शिक्षक पात्रता वैधता
छत्तीसगढ़ शिक्षक पात्रता परीक्षा प्रमाण पत्र के वैधता अब आजीवन रीही। जउन अभ्यर्थी मनके प्रमाण पत्र के वैधता खतम हो चुके हे, वो जम्मो मन अब वैध माने जाही। स्कूल शिक्षा विभाग ह एखर संबंध म आदेश घलो जारी कर देहे।
जानबा के अनुसार छत्तीसगढ़ शिक्षक पात्रता परीक्षा के संबंध म बछर दू हजार ग्यारा म एक घांव परीक्षा पास करइया अभ्यर्थी मन बर प्रमाण पत्र के वैधता के अवधि जादा ले जादा सात बछर बर निर्धारित करे गे रीहिस। जेला अब विलोपित करके आजीवन कर दे गेहे।
शिक्षक सम्मान
राज्य स्तरीय शिक्षक सम्मान समारोह के आज वर्चुअल आयोजन करे गीस। ए मउका म राज्यपाल अनुसूइया उइके अउ मुख्यमंत्री भूपेश बघेल ह तीन झिन शिक्षक मन ल राज्य शिक्षक सम्मान स्मृति अउ सैंतालिस झिन शिक्षक मन ल राज्य शिक्षक पुरस्कार ले सम्मानित करीन।
कार्यक्रम म बछर दू हजार बीस म राज्य शिक्षक सम्मान पुरस्कार बर चयतिन चौवन झिन शिक्षक मनके नाव के घोषणा करे गीस। समारोह ल संबोधित करत राज्यपाल ह कीहिन कि शिक्षक लईका मन ल सिरिफ ज्ञान ही नही देवय बल्कि ओमन ल एक अच्छा इंसान घलो बनाथे। कोरोना महामारी के बेरा म घलो शिक्षक मनह ऑनलाईन शिक्षा के जरिया ले ये मुहिम ल जारी रखीन।
राज्यपाल ह नवा शिक्षा नीति उपर गोठबात करत कीहिन कि ए नीति म समावेशी शिक्षा उपर घलो जोर दे गेहे। जेमा सामाजिक अउ आर्थिक रूप ले पिछड़ा वर्ग उपर विशेष धियान दे जाही।
उंहें मुख्यमंत्री भूपेश बघेल ह कीहिन कि समाज म शिक्षक समुदाय ल हमेशा ले उंचा स्थान दे गेहे। शिक्षा लोक कल्याण के सबले बड़का माध्यम बनय, ए सरकार के कोशिश हवय। मुख्यमंत्री ह कोरोना महामारी के बेरा म शिक्षक मन डहार ले करे गे काम ल देखत ओखर मनके आभार जताइन। ओमन ह कीहिन हे कि शिक्षक मन ह फ्रंटलाइन वारियर के घलो काम करीन हे। समारोह म स्कूल शिक्षा मंत्री डॅाक्टर प्रेमसाय सिंह टेकाम ह घलो संबोधित करीन।
कोरोना समाचार
प्रदेश म कोरोना संक्रमण के स्थिति म सरलग सुधार होवत हे। अउ औसत पॉजीटिवीटी दर शून्य दशमलव छै प्रतिशत म आगे हे । काली प्रदेश म कोरोना संक्रमण के एक सौ अठासी ठिन नवा मामला आगू आय हे। हाले म तीन हजार तीन सौ ले जादा मरीज मनके इलाज आने आने अस्पताल अउ होम आइसोलेशन म चलत हे।
इही बीच प्रदेश म टीकाकरण के काम जोरदरहा ले चलत हे। राज्य म कोरोना ले बचाव बर अब तक एक करोड़ पंद्रह लाख तेईस हजार ले जादा टीका लगाये जा चुके हे।
टोक्यो ओलंपिक
बत्तीसवां ओलंपिक खेल काली तेईस जुलाई ले जापान के राजधानी टोक्यो म शुरू होवत हे। एमा अठारा ठिन आने आने खेल म भारत के एक सौ छब्बीस खिलाड़ी मन अपन किस्मत आजमाही। दुनियाभर के खेलप्रेमी मन बड़ बेरा ले एखर इंतजार करत रीहिन हे। इतिहास म ये पहिली घांव होवत हे जब ओलंपिक खेल ल रद्द नइ करे गीस बल्कि एमा रोक लगा दे गे रीहिस।
आकाशवाणी, दूरदर्शन अउ डीडी स्पोर्ट्स चैनल ओलंपिक दू हजार बीस के आयोजन ल प्रसारित करही। ए प्रसारण ह आकाशवाणी अउ दूरदर्शन के डिजिटल प्लेटफार्म म घलो उपलब्ध होही। ओलंपिक खेल के सीधा प्रसारण डीडी स्पोर्ट्स म हर रोज बीहनिया पांच बजे ले संझा सात बजे तक करे जाही।
मुख्यमंत्री मुआवजा राशि
मुख्यमंत्री भूपेश बघेल ह कलमा बैराज ले प्रभावित जांजगीर-चांपा जिला के चंद्रपुर इलाका के तीन सौ चौदा झिन किसान मन ल भू अर्जन मुआवजा के रूप म बाईस करोड़ अठहत्तर लाख रूपिया के चेक बांटिन।
