संसद-मानसून सत्र
संसद के मानसून सत्र आज ले सुरू होगे हे। विपक्षी सदस्य मनके हंगामा के सेती संसद के दूनों सदन के कार्यवाही बार-बार बाधित होईस। लोकसभा के कार्यवाही विपक्षी सदस्य मनके हंगामा के कारण दू बजे तक स्थगित कर दे गीस। बइठका के दुबारा सुरू होय के बाद भी हंगाम जारी रेहे के कारण लोकसभा के कार्यवाही ल काली सुबह ग्यारह बजे तक बर स्थगित कर दे गेहे।
प्रधानमंत्री नरेन्द्र मोदी ह लोकसभा म नवा मंत्री मनके परिचय करवाना चाहत रिहीन। फेर इही बीच, विपक्षी सदस्य सदन के बीचोबीच आगे अउ कृषि संबंधी कानून मन ल रद्द करे के मांग अउ तेल के कीमत म बढ़ोतरी ल लेके नाराबाजी करे लगीन। सत्र के पहली दिन प्रधानमंत्री डहार ले मंत्रिपरिषद के नवा सदस्य मनके परिचय कराय के परंपरा रेहे हे।
एखर पहली, लोकसभा ह पाछु सत्र के बाद दिवंगत होय अपन चालीस पूर्व सदस्य मन ल श्रद्धांजलि अर्पित करीन।
अमृत महोत्सव-वृक्षारोपण
देस के आजादी के पचहत्तरवीं वर्षगांठ के मौका म महात्मा गांधी राष्ट्रीय ग्रामीण रोजगार गारंटी अधिनियम-मनरेगा के माध्यम ले आजादी के अमृत महोत्सव के तहत आज प्रदेशभर म विशेष पौधरोपण अभियान के सुरूआत करे गीस। अभियान के तहत मनरेगा श्रमिक, स्व-सहायता समूह सदस्य, दिव्यांगजन, त्रि-स्तरीय पंचायती राज संस्थान मनके पदाधिकारी मन अउ महिला मन डहार ले एक अगस्त तक गांव मन म पौधरोपण करे जाही। ये दौरान सड़क मनके तीरे-तीर, ग्राम पंचायत, शासकीय स्कूल, आंगनबाड़ी परिसर, डबरी अउ तालाब के मेड़ मन म वृक्षारोपण के साथ ही सामुदायिक भूमि म ब्लॉक प्लांटेशन घलो करे जाही। राज्य मनरेगा कार्यालय ह पौधरोपण के दौरान कोरोना संक्रमण से बचाव के सब्बो उपाय अउ दिशा-निर्देश मनके कड़ाई से पालन करे के निर्देश मैदानी अमला ल दीन।
फाइलेरिया मुक्त अभियान
स्वास्थ्य मंत्री टी.एस. सिंहदेव ह आज प्रदेस के चार जिला – रायपुर, बलौदाबाजार-भाटापारा, गरियाबंद अउ रायगढ़ म फाइलेरिया से बचाव बर सामूहिक दवा सेवन अभियान के वर्चुअल शुभारंभ करीन। ये मौका म ओमन स्वयं फाइलेरिया के दवा के सेवन कर जन-जागरूकता के संदेस दीन। स्वास्थ्य मंत्री ह किहीन कि लोगन मन ल सिर्फ दवा उपलब्ध ही नइ कराय जाय, बल्कि ओमन ल एखर सेवन करे बर घलो प्रेरित करना हे। श्री सिंहदेव ह किहीन कि स्वास्थ्य कर्मचारी मन के ये कोशिश होना चाही कि जब कोई दवा ले बर स्वास्थ्य केन्द्र म पहुंचे ओतके बेरा ओमन ल दवा के सेवन करवाय जाय। ये पहल ले छत्तीसगढ़ ल फालेरिया मुक्त बनाय जा सकत हे।
उद्योग मंत्री-बातचीत
उद्योग मंत्री कवासी लखमा ह किहीन कि बस्तर वनोपज उपर आधारित उत्पाद मन ल प्राथमिकता दे जाही। आज रायपुर म पत्रकार मन से बातचीत करत हुए श्री लखमा ह किहीन कि सरकार बस्तर म बड़े उद्योग मनके पक्ष म नइ ये। पहली छोटे उद्योग लगही, ओखर बाद परिस्थिति के अनुरूप निर्णय ले जाही।
