प्रधानमंत्री-कोविड
प्रधानमंत्री नरेन्द्र मोदी ह आज भारतीय जनता पार्टी के सांसद मन ले देस म कोविड के संबंध म विपक्ष कोति ले फैलाय जात झूठ के पर्दाफाश करे बर किहीन। श्री मोदी भाजपा संसदीय दल के बइठका म ए बात किहीन। प्रधानमंत्री ह भाजपा सांसद मन ले कांग्रेस के झूट ल सच ले हराय अउ लोगन ल सरकारी काम बर जागरूक रेहे के बात किहीन। भाजपा नेता प्रहलाद जोशी ह बइठका के बाद पत्रकार मन ल ए जानकारी दीन।
कोरोना समाचार
प्रदेस म कोरोना संक्रमण के स्थिति म सरलग सुधार होवत हे। औसत पॉजिटीविटी दर शून्य दशमलव सात प्रतिसत म आ गेहे। काली प्रदेस म कोरोना संक्रमण के तीन सौ सोलह नवा मामला आगू आय हे। एला मिलाके के प्रदेस म कोरोना मरीज के संख्या दस लाख के पार होगे हे। काली कोरोना संक्रमण ले चार झिन के मउत होय हे।
ऐति, बलौदाबाजार अस्पताल म कोविड वार्ड के प्रभारी डॉक्टर शैलेन्द्र साहू के कोरोना ले मउत होगे। भाजपा के प्रदेस उपाध्यक्ष अउ विधायक शिवरतन शर्मा ह दुख जताईन हे।
इही बीच, प्रदेस म कोरोना टीकाकरण के काम जोरदरहा चलत हे। राज्य म कोरोना ले बचाव बर अब तक एक करोड़ तेरह लाख बयालीस हजार ले जादा झन ल टीका लगाय गेहे।
कमजोर वर्ग-गणना तैयारी
प्रदेस म आने पिछड़ा वरग अउ आर्थिक रूप ले कमजोर लोगन के गणना के तियारी सुरू कर दे गेहे। एखर बर एक सदस्यीय आयोग के गठन करे गेहे। रिटायर जिला अउ सत्र न्यायाधीश सी.एल. पटेल एखर अध्यक्ष होही। गणना के तियारी के समीक्षा करत मुख्यमंत्री ह किहीन कि आयोग कोति ले संभागीय मुख्यालय मन म सामाजिक संगठन के संग बइठका करके उंखर सुझाव घलो ले जाय।
जाति प्रमाण पत्र
राज्य सरकार ह अनुसूचित जाति, जनजाति अउ पिछड़ा वर्ग के लोगन बर जाति प्रमाण पत्र जारी करे के काम ल सरल कर देहे। एखर मुताबिक जिखर तीर जाति ल प्रमाणित करे बर कोनों किसम के दस्तावेज नइ हे। अइसन स्थिति म ग्राम सभा कोति ले आवेदक के जाति के संबंध म पारित संकल्प ल मान्य करत जाति प्रमाण पत्र जारी करे जाही। अइसने, नगर पंचायत अउ नगर पालिका परिषद के सामान्य सभा कोति ले करे गे घोसना के बाद सक्षम प्राधिकारी जाति प्रमाण पत्र जारी कर सकही।
धमतरी/राजनांदगांव-प्रदर्शन
राज्य म पूरा सराब बंदी लागू करे समेत आने मांग ल लेके धमतरी जिला के गांव के लोगन मन ह सलौनी गांव के तरिया तीर प्रदर्सन करीन। एमा जिला के गेदरा, गट्टासिल्ली, बनबगौद, काटाकुर्रीडीह, बिरगुड़ी अउ साल्हेभाटा समेत आने गांव के लोगन संघरीन। एखर बाद गांव के लोगन मन ह मुख्यमंत्री के नाव नायब तहसीलदार ल ज्ञापन सौंपीन।
ऐति, राजनांदगांव जिला के मोहला ब्लॉक म रहइया किसान मन ह खातू के कमी ल लेके दू दिन ले प्रदर्सन करत हे। मोहला ब्लॉक के सोलह ठिन गांव के किसान मन ह दल्लीराजहरा मुख्य रद्दा म चक्काजाम करीन। उहां के किसान मन ह आरोप लगाईन कि सहकारी समिति म खातू के कमी हे अउ खुल्ला बाजार म एखर कालाबाजारी होवत हे।
टोक्यो ओलपिंक
टोक्यो ओलपिंक खेल म भाग लेवइया भारतीय खिलाड़ी मनके उछाह बढ़ाय बर भारत सरकार के सूचना अउ प्रसारण मंत्रालय के क्षेत्रीय लोक संपर्क कार्यालय बिलासपुर कोति ले ‘‘चीयर फॉर इंडिया‘‘ मुहिम के सुरूवात करे गेहे। एमा बिलासपुर के डी.टी. विप्र कॉलेज म सेल्फी प्वाइंट बनाय गेहे। कॉलेज के प्राचार्य प्रोफेसर अंजू शुक्ला समेत आने करमचारी एमा सामिल होईन।
