प्रधानमंत्री/गृहमंत्री-टीकाकरण
प्रधानमंत्री नरेन्द्र मोदी ह पर्वतीय पर्यटन स्थल मन म अउ बाजार मन म बाढ़त भीड़ उपर चिंता जतात लोगन मन ले आग्रह करे हे कि ओमन कोरोना ले बचाव बर सबो सावधानी के पालन करय। ओमन कोरोना संक्रमण ल रोके बर केन्द्र अउ राज्य सरकार डहार ले जारी करे गे दिशा-निर्देश के सख्ती ले लागू करे उपर घलो बल दीन।
प्रधानमंत्री ह किहीन कि कोरोना वायरस लगातार अपन रूप बदलत हे। एखर नवा रूप मन उपर नजर रखे के जरूरत हे। श्री मोदी ह कोरोना संक्रमण के तीसर लहर के आसंका ल देखत हुए टीकाकरण म तेजी लाय बर केहे हे। ओमन लोगन मन म वैक्सीन ल लेके फैले भ्रम ल दुरिहा करे उपर जोर दीन।
इही बीच, केन्द्रीय गृहमंत्री अमित शाह घलो शत-प्रतिशत टीकाकरण के लक्ष्य हासिल करे बर युवा मन ल आघू आय के अपील करे हे। ओमन युवा मन ले केहे हे कि ओमन प्रधानमंत्री गरीब कल्याण अन्न योजना के तहत 5 किलो मुफ्त अनाज के फायदा जरूरतमंद लोगन तक पहुंचाय।
कोरोना समाचार
प्रदेश म कोरोना संक्रमण के स्थिति म सरलग सुधार आत हे। अब तक मिले जानकारी के मुताबिक प्रदेश म संक्रमण के दर 1 प्रतिशत ले घलो कम होगे हे। राज्य म काली 36 हजार ले ज्यादा सैम्पल जांच करे गीस, जेमा सिर्फ 297 लोगन मन संक्रमित पाय गीस। रायपुर सहित प्रदेश के 20 जिला मन म संक्रमण के दर अब तक 1 प्रतिशत ले घलो कम हे। बाकी 8 जिला मन म संक्रमण के दर 1 ले 3 प्रतिशत के बीच म हे। उहें, राज्य म ए बेरा कोरोना के सक्रिय मरीज मनके संख्या साढ़े चार हजार ले ज्यादा हे।
कोरोना के स्थिति म सुधार ल देखत अब तक प्रदेश के आने-आने जिला मन म आर्थिक गतिविधि बर छूट बढ़ाय जात हे। इही कड़ी म रायगढ़ जिला म दुकान खोले के समय-सीमा संझा 7 बजे ले बढ़ाके रतिहा 8 बजे तक कर दे गेहे।
नीट-आवेदन प्रक्रिया
राष्ट्रीय पात्रता अउ प्रवेश परीक्षा-नीट के आवेदन प्रक्रिया एन.टी.ए. वेबसाइट के माध्यम ले आज संझा 5 बजे ले सुरू होगे हे। केन्द्रीय शिक्षा मंत्री धर्मेन्द्र प्रधान ह काली घोषणा करे रिहीस कि कोविड मानक मनके पालन करत हुए सितंबर महीना म पूरा देश म ए परीक्षा एके संघरा ले जाही। श्री प्रधान ह अपन ट्वीट संदेश म किहीन कि सुरक्षित दूरी बनाय राखे के नियम के पालन सुनिश्चित करे बर परीक्षा आयोजित होवइया शहर मनके संख्या 155 ले बढ़ाके 198 कर दे गेहे। श्री प्रधान ह किहीन कि सबो उम्मीदवार मन ल परीक्षा केन्द्र मन म मास्क उपलब्ध कराय जाही। संगेसंग परीक्षा केन्द्र मन म प्रवेश अउ निकासी बर अलग-अलग रद्दा बनाय जाही।
डहरिया-सरपंच संघ सम्मेलन
प्रदेश म पंचायत संस्था मन ल आत्मनिर्भर बनाय बर ग्रामीण क्षेत्र मन म वसूली उपर विशेष ध्यान दे जात हे। राज्य के नगरीय प्रशासन मंत्री डॉक्टर शिवकुमार डहरिया ह आज आरंग म छत्तीसगढ़ सरपंच संघ के सम्मेलन ल संबोधित करत किहीन कि पंचायत संस्था मनके आमदनी बढ़ाय ले ही ग्रामीण क्षेत्र मन म विकास के काम ल गति मिलही। ओमन किहीन कि पंचायत संस्था मन ल राज्य सरकार ले मिलइया सुविधा मनके बेहतर उपयोग ले आत्मनिर्भर बना के आदर्श बनाय जा सकथे। श्री डहरिया ह किहीन कि गांव मनके विकास बर प्राथमिकता के आधार म सरपंच मन ले जउन प्रस्ताव मिले हे। ओखर उपर राज्य सरकार हरसंभव मदद करे के प्रयास करही।
माओवादी समाचार
बीजापुर जिला के उसूर इलाका म मुठभेड़ के बेरा पुलिस ह तीन माओवादी मन ल मार गिराय के दावा करे हे। ए मुठभेड़ म सुरक्षा बल के एक जवान घायल होगे हे, जेला प्राथमिक उपचार के बाद बीजापुर जिला अस्पताल म भर्ती कराय गेहे।
इही जिला के नैमेड़ थाना क्षेत्र म पुलिस अउ सुरक्षा बल मन ह तीन माओवादी मन ल गिरफ्तार करे हे। पुलिस के अनुसार ए तीनों माओवादी मिनगा-चल जल संयंत्र म आगजनी के घटना म सामिल रिहीन।
