केन्द्रीय मंत्रिमंडल
केन्द्रीय मंत्रिमंडल ह वित्तीय बछर दू हजार इक्कीस-बाईस बर एक नवा योजना ‘‘भारत कोविड-नाइंटीन आपात प्रतिक्रिया अउ स्वास्थ्य प्रणाली तैयारी पैकेज-चरण/टू‘‘ ल मंजूरी दे देहे। ए योजना बर तेईस हजार एक सौ तेईस करोड़ रूपिया के रासि मंजूर करे गेहे।
काली संझा नई दिल्ली म कैबिनेट के बइठका के बाद केन्द्रीय स्वास्थ्य मंत्री मनसुख मांडविया ह बतईन कि ए योजना के लक्ष्य स्वास्थ्य प्रणाली म तेजी लाना हे। ओमन किहीन कि दूसर चरण के उपाय ए बछर एक जुलाई ले अवइया साल इकतीस मार्च तक लागू करे जाही। श्री मांडविया ह किहीन कि राज्य अउ केन्द्रसासित प्रदेस के सार्वजनिक स्वाथ्य देखभाल प्रणाली म बीस हजार आईसीयू बिस्तर के बढ़ोतरी करे जाही। ओमन यहू किहीन कि स्नातक अउ स्नातकोत्तर चिकित्सा प्रशिक्षार्थी अउ एमबीबीएस, बी.एस.सी. अउ जी.एन.एम. नर्सिंग जइसे पाठ्यक्रम के आखिरी बछर के पढ़ईया लइका मन ल कोविड नियंत्रण कारीकरम म तैनात करे जाही।
उहें, केन्द्रीय मंत्रिमंडल ह ‘कृषि बुनियादी ढांचा कोष‘ के तहत वित्त पोषण सुविधा के केन्द्रीय क्षेत्र योजना म संसोधन ल घलो मंजूरी दीन हे। केन्द्रीय कृषि मंत्री नरेन्द्र सिंह तोमर ह किहीन कि कृषि उपज मंडी समिति-ए.पी.एम.सी. ल कृषि बुनियादी ढांचा कोष ले एक लाख करोड़ रूपिया के इस्तेमाल करे के मंजूरी होही, जेखर घोषणा आत्मनिर्भर भारत पैकेज के अंतर्गत करे गे रिहीस।
प्रधानमंत्री-कोविड नियम
प्रधानमंत्री नरेन्द्र मोदी ह भीड़-भाड़ वाले जघा म लोगन मन डहार ले कोविड के नियम के पालन नइ करे म चिंता जताय हे। श्री मोदी ह किहीन कि पाछु कुछेक दिन ले भीड़-भाड़ वाले जघा म बिना मास्क अउ सुरक्षित दूरी के पालन नइ करइया घूमत मनखे मनके फोटू अउ वीडियो आगू आवत हे। ओमन किहीन कि अइसन बेरा म लापरवाही अउ कोताही नइ होना चाही।
केन्द्रीय मंत्रिमंडल बिस्तार के बाद मंत्रिपरिषद के काली पहली बइठका म श्री मोदी ह जोर देके किहीन कि जम्मां लोगन मन ल सुरता राखना चाहि कि कोरोना के खतरा अभी टले नइ हे। प्रधानमंत्री ह लोगन मन ले कोरोना ले बाचे खातिर जम्मों सावधानी बरते के अपील करीन हे।
कोरोना टीकाकरण
प्रदेस म कोरोना संक्रमण ले बचाव बर अब तक एक करोड़ तीन लाख चौरासी हजार टीका लगाय जा चुके हे। आबादी के हिसाब ले टीकाकरण कवरेज के मामला म छत्तीसगढ़ ह देस के कई ठिन बड़े राज्य ले आगू हे। प्रदेस म इंक्यानवे प्रतिशत स्वास्थ्यकर्मी, सत-प्रतिशत फ्रंटलाइन वर्कर्स, पैंतालीस बछर ले जादा उमर के बयासी प्रतिशत नागरिक अउ अट्ठारह ले चवालीस बछर के तेईस प्रतिशत युवा मन ह कोरोना के पहली लगवा लेहे। उहें, इकहत्तर प्रतिशत स्वास्थ्यकर्मी, तिहत्तर प्रतिशत फ्रंटलाइन वर्कर्स अउ पैंतालीस बछर ले जादा आयु वर्ग के बाईस प्रतिशत लोगन मन ह टीका के दूनों खुराक ले लेहे।
एम्स-स्पेशल क्लीनिक
अखिल भारतीय आयुर्विज्ञान संस्थान-एम्स रईपुर ह तीन ठिन नवा स्पेशल क्लीनिक सुरू करे हे। एमा रिम्यूटोलॉजी एंड इम्योनोलॉजी, सिकल सेल क्लीनिक अउ सियान मन बर जिरियाट्रिक स्पेशल क्लीनिक सामिल हवय। ए जम्मों क्लीनिक हरेक बुधवार अउ गुरूवार के मंझनिया दू बजे ले संझा चार बजे तक खुले रइही।
एम्स रईपुर के निदेशक प्रोफेसर डॉक्टर नितिन एम. नागरकर ह बतईन कि मेडिसिन विभाग म हर दिन करीबन चार सौ मरीज इलाज बर आथे। अइसन म कुछेक बिसेस बीमारी बर अलग ले स्पेशल क्लीनिक बनाय गेहे। ए जम्मों क्लीनिक जून के आखिरी हफ्ता ले सुरू होगे हे।
राष्ट्रीय लोक अदालत
