कोरोना टीका/समाचार
प्रदेस म कोरोना वैक्सीन के पहली टीका लगवइया मनके संख्या एक करोड़ ल पार कर लेहे। राज्य म तीन अगस्त तक 1 करोड़ 11 हजार ले जादा लोगन मन ल कोरोना वैक्सीन के पहली डोज लगाय जा चुके हे। उहें, वैक्सीन के पहली अउ दूसरइया डोज ल मिलाके अब तक प्रदेस म 1 करोड़ 24 लाख 13 हजार ले जादा टीका लगाय जा चुके हे। एमा 24 लाख ले जादा लोगन ल कोरोना वैक्सीन के दूनों डोज लगा दे गेहे।
इही बीच, प्रदेस म काली कोरोना संक्रमण के 142 नवा मामला सामने आय हे। एला मिलाके प्रदेस म अब तक 10 लाख 2 हजार 6 सौ कोरोना संक्रमित मरीज मनके पहिचान करे जा चुके हे। एमा ले 9 लाख 87 हजार ले जादा मरीज स्वस्थ हो चुके हे। वर्तमान म 1 हजार 8 सौ ले जादा मरीज मनके प्रदेस के आने-आने अस्पताल अउ होम आइसोलेशन म इलाज चलत हे। इही बीच, प्रदेस म काली कोरोना ले दू लोगन के मउत घलो होय हे।
ऐति, राजनांदगांव जिला के आने-आने स्कूल म लइका मनके पहुंचे के बाद सिक्षक सबले पहिली लइका मन ल कोरोना संक्रमण ले बचाव के पाठ पढ़ावत हे। लइका मन ल स्कूल परिसर म प्रवेस ले पहिली थर्मल स्क्रीनिंग करे के अलावा हाथ ल सेनिटाईज घलो करे जात हे।
हाथी-धान
प्रदेस के आने-आने जिला मन म हाथी मन ले होवइया नुकसान ले बचे धान रखे के प्रयोग सफल होवत दिखत हे। वन मंत्री मोहम्मद अकबर ह बतईन कि प्रदेस के सूरजपुर, धरमजयगढ़ अउ बालोद वनमंडल म खुला स्थान म धान राखे गे रिहीस। एमा ले सूरजपुर वनमंडल के तीन जगह म हाथी के दल ह चौदह क्विंटल धान खाय हे। अइसने, टूकूडांड-तिरालीस म चार क्विंटल अउ बगड़ा पी. नौ म छह क्विंटल धान हाथी मन खाय हे। श्री अकबर ह बतईन कि ए समय तीन सौ सात हाथी के सोलह दल राज्य के आने-आने जगह म घूमत हे। एमा ले नौ हाथी ल रेडियो कॉलर पहिनाय गेहें। ओमन ह बतईन कि हाथी मनके आतंक ले बचे बर गांव मन म हाथी मित्र के गठन करे गेहे। उहें, आकाशवाणी कार्यक्रम ‘‘हमर हाथी-हमर गोठ‘‘ के माध्यम ले रोज शाम साढ़े पांच बजे हाथी मनके संभावित घूमे के जगह के प्रसारण घलो करे जात हे।
वन मंत्री ह बतईन कि ग्रामीण मन ल हाथी मन ले बचाय बर अलर्ट सिस्टम के प्रयोग करे जावत हे। एखर तहत धान के बोरा मन ल खोलके हाथी मनके आगू रखे जात हे। जेन ल खाय के बाद हाथी मनके दल कोनों नुकसान झन करय। ओमन ह बतईन कि ए बिसेस प्रयोग बर धान के खरीदी नइ करे गेहे, जबकि खाद्य विभाग डहार ले समर्थन मूल्य म बिसाय गे धान के विभागीय अंतरण के माध्यम ले उपयोग करे जात हे।
सौर ऊर्जा संयंत्र
राज्य सरकार, प्रदेश के घरेलू उपभोक्ता मन ल एक ले दस किलोवाट क्षमता तक के ग्रिड कनेक्टेड अउ संयंत्र लगाय बर स्थापना लागत के 20 ले 40 प्रतिशत तक अनुदान दीही। इच्छुक घरेलू अउ आने उपभोक्ता राज्य विद्युत वितरण कंपनी-मर्यादित के मोर बिजली ऐप या क्रेडा के वेबपोर्टल म आवेदन कर सकत हे।
राज्य विद्युत नियामक आयोग डहार ले जारी विनियम अनुसार घरेलू अउ आने उपभोक्ता अपन अनुबंध भार के अनुसार क्षमता के ग्रिड कनेक्टेड अउ संयंत्र के स्थापना कर सकत हे।
कृषि मंत्री-एमएसपी
केन्द्रीय कृषि मंत्री नरेन्द्र सिंह तोमर ह किहीन कि न्यूनतम समर्थन मूल्य-एम.एस.पी. बर केन्द्र अउ राज्य सरकार के एजेंसी डहार ले उपज के खरीदी ले किसान मन ल फायदा होवत हे। ओमन किहीन कि कई निजी कंपनी एम.एस.पी. ले भी ज्यादा कीमत म उपज खरीदत हे। श्री तोमर ह लोकसभा म काली एक लिखित उत्तर म बतईन कि एम.एस.पी. म खरीद ले 2018-19 के दउरान लाभ पाने वाला किसान मनके संख्या 1 करोड़ 71 लाख 50 हजार रिहीस, जेन बछर 2020-21 के दउरान बड़के 2 करोड़ 10 लाख 7 हजार होगे हे।
