नये मंत्री-पदभार ग्रहण
केन्द्रीय मंत्रिपरिषद म काली होय विस्तार के बाद ले नवा बने कई झिन मंत्री मन ह आज अपन मंत्रालय के पदभार संभालीन। अनुराग सिंह ठाकुर ह सूचना अउ प्रसारण मंत्री के कार्यभार संभालीन। ए बेरा म श्री ठाकुर ह किहीन कि प्रधानमंत्री नरेन्द्र मोदी ह पाछु सात बछर म सुघ्घर काम करे हे। श्री ठाकुर ह किहीन कि सूचना अउ प्रसारण मंत्री के रूप म अपन जिम्मेदारी ल बढ़िया तरीका ले निभाय के संगेसंग ओमन ह देसवासी के अपेक्षा म खरा उतरही।
बतादन कि केन्द्रीय मंत्रिपरिषद म काली तिरालीस झिन मंत्री मन ल सपथ दिलाय गीस, जेमा पन्द्रह झिन कैबिनेट अउ अट्ठाईस झिन राज्य मंत्री हवय। मंत्री मनके विभाग के बंटवारा घलो कर दे गेहे। केन्द्रीय गृहमंत्री अमित शाह ल गृह विभाग के अलावा नवा सहकारिता मंत्री बनाय गेहे। धर्मेन्द्र प्रधान ह नवा सिक्षा मंत्री होही। ओमन ल कौशल विकास अउ उद्यमिता मंत्रालय के प्रभार घलो दे गेहे। एखर अलावा अन्नापूर्णा देवी अउ सुभाष सरकार ल सिक्षा मंत्रालय म राज्य मंत्री बनाय गेहे। ज्योतिरातित्य सिंधिया ह नागरिक उड्डयन मंत्री त उहें अनुराग सिंह ठाकुर ल नवा सूचना अउ प्रसारण मंत्री बनाय गेहे। ओमन ल युवा कार्य अउ खेल मंत्रालय घलो दे गेहे।
कृषि मंत्री-समीक्षा
कृषि मंत्री रविन्द्र चौबे ह राज्य के गौठान म महिला स्व-सहायता समूह डहार ले बने वर्मी कम्पोस्ट अउ सुपर कम्पोस्ट के जादा मांग ल देखत हुए अब एखर बिक्री के बेवस्था ल आउटलेट के जरिया ले करे के निरदेस दीन हे। दुरूग संभाग के कृषि अधिकारी मनके समीक्षा बइठका म कृषि मंत्री ह जैविक खाद बर जिला मुख्यालय म आउटलेट सुरू करे या फेर संजीवनी जइसन आउटलेट म एला उपलब्ध कराय बर केहे हे। श्री चौबे ह अधिकारी मन ल सरलग क्षेत्र के दउरा करके खेती-किसानी के उपस्थिति उपर नजर राखे अउ किसनहा मनके समस्या के निदान करे के निरदेस दीन।
जेनेटिक स्क्रीनिंग प्रयोगशाला
दाऊ वासुदेव चंद्राकर कामधेनु विश्वविद्यालय के अंतर्गत पशु चिकित्सा अउ पशु पालन महाविद्यालय अंजोरा, दुरूग के पशु आनुवांशिकी अउ प्रजनन विभाग म जेनेटिक स्क्रीनिंग प्रयोगशाला स्थापित करे गेहे। एखर उद्घाटन कृषि मंत्री रविन्द्र चौबे ह काली करीन। ए प्रयोगशाला म पशु मन म प्रमुख आनुवांशिक बीमारी के पता लगाय जा सकत हे अउ अइसनहा पशु जेमा ए बीमारी के जीन हवय, उंखर घलो जानकारी मिल सकत हे।
कुपोषण दुर्ग/बिलासपुर
कुपोषण मुक्त छत्तीसगढ़ बर दुरूग जिला म ‘‘वन होम-वन ट्री‘‘ महाअभियान के सुरूवात करे गेहे, जेखर चलत जिला के आंगनबाड़ी केन्द्र मन ल हरा-भरा करे खातिर पौधा लगाय जात हे। काली रसमड़ा अउ कोटनी के सबो आंगनबाड़ी केन्द्र मनके संगेसंग कुपोषित अउ गर्भवती मनके घर म मुनगा के पौधा लगाय गीस। जिला कारीकरम अधिकारी विपिन जैन ह बतईन कि पौधारोपण के उद्देश्य कुपोषण अउ एनीमिया के दर म कमी लाना हे।
ऐति, बलरामपुर म जिला प्रसासन ह ग्राम पंचायत ल कुपोषण मुक्त बनाय खातिर यूनिसेफ अउ सरपंच मनके मदद ले ‘‘सुपोषित ग्राम-सुपोषित बलरामपुर‘‘ अभियान सुरू करे हे, जेखर चलत संयुक्त जिला कार्यालय भवन म जिला प्रसासन अउ यूनिसेफ के टीम के संग सरपंच मन ह ‘‘सुपोषित ग्राम-सुपोषित बलरामपुर‘‘ बनाय के सपथ लीन। कलेक्टर इंद्रजीत एस.चं्रदवाल ह जिला के सब्बो सरपंच मन ले अपील करत हुए कहिन हे कि ओमन ह अपन ग्राम पंचायत म कुपोषण अउ एनीमिया ल खतम करे के ए कोसिस के नेतृत्व करय।
राष्ट्रीय लोक अदालत
