कोरोना टीकाकरण/समाचार
राज्य म अब तक एक करोड़ ले जादा कोरोना के टीका लगाय गेहे। स्वास्थ्य विभाग ले मिले जानकारी के अनुसार अब तक प्रदेश म पहली अउ दूसरइया खुराक मिलाके लगभग एक करोड़ छप्पन हजार ले जादा टीका लगाय जा चुके हे।
ऐति, राजनांदगांव जिला के मानपुर ले दस किलोमीटर दूर जंगल म बसे गांव कोराचा म टीका उत्सव मनाय गीस। ए बेरा म आसपास के गांव ले दू सौ ले जादा लोगन मन टीका लगवाय बर पहुंचीन।
इही बीच, प्रदेस म कोरोना संक्रमण के दर एक दशमलव एक प्रतिशत होगे हे। राज्य म काली कोरोना संक्रमण के दू सौ चैरानवे नवा मामला सामने आय हे।
वन प्रदर्शन प्रक्षेत्र
गृहमंत्री ताम्रध्वज साहू ह आज जिला मुख्यालय बैकुंठपुर के तीर ग्राम पंचायत आनी म प्रदेस के पहला ‘‘वन प्रदर्शन प्रक्षेत्र‘‘ के सुभारंभ करीन। ए मउका म श्री साहू ह किहीन कि आने-आने विभाग के समन्वय ले बनाय जावत वन प्रदर्शन प्रक्षेत्र ‘‘आनी‘‘ के अलग पहिचान बनही। फलदार पौधा के बीच औषधि पौधा के खेती अउ नर्सरी के तैयारी अपन आप म एक अभिनव पहल हे।
बतादन कि ग्राम पंचायत आनी के छब्बीस एकड़ क्षेत्र म गौठान चारागाह के अतिरिक्त इक्कीस एकड़ क्षेत्रफल ल वन प्रदर्शन प्रक्षेत्र के रूप म विकसित करे जात हे।
उहें, गृहमंत्री ह जिला कलेक्ट्रेट परिसर म छह करोड़ सत्तर लाख रूपिया के लागत ले पचहत्तर विकास कार्य के लोकार्पण अउ भूमिपूजन करीन।
संसद-मानसून सत्र
संसद के मानसून सत्र उन्नीस जुलाई से सुरू होवत हे। ए सत्र तेरह अगस्त तक चलही। संसदीय कार्य मामला के मंत्रिमंडल समिति ह संसद के ए सत्र ल उन्नीस जुलाई ले तेरह अगस्त तक चलाय के सिफारिस करे रिहीन।
स्वास्थ्य विभाग-समीक्षा बैठक
मुख्यमंत्री भूपेश बघेल ह काली राजधानी स्थित अपन निवास कार्यालय म स्वास्थ्य विभाग के समीक्षा बैठक लीन। बइठका म मुख्यमंत्री ह कोरोना के तीसर लहर के रोकथाम बर राज्य म करे जात स्वास्थ्यगत तैयारी के समीक्षा करीन अउ किहीन कि एखर बर घलो फंड के कमी नइ होही। ए दउरान श्री बघेल ह ग्रामीण अंचल म लोगन मन ल सरल ढंग ले स्वास्थ्य सेवा मुहैया कराए के उद्देश्य ले हाट बाजार क्लीनिक योजना ल प्रभावी ढंग सुनिश्चित करे के निरदेस देहे। मुख्यमंत्री ह हाट बाजार क्लीनिक बर आवश्यकता अनुसार चिकित्सक अउ स्वास्थ्य कर्मी मनके भर्ती के संग एम्बुलेंस के इंतजाम करे के घलो निरदेस दीन।
मुख्यमंत्री ह बैठक म कांकेर, कोरबा अउ महासमुंद म मेडिकल कालेज के भवन निर्माण चिकित्सा उपकरण सहित चिकित्सक अउ स्वास्थ्य कर्मी के भती के घलो समीक्षा करीन। एखरे संग ओमन ह चंदूलाल चंद्राकर स्मृति चिकित्सा महाविद्यालय ल अधिग्रहण करे के प्रक्रिया ल पूरा करे के निरदेस अधिकारी मन ल दीन।
एसीबी-छापा
वरिष्ठ आईपीएस अधिकारी अउ एडीजी जी.पी. सिंह के घर समेत पन्द्रह ठिकाना म एंटी करप्शन ब्यूरो-एसीबी के छापामारी म अभी तक दस करोड़ रूपिया ले जादा के बेनामी संपत्ति के खुलासा होय हे। उहें, दू किलो सोना समेत सोलह लाख रूपिया नगद बमराद करे गेहे।
एसीबी के प्रमुख शेख आरिफ हुसैन ह एखर पुष्टि करे हे। छापा के कार्रवाई श्री सिंह के राजनांदगांव, ओड़िशा समेत पन्द्रह ठिकाना म करे गीस।
लोक अदालत
