प्रधानमंत्री-ई.रूपी.
प्रधानमंत्री नरेन्द्र मोदी ह आज डिजिटल भुगतान बर नगदी रहित अउ स्पर्श मुक्त बेवस्था ‘‘ई-रूपी‘‘ के वीडियो कान्फ्रेंसिंग ले सुरूवात करीन। ई-रूपी कोन्हों भी मनखे बर डिजिटल भुगतान बेवस्था हे, जेमा क्यू-आर कोड अउ एस.एम.एस. वाउचर हवय, जउन ल लाभार्थी के मोबाइल बर दे जाथे।
ए मउका म श्री मोदी ह किहीन कि देस डिजिटल सासन अउ ई-रूपी ल नवा आयाम देवत हे।
अमृत महोत्सव
प्रधानमंत्री नरेन्द्र मोदी ह ए भरोसा जताईन हे कि एक सौ तीस करोड़ भारतीय देस ल नवा ऊंचाई तक पहुंचाय बर कड़ा मेहनत करत रइही। काबर कि देस अपन अमृत महोत्सव मनावत हे। एक ट्वीट संदेस म श्री मोदी ह किहीन कि अगस्त महीना के सुरूवात म कई ठिन बने घटना होय हे, जउन हर भारतीय बर सुखद बात हे। देस म रिकार्ड टीकाकरण के काम होय हे अउ आर्थिक गतिविधि बाढ़े के संकेत हवय।
बिजली दर
प्रदेस म बिजली दर म बढ़वार होगे हे। जानकारी के मुताबिक औसत अड़तालीस पइसा प्रतियूनिट बिजली के दर बाढ़े हे, जउन एक अगस्त ले लागू होगे हे। आयोग ह केहे हे कि घरेलू उपभोक्ता मन ल तय सुल्क ले जाही।
आयोग के अध्यक्ष हेमंत वर्मा ह बतईन कि बछर दू हजार इक्कीस बाईस बर औसत दर छह रूपिया इकचालीस पइसा होही। पाछु बछर ए दर पांच रूपिया तिरानवे पइसा रिहीस। उहें, अब पांच हजार रूपिया ले जादा बिजली बिल के भुगतान ऑनलाइन करे बर पड़ही। बिना सब्सिडी वाले कृषि पंप ल देवइया ऊर्जा प्रभार म दस प्रतिशत के छूट ल बढ़ाके बीस प्रतिशत करे गेहे। उहें, गंवई-गांव, अस्पताल अउ नर्सिंग होम ऊर्जा प्रभार के छूट ल पांच प्रतिशत ले बढ़ाके सात प्रतिशत करे गेहे। संगेसंगे उद्योग मन ल तीस घंटा के जघा अब छत्तीस घंटा बिजली दे जाही।
कोरोना टीका/समाचार
प्रदेस म कोरोना संक्रमण के औसत पॉजिटीविटी दर शून्य दशमलव नौ प्रतिशत म आ गेहे। काली प्रदेस म कोरोना संक्रमण के दू सौ चौदह ठिन नवा मामला आगू आईस। अभी एक हजार नौ सौ ले जादा मरीज के इलाज आने-आने अस्पताल म होवत हे।
इही बीच, प्रदेश म कोरोना टीकाकरण के काम जोरदरहा चलत हे। राज्य म कोरोना ले बांचे बर अब तक एक करोड़ तेईस लाख तेरह हजार ले जादा टीका लगाय गेहे।
मुख्यमंत्री-सिलगेर घटना
मुख्यमंत्री भूपेश बघेल ह किहीन हे कि सिलगेर घटना के जांच छह महीनो के भीतरी पूरा कर ले जाही। श्री बघेल काली रईपुर म सुकमा अउ बीजापुर जिला ले आय प्रतिनिधिमंडल संग गोठबात करत रिहीन। ए बेरा म मुख्यमंत्री ह गांव के लोगन ल भरोसा देवईन कि कोन्हों भी निरदोष मनखे के खिलाफ कार्रवाई नइ करे जाही।
स्कूल-संचालन
प्रदेस के स्कूल मन म आज ले कुछेक सरत संग ऑफलाइन पढ़ई सुरू होगे हे। अभी दसवीं अउ बारहवीं के संग पहली ले पांचवीं अउ आठवीं के कक्षा चलाय जात हे। करीबन सोलह महीना के बाद आज प्रदेस के कुछेक स्कूल मन म चहल-पहल दिखाई दीस।
मुख्यमंत्री भूपेश बघेल ह स्कूल म ऑनलाइन कक्षा सुरू होय म सिक्षक अउ लइका मन ल अपन सुभकामना दीन हे। ए बेरा म रईपुर के अपन निवास कार्यालय म राखे गे वर्चुअल कारीकरम ले मुख्यमंत्री ह दुरूग जिला के पाटन विधनसभा क्षेत्र म चलाय जात स्वामी आत्मानंद अंग्रेजी माध्यम स्कूल मन म सात करोड़ पच्चीस लाख रूपिया ले जादा के विकास काम, भूमिपूजन अउ लोकार्पण करीन।
उहें, स्कूल शिक्षा मंत्री डॉक्टर प्रेमसाय सिंह टेकाम आज राजधानी रईपुर के आर.डी. तिवारी इंग्लिश मीडियम स्कूल के प्रवेश उत्सव कारीकरम म संघरीन। ओमन स्कूल म ऑफलाइन कक्षा सुरू होय म डिजिटल बोर्ड म हाथ ले लिख के लइका मन ल सुभकामना दीन। डॉक्टर टेकाम ह सिक्षक मन ले किहीन कि ओमन लइका मन ल कोरोना बचाव संबंधी नियम के पालन जरूर करवावय।
