मन की बात
प्रधानमंत्री नरेन्द्र मोदी ह अमृत महोत्सव के मउका म देसवासी मन ले अमृत संकल्प लेके आरो दीन हे। आकाशवाणी ले मन की बात कारीकरम म श्री मोदी ह किहीन कि हमन ल राष्ट्र प्रथम, सदैव प्रथम के मंत्र के संग आगू बढ़ना हे।
बाबू के अगुवई म भारत छोड़ो आंदोलन चले रिहीस, वइसने आज हरेक देसवासी ल भारत जोड़ो आंदोलन के अगुवई करना हे।
अवइया पन्द्रह अगस्त बारे म प्रधानमंत्री ह किहीन कि देस आजादी के पचहत्तरवां बछर म जाही, जउन ह हमर मन बर बड़का सौभाग्य हे। एला मनाय बर बारह मार्च दो हजार इक्कीस ले बापू के साबरमती आश्रम अमृत महोत्सव सुरू होय हवय। ओमन यहू किहीन कि ए बछर पन्द्रह अगस्त ले राष्ट्रगान ले जुड़े एक ठिन आयोजन होही।
प्रधानमंत्री ह किहीन कि हमन इहे के काम ल समर्थन देवत रोजीना काम करत राष्ट्र निर्माण म योगदान दे सकत हन। ओमन लोगन मन ले बुनकर अउ शिल्पी मनके बनाय जिनीस ल बिसाय के अपील घलो करीन।
श्री मोदी ह टोक्यो ओलंपिक के चरचा करत देसवासी मन ले किहीन कि ओमन भारतीय दल देके संगे उंखर उछाह बढ़ावय। प्रधानमंत्री ह किहीन कि काली छब्बीस जुलाई करगिल विजय दिवस हरय। जउन ह हमर सशस्त्र बल मनके बहादुरी अउ धीरज के अइसन चिन्हारी हरय, जेला जम्मों विश्व ह देखे हे।
प्रधानमंत्री ह मन की बात बिसेस धन्यवाद देवत किहीन कि सुनइया मनके बारे म माईजीओवी ले पता चलत हे कि एखर बर संदेस अउ सुझाव पठोइया वाले म लगभग पचहत्तर प्रतिशत मनखे पैंतीस बछर ले कम उमर के हे, यानि भारत के युवा सक्ति के सुझाव ह मन की बात ल दिसा देवत हे।
श्री मोदी ह अवइया तिहार मन बर देसवासी मन ल बधाई देके संगे अपील घलो करीन हे कि सबो झिन मन कोविड प्रोटोकॉल के पालन करत राहय।
विस मानसून सत्र
छत्तीसगढ़ विधानसभा के मानसून सत्र काली छब्बीस जुलाई ले सुरू होही, जउन ह तीस जुलाई तक चलही। ए सत्र म कुल पांच ठिन बइठका होही। ए दउरान वित्तीय कार्य के संगे आने सरकारी काम होही।
ए मानसून सत्र के दउरान विपक्ष डहार ले प्रदेस म कानून अउ व्यवस्था के हालत अउ किसान मनके समस्या समेत आने बड़का मुद्दा ल उठाय के संभावना हवय।
आंगनबाड़ी-संचालन
प्रदेस के सबो आंगनबाड़ी केन्द्र काली छब्बीस जुलाई खुल जही। ए सब्बो केन्द्र पाछु चार महीना ले कोरोना संक्रमण के सेती बंद रिहीस। आंगनबाड़ी केन्द्र मन म तीन ले छह बछर तक के नान्हें लइका, गर्भवती माईलोगिन अउ सुपोषण अभियान के हितग्राही मन ल आय के परमिशन होही। इहां लइका मन ल मंझनिया तात-तात खाना दे जाही। केन्द्र म लइका मन ल पठोय बर उंखर पालक मनके सहमति लेना घलो जरूरी रइही। फेर इहां आने-आने बेरा म आने-आने समूह म हितग्राही मन ल बलाय जाही। संगे एक बेर म पन्द्रह झिन ले जादा मनखे केन्द्र म नइ रइही अउ कोविड ले बांचे संबंधी दिसा-निरदेस के पालन करना घलो जरूरी होही।
