लोकवाणी
मुख्यमंत्री भूपेश बघेल ह आज प्रसारित मासिक रेडियोवार्ता लोकवाणी के 19वां कड़ी म किहीन कि छत्तीसगढ़ के जम्मों क्षेत्र म विकास करे के काम सरकार के प्राथमिकता हवय। इही कारण हे कि प्रदेस म ढाई बछर म विकास के एक ठिन नवा स्वरूप नजर आवत हे।
मुख्यमंत्री ह किहीन कि राज्य सरकार छत्तीसगढ़ के बुनियादी विकास के बात करत उही दिसा म परयास करथे। ओमन किहीन कि राज्य सरकार बछर 2023 तक प्रदेस के ग्रामीण क्षेत्र मनके जम्मों घर मन म नल कनेक्सन पहुंचाय के लक्ष्य राखे हे।
पद्म पुरस्कार-नामांकन
प्रधानमंत्री नरेन्द्र मोदी ह किहीन हे कि भारत म बड़ अकन प्रतिभासाला लोगन मन हवय, जउन मन जमीनी स्तर म उल्लेखनीय काम करत हवय। एक ट्वीट संदेस म श्री मोदी ह लोगन मन ले किहीन कि ओमन अइसन प्रेरणा देवइया लोगन मन ल पद्म पुरस्कार खातिर नामित करय, जेखर नामांकन 15 सितंबर तक करे जा सकत हे।
मन की बात
प्रधानमंत्री नरेन्द्र मोदी 25 जुलाई के आकाशवाणी म ‘‘मन की बात‘‘ कारीकरम म देस-बिदेस के लोगन मनके संग अपन बिचार साझा करहीं। मासिक कारीकरम के 19वां कड़ी होही, जउन म प्रधानमंत्री ह लोगन मन ल अइसन बिसय म विचार साझा करे खातिर आमंत्रित करे हे, जेखर बारे म कारीकरम के अवइया कड़ी म ओमन अपन विचार राख सकय। लोगन मन अपन विचार ल नमो ऐप या माई जी.ओ.वी. ओपन फोरम म साझा कर सकत हे।
मनरेगा-अनुकंपा अनुदान
महात्मा गांधी राष्ट्रीय ग्रामीण रोजगार गारंटी अधिनियम के तहत मनरेगा कर्मी मनके सेवाकाल के दउरान मृत्यु होय म उंखर मनके आश्रित मन ल एक लाख रूपिया के अनुकंपा अनुदान दे जाही। ए संबंध म जम्मों जिला कलेक्टर मन ल संसोधित परिपत्र जारी कर दे गे हवय।
राज्य मनरेगा आयुक्त मोहम्मद कैसर अब्दुल हक ह बतईन कि केन्द्रीय ग्रामीण विकास मंत्रालय डहार ले जारी करे गे पत्र के मुताबिक महात्मा गांधी नरेगा के तहत कार्यरत् रिहीन अइसन दिवंगत दैनिक वेतनभोगी या सीधी भर्ती ले संविदा म नियुक्त कर्मचारी जिखर मनके लगातार दू बछर के सेवा पूरा हो चुके हे, उंखर मनके आश्रित परिवार के नामांकित सदस्य ल एकमुश्त राशि एक लाख रूपिया अनुकंपा अनुदान के रूप म दे जाय के प्रावधान हवय।
सीड बॉल-बोआई
प्रदेस म वन विभाग डहार ले राज्य स्तर म आज एके संघरा फलदार पौधा के बीजा अउ सीड बॉल के बोआई करे गीस। एखर तहत वन क्षेत्र मन म 50 हजार किलोग्राम फलदार पौधा के बीज समेत 25 लाख सीड बॉल के बोआई करे के लक्ष्य राखे गे हवय।
प्रदेस के वन क्षेत्र मन म बेर, जामुन, बेल, सीताफल, करौंदा अउ मुनगा जइसन फलदार प्रजाति मनके बीज के बोआई अउ छिड़काव करे के संगेसंग सीड बॉल डिब्लिंब के काम करे जावत हे।
राष्ट्रीय लोक अदालत
राष्ट्रीय विधिक सेवा प्राधिकरण के निरदेस म काली छत्तीसगढ़ म राष्ट्रीय लोक अदालत के आयोजन करे गीस। लोक अदालत म 10 हजार ले जादा प्रकरण मनके निराकरण करे गीस, जेमा करीबन 1 हजार मामला कोरोना काल म उल्लंघन ले संबंधित रिहीस, जेला सासन के पहल म वापस ले ले गीस। एखर अलावा मोटर दुर्घटना के प्रकरण मन म 2 करोड़ 39 लाख रूपिया ले जादा के रासि के अवॉर्ड पारित करे गीस।
भाजपा-पत्रकारवार्ता
