केन्द्र-कोविड एहतियात
केन्द्र सरकार ह कोविड ले बाचे बर जरूरी सुरक्षा उपाय म ढील नइ देके अपील करे हे। केन्द्रीय स्वास्थ्य मंत्रालय के संयुक्त सचिव लव अग्रवाल ह नई दिल्ली म संवाददाता सम्मेलन म किहीन कि खतरा अभी टले नइ हे। ओमन किहीन कि प्रधानमंत्री नरेन्द्र मोदी ह बंदिश म छूट बेरा कोविड नियम के लापरवाही उपर गहरा संसो करे हे।
उहें, नीति आयोग के सदस्य डॉक्टर वी.के पॉल ह किहीन हे कि लोगन मन ल कोविड ले बचाव वाले सब्बो नियम ल कड़ई ले मानना चाही। घूमे-फिरे के जगह समेत कहू भी मास्क पहनई अउ सुरक्षित दूरी के नियम ल मानना जरूरी हे।
कोरोना टीकाकरण/समाचार
छत्तीसगढ़ म कोरोना टीकाकरण के काम जोरदरहा चलत हे। एखर चलत प्रदेस म अब तक ले कोरोना ले बाचे बर करीबन एक करोड़ चार लाख नब्बे हजार आठ सौ सत्यासी टीका लगाय जा चुके हे। प्रदेस के करीब तीस प्रतिसत आबादी ल टीका के पहला डोज लग गे हवय। छत्तीसगढ़ म ह ए मामला म देस के कई ठिन बड़का राज्य के लागू हवय।
राजनांदगांव जिला के शहरी अउ ग्रामीण क्षेत्र म पौने सात लाख मनखे ल टीका लग गे हवय।
इही बीच, प्रदेस म कोरोना संक्रमण के मामला म सरलग सुधार होय के संगे औसत पॉजिटिविटी रेट एक प्रतिशत होगे हे। काली प्रदेस म कोरोना संक्रमण के तीन सौ इंक्यानवे नवा मामला आगू आय हे।
ओति, कांडागांव जिला म कोरोना के संभावित तीसरा लहर ले निपटे बर प्रसासन डहार ले तैयारी सुरू कर दे गेहे।
उहें, मुंगेली जिला म भारतीय जनता युवा मोर्चा के कार्यकर्ता मन कोरोना संक्रमण ले बाचे बर लोगन मन ल जागरूक करे बर एक दिन के नगर सैनिटाईजेशन अभियान चलाईन।
बाल वाटिका/ट्विनिंग ऑफ स्कूल
प्रदेस म स्कूल जाय के पहिली आंगनबाड़ी के नान्हें लइका मन अब बाल वाटिका म पढ़ही। बाल वाटिका म लइका मन ल स्कूली पढ़ई बर तियार करे जाही। राष्ट्रीय सिक्षा नीति के चलत प्रदेस म बाल वाटिका चालू करे बारे म बिसेस संयुक्त कार्यबल के बइठका म सोच-विचार करे गीस।
स्कूल सिक्षा विभाग के प्रमुख सचिव डॉक्टर आलोक शुक्ला के पगरइति म होय बइठका म राष्ट्रीय सिक्षा नीति म राखे गे नवा स्ट्रक्चर ल राज्य म लागू करे बर सबो बेवस्था अउ संसाधन के जानबा ले बाद प्रस्ताव तैयार करे के निरदेस दे गीस।
उहें, प्रदेस म कक्षा पहली ले आठवीं तक सबो स्कूल मन म ट्विनिंग ऑफ स्कूल कारीकरम चलाय जाही, जेखर चलत सरकारी अउ निजी स्कूल के जोड़ी बनाके ओमन ल आपस म एक-दूसरा ले साझा करे बर बड़वाही दे जाही। जोड़ी म ले कोनों भी दू ठिन तीर-तखार के स्कूल अपन संसाधन अउ बिसेसज्ञता के देवई-लेवई कर सकही। ए कारीकरम के संचालन बर समग्र सिक्षा के सबो जिला मिशन समन्वयक जरूरी निरदेस दे गेहे।
राष्ट्रीय लोक अदालत
राष्ट्रीय विधिक सेवा प्राधिकरण के निर्देशानुसार आज राष्ट्रीय लोक अदालत के आयोजन करे गीस। छत्तीसगढ़ म घलो तहसील स्तर ले लेके हाईकोर्ट तक सबो कोर्ट मन म लोक अदालत लगाय गीस, जेमा कई ठिन मामला के निपटारा पक्षकार मनके आपसी समझौता ले करे गीस।
एसआरई-मुंगेली
माओवाद परभावित सुरक्षा संबंधी खरचा-एस.आर.ई. के लिस्ट ले बालोद जिला ल घुचा के मुंगेली जिला ल राखे गेहे। केन्द्रीय गृह मंत्रालय के निरदेस ले छत्तीसगढ़ पुलिस मुख्यालय डहार ले ए बारे म आदेस निकाल दे गेहे।
लोकवाणी
