब थोरकुन समाचार सार म-
– आज विश्व सिंह दिवस हरय। ए मउका म उपराष्ट्रपति एम. वेंकैया नायडू ह शेर मनके संरक्षण बर लोगन मनले आगू आय के आह्वान करे हे। उहें प्रधानमंत्री नरेंद्र मोदी ह शेर मनके संरक्षण बर काम करइया लोगन मन ल शुभकामना देहे। – अवइया गणतंत्र दिवस म दे जाने वाला पद्म विभूषण, पद्म भूषण अउ पद्मश्री पुरस्कार मन बर ऑनलाईन नामांकन अउ सिफारिश मांगे गेहे। पद्म पुरस्कार मन बर नाम देके आखरी तारीख 15 सितंबर हे।
अउ
– शासकीय कार्य म लापरवाही बरते के शिकायत मिले उपर बलौदाबजार- भाटापारा जिला म सिमगा तहसील के पटवारी अउ उंहा के प्रभारी नायब तहसीलदार ल तत्काल प्रभाव ले निलंबित कर दे गेहे।