राष्ट्रीय विधिक सेवा प्राधिकरण के निरदेस के अनुसार दस जुलाई के राष्ट्रीय लोक अदालत के आयोजन करे जाही। जेखर अनुसार छत्तीसगढ़ म घलो तहसील स्तर ल लेके उच्च न्यायालय के संगेसंग सबो न्यायालय म ए आयोजन ल करे जाही। एमा आने-आने मामला पक्षकार मनके आपसी समझौता ले निपटाय जाही। प्रकरण मनके सुनवाई खातिर विशेष न्यायाधीश के नियुक्ति के संगेसंग तीन सौ बाईस खंडपीठ के करे गेहे। लोक अदालत म चुने हुए चालीस हजार प्रकरण के सुनवाई करे जाही। लोक अदालत म पक्षकार, व्यवहार न्यायालय, जिला न्यायालय या फेर विधिक सेवा संस्थान ले जुड़के अपन प्रकरण मनके निराकरण वर्चुअल माध्यम ले घलो करा सकत हे।
खरीफ-फसल बोआई
राज्य म खरीफ फसल के बोआई जारी हवय। कृषि विभाग ले मिले जानकारी के अनुसार अभू तक राज्य म करीबन साढ़े सत्रह लाख हेक्टेयर क्षेत्र म खरीफ फसल के बोआई ह पूरा हो चुके हे। जउन कि निर्धारित करे गे लक्ष्य के छत्तीस प्रतिसत हवय। उहें, धान के बोआई ह पन्द्रह लाख ले जादा हेक्टेयर क्षेत्र म पूरा हो चुके हे। जउन कि खरीफ मौसम बर निर्धारित लक्ष्य के इकतालीस प्रतिसत हवय। इही तरीका ले राज्य म मक्का बोनी तिरासी हजार ले जादा हेक्टेयर क्षेत्र म करे जा चुके हे।
एक्सीलेंस अवॉर्ड
कोरोना संकट के बेरा मानसिक स्वास्थ्य कारीकरम के चलत राज्य म सुघ्घर काम बर छत्तीसगढ़ के चयन एक्सीलेंस इन मेन्टल हेल्थ अवॉर्ड बर करे गेहे। नई दिल्ली म तीस जुलाई के आयोजित कारीकरम म छत्तीसगढ़ ल ए इनाम दे जाही।
पब्लिक हेल्थ फाउंडेशन ऑफ इंडिया डहार ले छत्तीसगढ़ के स्वास्थ्य अउ परिवार कल्याण विभाग ल ए पुरस्कार दे जात हे। संस्था ह बतईन कि राज्य ह मानसिक स्वास्थ्य ले जुड़े सेवा ल हरेक जगह तक पहुंचाय के अच्छा काम करे हे।
मौसम
प्रदेस म मानसून के सक्रियता बाढ़ गेहे। पाछु चौबीस म रायपुर सहित आने-आने जिला मन म पानी गिरे हे। मौसम विभाग के अनुसार राज्य म काली घलो अइसने स्थिति बने रइही। खास करके राज्य के मध्य अउ दक्षिणी हिस्सा म कुछु जगह म भारी बारिश अउ एक-दू ठिन जगह म अउ ज्यादा बारिस के संगेसंग आकाशीय बिजली गिरे के संभावना हे।
डायलिसिस सुविधा
राष्ट्रीय स्वास्थ्य मिशन अउ राष्ट्रीय निःशुल्क डायलिसिस के कारीकरम के तहत छत्तीसगढ़ के आठ ठिन जिला अस्पताल म ‘‘जीवनधारा‘‘ नाव ले निःशुल्क डायलिसिस के सुविधा दे जात हे। एमा दुरूग, कोरबा, कांकेर, बिलासपुर, महासमुंद अउ बीजापुर जिला म बछर दू हजार बीस ले ही ए सुविधा ल सुरू कर दे गेहे। त उहें, जशपुर अउ अंबिकापुर म घलो ए बछर ले ए सुविधा सुरू होगे हे।
लोकवाणी
मुख्यमंत्री भूपेश बघेल के मासिक रेडियोवार्ता ‘‘लोकवाणी‘‘ के उन्नीसवां कड़ी के प्रसारण ग्यारह जुलाई के करे जाही। मुख्यमंत्री लोकवाणी म ए घांव ‘‘विकास का नया दौर‘‘ बिसय उपर प्रदेसवासी मन ले गोठबात करही। लोकवाणी के प्रसारण छत्तीसगढ़ के आकाशवाणी के सब्बो केन्द्र एफ.एम. रेडियो और सब्बो क्षेत्रीय समाचार चैनल म बिहनिया दस बजके तीन मिनट ले ग्यारह बजे तक करे जाही।
अउ अब थोरकुन समाचार सार म-
– यात्री मनके सुविधा ल देखत हुए रेलवे ह पूरी-इंदौर स्पेशल ट्रेन के परिचालन तेरह जुलाई ले सुरू करे के फइसला लेहे। ए ट्रेन ह पुरी ले हर मंगलवार अउ इंदौर ले हर गुरूवार के चलही।
– सुकमा जिला म सक्रिय दू झिन माओवादी मन ह तेलंगाना के कोत्तागुड़म पुलिस अधीक्षक सुनील दत्त के समक्ष आत्मसमर्पण कर देहे।
अउ
– महासमुंद म यात्री किराया बढ़ाय सहित आने-आने मुद्दा ल लेके जिला बस मिनी ऑपरेटर्स संघ ह बस के रैली निकालीन अउ कलेक्टर के नाव डिप्टी कलेक्टर ल ज्ञापन सौंपीन।