इहां ए बतादन कि कोरोना संक्रमण के सेती पाछु बाईस मार्च ले आंगनबाड़ी केन्द्र के चलई बंद होय ले हितग्राही मन ल घरो-घर सूखा रासन दे जात रिहीस।
माओवादी-मुठभेड़
सुकमा जिला म आज सुरक्षा बल मन संग होय मुठभेड़ म एक झिन माओवादी मारे गेहे, जेखर लास बरामद कर ले गेहे।
जिला के पुलिस अधीक्षक सुनील शर्मा ह घटना बारे म बतईन कि केन्द्रीय रिजर्व पुलिस बल-सीआरपीएफ, स्पेशल टॉस्क फोर्स एसटीएफ अउ डिस्ट्रिक्ट रिजर्व गार्ड-डीआरजी के संघरा टीम ह सर्चिंग बर निकले रिहीस, तभे चिंतागुफा थाना क्षेत्र म आगू ले घात लगाय बइठे माओवादी मन सुरक्षा बल मन उपर फायरिंग सुरू कर दीस। फेर, जवान मन डहार ले होय जवाबी कार्रवाई म एक झिन माओवादी मारे गीस।
बाहरवीं-परिणाम
छत्तीसगढ़ माध्यमिक शिक्षा मंडल डहार ले होय हायर सेकेंडरी स्कूल सर्टिफिकेट के रिजल्ट आज निकाले गीस। बारहवीं बोर्ड के परीक्षा म ए बखत संतानवे दशमलव चार तीन प्रतिशत (97.43) पढ़ईया लइका मन उत्तीर्ण होय हे, जेमा अंठानवे दशमलव छह प्रतिशत नोनी अउ छियानवे दशमलव छह-नौ प्रतिशत बाबू हवय। स्कूल शिक्षा मंत्री डॉक्टर प्रेमसाय सिंह टेकाम ह आज वीडियो कान्फं्रेसिंग के जरिया ले परीक्षा परिणाम निकालीन। ए बछर बारहवीं के परीक्षा म दू लाख छियासी हजार ले जादा लइका मन सामिल होय रिहीन। एमा ले दू हजार चार सौ दू पढ़ईया लइका मनके रिजल्ट अपात्र होय के सेती निरस्त करे गीस अउ तीन सौ एकचालीस लइका मनके रिजल्ट बाद म घोषित करे जाही।
उहें, मंडल डहार ले होय हायर सेकेंडरी व्यावसायिक परीक्षा के रिजल्ट घलो घोसित करे गीस, जेमा सब्बो लइका मन उत्तीर्ण हवय। फेर ए बछर कोरोना संक्रमण के सेती लइका मन परीक्षा अपन घरे ले दे रिहीन। एखर सेती मंडल डहार ले अभी मेरिट लिस्ट नइ निकाले के निर्णय ले गे हवय।
राज्यपाल अनुसुईया उइके, मुख्यमंत्री भूपेश बघेल अउ स्कूल शिक्षा मंत्री डॉक्टर प्रेमसाय सिंह टेकाम ह उत्तीर्ण परीक्षार्थी मन ल बधाई अउ सुभकामना दीन हे।
मलेरिया मुक्त छत्तीसगढ़ अभियान
प्रदेस म मलेरिया मुक्त छत्तीसगढ़ अभियान चलाय जात हे। एखर चलत स्वास्थ्य विभाग के टीम ह अब तक ले तीन लाख सोलह हजार घर मन म जाके चौदह लाख तीस हजार मनखे के मलेरिया जांच करे हवय। ए दउरान पॉजिटिव पाय गे नौ हजार तीन सौ ले जादा मरीज मनके मउकाच म इलाज सुरू करे गीस।
