प्रधानमंत्री नई शिक्षा नीति
प्रधानमंत्री नरेंद्र मोदी ह कीहिन हे कि नवा राष्ट्रीय शिक्षा नीति युवा मन ल ये विश्वास दिलाथे कि देश ह अब पूरा तरीका ले उंखर अउ उंखर हौसला के संग हवय । प्रधानमंत्री राष्ट्रीय शिक्षा नीति के एक बछर पूरा होय उपर आयोजित कार्यक्रम ल संबोधित करत रीहिन। ओमन कीहिन कि पाछू एक बछर म शिक्षक, प्रधानाचार्य, अउ नीतिकार मन राष्ट्रीय शिक्षा नीति ल भुंइया म उतारे बर बड़ मेहनत करीन हे।
श्री मोदी ह कीहिन कि आठ राज्य के चौदा ठिन इंजीनियरिंग कॉलेज पांच भारतीय भाषा – हिंदी तमिल तेलगू मराठी अउ बांगला म इंजीनियरिंग के पढ़ई शुरू करइया हे। एखरे संग इंजीनियरिंग कोर्स के ग्यारा भारतीय भाषा म अनुवाद बर एक टूल घलो विकसित करे जा चुके हे। प्रधानमंत्री ह बताइन कि भारतीय साईन लैग्वेंज ल पहिली घांव एक भाषा विषय के दर्जा दे गेहे। अब छात्र मन ह एला भाषा के रूप म घलो पढ़ही। एखर ले दिव्यांग मन ल बहुत मदद मिलही।
राज्यपाल-दो वर्ष
छत्तीसगढ़ के राज्यपाल के रूप म अनुसुईया उइके के कार्यकाल के आज दू बछर पूरा होगे। ए दू बछर के कार्यकाल ल ओमन संतोषप्रद बतात किहीन कि छत्तीसगढ़ के दूरदराज इलाका मन म ए संदेस पहुंचिस हे कि राजभवन के दुआर आम जनता बर घलोक खुल्ला हे। राज्यपाल ह ए मउका म किहीन कि ओमन सौभाग्यसाली हे कि ओमन ला छत्तीसगढ़ के राज्यपाल बने के मउका मिलीस। राज्यपाल ह किहीन कि ओमन पूरा भारत भ्रमण करीन हे अउ ए महसूस करीन हे कि छत्तीसगढ़ के मनखे मन बहुत सहज अउ सरल हे। ए मउका म राजभवन परिवार ह राज्यपाल ह बधाई अउ सुभकामना दीन।
मुख्यमंत्री-विधानसभा
प्रदेस म राजीव गांधी ग्रामीण भूमिहीन कृषि मजदूर न्याय योजना के तहत अब ले हर साल मजदूर मन ल छह हजार रूपिया के आर्थिक मदद दे जाही। मुख्यमंत्री भूपेश बघेल ह काली विधानसभा म अनुपूरक बजट उपर चरचा के दउरान ए घोषणा करीन। ए योजना चालू वित्तीय बछर ले लागू होगी। अनुपूरक बजट म एखर बर दू सौ करोड़ रूपिया के प्रावधान करे गेहे।
मुख्यमंत्री ह आरोप लगईन कि केन्द्र सरकार ह साठ लाख मीटरिक टन चावल लेके सहमति दे रिहीस, लेकिन छत्तीसगढ़ ले मात्र चौबीस लाख मीटरिक टन चावल के उठाव करे गीस। एखर कारण अतिसेष धान के नीलामी घाटा उठाके करना पड़त हे। एखर बावजूद राज्य सरकार हर हाल म किसान मनके मदद करते हे।
विधानसभा म काली दू हजार चार सौ पचयासी करोड़ रूपिया ले जादा के पहली अनुपूरक बजट ध्वनिमत ले पारित होगे।
न्यू इंडिया एट रेट/75
केंद्र सरकार आजादी के पचहत्तरवां वर्षगांठ के उपलक्ष्य म विकास ल जन आंदोलन ले जोड़त – न्यू इंडिया एट द रेट/सेवंटी फाइव – के अवधारणा संग जन-जागरूकता अभियान शुरू करने वाला हे। जागरूकता अभियान बर जम्मों राज्य मनके पचहत्तर स्कूल अउ अतके कॉलेज मन म आने आने गतिविधि के आयोजन करे जाही। एखरे संग भारत सरकार के जम्मों विभाग अउ मंत्रालय घलो जन-जागरूकता कार्यक्रम आयोजित करही।
प्रथम चरण के जागरूकता अभियान के रूपरेखा तियार करे बर छत्तीसगढ़ राज्य एड्स नियंत्रण समिति डहार ले वर्चुअल बइठका राखे गीस। योजना के प्रथम चरण म अंतर्राष्ट्रीय युवा दिवस बारा अगस्त ले राज्य के चुने हुए स्कूल कॉलेज मन म एचआईवी, टीबी अउ रक्तदान जागरूकता अभियान चलाए जाही। ए अभियान बीस अगस्त तक चलही।
गृह सचिव-कोविड निर्देश
