मुख्यमंत्री एथेनाॅल प्लांट
राज्य सरकार ह बछर दू हजार एक ले दू हजार अठारा के बीच करे गे एक सौ अंठावन समझौता म कोनो किसम के काम नइ होय के सेती ए जम्मों समझौता ल रद्द कर दे हवय। मुख्यमंत्री भूपेश बघेल के अध्यक्षता म राज्य निवेश प्रोत्साहन बोर्ड के बइठका म ये फैसला करे गीस। उंहें बछर दू हजार उन्नीस ले अब तक राज्य म होय एक सौ पंद्रह समझौता म ले ब्यानबे समझौता म काम शुरू होगे हे।
बइठका म बताये गीस कि प्रदेश म मक्का अउ गन्ना ले एथेनाॅल बनाये के संयंत्र लगाये बर पूंजी निवेश के प्रस्ताव ल जल्दी ही स्वीकृति दे जाही। उंहें कृषि आधारित उद्योग अउ बस्तर अंचल म लौह खनिज के उद्योग लगाये के काम म घलो तेजी लाय के कोशिश करे जाही।
कोरोना टीका/समाचार 01
प्रदेश म कोरोना संक्रमण के स्थिति म सरलग सुधार होवत हे, उंहें टीकाकरण के काम घलो जोर शोर ले जारी हवय। स्वास्थ्य विभाग के अनुसार प्रदेश म संक्रमण के दर गिरके शून्य दशमलव छै पांच प्रतिशत रही गेहे।
ए ह ए बछर के सबले कम संक्रमण के दर हवय। ए बछर जनवरी म संक्रमण के दर डेढ़ प्रतिशत ले कुछ जादा रीहिस। उंहें फरवरी मार्च अउ जून म ए दर ह एक प्रतिशत ले कुछ कम रीहिस। जबकि अप्रैल म संक्रमण के दर ग्यारा प्रतिशत ले जादा होगे रीहिस। एति मई म संक्रमण ह चार प्रतिशत ले कुछ कम रीहिस।
राज्य म काली दू सौ बावन लोगन मन संक्रमित पाय गेहे। उंहें राज्य म ए बेरा म कोरोना के सक्रिय मरीज मनके संख्या चार हजार ले कुछ जादा हवय। उंहें जांजगीर चंापा जिला म कोरोना के रोकथाम खातिर केंद्र अउ राज्य सरकार के दिशा-निर्देश के कड़ाई के पालन कराके अधिकारी मनके एक ठिन टीम बनाय गेहे। जेखर तहत जिला के रेलवे स्टेशन अउ बस स्टेण्ड जइसे आय जाय के जगा म प्रवासी मजदूर अउ आने यात्री मनके नियमित रूप ले कोरोना के जाचं करे जाही।
उंहें धमतरी जिला म कोरोना संक्रमण के मामला म सरलग होत कमी ल देखत जिला प्रशासन ह सार्वजनिक गतिविधि बर कुछ अउ छूट देके एलान करे हे। एखर तहत इतवार के साप्ताहिक लाॅकडाउन अउ नाईट कफ्र्यू के आदेश म ढील दे दे गेहे। हालांकि धमतरी शहर म जरूरी सेवा मन ल छोड़के हर मंगलवार के दुकान मन बंद रीही।
कोरोना टीका/समाचार 02
इही बीच राज्य म कोरोना ले बांचे खातिर अब तक एक करोड़ आठ लाख बैंसठ हजार ले जादा कोरोना के टीका लगाये जा चुके उंहें आज कोविशील्ड वैक्सीन के एक ठिन खेप ह रायपुर पहुंच गेहे। स्वास्थ्य विभाग के अनुसार ए वैक्सीन ल अब जल्दी ही सबो जिला म पहुंचा दे जाही।
इही बीच कोरोना ले बचाव के दिशा-निर्देश के अनुसार अब प्रदेश म गर्भवती माइलोगिन मन ल घलो कोविड के टीका लगाये जाही। इही कड़ी म बलरामपुर जिला के मुख्य चिकित्सा अधिकारी डॅाक्टर बसंत कुमार ंिसह ह बताइन कि जिला के सबो स्वास्थ्य संस्था अउ टीकाकरण कंेद्र म काम करइया स्वास्थ्यकर्मी मन ल प्रशिक्षण देके बाद गर्भवती माइलोगिन मन ल कोरोना के टीका लगाये के काम ल शुरू करे जाही।
गोधन न्याय योजना-अधिकारी अध्ययन
जैविक खेती के संगेसंग गौ पालन के माध्यम ले पशुपालक मनके आमदनी बढ़ाय खातिर शुरू करे गे महत्वाकांक्षी गोधन न्याय योजना के अध्ययन बर राजस्थान सरकार के वरिष्ठ प्रशासनिक अधिकारी छत्तीसगढ़ के दउरा म आय हुए हे।
