सीएम-एसडीजी बैठक
मुख्यमंत्री भूपेश बघेल ह कीहिन हे कि राज्य सरकार के प्रयास हावय कि प्रदेश के चहुंमुखी विकास होवय। ओमन कीहिन कि राज्य सरकार समाज के आखरी मनखे तक शासन के योजना के फायदा पहुंचाय बर संकल्प ले हावय।
मुख्यमंत्री ह आज अपन निवास कार्यालय म राज्य स्तरीय एसडीजी संचालन समिति के पहिली बइठका के समीक्षा करीन। ये बेरा म ओमन गरीबी खतम करे, पर्यावरण के रक्षा, सबो बर न्याय अउ शांति ल सुनिश्चित करे के बात कीहिन। बइठका म ओमन बताइन कि राज्य सरकार आने-आने कल्याणकारी योजना ल पूरा करे के प्रयास करत हे।
प्रधानमंत्री खिलाड़ी बातचीत
प्रधानमंत्री नरेंद्र मोदी टोकियो ओलंपिक म भाग लेवइया खिलाड़ी मनले काली वीडियो कॅान्फ्रेसिंग ले वर्चुअल गोठबात करही। समीक्षा के बेरा म प्रधानमंत्री ल कोविड महामारी के बीच खिलाड़ी मनके प्रशिक्षण ओलंपिक कोटा पाये बर अंतर्राष्ट्रीय प्रतियोगिता म भागीदारी अउ खिलाड़ी मनके कोविड टीकाकरण के संबंध म जानकारी दीन।
पाछू महीना आकाशवाणी ले मन की बात कार्यक्रम म प्रधानमंत्री ह देशवासी मनले खिलाड़ी मनके मदद बर आगू आय के अपील करे रीहिन।
संसद मानसून सत्र
लोकसभा अध्यक्ष ओम बिरला ह कीहिन कि संसद के दूनो सदन के मानसून सत्र ए महीना के उन्नीस तारीख ले शुरू होही। ओमन कीहिन कि राज्यसभा अउ लोकसभा के सत्र अवइया महीना के तेरा तारीख तक चलही। अवइया सत्र म उन्नीस बइठका होही। जउन बीहनिया ग्यारा बजे ले छै बजे तक चलही।
लोकसभा अध्यक्ष ह कीहिन कि बइठका म कोरोना नियम के कड़ई ले पालन करे जाही।
कोरोना समाचार
प्रदेश म कोरोना संक्रमण के दर एक प्रतिशत ले कमती होगे हे। राज्य म काली कोरोना संक्रमण के एक सौ अठासी नवा मामला आगू आइस, एला मिलाके प्रदेश भर म अब तक करीबन नौ लाख अंठानबे हजार मरीज संक्रमित पाय गेहे। जेमा नौ लाख उन्यासी हजार सात सौ ले जादा मरीज स्वस्थ होगे हे। अउ अभी चार हजार सात सौ ले जादा के मरीज मनके आने आने अस्पताल अउ होम आइसोलेशन म इलाज होवत हे।
एति जांजगीर चांपा जिला कलेक्टर जितेंद्र शुक्ला ह कोविड नियम के कड़ाई ले पालन कराय बर अधिकारी मन ल निर्देश दीन अउ लोगन ले कोरोना संबंधी नियम माने के अपील करीन।
इही बीच प्रदेश म अब तक एक करोड़ पांच लाख इक्यासी हजार ले जादा झन ल कोविड के टीका लगाय गेहे।
भाजपा बयान
भारतीय जनता पार्टी महिला मोर्चा के राष्ट्रीय महामंत्री अउ राज्यसभा सांसद इंदुबाला गोस्वामी ह कीहिन हे कि छत्तीसगढ़ सरकार ह माइलोगिन मनले करे गे वादा के अनदेखी करत हे। ओमन कीहिन कि सरकार ह शराबबंदी करे के जगा एला घर-घर अमराय के बेवस्था करे हे।
भाजपा महिला मोर्चा के प्रदेश कार्य समिति के राजधानी रायपुर म काली होय बइठका म ओमन केंद्र सरकार के काम काज के प्रशंसा करीन। बइठका म बोलत भाजपा के राष्ट्रीय उपाध्यक्ष अउ पूर्व मुख्यमंत्री डॅाक्टर रमन सिंह ह कीहिन कि माइलोगिन मनके सशक्तिकरण ले ही समाज अउ देश के विकास होवत हे। डॅाक्टर सिंह ह राज्य सरकार उपर महिला मनके विकास के अनदेखी करे क आरोप लगाइन। उंहें राज्यसभा सांसद सरोज पांडे ह राज्य सरकार के योजना ल माइलोगिन मनके आगू बाढ़े म बाधक बताइन।
