केंद्र कोविड दल
केंद्र सरकार ह छत्तीसगढ़ संग छै राज्य मन म कोविड के बाढ़त मामला ल देखत विशेषज्ञ दल भेजे हे। केंद्रीय स्वास्थ्य मंत्रालय ह बताइन कि ये दल महामारी ले सही ढंग ले निपटे बर राज्य मन ल कोविड राहत अउ प्रबंधन म सहयोग दीही। ये दल स्थिति के जायजा लेके अउ लोक स्वास्थ्य कार्यक्रम बर राज्य सरकार ल सुझाव दीही। दू सदस्य वाले ये उच्च स्तरीय दल म एक-एक चिकित्सक अउ एक झिन स्वास्थ्य विशेषज्ञ शामिल हे।
टीम मन तुरते राज्य के दौरा करही अउ कोरोना प्रबंधन के सबो काम के निगरानी करही। ए दल विशेष रूप ले परीक्षण निगरानी अउ नियंत्रण काम के संग अस्पताल के बिस्तर मनके उपलब्धता, एंबुलेंस, वेंटिलेटर अउ मेडिकल आॅक्सीजन संग स्थिति के निगरानी करे के संगेसंग सुझाव घलो दीही।
खबर के मुताबिक केंद्र सरकार ‘‘संपूर्ण सरकार अउ संपूर्ण समाज‘‘ दृष्टिकोण के संग महामारी के खिलाफ लड़त हे। मंत्रालय ह बताइन कि कोरोना प्रबंधन बर आने आने राज्य अउ केंद्र शासित प्रदेश मनके सरकार के प्रयास म सहयोग बर केंद्र सरकार बेरा-बेरा म आने आने राज्य अउ केंद्र शासित प्रदेश मन म केंद्रीय टीम भेजत रीहिस हे। ये दल राज्य अउ केंद्र शासित प्रदेश मनके अधिकारी मनके संग बात करके उंखर आगू अवइया चुनौती अउ मुद्दा उपर विचार करथे।
एति प्रदेश म काली कोरोना संक्रमण के चार सौ दस नवा मामला आगू आय हे। राज्य म अब तक नौ लाख चैरानबे हजार आठ सौ ले जादा कोरोना संक्रमित मरीज मिल चुके हे। एमा ले नौ लाख पचहत्तर हजार छै सौ ले जादा मरीज ठीक हो चुके हे। वर्तमान म पांच हजार सात सौ ले जादा मरीज मनके इलाज आने आने अस्पताल अउ होम आइसोलेशन म चलत हे।
प्रधानमंत्री डॅाक्टर संवाद
प्रधानमंत्री नरेंद्र मोदी ह कीहिन कि केंद्र सरकार ह देश म मजबूत चिकित्सा बुनियादी ढंाचा तियार करे के प्रयास करत हे। ओमन कीहिन कि ए बछर के बजट म आधुनिक चिकित्सा ढंाचागत सुविधा बर दू लाख करोड़ रूपिया ले जादा बांटे गेहे। श्री मोदी ह काली चिकित्सक दिवस म डॅाक्टर मन ल संबोधित करत कीहिन कि देश म बुनियादी चिकित्सा सुविधा मजबूत करे बर पचास हजार करोड़ रूपिया के के्रडिट गारंटी योजना शुरू करे गेहे।
कोविड महामारी ले निपटे बर डॅाक्टर अउ चिकित्सा समुदाय के भूमिका के बड़ई करत श्री मोदी ह कीहिन कि डॅाक्टर, स्वास्थ्य देखभाल कर्मी मन अउ अग्रिम पंक्ति के कार्यकर्ता मन ह महामारी के दउरान कतकोन लोगन के जान बचाय हे। प्रधानमंत्री ह कीहिन कि सरकार डॅाक्टर मनके सुरक्षा बर प्रतिबद्ध हे।
सीएम किसान अपील
मुख्यमंत्री भूपेश बघेल ह प्रदेश के किसान मनले अपन खेत मन म जादा ले जादा वर्मी अउ सुपर कम्पोस्ट के उपयोग करे के अपील करे हे। मुख्यमंत्री ह किसान मनके नाव ले जारी अपन संदेश म कीहिन कि रासायनिक खाद के प्रयोग ले एक कोति जिहंा कृषि के लागत बाढ़त हे, उंहंे दूसर कोति जमीन के उर्वरा शक्ति घलो कम होवत हे। संगेसंग फसल म विशैला तत्व के मात्रा घलो बाढ़त हे।
ओमन कीहिन कि एखर असर लोगन के स्वास्थ्य अउ पर्यावरण उपर पड़त हे। श्री बघेल ह कीहिन कि राज्य सरकार जैविक खेती ल बढ़ावा देवत हे। जेखर ले जमीन के उर्वरा शक्ति बने रीही अउ फसल के उत्पादन क्षमता घलो बाढ़ही। एखर संग पर्यावरण संतुलन बने रीही अउ कृषि लागत म घलो कमी आही। मुख्यमंत्री ह कीहिन कि जैविक खाद के प्रयोग ले फसल के अच्छा कीमत मिलही जेखर ले किसान के आर्थिक स्थिति अउ मजबूत होही।
सहकारी बैंक मोबाईल एप
दुर्ग जिला के सहकारी बैंक मन म मोबाईल एप के माध्यम ले बैंकिंग के सुविधा शुरू होगे हे। मुख्यमंत्री भूपेश बघेल ह आज पाटन बलाॅक के झीट म बैंक के नवा शाखा के उद्घाटन के मउका म ए एप के शुभारंभ करीन। ए अवसर म मुख्यमंत्री ह कीहिन कि झीट म नवा शाखा शुरू होय ले तीर तखार के उन्नीस गांव वाले मन ल एखर लाभ मिलही। संगेसंग मोबाईल बैंकिंग के माध्यम ले ग्रामीण मन ह घर बइठे बैंकिंग सुविधा के लाभ ले सकही।