मंत्रालय म कृषि सचिव डॅाक्टर एम.गीता पंचायत तथा ग्रामीण विकास विभाग के सचिव आर. प्रसन्ना अउ गोधन न्याय योजना के नोडल अधिकारी डॅाक्टर एस. भारतीदासन ह राजस्थान के वरिष्ठ अधिकारी मन ल ए योजना के विषय म विस्तार ले जानकारी दीन। राजस्थान के अधिकारी मन काली घलो गोधन न्याय योजना के आने-आने पहलु के अध्ययन करहीं।
हाईकोर्ट -जी.पी. सिंह
छत्तीसगढ़ उच्च न्यायालय ह प्रदेश के निलंबित आईपीएस अधिकारी जी.पी. सिंह के खिलाफ आर्थिक अपराध अन्वेषण शाखा के कार्रवाई उपर रोक लगाए के संबंध म अंतरिम आवेदन उपर राज्य सरकार ल एक ठिन नोटिस जारी करके जवाब मंागे हे। उंहें एंटी करप्शन ब्यूरो डहार ले दर्ज करे गे आय ले जादा संपत्ति अउ राजद्रोह के मामला म अदालत ह केस डायरी प्रस्तुत करे बर कीहिन हे। ए मामला के अगला सुनवाई बीस जुलाई के होवइया हे।
जानबा के मुताबिक एंटी करप्शन ब्यूरो ह पाछू दिन अतिरिक्त पुलिस महानिदेशक जी.पी. सिंह के सरकारी आवास म छापामार कार्रवाई करत आय ले जादा संपत्ति अर्जित करे के मामला म दस्तावेज ल जब्त करे के बाद ओखर खिलाफ मामला दर्ज करे हे। एखर अलावा उंखर मनके घर ले डायरी के आधार म राजद्रोह के प्रकरण घलो अलग ले दर्ज करे गेहे। एखर खिलाफ जी.पी. सिंह ह हाईकोर्ट म याचिका दायर करे हे।
विषाक्त भोजन बीमार
मुख्यमंत्री भूपेश बघेल ह रायपुर जिला के सगुनी गांव म जहरीला खाना खाये ले बीमार होय मनखे मनके इलाज खातिर सबो जरूरी चिकित्सा सुविधा देवाय बर कीहिन हे। जिला के मुख्य चिकित्सा अधिकारी डॅाक्टर मीरा बघेल ह बताइन कि सबो मरज मन खतरा ले बाहिर हे अउ स्थिति नियंत्रण म हवय।
मौसम
गुजरात अउ आंध्रप्रदेश के उपर बने द्रोणिका के प्रभाव ले प्रदेश म अवइया चैबीस घंटा के बेरा आने-आने जगा म हल्का ले मध्यम बरसा होय या फेर गरज चमक के संग छींटा पड़े के संभावना हे। उंहें एक दू ठिन जगा म गरज चमक के संग आकासीय बिजली गिरे के चेतावनी घलो दे गेहे।
मौसम वैज्ञानिक मनके अनुसार तटीय गुजरात ल लेके आंध्रप्रदेश के उपर बने द्रोणिका के संग विदर्भ के उपर एक ठिन चक्रीय चक्रवात घलो सक्रिय हवय। जेखर असर ले प्रदेश म अवइया दू ले तीन दिन तक बरसा होय के स्थिति बने रेहे के संभावना हे।
इही बीच कृषि विभाग के अधिकारी मन ह बताइन हे कि रायपुर जिला म अब तक तीन सौ चालीस मिली मीटर औसत बरसा हो चुके हे। जउन कि पाछू दस बछर के होय औसत बरसा ले जादा हवय।
अउ अब थोरकुन समाचार सार म-
– विश्व युवा कौशल दिवस अउ स्किल इंडिया मिशन के छठवंा सालगिरह के बेरा म प्रधानमंत्री ह युवा मन ल वीडियो काॅन्फ्रेंसिंग ले संबोधित करीन। अउ कहिन कि कुशलकर्मी मन ही देश ल कोरोना ले लडे़ म मदद करे हे।
– धमतरी जिला म जंगली हाथी मनके उत्पाद ले प्रभावित किसान मन अउ उंहा रहइया लोगन मन ल जल्दीच मुआवजा दे जाही।
– प्रदेश के मुख्य विपक्षी दल भाजपा ह राज्य सरकार के आने आने फैसला के खिलाफ अवइया तीन महीना के दउरान प्रदर्शन अउ आंदोलन करे के फैसला करे हे।
– रायपुर के जिला रोजगार अउ स्वरोजगार मार्गदर्शन केंद्र डहार ले उन्नीस जुलाई के रोजगार आॅफिस म भर्ती शिविर के आयोजन करे जाही। एमा एक ठिन निजी बैंक डहार ले सेल्स आॅफिसर के चालीस ठिन पद उपर स्नातक उम्मीदवार मनके भर्ती करे जाना हे।
अउ
– छत्तीसगढ़ राज्य महिला आयोग के अध्यक्ष डॅाक्टर किरणमयी नायक के उपस्थिति म काली कंाकेर के कलेक्ट्रेट म बीस ठिन प्रकरण के सुनवाई करे गीस।