प्रधानमंत्री किसान सम्मान निधि योजना
प्रधानमंत्री नरेन्द्र मोदी ह आज वीडियो कान्फ्रेंसिंग ले प्रधानमंत्री किसान सम्मान निधि योजना के अगला किस्त जारी करीन। ए योजना म नौ करोड़ पचास लाख लाभार्थी किसान परिवार के खाता म उन्नीस हजार करोड़ रूपिया ले जादा के रकम डाले गीस।
प्रधानमंत्री ह किहीन कि देस कुछ दिन म आजादी के अमृत महोत्सव मनवइया हे अउ ए लोगन बर तय करे के मउका हे कि ओमन पच्चीस बछर म देस ल कहां देखना चाहत हे। श्री मोदी ह किहीन कि सरकार ह न्यूनतम समर्थन मूल्य म किसान मन ले सबले बड़े खरीदी करे हे, चाहे ओ खरीफ होवय या रबी मौसम। एमा करीब एक लाख सत्तर हजार करोड़ रूपिया धान बर अउ करीबन पच्यासी हजार करोड़ रूपिया गंहू फसल बर सोझे किसान मनके खाता म पहुंच गेहे।
प्रधानमंत्री ह किहीन कि देस के कृषि नीति म छोटे किसान मन ल पहिली प्राथमिकता दे जावत हे। प्रधानमंत्री किसान सम्मान निधि म अब तक किसान मन ल एक लाख साठ हजार करोड़ रूपिया दे गेहे।
विश्व आदिवासी दिवस
आज विश्व आदिवासी दिवस हरय। ए मउका म राज्यपाल अनुसुईया उइके ह प्रदेस समेत आदिवासी समाज के लोगन ल बधाई अउ सुभकामना देवत किहीन कि आदिवासी समाज प्रगति के रद्दा म आगू बाढ़त राहय अउ उंखर भविष्य सुघ्घर राहय।
उहें, मुख्यमंत्री भूपेश बघेल ह प्रदेसवासी बिसेस रूप ले आदिवासी समाज के लोगन ल बधाई अउ सुभकामना देवत किहीन कि जनजाति मनके प्राचीन कला अउ संस्कृति छत्तीसगढ़ के अनमोल धरोहर हवय। राज्य सरकार आदिवासी मनके परंपरा, संस्कृति अउ जीवन मूल्य ल सहेजे खातिर उंखर विकास बर सरलग प्रयास करत हे। ओमन किहीन कि आदिवासी क्षेत्र समेत प्रदेस के हरेक गांव म सिक्षा अउ स्वास्थ्य के सुभीता देवाना राज्य सरकार के पहिली प्राथमिकता हरय। मुख्यमंत्री ह किहीन कि आदिवासी मन बर जंगल के बहुत महत्व हे अउ सांति, विकास अउ भरोसा के रद्दा इही जंगल ले होके जाथे।
विश्व आदिवासी दिवस म रईपुर समेत प्रदेसभर म कतकोन कारीकरम होवत हे। दंतेवाड़ा के दंतेश्वरी फाइटर्स के महिला कमांडों ह गोण्डी अउ हिन्दी म संदेस जारी करके बस्तर के ओ आदिवासी जउन माओवादी संगठन ले जुड़े हे, ओमन मन ल आत्मसमर्पण करे के आह्वान करीन। संगेसंग ओमन समाज के मुख्यधारा ले जुड़के राज्य सासन के योजना के फायदा उठाय बर किहीन।
राजीव गांधी न्याय योजना
कृषि मंत्री रविन्द्र चौबे ह किहीन कि प्रदेस म अवइया देवउठनी परब ले ‘‘राजीव गांधी ग्रामीण भूमिहीन कृषि मजदूर न्याय योजना‘‘ के सुरूवात करे जाही। ए बात श्री चौबे ह काली हरेली तिहार के मउका म बेमेतरा जिला के राखी गांव म राखे गे एक ठिन कारीकरम म आने-आने विकास काम के लोकार्पण अउ भूमिपूजन करे के बेरा किहीन। ओमन बतईन कि ए योजना म गंवई के अइसन परिवार ल छह हजार रूपिया हरेक बछर दे जाही, जिखर तीर खेती बर भूईंया नइ हे अउ ओमन मनरेगा या फेर किसानी मजदूरी ले जुड़े हे। संगेसंग धोबी, नाई लोहार अउ मंदिर के पुजारी मन ल घलो ए योजना के फायदा मिलही। कारीकरम म कृषि मंत्री ह माईलोगिन मन ल आत्मनिर्भर बनाय बर बीस ठन सिलाई मशीन देके घोसना करीन।
कोरोना टीका/समाचार
प्रदेस म कोरोना ले बचाव बर अभी तक एक करोड़ उनतीस लाख बयालीस हजार ले जादा टीका लगाय गेहे। उहें, रायगढ़ शहर प्रदेस के पहिली पूर्ण कोविडकृत शहर बन गेहे। इहां जम्मों आयु वरग के पात्र लोगन ल कोविड टीका के पहिली खुराक दे दे गेहे। कलेक्टर भीम सिंह के अगुवई म टीकाकरण के काम जोरदरहा चलत हे।
प्रदेस म कोरोना संक्रमण के स्थिति म सरलग सुधार होवत हे। औसत पॉजिटीविटी दर शून्य दशमलव तीन प्रतिशत म आ गेहे। प्रदेस म काली कोरोना संक्रमण के छिहत्तर ठिन नवा मामला आगू आईस। अभी एक हजार सात सौ ले जादा मरीज मनके इलाज आने-आने अस्पताल म होवत हे।
