फसल बीमा योजना
प्रधानमंत्री फसल बीमा योजना म बीमा कराय के आखरी तारीख पंद्रा जुलाई तय करे गेहे। ये योजना ले सिंचित अउ असिंचित धान, मक्का, सोयाबीन, मंूगफली, मंूग, उरिद, के फसल के बीमा कराय जा सकत हे। एखर फायदा अइसन किसान जउन मन कर्जा नइ लेहे अउ जउन मन कर्जा ले हे, दूनों ले सकत हे। जउन किसान मन बीमा कराना चाहत हे ओमन पंद्रा जुलाई तक अपनी तीर के बैंक वित्तीय संस्था अउ लोक सेवा केंद्र म पूछताछ कर सकत हे। खबर के मुताबिक प्रदेश म अब किसान स्व प्रमाणित बोवई पत्र देके प्रधानमंत्री फसल बीमा योजना के फायदा ले सकही। एमा सूखा, बाढ़, अउ आने प्राकृतिक आपदा ले होवइया नुकसान ले किसान मन ल राहत मिलही
केंद्रीय मंत्रिमंडल मंजूरी
केंद्रीय मंत्रिमंडल ह एक नवा अखिल भारतीय योजना- कृषि अवसंरचना कोष ल मंजूरी देहे। ये योजना म फसल के बाद प्रबंधन खातिर परियोजना म निवेश बर छोटे अउ लंबा समय बर कर्जा देके सुविधा दे जाही। केंद्रीय कृषि अउ किसान कल्याण मंत्री नरेंद्र सिंह तोमर ह कीहिन कि ये योजना क्रांतिकारी साबित होही। ये योजना के बेरा चालू वित्तीय बछर ले दू हजार उनतीस तक दस बछर बर होही। एमा चालू बछर ले दस हजार करोड़ रूपिया के मंजूरी के संग अवइया चार बछर म कर्जा के भुगतान करे जाही।
एखर संगेसंग केंद्रीय मंत्रिमंडल कर्मचारी भविष्य निधि के चोबीस प्रतिशत योगदान ल जून ले अगस्त महीना तक बढ़ाय के मंजूरी देहे।
उंहें मंत्रिमंडल ह प्रधानमंत्री आवास योजना म उपयोजना के रूप म गरीब अउ शहरी प्रवासी मन बर कमती पइसा म किराया के आवासीय परिसर के निर्माण ल मंजूरी देहे।
एम्स-ब्रेस्ट कैंसर क्लिनिक
रायपुर के एम्स ह एक घांव फेर स्पेशल ब्रेस्ट कैंसर क्लिनिक शुरू करे के फैसला लेहे। ये हरएक बुधवार के सर्जरी विभाग ले चलाय जाही। जिहंा माइलोगिन मनके स्तन कैंसर के जांच करके जरूरत पड़े म आपरेशन खातिर तारीख दे जाही। खबरके मुताबिक एम्स रायपुर म तालाबंदी के बाद ओपीडी समेत स्पेशल क्लिनिक घलो कोरोना संक्रमण के सेती बंद कर देगे रीहिस जउन ल फेर से शुरू करे के मंजूरी मिल गेहे।
सीबीएसई बयान
केंद्रीय माध्यमिक शिक्षा बोर्ड – सीबीएसई ह केहे हे कि जउन पाठ्यक्रम ल हटाय जाय के खबर आत हे, ओला संशोधित पाठ्यक्रम म या फेर एनसीईआरटी के वैकल्पिक शैक्षणिक कैलेण्डर म सामिल करे जात हे। सीबीएसई ह बताइन कि एनसीईआरटी के वैकल्पिक शैक्षिक कैलेण्डर बोर्ड ले जुड़े जम्मों स्कूल म पहिली ले ये लागू हे। बोर्ड ह बताय हे कि शैक्षिक सत्र दू हजार बीस-इक्कीस बर, नवमीं ले कक्षा बारहवीं तक के पाठ्यक्रम म करे गे कटौती सिरिफ एसो बर हवय।
मनरेगा निर्देश
प्रदेश के पंचायत अउ ग्रामीण विकास विभाग ह मनरेगा कार्यस्थल म नागरिक सूचना पटल लगाय के संबंध म नवा दिशा निर्देश जारी करे हे। एमा नागरिक सूचना पटल म मनरेगा अउ छत्तीसगढ़ शासन के लोगो, ग्राम पंचायत, विकासखंड जिला के नाव समेत काम करे के जगा के जानकारी, निर्माण काम के नाव अउ काम के यूनिक कोड, मंजूर करे गे राशि, काम के तारीख, खरच के रकम, मानव दिवस के संख्या, दैनिक मजदूरी दर, जिला अउ राज्य स्तरीय टोल फ्री नंबर, तकनीकी सहायक, के संगेसंग मनरेगा कार्यक्रम अधिकारी के नाव अउ मोबाइल नंबर लिखे बर केहे गेहे।
वनमंत्री बैठक