माओवादी समाचार
नारायणपुर जिला म आज दू झिन महिला माओवादी मन ह पुलिस के आगू आत्मसमर्पण करीन। खबर के मुताबिक राज्य सरकार के पुर्नवास नीति ले प्रभावित होके ये माओवादी मन ह पुलिस अधीक्षक यू. उदय किरण के आगू आत्मसमर्पण करीन हे।
एति बीजापुर जिला के कुटरू थाना क्षेत्र के भैरमगढ़ ब्लॉक म माओवादी मन कोति ले एक मनखे के हत्या करे जाय के मामला आगू आय हे।
बस संचालक हड़ताल
अपन दू सूत्रीय मांग ल लेके प्रदेश भर के बस चलइया मन ह आज राजधानी रायपुर म धरना दीन। ये बेरा म आंदोलन करइया मन ह मांग नइ माने म काली ले अनिश्चितकालीन हड़ताल म जाय के चेतावनी देहे।
खबर के मुताबिक यात्री बस किराया म चालीस फीसदी बढ़ोत्तरी के मांग अउ टैक्स माफी करे के मांग ल लेके बस संचालक मन कोति ले प्रदर्शन करे जात हे।
एति राजनांदगांव म छत्तीसगढ़ संयुक्त अनियमित कर्मचारी महासंघ ह अपन पांच सूत्रीय मांग ल लेके मशाल रैली निकालिन अउ मुख्यमंत्री के नाव तहसीलदार ल ज्ञापन सौंपीन।
रथयात्रा
आज भगवान जगन्नाथ के रथयात्रा हवय। ये मउका म राष्ट्रपति रामनाथ कोविंद, उप राष्ट्रपति एम. वेंकैया नायडू, अउ प्रधानमंत्री नरेंद्र मोदी ह रथयात्रा के लोगन मन ल बधाई दीन हे। छत्तीसगढ़ म घलो रथयात्रा कोरोना नियम के पालन करत बनाये जाथे। ये बेरा म विशेष सावधानी राख के पूजा-पाठ अउ भगवान जगन्नाथ के दर्शन के मंजूरी श्रद्धालु मन ल दे गेहे।
एति भिलाई के जगन्नाथ मंदिर म घलो रथयात्रा महोत्सव मंदिर परिसर म ही रथयात्रा निकाल के करे गीस। जगदलपुर म बस्तर गोंचा महापर्व म काली नेत्रोत्सव विधान के बाद आज भगवान जगन्नाथ, बलभद्र अउ सुभद्रा के रथयात्रा निकाले गीस।
इही बीच मुख्यमंत्री भूपेश बघेल ह रायपुर के गायत्री नगर के जगन्नाथ मंदिर म भगवान के वर्चुअल दर्शन करत रथयात्रा महोत्सव म शामिल होइन। ये बेरा म ओमन प्रदेशवासी मनके सुख समृद्धि अउ निरोगी जीवन के कामना करत रथयात्रा परब के बधाई अउ शुभकामना दीन।
महिला आयोग सुनवाई
राज्य महिला आयोग कोति ले काली तेरा जुलाई के बस्तर जिला के मामला के सुनवाई करे जाही। आयोग के अध्यक्ष डॅाक्टर किरणमयी नायक काली मामला के सुनवाई करही। ये सुनवाई कलेक्ट्रेट के प्रेरणा कक्ष म राखे जाही। पक्षकार मन ल कोरोना बर जारी दिशा निर्देश के पालन करत सुनवाई म शामिल होय बर सूचित करे गेहे।
मौसम
प्रदेश म अवइया चौबीस घंटा म कुछ एक जगा म हल्का ले मध्यम बरसा होय के संभावना हवय। उंहें एक दू जगा म भारी बरसा अउ गाज गिरे के चेतावनी दे गेहे।
मौसम विभाग के मुताबिक निम्न दाब के क्षेत्र पश्चिम बंगाल के खाड़ी अउ ओखर ले लगे उत्तर पश्चिम के बंगाल आंध्रप्रदेश, अउ दक्षिण तटीय उड़ीसा म हवय। संगेसंग एक द्रोणिका उत्तर-पश्चिम राजस्थान ले मध्यप्रदेश अउ दक्षिण छत्तीसगढ़ तक बनत हे । जेखर प्रभाव ले प्रदेश म बादल छाय अउ बरसा हो सकत हे।