इही बीच, सुकमा जिला के पुलिस अधीक्षक सुनील शर्मा ह बतईन कि बछर 2013 म होय झीरम घाटी हमला के मास्टर माइंड केहे जाने वाला माओवादी कमांडर विनोद के मउत होगे हे। ओमन बतईन कि ए माओवादी कमांडर पाछु कुछु समय ले बीमार चलत रिहीस अउ जंगल म ही एखर इलाज करे जात रिहीस। इही बीच, तेलंगाना राज्य के कोत्तागुड़म जिला के पुलिस अधीक्षक सुनील दत्त ह घलो माओवादी कमांडर विनोद के मउत होय के पुष्टि करे हे।
दुर्ग-आरोपी गिरफ्तार
दुर्ग जिला पुलिस ह डकैती के एक बड़े योजना ल नाकाम करत गिरोह के 7 हथियारबंद आरोपी मन ल गिरफ्तार करे हे। पुलिस के अनुसार पकड़े गे आरोपी कोन्हों वारदात ल अंजाम देके फिराक म रिहीन। पुलिस ह आरोपी मन करा ले ऑटोमेटिक पिस्तौल, चार मैगजीन, 14 राउंड गोली, धारदार हथियार अउ एक ठन नकली पिस्तौल बरामद करे हे।
पुलिस अधीक्षक प्रशांत अग्रवाल ह बतईन कि ए गिरोह के संबंध म सूचना मिलते ही छापामार कार्रवाई करे गीस। ओमन बतईन कि पकड़े गे आरोपी मनके खिलाफ पहली ले ही आपराधिक मामला दर्ज हे।
वोरा-गोदाम निरीक्षण
छत्तीसगढ़ राज्य नागरिक आपूर्ति निगम के अध्यक्ष अरूण वोरा ह काली राजनांदगांव के बसंतपुर इलाका म खाद्य विभाग के गोदाम के निरीक्षण करीस। ओमन ह गोदाम के व्यवस्था के बारे म जानकारी लेके सुरक्षा के संबंध म निर्देश घलो दीन। श्री वोरा ह किहीन कि प्रदेश के गोदाम मन म 19 लाख मीटरिक टन अनाज रखे के क्षमता हे। ए बछर गोदाम मनके क्षमता बढ़ाय के बाद अब 31 हजार मीटरिक टन ज्यादा अनाज के भंडारण करे जा सकथे।
खाद/बीज-जांच
प्रदेश म रासायनिक खातू के अलावा बीजा अउ कीटनाशक दवई मनके गुणवत्ता उपर विशेष निगरानी राखे जात हे। कृषि विभाग के अधिकारी सबो जिला मन म लगातार दबिश देके बीजा, खातू अउ कीटनाशक दवई मनके नमूना के जांच करत हे। अब तक राज्य म बीजा के 20 नमूना अउ रासायनिक खातू के 42 नमूना अमानक पाय गेहे। एखर बिक्री उपर तत्काल प्रभाव ले प्रतिबंध लगा दे गेहे। संगेसंग रासायनिक खातू अउ बीजा ले जुड़े फॉर्म मन ल कृषि विभाग ह नोटिस जारी करके जवाब मांगे हे।
बस सेवाएं-प्रभावित
यात्री बस किराया म बढ़ोत्तरी अउ पुराना बंद पड़े बस मनके टेक्स माफी के मांग ल लेके रायपुर समेत राज्यभर के जम्मों बस ऑपरेटर मन आज ले अनिश्चितकालीन आंदोलन सुरू कर दे हंवय। ऐखरे सेती आज प्रदेसभर म अवइया-जवइया मन ल बस नई चले के सेती अब्बड़ परेसानी होईस। आंदोलन के सेती दुरूग, राजनांदगांव, बालोद, बेमेतरा, धमतरी, गरियाबंद, महासमुंद अउ कांकेर समेत कतकोन जिला मन म एको बस नई चीलसं
टोक्यो ओलंपिक-नारा
32वां ओलंपिक खेल अवइया 23 जुलाई ले जापान के राजधानी टोक्यो म शुरू होही। एमा दुनिया के 205 देश मनके खिलाड़ी भाग लीहीं। ए आयोजन म 18 आने-आने खेल मन म भारत के 126 खिलाड़ी मन घलो अपन किस्मत आजमाही। यदि ए खिलाड़ी मन ल पदक जीते बर आपमन घलो प्रेरित करना चाहत हो, त एखर बर केन्द्रीय सूचना अउ प्रसारण मंत्रालय के क्षेत्रीय लोकसंपर्क ब्यूरो अउ पत्र सूचना कार्यालय के डहार ले आपमन ल एक मौका दे जात हे। आपमन ओलंपिक म भाग लेवइया भारतीय खिलाड़ी मन ल अपन लेखनी ले कहि सकत हव ‘‘चीयर फॉर इंडिया‘‘।
ए अभियान म छत्तीसगढ़ के अइसे कोई भी नागरिक भाग ले सकथे, जउन रायपुर स्थित छत्तीसगढ़ के क्षेत्रीय लोकसंपर्क ब्यूरो अउ पत्र सूचना कार्यालय के ट्वीटर हैंडल ल फॉलो करथे। एमा भाग ले बर क्षेत्रीय लोक संपर्क ब्यूरो रायपुर के ट्वीटर हैंडल म जाके आपमन अपन मौलिक रचना, कविता या स्लोगन ‘‘चीयर फॉर इंडिया हैश टैग‘‘ के संग 15 ले 25 जुलाई के बीच ट्वीट कर सकत हव।