प्रधानमंत्री-गरीब कल्याण अन्न योजना
प्रधानमंत्री नरेन्द्र मोदी ह आज गरीब कल्याण अन्न योजना के उत्तरप्रदेश के लाभार्थी मन ले वीडियो कान्फ्रेंसिंग के माध्यम ले बातचीत करीन। ए बेरा म प्रधानमंत्री ह किहीन कि देस के अर्थव्यवस्था सुधरत हे अउ ए बात के स्पष्ट संकेत हरय कि देस ह कोविड महामारी म नियंत्रण पाय म कामयाब होवत हे। प्रधानमंत्री ह लाभार्थी मन ले बात करत हुए किहीन कि कोविड रोधी टीका लगाय के प्रति जागरूकता फैलाय।
केन्द्र-कोविड प्रतिबंध/टीका
केन्द्र सरकार ह राज्य मन ल सलाह दीन दे कि ओमन आगामी तिहार के दउरान भीड़-भाड़ उपर रोक लगाय बर स्थानीय प्रतिबंध लागू करे बर गहनता ले विचार करय। केन्द्रीय स्वास्थ्य सचिव राजेश भूषण ह सब्बो राज्य के मुख्य सचिव मन ल ए बारे म पत्र लिखे हे। ओमन ह किहीन कि पिछलइया महीना ले दैनिक कोविड संक्रमण के संख्या म लगातार कमी आय हे, फेर कुछ राज्य मन म दैनिक संक्रमण बढ़त हे। श्री भूषण ह किहीन कि मुहर्रम, ओणम, जन्माष्टमी, गणेश चतुर्थी अउ दुर्गा पूजा जइसे अवइया तिहार ल देखत हुए राज्य मन ल स्थानीय स्तर म प्रतिबंध लगाय के सलाह दे गेहे। ए तिहार के दउरान बड़ संख्या म लोगन के भीड़ जुट सकत हे।
इही बीच, छत्तीसगढ़ म कोरोना संक्रमण ले बचाव के पहली टीका लगवइया मनके संख्या 1 करोड़ 31 हजार ले जादा होगे हे।
ऐति, प्रदेस म कोरोना संक्रमण के पॉजिटीविटी दर गिरके शून्य दशमलव तीन प्रतिशत म आ गेहे। केवल सूरजपुर जिला म संक्रमण के दर एक प्रतिशत ले जादा हवय। उहें, प्रदेस के पांच जिला राजनांदगांव, बेमेतरा, कबीरधाम, मुंगेली अउ गौरेला-पेण्ड्रा-मरवाही म काली कोरोना के कोनों नवा मरीज नइ मिलीस।
टोक्यो ओलंपिक-हॉकी
टोक्यो ओलंपिक म भारत ह पुरूष हॉकी स्पर्धा म जर्मनी ल हराके कांस्य पदक जीत लेहे। टीम इंडिया ह कांस्य पदक के रोमांचक मैच म जर्मनी ल पांच-चार ले हराके पदक देस के नाम करीन।
छत्तीसगढ़ के मुख्यमंत्री भूपेश बघेल घलो भारतीय हॉकी टीम ल बधाई अउ सुभकामना दीन।
माओवादी-समाचार
दंतेवाड़ा जिला म माओवादी मन ह बारूदी सुरंग म विस्फोट करके एक चारपहिया वाहन ल उड़ा दीन। ए घटना म एक ग्रामीण के मउत होगे। उहें, ग्यारह आने लोगन घायल होगे हे। एमा ले एक के हालत गंभीर बताय जात हे।
जिला के पुलिस अधीक्षक अभिषेक पल्लव ह बतईन कि नारायणपुर ले कुछ लोगन मन एक चारपहिया गाड़ी ले दंतेवाड़ा आवत रिहीन। ए दउरान मालेवाही क्षेत्र के घोटिया गांव के तीर माओवादी मन ह बारूदी सुरंग विस्फोट कर चारपहिया वाहन ल उड़ा दीन। ए घटना म मध्यप्रदेश के बालाघाट निवासी धनसिंह के मउत होगे। उहें, रूपलाल के हालत गंभीर बताय जात हे। घायल मन म दस लोगन राजनांदगांव जिला के जामगांव इलाका के रहवइया हे।
इही बीच बीजापुर अउ सुकमा जिला के दू दिन के भ्रमण बर पहुंचे विशेष पुलिस महानिदेशक अशोक जुनेजा ह पुलिस अउ केंद्रीय अर्ध सैनिक बल के वरिष्ठ अधिकारी मनके संग क्षेत्र के विकास काम अउ माओवादी अभियान के समीक्षा करीन। ओमन ह माओवादी मनके विरूद्ध प्रभावी कार्रवाई करे बर ठोस रणनीति बनाये बर घलो बल दीन।
स्कूल-शिक्षा