जज तबादला
छत्तीसगढ़ उच्च न्यायालय ह तिरासी जज मनके तबादला आदेश जारी करे हे। हाईकोर्ट के रजिस्ट्रार जनरल डहार ले जारी आदेश के अनुसार सिविल जज वर्ग-एक सह मुख्य न्यायिक मजिस्ट्रेट के छै, वर्ग-दो के चैसठ अउ सिविल जर्ज वर्ग-एक के तेरा जज के तबादला करे गेहे। उंहें दक्षिण बस्तर के प्रथम अपर जिला सत्र न्यायाधीश विनोद कुमार देवंागन ल बस्तर दंतेवाड़ा के कार्यवाहक जिला अउ सत्र न्यायाधीश नियुक्त करे गेहे।
पेयजल सीएम
मुख्यमंत्री भूपेश बघेल ह कीहिन कि राज्य के इंडस्ट्रीयल अउ माइनिंग इलाका म साफ पीये के पानी बर सरफेस वाॅटर सप्लाई जरूरी हे। एखर बर ओमन ह अधिकारी मन ल योजना बनाये के निर्देश दीन।
श्री बघेल ह अपन निवास कार्यालय म लोक स्वास्थ्य यांत्रिकी विभाग के समीक्षा बइठका के दौरान कीहिन कि ए इलाका म लगातार भू-जल के दोहन ले स्थिति बिगड़त हे। उंहें माइनिंग एरिया म विस्फोट के सेती भू-जल म धातु के मात्रा बाढ़ जाथे। जेला पीये ले कतकोन प्रकार के गंभीर बीमारी होवत हे। मुख्यमंत्री ह अधिकारी मन ल एखर जांच करे के निर्देश दीन हे।
ओमन ह राज्य म क्रिटीकल ब्लाॅक के रूप म चुने गे बालोद जिला के गुरूर अउ रायपुर जिला के धरसींवा ब्लाॅक संग सेमी क्रिटीकल ब्लाॅक के रूप म चुने क्षेत्र मन म पेयजल के पूर्ति बर सरफेस वाॅटर सप्लाय योजना तियार करे के निर्देश दीन।
मुख्यमंत्री ह खारून नदी म पर्याप्त जल रहय ओखर बर बालोद, धमतरी, दुर्ग, पाटन अउ अभनपुर इलाका के नाला मनके मरम्मत अउ एमा पानी रोके बर निर्माण कराय जाय के निर्देश घलो दीन।
उंहें श्री बघेल ह जल संसाधन विभाग के समीक्षा बइठक म अधिकारी मन ल बस्तर, चित्रकोट अउ नारायणपुर क्षेत्र म सिंचाई बर इंद्रावती नदी उपर लिफ्ट एरिगेशन के योजना तियार करे के निर्देश दीन।
फसल बीमा सप्ताह
रायपुर जिला म आजादी के अमृत महोत्सव के तहत फसल बीमा सप्ताह के आयोजन करे जात हे। एखर तहत कलेक्टर सौरभ कुमार अउ जिला पंचायत के मुख्य कार्यपालन अधिकारी मयंक चतुर्वेदी ह आज प्रधानमंत्री फसल बीमा योजना के प्रचार-प्रसार बर रथ ल हरी झंडी दिखाके रवाना करीन। ए रथ जिला के छप्पन ग्राम पंचायत मन म सात जुलाई तक घुमही।
आज पहिली दिन अभनपुर विकासखंड के सोला ग्राम पंचायत म ये रथ ले फसल बीमा के प्रचार-प्रसार करे गीस।
महिला आयोग सुनवाई
राज्य महिला आयोग म प्रकरण के सुनवाई फेर शुरू होगे हे। आयोग के अध्यक्ष डॅाक्टर किरणमयी नायक ह ए महीना रायपुर अउ बस्तर संभाग म महिला मनके उत्पीड़न ले संबंधित प्रकरण के सुनवाई करही। जुलाई के पहला सप्ताह म रायपुर संभाग के अउ दूसर सप्ताह म जगदलपुर संग कंाकेर जिला के मामला के सुनवाई होही।
रायपुर के शास्त्रीय चैक स्थित राज्य महिला आयोग कार्यालय म बीहनिया ग्यारा बजे ले संझा पांच बजे तक मामला के जन सुनवाई करे जाही। ए दउरान कोरोना महामारी ले बचाव बर जारी दिशा निर्देश के पालन करे जाही।
मनरेगा भुगतान
मनरेगा आयुक्त मोहम्मद कैसर अब्दुलहक ह मजदूरी भुगतान म आवत समस्या ल बेरा-बेरा म दूरिहा करे के निर्देश देहे। ओमन ह ए संबंध म सबो जिला पंचायत मनके मुख्य कार्यपालन अधिकारी मन ल पत्र जारी करे हे। पत्र के संग ट्रंाजेक्शन के दौरान अवइया समस्या केे समाधान बर कार्यवाही संबंधी मार्गदर्शिका घलो भेजे हे।
थलसेना लिखित परीक्षा
भारतीय थलसेना म भर्ती बर लिखित परीक्षा अवइया पच्चीस जुलाई के नवा रायपुर के कलिंगा विश्वविद्यालय म ले जाही। परीक्षा के तियारी बर पात्र आवेदक मन ल पंद्रह दिन के निशुल्क कोचिंग देके व्यवस्था करे गेहे। एखर बर आवेदक अवइया दस जुलाई तक रायपुर जिला के रोजगार कार्यालय म संपर्क कर सकत हे।