केन्द ह राज्य अउ केंद्र सासित प्रदेस मनले केहे हे कि ओमन जिला अउ दूसर स्थानीय अधिकारी मन ल कोविड-नाइंटीन प्रबंधन के जरूरी उपाय करे बर सख्त निरदेस जारी करय। राज्य के मुख्य सचिव मन ल लिखे पत्र म केंद्रीय गृह सचिव अजय भल्ला ह किहीन कि कोविड अनुरूप आचरण के पालन करवाय म कोनों किसम के लापरवाही बर संबंधित अधिकारी व्यक्तिगत रूप ले जिम्मेदार ठहराया जाना चाही। अपन पत्र म श्री भल्ला ह किहीन कि कोविड मामला म कमी आना संतोषजनक हे, लेकिन कोविड संक्रमित लोगन मनके कुल संख्या आज घलो जादा हे। ओमन किहीन कि लापरवाही के कोनो गुंजाइस नई हे अउ प्रतिबंध म सोच-समझ के छूट देना चाही। गृह सचिव ह किहीन कि अवइया तिहार मन ल देखत भीड़भाड़ वाला स्थान मन म कोविड संबंधी दिसा-निरदेस के अनुपालन सुनिश्चित करना होही।
स्कूल-कॉलेज-संचालन
प्रदेस म अवईया दू अगस्त ले स्कूल खुलत हे। स्कूल मन म हाल-फिलहाल दसवीं अउ बारहवीं कक्षा के पढ़ई होही। आफलाइन कक्षा के तियारी के जायजा ले बर करीब छह सौ अधिकारी मन ल जिम्मेदारी दे गेहे। जेन मन पांच हजार ले जादा स्कूल म पहुंचके स्थिति के निरीक्षण करहीं। हरेक अधिकारी कम से कम पांच-पांच ठिन स्कूल मन म पहुंचही। ऐमा एक स्वामी आत्मानंद इंग्लिस स्कूल, एक प्राथमिक, एक मिडिल, एक हाई अउ एक हायर सेकेंडरी स्कूल सामिल हे। स्कूल मन म ओमन कोरोना ले बचाव बर जारी निरदेस मनके अनुपालन महत्वपूर्ण योजना जइसे निःसुल्क पाठ्य-पुस्तक, गणवेस, मध्यान्ह भोजन आदि के क्रियान्वयन बर घलो मॉनिटरिंग करही। स्कूल सिक्षा सचिव डाक्टर कमलप्रीत सिंह ह ए संबंध म सब्बों संभागीय संयुक्त संचालक अउ जिला सिक्षा अधिकारी मन ल निरदेस जारी कर देहे।
उहें, दू अगस्त ले कॉलेज घलो खुलत हे। कॉलेज मन म सेमेस्टर के परीक्षा आफलाइन मोड म होही। कॉलेज मन म सेमेस्टर परीक्षा बर फॉर्म भरे के प्रक्रिया सुरू होगे हे।
कोरोना समाचार
प्रदेस म कोरोना संक्रमण की स्थिति म सरलग सुधार होवत हे अउ औसत पॉजीटिविटी दर गिरके सून्य दसमलव चार प्रतिसत होगे हे। काली प्रदेस म कोरोना संक्रमण के एक सौ चौंसठ नवा मामला आगू आए हे। वर्तमान म दू हजार दू सौ ले जादा मरीज मनके इलाज आने-आने अस्पताल या होम आइसोलेसन म चलत हे।
ऐती, कोरोना संक्रमण के स्थिति म सुधार ल देखत बालोद जिला म मंगलवार के साप्ताहिक लॉकडाउन ल समाप्त कर दे गेहे।
इहीं बीच, प्रदेस म कोरोना टीकाकरण के काम सरलग चालू हे। राज्य म कोरोना ले बचाव बर अब एक करोड़ अट्ठारह लाख अटहत्तर हजार ले जादा टीका लगाए जा चुके हैं।
मौसम
प्रदेश के अधिकांश इलाका मन म पाछू तीन दिन ले लगातार बरसा होवत हे। मौसम विभाग ह चेतावनी देहे कि अवइया चौबीस घंटा के दउरान कुछएक जगा म भारी ले अतिभारी बारिश हो सकत हे। मुख्य रूप ले प्रदेश के मध्य क्षेत्र अउ सरगुजा संभाग के उत्तरी भाग म भारी बरसा होय के संभावना हे।
ए समय एक निम्न दाब के क्षेत्र तटीय बांगलादेश अउ ओखर ले लगे पश्चिम बंगाल उपर स्थित हे। एखरे संग उपरी हवा म चक्रवाती घेरा घलो बने हे। एखर असर ले छत्तीसगढ़ म बरसा के स्थिति बने हुए हे।
इही बीच प्रदेश के कई ठन जिला मन म पाछू दू दिन ले लगातार बरसा ले जनजीवन अस्त व्यस्त होगे हे। कई ठिन नदिया-नाला मनके जल स्तर बाढ़ गेहे। कोरबा जिला म जादा बरसा होय के सेती कई ठिन गांव के संपर्क ब्लॅाक मुख्यालय ले टूट गेहे।