लोकवाणी
मुख्यमंत्री भूपेश बघेल के मासिक रेडियोवार्ता लोकवाणी के आगामी कड़ी के प्रसारण 8 अगस्त रविवार के होही। मुख्यमंत्री लोकवाणी म ए दरी ‘‘आदिवासी अंचलों की अपेक्षाएं और विकास‘‘ बिसय म प्रदेसवासी मन ले बातचीत करही। लोकवाणी के प्रसारण छत्तीसगढ़ के आकाशवाणी के सब्बो केन्द्र, एफ.एम. रेडियो अउ क्षेत्रीय समाचार चैनल मन ले बिहनिया साढ़े दस बजे ले ग्यारह बजे तक होही।
रेल-मॉनिटरिंग सिस्टम
रेल पुल म नदी के जलस्तर अब वाटर लेवल मॉनिटरिंग सिस्टम ले मापे जावत हे। मापन यंत्र म लगे सेंसर के माध्यम ले पल-पल के जलस्तर के जानकारी मिलही। इहे नहीं ए सिस्टम ले जुड़े अधिकारी मनके मोबाइल म जलस्तर के जानकारी घलो आत रिही।
दक्षिण पूर्व मध्य रेलवे के तहत स्थित ग्यारह जरूरी रेलवे पुल म घलो वाटर लेवल मॉनिटरिंग सिस्टम के इस्तेमाल करे जात हे। संगेसंग आने जरूरी रेलवे पुल म घलो एला लगाय के योजना हे। जानबा के मुताबिक पहली पारंपरिक गेज पद्धति ले नदी के जलस्तर पता करे जात रिहीस। एमा तुरते सूचना नइ मिल पात रिहीस। संगेसंग वाटर लेवल रीडिंग म घलो गलती के संभावना रिहीस।
आधार-सीडिंग
सार्वजनिक वितरण प्रणाली के तहत रासन सामग्री पाय बर हितग्राही मन ल आधार नंबर प्रस्तुत करे के संबंध म समय-सीमा 10 जून ले बढ़ाके 30 सितंबर कर दे गेहे। ए संबंध म खाद्य, नागरिक आपूर्ति अउ उपभोक्ता संरक्षण विभाग ह प्रदेस के सब्बो जिला कलेक्टर मन ल पत्र जारी करके रासनकार्ड म पंजीकृत सब्बो सदस्य मनके आधार नंबर लेके 30 सितंबर तक सीडिंग के कार्यवाही पूरा करे के निरदेस दीन हे।
सूरजपुर-चलित थाना
लोगन मनके समस्या सुलझाय अउ डिजिटल ठगी बर जागरूकता लाय के उद्देश्य ले सूरजपुर पुलिस डहार ले मानी गांव म चलित थाना के आयोजन करे गेहे। पुलिस अधीक्षक भावना गुप्ता के उपस्थ्ति म लोगन मन ह अपन समस्या के जानकारी दीन। एमा ले कई ठिन समस्या ल मउका म ही सुलझाय गीस। पुलिस अधीक्षक ह ग्रामीण मन ल एटीएम अउ साइबर क्राईम के जानकारी दीन। संगेसंग ओमन ग्रामीण मन ल एटीएम पिन, ओटीपी अउ सी.वी.वी. नंबर के जानकारी कोनों ले भी साझा करे ले मना करीन।
दूरदर्शन-स्ट्रिंगर नियुक्ति
रायपुर दूरदर्शन केंद्र के प्रादेशिक समाचार एकांश डहार ले प्रदेश के सबो अठाईस जिला म स्ट्रिंगर के नियुक्ति बर आवेदन मंगाए गेहे। आवेदक मन ल अपन आवेदन पत्र म ए बात स्पष्ट उल्लेख करना होही। ओमन कौन से जिला ले स्ट्रिंगर बनना चाहत हे। एक आवेदक एक ही जिला ले आवेदन कर सकत हे।
चुने गे स्ट्रिंगर मनके नियुक्ति दू वर्ष के अनुबंध के आधार म करे जाही। स्ट्रिंगर नियुक्ति ले संबंधित सबो जानकारी प्रसार भारती के वेबसाईट -प्रसार भारती डॅाट जीओवी डॅाट इन/पीबी वैकेंसीस- म पा सकत हे। आवेदन स्पीड पोस्ट या पंजीकृत डाक डहार ले ही स्वीकार करे जाही। आवेदन करे के आखरी तारीख काली पांच अगस्त हे।
अउ अब थोरकुन समाचार सार म-
– प्रदेस के खेल अउ युवा कल्याण विभाग ह राज्य खेल पुरस्कार बर आवेदन मंगाय के तिथि सात ले बढ़ाके दस अगस्त कर देहे।
– धमतरी जिला के बोराई थाना पुलिस ह बारह नग हीरा के संग दू आरोपी मन ल गिरफ्तार करे हे। इंखर तीर ले एक मोटरसाइकिल घलो जब्त करे गेहे।
– जांजगीर-चांपा जिला के पामगढ़ के मुख्य सड़क म दू मोटरसाइकिल के बीच होय टक्कर म एक आदमी के मउका म ही मउत होगे।
अउ
– रायपुर के कुशाभाउ ठाकरे पत्रकारिता अउ जनसंचार विश्वविद्यालय म पत्रकारिता अउ मीडिया के स्नातक पाठ्यक्रम म प्रवेश के प्रक्रिया शुरू होगे हे। जेखर आखरी तारीख बीस अगस्त हे।