केंद्र कोरोना दिशा-निर्देश
देश के कतकोन हिस्सा म सार्वजनिक परिवहन अउ पर्वतीय पर्यटन स्थान म कोरोना ले बचाव के दिशा निर्देश के पालन म ढिलाई ल देखत केंद्र सरकार ह राज्य अउ जिला प्रशासन ल भीड़भाड़ वाले जगा म कोविड मानक के पालन करे के निर्देश देहे।
राज्य मनके मुख्य सचिव मन ल लिखे गे पाती म केंद्रीय गृह सचिव अजय भल्ला ह कीहिन कि कोविड मानक मनके सख्ती ले पालन कराय म कोनो तरह के कोताही बर संबंधित अधिकारी जिम्मेदार होही। ओमन कीहिन कि कतकोन जगा म देखे गेहे कि बाजार मन म भीड़भाड़ होवत हे। उंहें सुरक्षित दूरी बनाय राखे के नियम के घलो उल्लंघन होवत हे।
केंद्रीय गृह सचिव ह कीहिन कि बाजार, मंडी, बस स्टेशन, रेलवे स्टेशन, सार्वजनिक उद्यान के संग विवाह भवन, रेस्टाॅरेंट अउ खेल परिसर संग सबो भीड़ भाड़ वाले जगा म कोरोना ले बचाव के निर्देश के पालन कराया जाये।
बस हड़ताल स्थगित
प्रदेश के बस संचालक मन ह अपन अनिश्चितकालिन हड़ताल वापस ले लेहे। परिवहन मंत्री मोहम्मद अकबर ले काली रतिहा होय चर्चा के बाद छत्तीसगढ़ यातायात महासंघ ह हड़ताल वापस लेके निर्णय लीन।
खबर के मुताबिक यात्री किराया म बढ़ोत्तरी संग आने-आने मंाग ल लेके प्रदेश के बस संचालक मन ह काली ले परिवहन सेवा बंद कर दे रीहिस। अपन मांग के संबंध म परिवहन मंत्री ले तुरते विचार करे जाय के आश्वासन मिले के बाद बस संचालक मन ह अपन सेवा फेर ले शुरू कर देहे। बस संचालक मन ह बताइन कि यात्री बस के संचालन कोरोना ले बचाव के दिशा-निर्देश ल धियान म राखत करे जाही।
कोरोना समाचार
प्रदेश म कोरोना संक्रमण के स्थिति म सरलग सुधार होवत हे। अब तक मिले आंकड़ा के आधार म प्रदेश म संक्रमण के दर गिरके शून्य दशमलव सात प्रतिशत रही गेहे। राज्य म काली दू सौ पंच्यानबे लोगन संक्रमित पाये गीस। उंहें राज्य म ए बेरा कोरोना के सक्रिय मरीज मनके संख्या चार हजार एक सौ पचास हे।
इही बीच बस्तर कलेक्टर रजत बंसल ह जिला के भानपुरी, मारेंगा अउ धनपुंजी नाका म सबो अवइया जवइया के चैबीस घंटा म कोरोना जांच करे के निर्देश देहे।
ओति मंुगेली जिला के लोरमी विधानसभा क्षेत्र म भाजपा कार्यकर्ता मनके वेबिनार ल संबोधित करत पूर्व विधायक अउ संसदीय सचिव तोखन साहू ह कीहिन कि प्रधानमंत्री नरेंद्र मोदी के नेतृत्व म कोरोना के पहिली अउ दूसर लहर ले देश उबर चुके हे। अब तीसर लहर ल रोके बर हम सबो ल कोरोना ले बचाव के दिशा निर्देश के पालन करना होही।
राज्यपाल सीएम भेंट
राज्यपाल अनुसूइया उइके ले काली राजभवन म मुख्यमंत्री भूपेश बघेल ह सौजन्य मुलाकात करीन। ए अवसर म राज्यपाल ह मुख्यमंत्री ल शॅाल अउ प्रतीक चिन्ह देके उंखर अभिनंदन करीन। मुख्यमंत्री ह घलो राज्यपाल ल साड़ी देके उंखर सम्मान करीन।
मुलाकात के दउरान राज्यपाल ह मुख्यमंत्री डहार ले प्रदेश म कोरोना ले बचाव बर करे गे काम के सराहना करीन। राज्यपाल ह मुख्यमंत्री ल अनुसूचित क्षेत्र मन म नगर पंचायत के स्थापना के संबंध म जरूरी सुझाव घलो दीन। ओमन ह आदिवासी क्षेत्र म उद्योग मनके स्थापना अउ चंदूलाल चंद्राकर चिकित्सा महाविद्यालय के संबंध म घलो मुख्यमंत्री ले चर्चा करीन।
राज्यपाल ह मुख्यमंत्री ले उच्च शिक्षा विभाग के समन्वय समिति अउ आदिवासी मंत्रणा परिषद के बइठका तुरते बुलाय के आग्रह करीन। राज्यपाल ह मुख्यमंत्री ले यहू घलो कीहिन कि फर्जी जाति प्रमाण पत्र के आधार म आने-आने शासकीय विभाग अउ विश्वविद्यालय स्तर म नौकरी करत अधिकारी अउ कर्मचारी के प्रकरण उपर न्यायालय म तुरते सुनवाई करे के संग दोषी मनके खिलाफ कानूनी कार्रवाई करे जाय।
दुर्ग मानव निर्मित जंगल