प्रधानमंत्री फसल बीमा योजना
प्रधानमंत्री फसल बीमा योजना म किसान अब इकतीस जुलाई तक खरीफ फसल के बीमा करा सकही। मौसम आधारित फसल बीमा कराय के आखिरी तारीख पन्द्रह जुलाई तय करे गे रिहीस, जउन ल बढ़ाके इकतीस जुलाई कर दे गेहे। कोरोना संकट ल देखत हुए किसान मनके हित म केन्द्र सरकार डहार ले ये संबंध म निर्देश जारी करे गेहे। इच्छुक किसान नजदीकी बैंक, वित्तीय संस्था, लोक सेवा केन्द्र अउ बीमा कंपनी म संपर्क करके ये योजना के लाभ ले सकथे।
खूबचंद बघेल-जयंती
आज गांधीवादी चिंतक अउ स्वतंत्रता संग्राम सेनानी डॉक्टर खूबचंद बघेल के जयंती आय। ये मौका म राजधानी रायपुर सहित प्रदेशभर म अलग-अलग कार्यक्रम आयोजित करे गीस। संस्कृति अउ पुरातत्व विभाग द्वारा महंत घासीदास स्मारक संग्रहालय रायपुर के सभागार म आयोजित मुख्यमंत्री भूपेश बघेल वर्चुअल रूप से सामिल होईन। ए मौका म ओमन डॉक्टर बघेल के चित्र उपर मार्ल्यापण कर ओमन ल नमन करीन। मुख्यमंत्री ह डॉक्टर बघेल के परिजन अउ स्वतंत्रता संग्राम सेनानी मनके उत्तराधिकारी मन ल शॉल, श्रीफल अउ प्रतीक चिन्ह भेंट कर सम्मानित करीन।
समारोह ल संबोधित करत हुए मुख्यमंत्री ह किहीन कि डॉक्टर खूबचंद बघेल के व्यक्तित्व अउ कृतित्व बहुआयामी रिहीस। उंखर जीवन देस प्रेम के भावना से ओत-प्रोत रिहीस अउ ओमन छत्तीसगढ़ राज्य निर्माण के प्रथम स्वप्नदृष्टा रिहीन। ओमन किहीन कि राज्य सरकार डहार ले डॉक्टर बघेल के सपना के अनुरूप विकास के राह म छत्तीसगढ़ तेजी से आगे बढ़त हे अउ निरंतर नवा स्वरूप म गढ़े के कार्य करे जात हे। ये कार्यक्रम ल संस्कृति मंत्री अमरजीत भगत ह घलो संबोधित करीन।
भाजपा-धरना प्रदर्शन
राजनांदगांव जिला म खाद के कमी ल लेके भाजपा किसान मोर्चा ह आज राज्य सरकार के खिलाफ धरना-प्रदर्शन करीस। ये दौरान मोर्चा के पदाधिकारी मन आरोप लगाईन कि राज्य सरकार ह जानबूझ के किसान मन संग खाद के कृत्रिम समस्या खड़ा करत हे। मोर्चा ह काली बीस जुलाई के जिला के सबो ब्लॉक मुख्यालय मन म प्रदर्शन करे के घोषणा करीन।
उहें, इही जिला म मोहला ब्लॉक के सोमाटोला म आज किसान मन ह घलो खाद-बीज के कमी ल लेके दल्लीराजहरा से अंबागढ़ चौकी मार्ग म चक्काजाम करके विरोध-प्रदर्शन करीन।
विवि अनुदान आयोग-प्रवेश परीक्षा
विश्वविद्यालय अनुदान आयोग ह केहे हे कि ये बछर केन्द्रीय विश्वविद्यालय म सामान्य प्रवेश परीक्षा नइ होवय। आयोग ह एक ट्वीट म किहीन कि मौजूदा कोविड महामारी के मद्देनजर केन्द्रीय विश्वविद्यालय मन म सैक्षिक सत्र दू हजार इक्कीस-बाईस के दौरान प्रवेश परीक्षा पहली असन जारी रइही। केन्द्रीय विश्वविद्यालय मनके सामान्य प्रवेश परीक्षा ल शैक्षिक सत्र दू हजार बाईस-तेईस ले लागू करे जा सकथे।