मुख्यमंत्री भूपेश बघेल के मासिक रेडियोवार्ता ‘‘लोकवाणी‘‘ के उन्नीसवां कड़ी के प्रसारण काली ग्यारह जुलाई के करे जाही। मुख्यमंत्री लोकवाणी म ए बखत ‘‘विकास का नया दौर‘‘ बिसय उपर प्रदेसवासी मन ले गोठबात करही। लोकवाणी के प्रसारण छत्तीसगढ़ के आकाशवाणी के सब्बो केन्द्र एफ.एम. रेडियो और सब्बो क्षेत्रीय समाचार चैनल म बिहनिया दस बजके तीस मिनट ले ग्यारह बजे तक करे जाही।
रूर्बन कलस्टर
छत्तीसगढ़ म रूर्बन मिशन के चलत होवत कामकाज ल एक घांव फेर राष्ट्रीय स्तर म सहराय गीस। केन्द्रीय ग्रामीण विकास मंत्रालय के परफॉर्मेंस रिव्यू कमेटी के बइठका म रूर्बन मिशन के तहत रईपुर जिला के मंदिर हसौद कलस्टर म अन्नापूर्णा ग्राम संगठन डहार ले चलइया मल्टी एक्टिविटी सेंटर म पेवर ब्लॉक अउ फ्लाईएश ब्रिक्स बनाय के काम ल सहराय गीस।
केन्द्रीय सचिव नागेन्द्रनाथ सिन्हा के पगरइति म राखे गे ऑनलाइन बइठका म संयुक्त सचिव डॉक्टर बिश्वजीत बैनजी ह बतईन कि छत्तीसगढ़ ह रूर्बन के सुघ्घर कामकाज म देस के अगवा राज्य म आथे।
सीड बॉल-बोआई/पौधारोपण
प्रदेस म वन विभाग डहार ले राज्य स्तर म काली ग्यारह जुलाई के एक संग फलदार पौधा के बीज अउ सीड बॉल के बुआई करे जाही। वन मंत्री मोहम्मद अकबर ह एखर सफल आयोजन बर विभागीय अधिकारी मन ल जरूरी निरदेस देहे।
उहें, ए बेरा प्रदेस म वन विभाग डहार ले मुफत पौधा घलो बांटे जात हे।
निकाय चुनाव-मतदाता सूची
राज्य निर्वाचन आयोग ह भिलाई-चरौदा नगर निगम अउ सारंगढ़ नगर पालिका म आम निर्वाचन अउ रायगढ़, बेमेतरा, उतई के संगे थान खम्हरिया म उप निर्वाचन बर फोटो वाले मतदाता सूची तैयार करे बर कारीकरम जारी कर देहे। दावा आपत्ति के निराकरण के बाद मतदाता सूची के आखिरी प्रकाशन तीस सितंबर के करे जाही।
अउ अब सुनव मौसम के हालचाल..
प्रदेस म अवइया चौबीस घंटा के दउरान कई ठिन जगह म थोरकुन ले जादा बरसा हो सकत हे। उहें, कहूं-कहूं बड़भारी बरसा होय के संगे आकाशीय बिजली गिरे के चेतावनी घलो दे गेहे।
मौसम विभाग के मुताबिक एक ठिन द्रोणिका उत्तर-पश्चिम राजस्थान ले होवत छत्तीसगढ़ अउ ओड़िसा तक बगरे हवय। संगे एक चक्रीय चक्रवाती घेरा तटीय ओड़िसा अउ ओखर तीर-तखार म बने के सेती प्रदेस के कई ठिन इलाका म बीते चौबीस घंटा के दउरान कोनों-कोनों जघा म पानी गिरे हे।
अउ अब थोरकुन समाचार सार म-
– राज्य सासन ह सरकारी चिकित्सा महाविद्यालय सरगुजा-अंबिकापुर के नामकरण राजमाता देवेन्द्र कुमारी सिंहदेव के नाव म राखे के आदेस निकाल देहे।
– प्रदेस के सबो अधिकारी-करमचारी अउ अखिल भारतीय सेवा के अधिकारी मनके सामान्य भविष्य निधि-जीपीएफ लेखा पर्ची ह कार्यालय महालेखाकार छत्तीसगढ़ अउ राज्य सासन के वेबसाइट म मिल जही।
– वाइल्ड लाइफ क्राइम कंट्रोल ब्यूरो के टीम ह छत्तीसगढ़ के गरियाबंद समेत ओड़िशा के नुवापाड़ा अउ कालाहांडी जिला म छापा मारके जंगली जानवर के सिकार करे के मामला म छह झिन आरोपी ल गिरफ्तार करे हे।
– महासमुंद जिला के सीमावर्ती इलाका म लिलेसर नदी घाट ले पुलिस ह अटठ्यासी किलो गांजा संग एक झिन मनखे ल गिफ्तार करे हे।
अउ
– राजनांदगांव जिला म तुमड़ीबोड़ पुलिस ह खेत म लगे सिंचई पाईप ल चोरी करे के मामला ल छह झिन आरोपी ल पकड़े हे। उहें, इही जिला म एक झिन मनखे के अपहरण करे बाद तीस लाख फिरौती मंगइया तीन झिन आरोपी ल सोमनी पुलिस ह गिरफ्तार करे हे।