दुर्ग जिला के नंदिनी म खाली पड़े खदान क्षेत्र म देश के सबले बड़का मानव निर्मित जंगल बनाये जाही। एखर बर जिला प्रशासन ह प्रस्ताव तियार कर लेहे। ए पूरा क्षेत्र लगभग ढाई हजार एकड़ म बगरे हे। एमा ले करीबन आठ सौ पच्यासी एकड़ म खाले पड़े खदान क्षेत्र म आने-आने प्रजाति के अस्सी हजार ले जादा पौधा लगाये जाही।
ए जंगल ल बनाये खातिर जिला खनिज न्यास के राशि के घलो उपयोग करे जाही। ए योजना ल पूरा करे म लगभग तीन करोड़ रूपिया खर्च होय के अनुमान हे।
दुर्ग जिला के कलेक्टर डॅाक्टर सर्वेश्वर नरेंद्र भुरे अउ वनमंडल अधिकारी धम्मशील गणवीर ह नंदिनी क्षेत्र के निरीक्षण करीन। कलेक्टर ह बताइन कि पर्यावरण संरक्षण के लिहाज ले ए पूरा देश बर उदाहरण जइसन होही। ए परियोजना ल तीन बछर के भीतर पूरा करे के लक्ष्य राखे गेहे।
विषाक्त भोजन बीमार
रायपुर जिला म तिल्दा विकासखंड के सगुनी गांव म काली जहरीला भोजन के खाय ले बीमार होय लोगन के इलाज सगुनी के चिकित्सा शिविर अउ धरसींवा के सामुदायिक स्वास्थ्य केंद्र म चलत हे। सबो मरीज मनके हालत खतरा ले बाहर बताय जात हे।
कलेक्टर सौरभ कुमार ह ए दूनों केंद्र म पहुंच के मरीज मनले मुलाकात करके उंखर स्वास्थ्य के जानकारी लीन।
इही बीच कलेक्टर ह रायपुर मेडिकल काॅलेज के विशेषज्ञ, डॅाक्टर मन ल घलो सगुनी अउ धरसींवा के आने आने अस्पताल अउ शिविर म जाके मरीज मनके स्वास्थ्य के जानकारी लेके निर्देश दीन हे।
अंग्रेजी स्कूल भर्ती प्रक्रिया
राज्य म संचालित एक सौ इकहत्तर स्वामी आत्मानंद शासकीय अंगे्रजी माध्यम के विद्यालय मन म छै हजार आठ सौ छब्बीस पद उपर भर्ती के प्रक्रिया तुरते शुरू करे जाही। वर्तमान शिक्षण सत्र ले प्रदेश म एक सौ उन्नीस नवा स्वामी आत्मानंद अंग्रेजी माध्यम विद्यालय शुरू करे गेहे।
लोक शिक्षण संचालनालय ह एखर संचालन बर हर विद्यालय म तिरालिस पद मंजूर करे गेहे। हरएक स्कूल के भीतर हायर सेकण्डरी कक्षा मन बर प्राचार्य के एक पद के संग आने-आने विषय के व्याख्याता राखे जाही।
उंहें पूर्व माध्यमिक अउ प्राथमिक कक्षा मन बर प्रधान पाठक के दू-दू पद के संग व्यायाम शिक्षक, ग्रंथपाल, कम्पयूटर शिक्षक, अउ लेखापाल के पद के मंजूरी दे गेहे। एखरे संग सबो स्कूल म सहायक ग्रेड के दू कर्मचारी अउ एक चैकीदार के भर्ती घलो करे जाही।
इही बीच ए बछर डिप्लोमा इन एलीमेंट्र एजुकेशन-डी.एल.एड. प्रथम अउ द्वितीय बछर के मुख्य अउ अवसर परीक्षा तीस जुलाई ले सात अगस्त तक करे जाही। छत्तीसगढ़ माध्यमिक शिक्षा मंडल के सचिव प्रोफेसर व्ही.के. गोयल ह बताइन कि ए परीक्षा आॅफलाईन तरीका ले दू पाली म होही।
दूरदर्शन-स्ट्रिंगर नियुक्ति
रायपुर दूरदर्शन केंद्र के प्रादेशिक समाचार एकंाश डहार ले प्रदेश के सबो अठाईस जिला म स्ट्रिंगर के नियुक्ति बर आवेदन मंगाय गेहे।
आवेदक मन ल अपन आवेदन म ए बात के स्पष्ट उल्लेख करना होही कि ओमन कौन से जिला के स्ट्रिंगर बनना चाहत हे। एक आवेदक एक ही जिला ले आवेदन कर सकथे। चुने गे स्ट्रिंगर मनके नियुक्ति दू बछर के अनुबंध के आधार म करे जाही।
स्ट्रिंगर नियुक्ति ले संबंधित पूरा जानकारी प्रसार भारती के वेबसाईट – प्रसार भारती डॅाट जीओवी डॅाट इन/पीबी वेकेंसीस – ले ले सकत हे। आवेदन स्पीड पोस्ट या पंजीकृत डॅाक डहार ले ही स्वीकार करे जाही। आवेदन करे के आखरी तारीख पांच अगस्त हे।
मौसम
प्रदेश म अवइया चैबीस घंटा के दउरान कुछएक जगा म हल्का ले मध्यम बरसा होय अउ गरज चमक के संग छींटा पड़े के संभावना हे । उंहें एक दू स्थान म आकासीय बिजली गिरे के चेतावनी घलो दे गेहे।
मौसम वैज्ञानिक मनके अनुसार ए बेरा तटीय आंध्रप्रदेश, महाराष्ट्र अउ तटीय गुजरात के उपर एक ठिन द्रोणिका बने हुए हे। संगेसंग दक्षिण छत्तीसगढ़ के उपर एक ठिन चक्रीय चक्रवाती घेरा घलो बने हुए हे। एखर प्रभाव ले प्रदेश म अवइया एक दू दिन तक गरज चमक के संग बौछार पड़े के संभावना हे।