क्षेत्रीय लोक संपर्क कार्यालय के क्षेत्रीय प्रचार अधिकारी डॉक्टर प्रेमकुमार ह बतईन कि ए मुहिम के सुरूवात प्रधानमंत्री नरेन्द्र मोदी अउ केन्द्रीय सूचना प्रसारण मंत्री अनुराग ठाकुर के आह्वान म करे गेहे।
जवान-शहीद
नारायणपुर जिला म आज माओवादी मन संग होय मुठभेड़ म एक जवान सहीद होगे। उहें, एक आने जवान घायल होगे हे।
खबर के मुताबिक नारायणपुर विधायक चंदन कश्यप आज दउरा म ओरछा जात रिहीन हे। माओवादी मन ह हमला के फिराक म रिहीन। इही बेरा विधायक के सुरक्षा म लगे जवान मन उपर माओवादी मन ह हमला कर दीन। छोटेडोंगर थाना क्षेत्र के अमदई घाटी म डोंगरहिल्स तीर होय ए हमला म जवान शिव कुमार मीणा सहीद होगे अउ एक आने जवान घायल होगे, जउन ल इलाज बर अस्पताल म भर्ती कराय गेहे।
दूसर कोति, बीजापुर जिला म माओवादी मन ह पूर्व माओवादी के हत्या कर देहे। जिला पुलिस अधीक्षक कमलोचन कश्यप ह बतईन कि गंगालूर गांव के रहइया ए ग्रामीण ह नौ बछर तक माओवादी संगठन ले जुड़े रिहीस। फेर, बाद म माओवादी संगठन ल छोड़के खेती-किसानी के काम करत रिहीस हे। एखर सेती ओखर साथी मन ह ओखर हत्या कर दीन। गंगालूर एरिया कमेटी ह ए घटना के जिम्मेवारी लेहे।
ग्रामीण-अगवा
सुकमा जिला म माओवादी मन ह गांव के सात झिन मनखे मन ल अगवा कर लीन। जिला के पुलिस अधीक्षक ह ए मामला के पुष्टि करे हे।
खबर के मुताबिक जगरगुंडा गांव के चौदह झिन अट्ठारह जुलाई के माओवादी मन संग गोठबात करे बर गे रिहीन। एमा ले सात झन ल माओवादी मन ह बंधक बना लीन। बताय जात हे कि गांव के अउ तेरह झिन आज माओवादी मन ले गोठबात करे बर गेहे।
इही बीच, सर्व आदिवासी समाज ह माओवादी मन ल गांव के लोगन ल छोड़े के मांग करीन हे। समाचार लिखे जाय तक कोन्हों भी गांव नइ लहुटे रिहीन। उहें, सुरक्षा बल कोति ले सर्चिंग करे जात हे।
चिटफंड कंपनी-आरोपी गिरफ्तार
कबीरधाम जिला म पइसा दुगुना करे के नाव म लोगन ले ठगी करे के मामला म पुलिस ह एक अउ आरोपी ल गिरफ्तार करे हे। पी.ए.सी.एल. इंडिया लिमिटेड के नाव ले चिटफंड कंपनी चलइया ए गिरोह के चार झिन आरोपी ल पहिलीच गिरफ्तार करे गेहे। पुलिस के मुताबिक पंजाब के रहइया ए आरोपी तीर ले आठ नग कम्प्यूटर, प्रिंटर मशीन, नोट गिने के मशीन अउ कैशबुक संग हितग्राही मनके जमा रकम के कापी घलो जब्त करे गेहे।
गांजा-बरामद
महासमुंद जिला के कोमाखान थाना क्षेत्र के टेमरी नाका ले पुलिस ह गांजा तस्करी के मामला म चार झिन आरोपी ल गिरफ्तार करे हे। गांजा के कीमत करीबन एक करोड़ साठ लाख रूपिया हवय। ए गांजा दू ठिन गाड़ी म साग-भाजी के बोरी तरी लुका के लाय जात रिहीस।
उहें, दुरूग जिला के पाटन पुलिस ह बठेना गांव म गांजा बेचे के मामला म एक आरोपी ल करीबन पांच किलो गांजा के संग गिरफ्तार करे हे।
धमतरी जहर-सेवन
धमतरी जिला के बखारा थाना क्षेत्र के जुगदेही गांव म एके परिवार के छह झिन मन जहर खा लीन। सब्बो के हालत गंभीर बताय जात हे।
खबर के मुताबिक चोरी के एक मामला म पूछताछ बर पुलिस ह ए परिवार के मुखिया ल थाना बलाय रिहीस हे, जिहां ले लहुटे के बाद ए मनखे ह अपन घर गोसईन अउ लइका मन संग जहर खा लीस।
उहें, जशपुर नगर के लोदाम क्षेत्र म एक मनखे के जेल अभिरक्षा म मउत होगे। ए मनखे विचाराधीन कैदी रिहीस। पुलिस ह दू दिन पहिलीच छेड़छाड़ के मामला ल एला गिरफ्तार करे रिहीस। ए मामला म स्थानीय भाजपा नेता मन ह आरोप लगाईन हे कि पुलिस कोति होय मारपीट के सेती ओखर मउत होगे। भाजपा कोति ले ए मामला के जांच करे के मांग करे गेहे।