ऐति, महासमुंद अउ बिलासपुर जिला के जम्मों सरकारी अउ प्राईवेट स्कूल म आज ले कक्षा सुरू होईस। बिलासपुर म स्कूल म दू पाली म लगाय जात हे। जिला के सरकंडा सरकारी स्कूल म लइका मन ल आज मास्क बांटे गीस। उहें, रायगढ़ जिला कलेक्टर भीमसिंह ह आज दू ठिन स्कूल के जांच करीन अउ लइका मन ले गोठबात करत उंखर उत्साह बढ़ईन। राज्य सासन ह ए सबो कक्षा ओ जिला म सुरू करे के फइसला लेहे, जिहां कोरोना पॉजिटीविटी दर पाछु सात दिन म एक प्रतिशत हवय। उहें, स्कूल मन म ऑनलाइन कक्षा पहिली असन चलत रइही।
प्रशिक्षण संस्था-आवेदन
प्रदेस के सबो सरकारी औद्योगिक प्रशिक्षण संस्था अउ बिसेस औद्योगिक प्रशिक्षण संस्था म भर्ती बर ऑनलाइन अरजी मंगाय गेहे। ए संस्था मन म भर्ती खातिर आवेदन देके आखिरी तारीख आठ अगस्त हवय। रोजगार अउ प्रशिक्षण संचालक के मुताबिक आई.टी.आई. म चलाय जात पाठ्यक्रम मन म भर्ती बर राज्य के मूल निवासी पात्र होही। लोक सेवा केन्द्र कोति ले ए अरजी दे जा सकत हे।
सिंधु-कास्य पदक
टोक्यो ओलंपिक म बैडमिंटन के महिला सिंगल्स म पी.वी. सिंधु ह कास्य पदक जीते हे। एखरे संग सिंधु ओलंपिक खेल म दू व्यक्तिगत पदक जीतइया पहिली भारतीय महिला खिलाड़ी बन गेहे।
राष्ट्रपति रामनाथ कोविंद, प्रधानमंत्री नरेन्द्र मोदी अउ केन्द्रीय खेल मंत्री अनुराग ठाकुर ह सिंधु ल पदक जीते म बधाई दीन हे। प्रधानमंत्री ह अपन ट्वीट संदेस म किहीन कि सिंधु भारत के गौरव हवय।
ऐति, छत्तीसगढ़ के मुख्यमंत्री भूपेश बघेल अउ खेलमंत्री उमेश पटेल ह सिंधु ल कास्य पदक जीते म सुभकामना दीन हे।
माओवादी-समाचार
सुकमा जिला म दू झिन इनामी समेत तीन झिन माओवादी मन ह आत्मसमर्पण करीन हे। जिला के पुलिस अधीक्षक सुनील शर्मा ह बतईन कि ए माओवादी फुलबगड़ी थाना क्षेत्र म सक्रिय रिहीस अउ इंखर उपर बम विस्फोट अउ पुलिस पार्टी उपर हमला करे जइसन घटना म सामिल रेहे के आरोप हवय।
उहें, सुकमा जिला के गादीरास पोरदेम क्षेत्र म सुरक्षा बल अउ माओवादी मनके बीच मुठभेड़ होय के खबर मिले हे। ए बेरा म एक झिन माओवादी ल गिरफ्तार करे गेहे। एक लाख रूपिया के ए इनामी माओवादी तीर ले विस्फोटक जिनीस बरामद होय हे।
स्व-सहायता समूह-राखी
बालोद जिला म स्व-सहायता समूह के माईलोगिन मन ह वोकल फॉर लोकल के मुहिम ल आगू बढ़ाय के जिम्मेवारी लेहे। जिला के गुंडरदेही, डौंडी अउ बालोद विकासखंड के करीबन तेरह ठिन स्व-सहायता समूह के माईलोगिन मन अपन हाथ ले राखी बनावत हे। जिला कलेक्टर के पहल म बिहान समूह कोति ले धान के बाली, बांस अउ साग-भाजी ले रिकम-रिकम के राखी बनाय गेहे। ए राखी ल बालोद बंधन के नाव दे गेहे। स्व-सहायता समूह के मुताबिक बाजार म जउन चाईनीज अउ फैंसी राखी हे, ओखर मुकाबला म ए राखी सस्ता हवय।
मौसम
दक्षिण-पश्चिम उत्तरप्रदेश अउ उत्तर-पश्चिम मध्यप्रदेश के उपर निम्नदाब के क्षेत्र बने हे, जेखर परभाव ले काली राज्य के कुछेक जघा म छूटपुट बरसा होय के आसार हवय। उहें, चार अगस्त के बाद ले राज्य के बस्तर, दुरूग अउ रईपुर संभाग म जादा बरसा होय के संभावना जताय गेहे।
इही बीच, अब तक राज्य म पांच सौ तिरासी मिलीमीटर औसत बरसा दरज करे गेहे। ए बेरा म कोरबा जिला म सबले जादा आठ सौ पंचानवे मिलीमीटर अउ बालोद जिला म सबले कमती चार सौ उनतीस मिलीमीटर बरसा होय हे।