प्रधानमंत्री-आईपीएस प्रोबेशनर्स
प्रधानमंत्री नरेन्द्र मोदी ह आईपीएस प्रोबेशनर मन ले अवइया 25 बछर म देस म सुराज स्थापित करे खातिर अपन मुख्य भूमिका निभाय ल किहीन। प्रधानमंत्री ह ए जम्मों अधिकारी मन ले आग्रह करीन कि ओमन अपन हर निर्णय म राष्ट्रीय हित ल ध्यान म राखत ‘‘राष्ट्र प्रथम-सदैव प्रथम‘‘ के मंत्र ल याद राखय।
प्रधानमंत्री ह किहीन कि आतंरिक सुरक्षा बनाय राखे म विकास अउ कल्याण काम मनके मुख्य भूमिका होथे अउ आईपीएस प्रोबेशनर मन ले आग्रह करीन कि ओमन जनभावना ल समझ के जम्मां मुद्दा के निपटारा सांतिपूर्वक करय।
प्रधानमंत्री ह छत्तीसगढ़, तमिलनाडु, राजस्थान, केरल अउ आंध्रप्रदेश समेत आने-आने राज्य के कैडर मनके आईपीएस प्रोबेशनर मन ले गोठबात करीन।
केन्द्र परामर्श/कोविड पैकेज
केन्द्र सरकार ह राज्य अउ केन्द्रसासित प्रदेस मन ल फेर परामर्स दे हवय कि ओमन देसव्यापी कोविड टीकाकरण कार्यक्रम म बेघर अउ निराश्रित लोगन मन ल प्राथमिकता के आधार म वैक्सीन लगावय। केन्द्रीय स्वास्थ्य मंत्रालय के पत्र म राज्य अउ केन्द्रसासित प्रदेस मन ल सलाह दे गे हवय कि ओमन अपन सामाजिक न्याय अधिकारिता विभाग अउ स्वास्थ्य विभाग ल निरदेस देवय कि बेसहारा अउ भिखारी मनके टीकाकरण करे खातिर एके संघरा परयास करे जावय।
उहें, केन्द्र सरकार ह कोविड महामारी ले निपटे खातिर इमरजेंसी कोविड रिस्पॉन्स पैकेज के तहत राज्य अउ केन्द्रसासित प्रदेस मन ल अब तक तकरीबन 1 हजार 8 सौ 28 करोड़ रूपिया के रासि प्रदान करे हवय। एक ठिन ट्वीट म केन्द्रीय स्वास्थ्य मंत्री मनसुख मांडविया ह किहीन कि दे गीस रासि पैकेज के कुल रासि के 15 प्रतिशत हवय।
कोरोना टीका/समाचार
प्रदेस म कोरोना संक्रमण के स्थिति म सरलग सुधार होवत हे अउ औसत पॉजिटीविटी दर ह गिरके शून्य दशमलव दू प्रतिसत म आ गे हवय। काली प्रदेस म कोरोना संक्रमण के 125 ठिन नवा मामला आगू आईस। अभी के बेरा म 1 हजार 9 सौ ले जादा मरीज मनके इलाज आने-आने अस्पताल अउ होम आइसोलेशन म चलत हवय।
इही बीच, प्रदेस म कोरोना टीकाकरण के काम जोरसोर ले चलत हवय। राज्य म कोरोना ले बचाव खातिर अब तक 1 करोड़ 20 लाख 82 हजार ले जादा टीका लगाय जा चुके हवय। एमा 97 लाख 65 हजार ले जादा लोगन मन ल उंखर पहिली टीका अउ तकरीबन 23 लाख 16 हजार लोगन मन ल कोरोना टीका के दूसर डोज लग चुके हवय।
रईपुर जिला म कोरोना टीकाकरण अभियान के तहत अब तक करीबन साढ़े 14 लाख टीका लगाय जा चुके हे। एमा ले तकरीबन 11 लाख 44 हजार लोगन मन अइसन हे, जेमन ल वैक्सीन के पहिली डोज लगे हे। उहें, 3 लाख 4 हजार लोगन मन अपन दून्नों डोज ल लगवा चुके हवय।
आयुष्मान भारत योजना
आयुष्मान भारत योजना के दायरा म अब तक 10 करोड़ परिवार मन ल लाय जा चुके हवय। केन्द्रीय स्वास्थ्य मंत्री मनसुख मांडविया ह काली लोकसभा म बतईन कि ए योजना म अब ले 50 करोड़ लोगन मन 5 लाख रूपिया तक के निःशुल्क उपचार करवाय के पात्र होही। आयुष्मान भारत योजना के सुरूवात जम्मों मनखे मन खातिर स्वास्थ्य बीमा उपलब्ध कराय के उद्देश्य ले करे गे रिहीस।
विश्व स्तनपान सप्ताह
हर बछर जइसन ए बछर घलो अगस्त माह के पहिली सप्ताह ल ‘‘विश्व स्तनपान सप्ताह के रूप म मनाय जाही। ए दउरान प्रदेस म शिशुवती महिला मनके के बीच स्तनपान ल बढ़ावा दे बर, छोट लइका मन ल बीमारी अउ कुपोसन ले बचाय बर अउ शिशु मृत्यु दर म कमी लाय के उद्देश्य ले स्वास्थ्य विभाग अउ महिला बाल विकास विभाग डहार ले मिलजुल के 1 ले 7 अगस्त तक जन-जागरूकता म आधारित आने-आने कारीकरम आयोजित करे जाही।