माओवादी-समाचार
बीजापुर अउ दंतेवाड़ा जिला म आज तीन इनामी समेत चार झिन माओवादी मन ह आत्मसमर्पण करीन। बीजापुर जिला म एक माओवादी दंपत्ति ह सीआरपीएफ के डीआईजी कोमल सिंह अउ पुलिस अधीक्षक कमलोचन कश्यप के आगू आत्मसमर्पण करीन। ए माओवादी मन उपर आठ-आठ लाख रूपिया के इनाम घोसित रिहीन। उहंें, एखर मन उपर आने-आने माओवादी घटना म सामिल रेहे के आरोप हवय। आत्मसमर्पित करइया ए माओवादी मन ल राज्य सरकार के पुनर्वास नीति म दस-दस हजार रूपिया के सहायता रासि दे गीस।
उहें, दंतेवाड़ा जिला म घलो एक इनामी समेत दू झिन माओवादी मन आत्मसमर्पण करीन। एमन कटेकल्याण क्षेत्र म सक्रिय रिहीन।
ऐति, गरियाबंद जिला के वनभैंसा प्रजनन केन्द्र म माओवादी मन ह आगी लगा दीन। वन विभाग के अधिकारी मन ह एखर खबर पुलिस ल दीन। पुलिस के मुताबिक आगजनी के बाद माओवादी मन ह घटना के जगह म बैनर-पोस्टर घलो लगाय हे।
दुर्घटना
दंतेवाड़ा जिला म आज होय एक रद्दा दुर्घटना म चार झिन के मउत होगे। उहें, चार आने मन गंभीर रूप ले घायल होगे हे।
खबर के मुताबिक गांव के कुछेक लोगन एक ठिन ट्रेक्टर म बइठ के कटेकल्याण कोति जात रिहीन। इही बेरा टेटम-तेलम गांव तीर ट्रेक्टर अनते-तनते होके पानी ले भराय डबरा म जा गिरीस। ए हादसा म चार झन के ट्रेक्टर तरी चपकाय ले मउकाच म मउत होगे। उहें, गंभीर रूप ले घायल चार झिन ल इलाज बर अस्पताल म भर्ती कराय गेहे। बताय जात हे कि ट्रेक्टर म दस झिन ले जादा झन बइठे रिहीस।
पेंशन राशि
केन्द्रीय कार्मिक जन शिकायत अउ पेंसन राज्यमंत्री डॉक्टर जितेन्द्र सिंह ह किहीन कि फउत होय सरकारी करमचारी अउ पेंसन पवइया मनके दिव्यांग लइका मन ल परिवार पेंसन के बाढ़े रासि मिलही। ओमन किहीन कि ए संबंध म पेंसन अउ पेंसनधारक कल्याण विभाग ल निरदेस दे गेहे। डॉक्टर सिंह ह किहीन कि अइसन लइका मनके बिसेस ध्यान देके जरूरत हवय। एला देखत प्रधानमंत्री ह ए ऐतिहासिक फइसला लेहे। ए फइसला के लक्ष्य निराश्रित दिव्यांग लइका मनके जिनगी ल सरल बनाना अउ उंखर आर्थिक स्थिति म सुधार लाना हे।
वाट्सऐप-कोविड टीकाकरण-प्रमाण पत्र
अब वाट्सऐप नंबर म संदेस भेज के कोविड रोधी टीकाकरण प्रमाण पत्र डाउनलोड करे जा सकही। केन्द्रीय स्वास्थ्य मंत्री मनसुख मांडविया ह एक ठिन ट्वीट म बतईन कि माई.जीओवी कोरोना हेल्प डेस्क ले प्रमाण पत्र निकल सकथे। एखर बर वाट्सऐप नंबर ‘‘नौ शून्य एक तीन एक पांच, एक पांच, एक पांच‘‘ म कोविड सर्टिफिकेट टाइप करके भेज बर पड़ही। एखर बाद लोगन ल ओटीपी ले प्रमाण पत्र मिल सकही।
राज्यपाल-दिल्ली-प्रवास
छत्तीसगढ़ के राज्यपाल अनुसुईया उइके ह आज नई दिल्ली म रक्षामंत्री राजनाथ सिंह ले भेंट करीन। ए बेरा म राज्यपाल ह रक्षामंत्री ले प्रदेस के माओवादी समस्या म गोठबात करीन। राज्यपाल ह रक्षामंत्री ल ‘‘कोरोना काल में रचनात्मक भूमिका में राज्यपाल दो हजार इक्कीस‘‘ नाव के पुस्तिका भेंट करीन।
उहें, राज्यपाल ह आज राष्ट्रीय अनुसूचित जनजाति आयोग के चेयरमैन हर्ष चौहान अउ सदस्य अनंत नायक ले भेंट करके जनजाति समाज के कई ठिन मुद्दा म गोठबात करीन।
मौसम
अवइया चौबीस घंटा म प्रदेस के कुछेक जघा म हल्का ले मध्यम बरसा होय के संभावना हवय। मौसम विभाग के मुताबिक एक निम्नदाब के क्षेत्र पूर्वी उत्तरप्रदेश के उपर हवय। संगेसंग चक्रवाती घेरा घलो बने हे, जेखर परभाव ले प्रदेस के कुछेक जघा म बरसा हो सकत हे। आज राजधानी रईपुर के कोनों-कोनों जघा म छूटपुट बरसा होईस।