भारतीय जनता पार्टी महिला मोर्चा के राष्ट्रीय महामंत्री अउ राज्यसभा सांसद इंदुबाला गोवास्मी ह किहीन हे कि प्रधानमंत्री नरेन्द्र मोदी ह माईलोगिन मनके राजनीतिक, सामाजिक अउ आर्थिक सशक्तिकरण म जोर दीन हे। ओमन 11 झिन माईलोगिन मन ल केन्द्रीय मंत्रिमंडल म स्थान देके ए बात ल साबित करे हवय। सांसद गोस्वामी ह किहीन कि 50 फीसदी महिला आबादी ल सशक्त करे ले ही राष्ट्र के सशक्तिकरण होही।
आज रईपुर म आयोजित एक ठिन पत्रकारवार्ता ल संबोधित करत सुश्री गोस्वामी ह राज्य के कांग्रेस सरकार उपर टीकाकरण के मामला म आम जनता ल गुमराह करे के आरोप लगाईन। ओमन किहीन कि प्रदेस म माईलोगिन मन उपर अत्याचार बाढ़ गे हवय। एखर पहिली, सुश्री गोस्वामी ह प्रदेस भाजपा महिला मोर्चा के कार्यसमिति के बइठका म सामिल होके पदाधिकारी अउ कार्यकर्ता मन ल संबोधित करीन।
कृषि मंत्री-पत्रकारवार्ता
कृषि मंत्री रविन्द्र चौबे ह स्वीकार करीन हे कि प्रदेस म खाद अउ यूनिया के कमी होवत हे अउ एखर सेती ओमन केन्द्र सरकार ल जिम्मेदार ठहराय हे। श्री चौबे ह आज रईपुर म पत्रकावार्ता म किहीन कि फर्टिलाइजर कंट्रोल एक्ट के तहत खाद अउ यूरिया उपलब्ध कराय के काम केन्द्र सरकार के हवय। राज्य ह केन्द्र ले जतका मांग करे रिहीन, ओखर 40 प्रतिशत खाद घलो नइ मिल पाय हे।
विश्व जनसंख्या दिवस
आज विश्व जनसंख्या दिवस हवय, जउन हर बछर 11 जुलाई के मनाय जाथे। एला मनाय के उद्देश्य वैश्विक स्तर म जनसंख्या के मुद्दा मन उपर लोगन मनके बीच जागरूकता बढ़ाना हवय। संयुक्त राष्ट्र विकास कारीकरम के शासी परिषद ह बछर 1989 म 11 जुलाई के विश्व जनसंख्या दिवस के रूप म मनाय के सिफारिश करे रिहीन।
वजन त्यौहार
प्रदेस म महिला अउ बाल विकास विभाग डहार ले ए बेरा वजन तिहार मनाय जावत हे। इही कड़ी म महिला अउ बाल विकास मंत्री अनिला भेंडिया काली बालोद जिला के ग्राम कलकसा म आयोजित वजन तिहार म सामिल होईन। ए मउका म ओमन नंद घर के लोकार्पण करे के संगेसंग जिला के पच्चीस आंगनबाड़ी केन्द्र मन म नंद घर प्रोजेक्ट के सुरूआत करीन। नंद घर ल लइका मनके सउक के अनुसार आकर्षक अउ सुविधायुक्त बनाय गे हवय।
रथयात्रा
काली भगवान जगन्नाथ के रथयात्रा हवय। ए बछर कोरोना संक्रमण ल देखत छत्तीसगढ़ के मंदिर मन म घलो धार्मिक आयोजन के दौरान बिसेस ऐहतियात बरते जाही। एखर तहत आने-आने स्थान मन म ए दारी जगन्नाथ रथयात्रा नइ निकाले जाही।
मुख्यमंत्री भूपेश बघेल ह प्रदेसवासी मन ल रथयात्रा के अपन सुभकामना देवत किहीन कि अभी कोविड के खतरा टले नइ हवय। एखर सेती मास्क, फिजिकल डिस्टेंसिंग जइसन कोरोना संक्रमण से बचाव खातिर जारी दिसा-निरदेस के लोगन मन ल पालन करना चाही
अउ अब पेस हे मौसम के हाल..
प्रदेस म अवइया 24 घंटा के दउरान आने-आने स्थान मन म हल्का ले मध्यम बारिस होय के संभावना हवय। उहें, एक-दू स्थान म भारी बरसा होय के संगेसंग आकाशीय बिजली गिरे के चेतावनी घलो दे गे हवय।
मौसम विभाग के मुताबिक एक निम्न दाब के क्षेत्र पश्चिम मध्य बंगाल के खाड़ी अउ उंखर ले लगे उत्तर-पश्चिम बंगाल, उत्तर तटीय आंध्रप्रदेश अउ दक्षिण तटीय ओड़िसा म स्थित हवय। एखर अलावा एक ठिन द्रोणिका उत्तर-पश्चिम राजस्थान ले मध्यप्रदेश अउ दक्षिण छत्तीसगढ़ तक विस्तारित हवय। एखर असर ले प्रदेस म बदली-बरसा के स्थिति बने हुए हे।