बस्तर संभाग के सब्बो जिला म ए अभियान के चौथा चरण बीते पन्द्रह जून ले सुरू होगे हवय। राष्ट्रीय स्वास्थ्य मिशन के संचालक डॉक्टर प्रियंका शुक्ला ह बतईन कि ए जिला मन म अब तक ले दस लाख ले जादा मनखे के मलेरिया जांच करे गेहे।
फजी प्रमाण पत्र-सेवा समाप्ति
प्रदेस म अनुसूचित जाति, अनुसूचित जनजाति अउ अन्य पिछड़ा वर्ग के फर्जी या फेर गलत सर्टिफिकेट के आधार ले नियुक्त लेइवया सरकारी नौकरी वाले मनके सर्विस ल तुरते खतम करे जाही। ए बारे म सबो विभाग मन ल परिपत्र पठो दे गेहे।
इहां ए बतादन कि सर्व आदिवासी समाज के प्रतिनिधि मन हाले म मुख्यमंत्री भूपेश बघेल अउ उद्योग मंत्री कवासी लखमा ले ए संबंध म चरचा के संगे जरूरी कार्रवाई करे के मांग करे रिहीन।
हीरा-जब्त
गरियाबंद जिला म पुलिस ह दू सौ चार नग हीरा के संग एक झिन आरोपी ल गिरफ्तार करे हे। जब्त हीरा के कीमत करीबन बाईस लाख रूपिया बताय जात हे। जिला के पुलिस अधीक्षक पारूल माथुर ह बतईन कि ए आरोपी ह मैनपुर थाना क्षेत्र के बरदूला गांव म हीरा बेच के फिराक म रिहीस।
मौसम
प्रदेस म अवईया चउबीस घंटा के दउरान कतकोन जघा म थोरकुन ले जादा बरसा होय या फेर गरज-चमक के संगे बूंदाबांदी हो सकत हे।
मौसम बिभाग के मुताबिक एक ठिन द्रोणिका बीकानेर, अजमेर अउ निम्न दाब के क्षेत्र डाल्टनगंज, जमसेदपुर, त्रिपुरा अउ मध्यप्रदेश के उत्तरी भाग म बने हावय। जेखर पाय ले प्रदेस म बादर अउ बरसा असन होवत हे।
प्रदेस म पाछु कई दिन ले होवत बरसा के सेती बिलासपुर-पेण्ड्रा-अमरकंटक् क्षेत्र म अरपा-भईसाझार बैराज ह लबालब होगे हे। इहां ले एक हजार क्यूसिक पानी छोड़े गीस।
अउ अब थोरकुन समाचार सार म-
– मुख्यमंत्री भूपेश बघेल ह आज छत्तीसगढ़ योग आयोग के अध्यक्ष अउ सदस्य मनके कार्यभार ग्रहण समारोह म वर्चुअल रूप म सामिल होईन। ए मउका म ओमन आयोग के अध्यक्ष ज्ञानेश शर्मा अउ सदस्य मन ल अपन बधई अउ सुभकामना दीन।
– छत्तीसगढ़ लोक सेवा आयोग डहार ले राज्य मुख्य परीक्षा दू हजार बीस ह काली ले सुरू होके उनतीस जुलाई तक चलही। ए परीक्षा ह दू पाली म बिहनिया नौ ले बारा बजे तक अउ मंझनिया दू बजे ले संझा पांच बजे तक होही।
– राज्य सरकार ह इंदिरा गांधी कृषि बिश्वबिद्यालय के स्नातक वाले पाठ्यक्रम म पढ़इया लइका मनके निरदेस के पालन करत परीक्षा राखे के ससर्त परमीसन दे दे हे।
अउ
– सीमा सुरक्षा बल-बीएसएफ ह दुरूग जिला के भिलाई स्थित तालपुरी अउ तीर-तखार के इलाका म पौधा लगाके पर्यावरण ल हरियर अउ साफ-सूफा राखे के आरो दीन।