अंगना म शिक्षा
राज्य म छोटे लइका मन ल घर म रहि के उंखर महतारी के माध्यम ले सीखे के अवसर प्रदान करे बर, सुरू करे गे ‘‘अंगना म शिक्षा‘‘ कारीकरम ल अब नवा स्वरूप म सुरू करे के तैयारी करे जात हे। केन्द्र सरकार डहार ले जारी निपुर्ण भारत अभियान के तहत पांच ले आठ बछर तक के लइका मन ल बाल वाटिका से लेके कक्षा तीसरी तक के लइका मन बर ए कारीकरम ल राज्य म महतारी मनके सक्रिय सहभागिता के संग लांच करे जाही।
स्कूल शिक्षा मंत्री डॉक्टर प्रेमसाय सिंह टेकाम ह काली अपन निवास कार्यालय ले वेबीनार के माध्यम से ‘‘अंगना म शिक्षा‘‘ कारीकरम के प्रथम चरण के तैयारी बर कारीकरम से संबंधित व्यक्ति मन ल संबोधित करीन। ओमन कोरोना संक्रमण के तीसरइया लहर के आसंका के मद्देनजर शिक्षिका मन डहार ले करे जात प्रयास के सराहना करीन।
उहें, स्कूल शिक्षा मंत्री ह बालिका शिक्षा अभियान ‘‘हर कदम बेटी के संग, लीडरशिप की तरंग‘‘ के तहत पालक मन से आह्वान करीन कि ओमन अपन बालिका मन ल पढ़ाई बर पूरा सहयोग देवय अउ उंखर से लगातार बातचीत करत राहय, ताकि ओमन जीवन के लक्ष्य ल प्राप्त करे बर प्रयत्नशील राहय।
रेनवाटर हार्वेस्टिंग-भूमिपूजन
नगरीय प्रशासन, विकास अउ श्रम मंत्री डॉक्टर शिवकुमार डहरिया ह आज करीब अट्ठारह करोड़ रूपिया के लागत ले आरंग म बनने वाला रेनवाटर हार्वेस्टिंग शैक्षणिक, प्रशिक्षण, शोध केन्द्र अउ उद्यान निर्माण कार्य के भूमिपूजन करीन। एखर स्थापना से लोगन मन ल जिहां जल संरक्षण के जानकारी मिलही। उहें, ये केन्द्र म रिसर्च के संगेसंग लोगन मन ल मनोरंजन अउ सैरसपाटा बर भव्य पार्क घलो मिलही।
ये मौका म डॉक्टर डहरिया ह किहीन कि गिरत भू-जल अउ पानी के समस्या वैश्विक चिंता के कारण बन गेहे। जल संरक्षण ल लेके राज्य सरकार नदी -नाला मन ल उपचारित कर पुनजीर्वित करे के प्रयास करत हे। सरकारी भवन मनके संग अब निजी निर्माण वाले भवन मन म घलो वाटर हार्वेस्टिंग ल अपनाय जात हे। आरंग म स्थापित होवइया रेनवाटर हार्वेस्टिंग शैक्षणिक, प्रशिक्षण, शोध केन्द्र अउ उद्यान बने ले अवइया पीढ़ी ल पानी बचाय से लेके एखर महत्ता के जानकारी मिलही।
टोक्यो ओलपिंक
टोक्यो ओलपिंक खेल म भाग लेवइया भारतीय खिलाड़ी मनके उत्साहवर्धन बर राजधानी रायपुर के चार सार्वजनिक स्थान मन म सेल्फी प्वाइंट बनाय गेहे। सेल्फी प्वाइंट म सेल्फी फोटो लेके एला हैशटैग चीयर ऑफ इंडिया के संग फेसबुक म सीजी स्पोर्ट्स वाय.डब्ल्यू. म टैग करत हुए भेजे जा सकत हे। एखर अलावा भारतीय खेल प्राधिकरण अउ भारतीय ओलंपिक संघ द्वारा एक ऑनलाइन क्विज के आयोजन घलो करे जात हे। एमा भाग्यशाली विजेता ल भारतीय टीम के जर्सी के संगेसंग भारतीय खिलाड़ी मन से मिले के मौका घलो मिलही।