प्रदेस के स्कूल सिक्षा विभाग ह पढ़ई ल लेके सब्बो बेवस्था के निरीक्षण बर वर्चुअल मॉनिटरिंग प्रणाली के सुरूवात करीन। एखर तहत सिक्षा अधिकारी वर्चुअल माध्यम ले स्कूल के जायजा लेवत हे। वर्चुअल निरीक्षण म स्कूल के व्यवस्था, मध्यान्ह भोजन, साफ-सफाई, मैदान, स्कूल परिसर, टीचिंग लर्निंग मटेरियल, विद्यार्थी विकास सूचकांक अउ लइका मनके स्तर के जांच करे जावत हे।
इही कड़ी म स्कूल सिक्षा विभाग के अधिकारी मन ह काली कोरिया जिला के खड़गवां गांव अउ सरगुजा जिला के जामझरिया गांव के प्राथमिक स्कूल के व्यवस्था के वर्चुअल जायजा लीन। ए दउरान लइका मनके पढ़ाई के स्तर के जांच करे गीस। संगेसंग छात्र मन ले पढ़ई के संबंध म प्रश्न घलो करे गीस।
अकबर समीक्षा
वन, आवास अउ पर्यावरण मंत्री मोहम्मद अकबर ह वीडियो कान्फ्रेंसिंग के माध्यम ले कबीरधाम जिला के आने-आने ग्राम पंचायत के सरपंच मन ले विकास काम के संबंध म चरचा करीन। ए दउरान ओमन पंचायत म कोविड महामारी के संभावित तीसरा लहर के तैयारी के जानकारी लीन। श्री अकबर ह पाछु दू दिन म चौसठ ग्राम पंचायत के कामकाज के समीक्षा करीन। ओमन ह राज्य सरकार के योजना ल बेहतर तरीका ले लागू करे अउ ग्रामीण मन ल योजना के जादा ले जादा लाभ देवाय बर सरंपच मन ल निरदेस दीन।
अमृत महोत्सव-क्विज प्रतियोगिता
देश के स्वतंत्रता के पचहत्तर बछर पूरा होय के उपलक्ष्य म आजादी के अमृत महोत्सव के तहत प्रादेशिक समाचार एकांश, आकाशवाणी, रायपुर डहार ले काली छै अगस्त शुक्रवार ले एक प्रश्नोत्तरी कार्यक्रम शुरू करे जात हे।
एखर तहत छत्तीसगढ़ म स्वतंत्रता संग्राम के दउरान होय घटना, राज्य के स्वाधीनता सेनानी अउ समाज सुधारक ले संबंधित प्रश्न पूछे जाही। ए प्रश्न ल छत्तीसगढ़ी अउ हिंदी प्रादेशिक समाचार बुलेटिन म पूछे जाही। श्रोता मन ल ई-मेल अउ एसएमएस के माध्यम ले जवाब देना होही।
ए जवाब ई-मेल आईडी – आर.ए.आई.पी.यू.आर.एस.ए.डब्लू.ए.एल. एट द रेट जीमेल डॅाट कॉम म – या फोन नंबर 94242-08182 म एसएमएस के माध्यम ले भेजे जा सकत हे।
जउन श्रोता के सबले पहिली सही जवाब मिलही वो ह विजेता माने जाही अउ ओखर नाम के घोषणा अवइया समाचार बुलेटिन म करे जाही। संगेसंग ओला प्रादेशिक समाचार एकांश डहार ले डिजीटल प्रमाण पत्र घलो जारी करे जाही। ए प्रश्नोत्तरी कार्यक्रम के तहत हर शुक्रवार के प्रश्न पूछे जाही।
डब्ल्यूएचओ-दौरा
राष्ट्रीय कुष्ठ उम्मूलन कार्यक्रम के तहत डब्लयू.एच.ओ. के टीम कुष्ठ प्रभावित मनके खोज अउ रोग निदान के गतिविधि के जायजा ले बर ए बखत दुर्ग जिला के दू दिवसीय प्रवास म हवय। ए दउरान टीम ह निकुम ब्लॉक के मचांदूर अउ हनौदा के प्राथमिक स्वास्थ्य केन्द्र के अलावा धनोरा के उप स्वास्थ्य केन्द्र के घलो निरीक्षण करीन। ए मउका म अधिकारी मन ह कुष्ठ उन्मूलन के जानकारी देके संग दिसा-निरदेस घलो दीन। टीम ह स्वास्थ्य केन्द्र के निरीक्षण करे के बाद कतकोन कुष्ठ मरीज मनके घर म जाके उंखर इलाज के संबंध म जानकारी घलो लीन।
हाईकोर्ट-याचिका खारिज
छत्तीसगढ़ उच्च न्यायालय ह प्रदेस के पूर्व आबकारी आयुक्त समुद्र सिंह के जमानत याचिका खारिज कर दीन। श्री सिंह उपर आबकारी आयुक्त के पद म राहत हुए निजी सराब कंपनी मन ल फायदा पहुंचाय के आरोप हे, जेखर बाद उंखर ठिकाना मन म एसीबी अउ ईओडब्ल्यू के टीम डहार ले छापा मारे गे रिहीस। ए छापा म एसीबी अउ ईओडब्ल्यू ह करोड़ो रूपिया के बेनामी संपत्ति मिले के दावा करे हे।
जानबा के मुताबिक समुद्र सिंह पाछु छह महीना ले जेल म बंद हे।