राष्ट्रीय विधिक सेवा प्राधिकरण डहार ले आगामी दस जुलाई के राष्ट्रीय लोक अदालत के आयोजन करे जाही। लोक अदालत के माध्यम ले न्यायालय म राजीनामा योग्य आपराधिक प्रकरण, मोटर दुर्घटना, दावा प्रकरण, बैंक रिकवरी, सिविल, विद्युत संबंधी अउ पारिवारिक विवाद के मामला के निराकरण करे जाथे।
बतादन कि कोरोना संक्रमण के कारण न्यायालय म लंबित प्रकरण म कमी लाय के उद्देश्य ले अउ प्रभावित पक्षकार मन ल जल्दी अउ सरल ढंग ले न्याय देवाय के दिसा म राष्ट्रीय लोक अदालत के बढ़िया पहल हरय।
मोहल्ला क्लास
राज्य के शहरी अउ ग्रामीण क्षेत्र म स्कूली लइका मनके पढा़ई खातिर मोहल्ला क्लास फेर सुरू होवत हे। स्कूली शिक्षा मंत्री डाॅक्टर प्रेमसाय सिंह टेकाम ह काली रायपुर जिला के ग्राम चंदखुरी अउ पचेड़ा म मोहल्ला क्लास के औचक निरीक्षण करीन अउ लइका मन ले पढ़ई-लिखई के बारे म चर्चा घलो करीन। ओमन पालक अउ जनप्रतिनिधि मन ले ए कक्षा अउ ओखर उपयोगिता के संग संचालन के संबंध म जानकारी लीन।
लइका मन स्कूल शिक्षा मंत्री ल पाठ पढ़के सुनाय के संग उंखर प्रश्न के उत्तर दीन। ए बेरा म ओमन लइका मन ल पाठ्य-पुस्तक घलोक बांटीन।
शराब मुक्ति-कार्यशाला
राजधानी रायपुर के माना स्थित राज्य संसाधन अउ पुनर्वास केन्द्र म छत्तीसगढ़ ल नशा मुक्त बनाय बर छत्तीसगढ़ शराब व्यसन मुक्ति अभियान प्रारूप म केन्द्रित कार्यसाला के आयोजन करे गीस। एखर तहत प्रत्येक जनपद पंचायत के दस ग्राम पंचायत म नशा मुक्ति के जोरदरहा प्रचार-प्रसार करे बर आठ से दस सदस्य वाले भारतमाता वाहिनी के गठन अउ योजना के क्रियान्वयन करे बर रणनीति म विचार-विमर्स करे गीस। कारीकरम म ग्राम पंचायत स्तर म नशा पान के दुष्प परिणाम ल रैली, नारा, दीवार लेखन, पोस्टर, हैंड बिल अउ नुक्कड़ नाटक के माध्यम ले लोगन मन ल पहुंचाय के कार्ययोजना म चर्चा करे गीस।
ए मउका समाज कल्याण मंत्री अनिला भेंडिया ह छत्तीसगढ़ वर्चुअल योग मैराथन म जन सामान्य के जादा पंजीयन करइया जिला ल प्रशस्ति पत्र अउ प्रतीक चिन्ह देके पुरस्कृत करीन।
पौधा तुहंर द्वार
राज्य म ‘‘पौधा तुंहर द्वार‘‘ कारीकरम के तहत वन विभाग डहार ले अब तक बारह लाख पौधा बांटे जा चुके हे। ए कारीकरम बीते पच्चीस जून ले चलाय जात हे। वन विभाग डहार ले ए बछर दू करोड़ सत्ताईस लाख पौधा बांटे के लक्ष्य राखे गेहे।
‘‘पौधा तुंहर द्वार‘‘ कारीकरम के तहत इकतीस जुलाई तक पौधा मंगाय जा सकत हे, जेमा आम, कटहल, जामुन, मुनगा, पीपल, नीम, बरगद, करंच, खम्हार, बैहरा, गुलमोहर अउ कचनार जइसे फलदार अउ छायादार पौधा निःशुल्क दे जावत हे।
माओवादी-गिरफ्तार
सुकमा जिला म सुरक्षा बल के टीम ह तीन माओवादी ल गिरफ्तार करे हे। मिले जानकारी के अनुसार कोबरा बटालियन के जवान तलासी अभियान म निकले रिहीन। ए दउरान मिनपा इलाका म ए माओवादी मन ल पकड़े गीस। गिरफ्तार माओवादी मन उपर कई घटना म सामिल होय के आरोप हे।
अब सुनव मौसम समाचार..
राज्य म अवइया चैबीस घंटा के दौरान एक-दू जगह म गरज-चमक के संग बरसा होय अउ गाज गिरे के संभावना हे।
मौसम विभाग ले मिले जानकारी के अनुसार एक द्रोणिका बिहार ले दक्षिण तटीय ओड़िशा अउ उत्तर-पूर्व झारखंड म स्थित हे। एखर असर ले प्रदेस म बदली-बारिस के स्थिति बनत हे।