ओपन स्कूल परिणाम
छत्तीसगढ़ राज्य ओपन स्कूल डहार ले आयोजित हायर सेकेंडरी स्कूल सर्टिफिकेट मुख्य परीक्षा के परिणाम घोषित कर दे गे हवय। स्कूल सिक्षा मंत्री डॉक्टर प्रेमसाय सिंह टेकाम ह परीक्षा परिणाम ल ऑनलाइन जारी करीस। परीक्षाफल 98.20 प्रतिशत रिहीस। एमा पास होवइया नोनी मनके 98.30 प्रतिसत अउ बाबू मनके 98.12 प्रतिशत हवय। परीक्षा परिणाम छत्तीसगढ़ राज्य ओपन स्कूल के वेबसाइट म देखे जा सकत हे।
उहें, छत्तीसगढ़ माध्यमिक सिक्षा मंडल के हायर सेकेंडरी पूरक अउ अवसर परीक्षा दू हजार इक्कीस खातिर अवइया दू अगस्त ले आवेदन पत्र भरे जा सकही, जेखर भरे के अवधि सामान्य सुल्क के संग दू ले बीस अगसत तक राखे गे हवय। फेर, विलंब सुल्क के साथ 21 ले 28 अगस्त तक आवेदन पत्र भरे जा सकत हे। हायर सेकेंडरी पूरक अउ अवसर परीक्षा सितंबर माह के दूसर सप्ताह ले सुरू होही।
विधानसभ सत्र-समापन
छत्तीसगढ़ विधानसभा के मानसून सत्र काली समाप्त होगीस। ए मउका म मुख्यमंत्री भूपेश बघेल ह किहीन कि विधानसभा के ए मानसून सत्र छोटे होय के संगेसंग सार्थक घलो रिहीस। सत्र के दउरान सदस्य मन ह अपन-अपन क्षेत्र के समस्या मन ले जुड़े प्रश्न, ध्यानाकर्षण, स्थगन, अशासकीय संकल्प अउ लोकहित के मुद्दा उपर सदन के ध्यान आकर्षित करीन। मुख्यमंत्री ह किहीन कि ए सत्र म संसदीय प्रणाली के सब्बो आयाम मनके उपयोग होय हवय।
सत्र के समापन के मउका म नेता प्रतिपक्ष धरमलाल कौशिक, विधायक धर्मजीत सिंह अउ केशव चंद्रा ह घलो मानसून सत्र म जनहित के मुद्दा मन उपर होय सार्थक गोठबात अउ नवा सदस्य मनके सहभागिता के सराहना करीन।
युवा आयोग-पदभार ग्रहण
छत्तीसगढ़ युवा आयोग के नवा नियुक्त करे गे अध्यक्ष जितेन्द्र मुदलियार, सदस्य उत्तम वासुदेव अउ अजय सिंह ह आज राजधनी रईपुर के पंडित दीनदयाल उपाध्याय ऑडिटोरियम म राखे गे कारीकरम म पदभार संभलीन। कारीकरम म मुख्यमंत्री भूपेश बघेल वीडियो कान्फ्रेंसिंग के माध्यम ले सामिल होईन।
ए मउका म मुख्यमंत्री ह किहीन कि नवा छत्तीसगढ़ के निर्माण म प्रदेस के युवा मनके भूमिका महत्वपूर्ण होही। ओमन किहीन कि युवा मन ल सिक्षा अउ रोजगार के बढ़िया ले बढ़िया सुविधा उपलब्ध कराना राज्य सरकार के सबले बड़े प्राथमिकता हवय।
अउ अब पेस हवय मौसम के हाल..
प्रदेस के आने-आने हिस्सा म पाछु तीन दिन ले रूक-रूक के होवत सरलग बरसा के रूके के बाद आज लोगन मन ल थोकुन राहत मिले हवय। हालांकि, मौसम विभाग ह अवइया 24 घंटा के दउरान प्रदेस म आने-आने जघा मन म हल्का ले मध्यम बारिस होय के संभावना घलो बताय हे।
अउ अब थोरकुन समाचार सार म-
– मुख्यमंत्री भूपेश बघेल ह स्वतंत्रता संग्राम सेनानी अउ समाज सुधारक बाल गंगाधर तिलक ल एक अगस्त के उंखर पुण्यतिथि म नमन करीन हे।
– राज्य सासन ह चतुर्थ राज्य वित्त आयोग के गठन के अधिसूचना जारी कर दे हवय। सेवानिवृत्त आईएएस अधिकारी सरजियस मिंज ह राज्य वित्त आयोग के अध्यक्ष होही।
– प्रधानमंत्री कौशल विकास योजना के तहत रईपुर जिला के युवा मन ले आई.टी.आई. माना म इलेक्ट्रीकल बाइंडर अउ इंडस्ट्रीयल इलेक्ट्रीशियन व्यवसाय मन म निःशुल्क कौशल प्रशिक्षण दे खातिर चार अगस्त तक आवेदन आमंत्रित करे गे हवय।
अउ
– महासमुंद जिला म पुलिस ह अंतर्राज्यीय मोटर साइकिल चोर गिरोह के सात झिन सदस्य मन ल गिरफ्तार करे हे। आरोपी मनके पास ले 15 ठिन दुपहिया वाहन जब्त करे गे हवय।