गौरतलब हे कि बत्तीसवां ओलपिंक खेल आगामी तेईस जुलाई ले जापान के राजधानी टोक्यो म सुरू होवत हे। एमा दुनिया के दू सौ पांच देस के खिलाड़ी मन भाग लीहीं। ए आयोजन म अट्ठारह अलग-अलग खेल म भारत के एक सौ छब्बीस खिलाड़ी घलो अपन किस्मत आजमाही।
दूरदर्शन-स्ट्रिंगर नियुक्ति
रायपुर दूरदर्शन केंद्र के प्रादेशिक समाचार एकांश डहार ले प्रदेश के सबो अठाईस जिला म स्ट्रिंगर के नियुक्ति बर आवेदन मंगाय गेहे। आवेदक मन ल अपन आवेदन म ए बात के स्पष्ट उल्लेख करना होही कि ओमन कोन से जिला के स्ट्रिंगर बनना चाहत हे। एक आवेदक एक ही जिला ले आवेदन कर सकथे। चुने गे स्ट्रिंगर मनके नियुक्ति दू बछर के अनुबंध के आधार म करे जाही।
स्ट्रिंगर नियुक्ति ले संबंधित पूरा जानकारी प्रसार भारती के वेबसाईट – प्रसार भारती डॅाट जीओवी डॅाट इन/पीबी वेकेंसीस – ले ले सकत हे। आवेदन स्पीड पोस्ट या पंजीकृत डॅाक डहार ले ही स्वीकार करे जाही। आवेदन करे के आखरी तारीख पांच अगस्त हे।
अउ अब पेश हे मौसम के हाल..
मौसम विभाग ह प्रदेस म आगामी चौबीस घंटा के दौरान अधिकांश जगह म हल्का ले मध्यम बरसा होय अउ गरज-चमक के संग छीटा पड़े के संभावना जताय हे। उहें, एक-दू स्थान म भारी बरसा अउ आकाशीय बिजली गिरे के चेतावनी घलो दे हे।
अउ अब थोरकुन समाचार सार म-
– दुर्ग जिला के जामुल क्षेत्र म मध्यप्रदेश अउ भिलाई पुलिस ह नकली नोट छापने वाला गिरोह के पर्दाफाश करे हे। ये मामला म पुलिस ह गिरोह के एक सदस्य ल गिरफ्तार करे हे। संगेसंग मौका ले करीब चौव्वन लाख रूपिया के नकली नोट अउ एक करोड़ रूपिया के कागज जब्त करे हे।
– राजनांदगांव कलेक्टर तारन प्रकाश सिन्हा ह सब्बो नागरिक मन ले अपील करीन कि वृक्षारोपण अभियान म सामिल होके पर्यावरण के संरक्षण अउ संवर्धन म अपन भागीदारी निभावय।
– कोंडागांव जिला मुख्यालय म रोजगार कार्यालय अउ मार्गदर्शन केन्द्र डहार े ले आगामी तेईस जुलाई के रोजगार मेला के आयोजन करे जाही।
– राजधानी रायपुर के सदन बाजार इलाका म स्थित नगिना जेम्स ज्वेलरी के दुकान ले काली तीन करोड़ रूपिया के हीरा-जवाहरात चोरी होगे हे। सूचना मिलते ही मउका म पहुंचे पुलिस ह मामला के जांच सुरू कर देहे।
– रायपुर के रेलवे पुलिस ह गुजरात के सूरत से डकैती कर सूरत-पुरी स्पेशल ट्रेन से भागत सात आरोपी मन ल महासमुंद म गिरफ्तार कर सबो झन ल सूरत क्राइम ब्रांच के हवाले कर दीस।
अउ
– राजधानी रायपुर से लगे राखी थाना इलाका म पुलिस ह तंत्र-मंत्र के जरिया पैसा दोगुना करे के नाम म पांच लाख रूपिया के ठगी करने वाला एक दंपत्ति सहित तीन लोगन ल गिरफ्तार करीस।