आज रायपुर स्थित मुख्यमंत्री निवास म आयेजित वर्चुअल कार्यक्रम ल संबोधित करत मुख्यमंत्री ह कीहिन कि कलमा बैराज के निर्माण जांजगीर-चांपा के कलमा गांव म अउ रायगढ़ जिला के बरगांव के बीज महानदी उपर तीन सौ सतहत्तर करेड़ रूपिया के लागत ले कराय गेहे। ओमन ह कीहिन हे कि ए बैराज ले जांजगीर-चांपा जिला के तेरा ठिन गांव के छै सौ बियासी किसान मन ह करीबन अंठानबे हेक्टेयर भुंइया प्रभावित होय रीहिस। ए बैराज के बने ले पंद्रह हजार हेक्टेयर ले जादा रकबा म किसान मन ल सिचांई सुविधा उपलब्ध होही।
कार्यक्रम म उपस्थित विधानसभा अध्यक्ष डॅाक्टर चरणदास महंत ह कीहिन कि भू अर्जन के मामला ह बछर बर ले लंबित रीहिस, जेखर निदान राज्य सरकार ह करीन हे। समारोह ल जल संसाधन मंत्री रविंद्र चौबे अउ राजस्व मंत्री जयसिंह अग्रवाल ह घलो संबोंधित करीन।
साय आरोप
भाजपा के प्रदेश अध्यक्ष विष्णुदेव साय ह प्रदेश म बिजली के बाढ़त मांग अउ बिजली कटौती के सेती किसान मन अउ घरेलु उपभोक्ता मन ल होवत परेसानी बर राज्य सरकार ल जिम्मेदार ठहराय हे। ओमन ह कीहिन हे कि प्रदेश ह कई बछर ले जीरो पॉवर कट वाला राज्य रहे हे। अइसन म बिजली के कटौती के सेती लोगन मनके आंदोलन बर विवश होना ही सरकार के नाकामी हवय।
माओवादी समाचार
गरियाबंद जिला म शोभा थाना क्षेत्र के कोकड़ी गांव म माओवादी मन डहार ले रद्दा म बम लगाये जाये के खबर के बाद सुरक्षा बल के टीम ह सतर्क होगे हे। पुलिस प्रशासन ह बम निरोधक दस्ता ल मउका म रवाना कर दीन हे। सूचना के बाद शोभा ले ओडिशा जाये के रद्दा म लंबा जाम लगे हे। उंहें माओवादी मन ह पेड़ ल काटके अवई जवई ल रोके के घलो प्रयास करीन हे। इलाका म तलाशी अभियान ल तेज कर दे गेहे।
मलेरिया मुक्त अभियान
छत्तीसगढ़ के राजनांदगांव अउ मध्यप्रदेश के बालाघाट जिला के सीमावर्ती गांव के लोगन ल मलेरिया ले बचाय खातिर दूनो जिला के कलेक्टर मन ह आज ले संयुक्त रूप ले पहल करीन हे। ए जिला मनके स्वास्थ्य विभाग के कार्यकर्ता मन डहार ले सीमा क्षेत्र के गांव मन म मॉस स्क्रीनिंग कार्यक्रम के चलत घर-घर जाके मलेरिया के जांच अउ उपचार करे जात हे।
राजनांदगांव कलेक्टर तारन प्रकाश सिन्हा ह बताइन कि ए अभियान के चलत सर्वे दल डहार ले खैरागड़ विकासखंड के सतरा अउ छुईखदान विकासखंड के सात ठिन गांव के अलावा मध्यप्रदेश के सीमाक्षेत्र विकासखंड लाजी के तीन अउ बिरसा विकासखंड के ग्यारा ठिन गांव म मॉस स्क्रीनिंग करके लोगन मनके मलेरिया जांच करे जाही।
खाद्य मंत्री सम्मान समारोह
खाद्य अउ संस्कृति मंत्री अमरजीत भगत ह रायपुर के अपन निवास कार्यालय म आयोजित कार्यक्रम म निगम मंडल अउ बोर्ड म मनोनीत पदाधिकारी मनके सम्मान करीन। कार्यक्रम ल संबोधित करत श्री भगत ह कीहिन कि राज्य म आदिवासी समाज के बहुलता हवय। समाज के लोगन मन ल मजबूत बनाय के दिशा म सबो ल मिलके प्रयास करना होही।
मौसम
मौसम विभाग ह प्रदेश म अवइया चौबीस घंटा के बेरा कतकोन जगा म हल्का ले मध्यम बरसा होय या फेर गरज-चमक के संग बूंदाबांदी के संभावना जताय हे। उंहें एक दू ठिन जगा म गरज-चमग के संग आकाशीय बिजली गिरे के संग जादा बरसा होय के चेतावनी दीन हे।
उंहें आज राजधानी रायपुर सहित प्रदेश के आने-आने जगा म हल्का ले मध्यम बरसा होय के जानकारी मिलत हे।