राष्ट्रीय विधिक सेवा प्राधिकरण के निरदेस के अनुसार काली दस जुलाई के राष्ट्रीय लोक अदालत के आयोजन करे जाही। जेखर मुताबिक छत्तीसगढ़ म घलो तहसील स्तर ल लेके उच्च न्यायालय के संगेसंग जम्मों न्यायालय म ए आयोजन ल करे जाही। एमा आने-आने मामला पक्षकार मनके आपसी समझौता ले निपटाय जाही। प्रकरण मनके सुनवाई खातिर विशेष न्यायाधीश के नियुक्ति के संगेसंग तीन सौ बाईस खंडपीठ के गठन करे गेहे। लोक अदालत म चुने गे चालीस हजार प्रकरण के सुनवाई करे जाही। ए मउका म पक्षकार व्यवहार न्यायालय, जिला न्यायालय या फेर विधिक सेवा संस्थान ले जुड़के अपन प्रकरण मनके निपटारा वर्चुअल माध्यम ले घलो करा सकत हे।
मुख्यमंत्री-समीक्षा
मुख्यमंत्री भूपेश बघेल ह राज्य म वन संरक्षण अउ संवर्धन के संगेसंग आदिवासी अउ वनवासी के उत्थान के दिसा म सत्त रूप ले काम करे के निरदेस अधिकारी मन ल दीन हे। मुख्यमंत्री ह काली वन अउ जलवायु परिवर्तन, आवास अउ पर्यावरण विभाग के काम के वर्चुअल समीक्षा बइठका करीन। बइठका म ओमन किहीन कि नंदिया-नरवा के तीर भू-जल संरक्षण बर माटी के डाईकवाल बनाय के काम ल बिसेस प्राथमिकता दे जाय। ओमन राज्य म कोसा उत्पादन ल ध्यान म राखत शहतूत के पेड़ लगाय ल घलो बढ़ावा दे बर किहीन।
माओवादी-समर्पण
सुकमा जिला म आज तीन झिन माओवादी मन ह पुलिस के आगू आत्मसमर्पण कर दीन। एमा ले एक झिन माओवादी उपर एक लाख रूपिया के इनाम घोसित रिहीस। ए माओवादी मन ह सुकमा पुलिस अधीक्षक सुनील शर्मा, सीआरपीएफ के डीआईजी योज्ञान सिंह अउ कमांडेंट तासी ज्ञालिक के आगू आत्मसमर्पण करीन। पुलिस के मुताबिक ए जम्मों माओवादी आने-आने घटना म सामिल रिहीस।
जी.पी. सिंह-कार्रवाई
निलंबित आईपीएस अधिकारी अउ एडीजी जी.पी. सिंह के खिलाफ पुलिस ह राजद्रोह के मामला दर्ज करे हे। एसीबी प्रमुख के चिट्ठी के आधार म रईपुर पुलिस ह काली रतिहा ए कार्रवाई करीन।
इही बीच, निलंबित अधिकारी जी.पी. सिंह ह हाईकोर्ट म याचिका दायर करे हे। अपन नब्बे पेज के रिट याचिका म ओमन ए पूरा मामला के सीबीआई ले जांच कराय के मांग करे हे। याचिका म ओमन ए पूरा कार्रवाई ल पक्षपातपूर्ण बताय हे।
खबर के मुताबिक पाछु दिन बड़का आईपीएस अधिकारी जी.पी. सिंह के घर समेत पन्द्रह ठिकाना म एंटी करप्शन ब्यूरो-एसीबी के टीम ह छापा मारे रिहीस। एमा दस करोड़ रूपिया ले जादा के बेनामी संपत्ति के खुलासा होय रिहीस।
मौसम
अवइया चौबीस घंटा के दउरान प्रदेस के कतकोन जघा म हल्का ले मध्यम बरसा होय अउ गरज-चमक के संग छींटा पड़े के संभावना हे। उहें, एक-दू जघा म भारी बरसा होय अउ गाज गिरे के चेतावनी घलो दे गेहे।
मौसम विभाग के मुताबिक एक ठिन द्रोणिका पंजाब ले उत्तर-पश्चिम बंगाल के खाड़ी तक बने हे। उहें, एक ठिन चक्रीय चक्रवाती घेरा उत्तर-पश्चिम झारखंड अउ ओखर तीर-तखार म स्थित हे। एखर असर ले प्रदेस के कई ठिन जघा म हल्का ले मध्यम बरसा होवत हे। आज राजधानी रईपुर समेत प्रदेस के कुछेक जघा म दिनभर बादर छाय रिहीस अउ सिटिर-साटर पानी घलो गिरीस।
कोंडगांव पुलिस-अपील
कोंडगांव पुलिस ह आम लोगन मन ले अपील करे हे कि ओमन सोशल मीडिया म कोनां अनजान मनखे ले वीडियो कॉल झन करय। कोंडगांव थाना म पाछु कुछेक दिन ले सोशल मीडिया म अश्लील वीडियो कॉल आय अउ कॉल रिकार्डिंग के बाद वीडियो वायरल करे के धमकी देके ओमन ले पइसा के मांग करे जावत हे। एखर ले परेसान होके कुछेक लोगन मन थाना म रिपोर्ट दर्ज कराय हे। पुलिस ए मामला के जांच करत हे।