प्रदेश के वन मंत्री मोहम्मद अकबर ह कीहिन हे कि ग्यारा जुलाई के राज्य के वन क्षेत्र म पचास हजार किलोग्राम फलदार पौधा के बीज के बोवाई होही। एखर संगेसंग छै हजार पांच सौ किलोग्राम सागभाजी के बीजा अउ पच्चीस लाख सीडबॅाल के बोवाई करे जाही। काली नवा रायपुर म वीडियो कॅान्फे्रसिंग ले वृक्षारोपण कार्यक्रम के समीक्षा बइठका म ओमन कीहिन कि राज्य के जम्मों गोठान म लघु वनोपज म आने आने प्रजाति के करीबन साढ़े तीन लाख पौधा लगाये जाही। ये काम ल इकतीस जुलाई तक पूरा करे के निर्देश दीन हे। संगेसंग डीएफओ मन ल अपन क्षेत्र म टीम बनाके निगरानी बर गश्त बढ़ाय बर कीहिन।
मुख्यमंत्री बुजुर्ग चर्चा
मुख्यमंत्री भूपेश बघेल ह आज प्रदेश के साठ ठिन जिला के वृद्धाआश्रम के सियान मनले वीडियो कॅान्फ्रेसिंग ले गोठबात करीन। संगेसंग आश्रम के सफाई व्यवस्था के संबंध म जानकारी लीन।
श्री बघेल ह सियान मनले आश्रम के कामकाज अउ कोरोना संक्रमण ले बचाव बर का-का सावधानी राखे जात हे, एखर जानकारी लीन। ओमन कीहिन कि कोरोना वैश्विक महामारी के सेती रोज के जिनगी म फेरबदल आगे हे। आज के सबले बड़े जरूरत सुरक्षित रेहे के हवय। एखर सेती राज्य सरकार कोति ले कोरोना संक्रमण ले बांचे बर जारी करे गे दिशा निर्देश के पालन करे जाय।
माओवादी समर्पण
दंतेवाड़ा जिला म आज पांच झिन इनामी समेत सत्ताईस झिन माओवादी मन ह आत्मसमर्पण करीन हे। खबर के मुताबिक कलेक्टर अउ पुलिस अधीक्षक के आगू एक-एक लाख रूपिया के तीन झिन इनामी समेत पच्चीस झिन माओवादी मन ह कुंआकोंडा थाना म आत्मसमर्पण करीन।
उंहें इही जिला म दू लाख रूपिया के इनामी माओवादी दंपत्ति मन घलो पुलिस अधीक्षक अभिषेक पल्लव अउ केंद्रीय रिजर्व पुलिस बल के आगू आत्मसर्पण कर दीन। ये माओवादी दंपत्ति ग्यारा झिन जवान के हत्या म सामिल बताय जात हे।
रेलवे बीडीयू गठन
भारतीय रेलवे कोति ले जम्मों जोन म रेलवे के आमदनी म बढ़ोत्तरी बर बीडीयू के गठन करे जात हे। एमा सबो रेलवे जोन के वाणिज्य परिचालन लेखा विभाग के बड़का अधिकारी, बीडीयू म सामिल होके रेलवे के आमदनी बढ़ाय बर काम करही। संगेसंग उद्योग चलइया छोटे व्यापारी वाणिज्यक संगठन अउ कंपनी के प्रबंध निदेशक मनले भेंट करके रेलवे ले माल लाने लेगे बर बढ़ावा दीही।
लूट सामान
कबीरधाम जिला म करीबन बहत्तर लाख रूपिया के लूट के मामला आगू आय हे। हमर संवाददाता ले मिले जानकारी के मुताबिक राईस मिल के दू झिन कर्मचारी आज बीहनिया इकहत्तर लाख छप्पन हजार रूपिया लेके बिलासपुर के एक ट्रेडिंग कंपनी ल देबर जात रीहिन, इही बेरा पंाडातराई थाना के कुंडा अउ जंगलपुर के बीच आरोपी मन ह दूनों कर्मचारी के आंखी म भुर्का डारके उंखर तीर रखाय करीबन बहत्तर लाख रूपिया लूट के भाग गे। घटना के सूचना मिलते पुलिस शहर के चारो कोति नाकाबंदी करके गाड़ी के जांच करत हे।
इही बीच गृहमंत्री ताम्रध्वज साहू ह ये मामला म आरोपी मनके गिरप्तारी बर पुलिस महानिरिक्षक अउ पुलिस अधीक्षक ल हरसंभव परयास करे के निर्देश दीन हे।
एति रायगढ़ जिला म पाछू दिन कैश वैन म होय लूट के मामला ल दस घंटा के भीतरी सुलझाय म गृहमंत्री ताम्रध्वज साहू ह रायगढ़ पुलिस अधीक्षक संतोष सिंह अउ उंखर टीम ल आज रायपुर म सम्मानित करीन।
उंहें ए लूट के घटना म मारे गे एटीएम कैश वैन के कर्मचारी अरविंद पटेल के घरवाले मन ल बीमा अउ नियोजक कंपनी सतरा लाख रूपिया दीही संगेसंग घायल होय कर्मचारी विनोद पटेल के इलाज बर कंपनी कोति ले तीन लाख रूपिया दे जाही।
रायपुर जिला के उरला थाना के पुलिस ह डकैती के तियारी करत एक नाबालिक समेत पांच झिन आरोपी ल गिरप्तार करे हे। पुलिस ह ओखर तीर ले एक देशी कट्टा, तीन कारतूस, खुखरी, अउ चाकू समेत चार ठिन मोबाइल अउ दू फटफटी जब्त करे हे।