वित्तमंत्री राहत पैकेज
कोविड महामारी ले जादा प्रभावित अर्थव्यवस्था ल पटरी म लाये बर केंद्र सरकार ह कतकोन राहत उपाय के घोषणा करे हे। केंद्रीय वित्त मंत्री सीतारमन ह आज आठ ठिन राहत उपाय के घोषणा करीन। जेमा ले चार पूरा तरह ले नवा हे, जबकि एक ठन स्वास्थ्य अउ संरचना क्षेत्र ले जुड़े हे।
आज नई दिल्ली म मीडिया ल संबोधित करत वित्तमंत्री ह कोविड प्रभावित क्षेत्र मन बर एक लाख करोड़ रूपिया ले जादा के ऋण गारंटी योजना के एलान करीन। एक ठन आने उपाय के तहत वित्तमंत्री ह पच्चीस लाख छोटे कारोबारेी मन बर ऋण गारंटी योजना शुरू करे के घोषणा करीन।
कोरोना टीकाकरण – 01
भारत ह कोविड टीका लगाये के मामला म एक अउ बड़का उपलब्धि हासिल कर लेहे। अउ कुल टीका के मामला म अमेरिका ले आगू निकल गेहे। प्रधामंत्री नरेंद्र मोदी ह कोविड टीकाकरण अभियान म भारत के ए बड़का उपलब्धि उपर खुशी जताय हे। भारत ह अब तक बत्तीस करोड़ छत्तीस लाख ले जादा कोविड टीका लगाय हे। भारत ह अमेरिका के तुलना म तैंतीस लाख ले जादा टीका लगाय हे।
श्री मोदी ह अपनी ट्वीट संदेश म कीहिन कि भारत के टीकाकरण अभियान तेजी ले चलत हे। सबो लोगन बर निशुल्क वैक्सिन देके अपन संकल्प ल बोलत प्रधानमंत्री ह ओ जम्मों लोगन ल बधाई दीन, जेन ह टीकाकरण अभियान ल बढ़ाय बर प्रयास करत हे।
उंहें केंद्रीय मंत्री प्रकाश जावड़ेकर ह प्रधानमंत्री ल टीकाकरण अभियान के क्षेत्र म महत्वपूर्ण उपलब्धि उपर बधाई दीन हे। श्री जावड़ेकर ह अपन ट्वीट संदेश म कीहिन कि भारत एकजुट होके तुरते ही महामारी ल हराय म सफल होही।
कोरोना टीकाकरण-02
वैश्विक महामारी कोरोना ले बचाव खातिर प्रदेश म चलत टीकाकरण अभियान ह अब जोर पकड़ लेहे। टीकाकरण ल लेके लोगन म जागरूकता अउ उछाह बाढ़े हे। जेखर सेती वैक्सिनेशन सेंटर म टीका लगवइया मनके भीड़ देखे जात हे।
प्रदेश म काली एक लाख नवासी हजार ले जादा लोगन ल कोरोना के टीका लगाये गीस। एखर बर राज्य म चार हजार ले जादा केंद्र बनाय गे रीहिस। प्रदेश म काली तक कुल नब्बे लाख चैवन हजार ले जादा लोगन ल कोरोना टीका लगाये जा चुके हे। अठारा ले चैंवालिस बछर आयु समूह के बाईस लाख छप्पन हजार चार सौ पच्यासी लोगन ल पहिली डोज अउ तिरसठ हजार नौ सौ चैंतीस लोगन ल दूसरा डोज लगाये गेहे। उंहें पैंतालिस बछर ले जादा उमर के सैंतालिस लाख दू हजार ले जादा लोगन ल पहिली डोज अउ नौ लाख अंठावन हजार ले जादा लोगन ल दूसर डोज दे गेहे।
एति राजनांदगंाव जिला म लोगन के उछाह ल देखत वैक्सीनेशन केंद्र म टीका लगाये के निर्धारित बेरा के बाद घलो लोगन ल टीका लगाये जात हे। जिला म अब तक करीबन चार लाख नब्बे हजार लोगन ल कोरोना के टीका लग चुके हे। काली सत्ताईस जून के बाईस हजार ले जादा लोगन ल कोरोना ले बचाव के टीका लगवाये गीस। टीकाकरण अभियान ल जन अभियान बनाये बर प्रशासनिक टीम ह ग्रामीण क्षेत्र के साप्ताहिक बाजार घलो पहुंचत हे, जिहंा लोगन ल टीका लगाये बर जागरूक करे जात हे।
ओति जांजगीर चंापा जिला के कलेक्टर जितेंद्र कुमार शुक्ला ह सबो पात्र हितग्राही ल तुरते कोरोना टीका लगवाये के अपील करे हे। उंहें जिला प्रशासन डहार ले स्थानीय स्तर म कोरोना टीका लगाये बर लोगन ल जागरूक करे जात हे।
कोरोना समाचार
राजधानी रायपुर म सिनेमाघर, थियेटर, स्वीमिंग पूल, जंगल सफारी, पुरखौती मुक्तागंन, तेलीबांधा अउ बूढ़ातालाब खोले के आदेश जारी कर दे गेहे। रायपुर कलेक्टर सौरव कुमार ह पूर्व म जारी आदेश म आंशिक संशोधन करत आज नवा आदेश जारी करे हे। जेखर अनुसार जिला म स्थित सिनेमा हाॅल, मल्टीप्लैक्स, थियेटर, पार्क, थीम पार्क, वाटर पार्क, स्टेडियम, स्पोर्ट्स, काम्पलेक्स, स्वीमिंग पूल ल आने-आने शर्त के अधीन खोले बर पहिली ले चलत बेरा के अनुसार रात आठ बजे तक चलाये जाय के अनुमति दे गेहे।
जारी आदेश के अनुसार स्कूल अउ काॅलेज छात्रा मन बर बंद रीही। उंहें छात्रावास म सिरिफ परीक्षा देवइया विद्यार्थी मन ल रेहे के अनुमति दे गेहे। एखर अलावा सरकार ले अनुमति प्राप्त सबो परीक्षा अउ आॅनलाईन शिक्षा ल छोड़के सार्वजनिक रूप ले संचालित कोचिंग कक्षा अउ आने सबो शैक्षणिक कार्यक्रम बंद रीही।
अइसने सबो तरह के सभा, रैली, जुलूस, धरना प्रदर्शन के अलावा सामाजिक, राजनीतिक, खेल, सांस्कृतिक अउ धार्मिक आयोजन ह प्रतिबंधित रीही। संगेसंग रतिहा आठ बजे ले बीहनिया छै बजे तक लाॅकडाउन लागू रीही। आदेश के अनुसार होटल, रेस्टाॅरेंट, बाॅर, रतिहा दस बजे तक खुले रीही। एखर अलावा वैवाहिक कार्यक्रम म अधिकतम पचास लोगन अउ अंत्येष्टी दशगात्र अउ मृत्यु संबंधित कार्यक्रम म कुल बीस लोगन मन शामिल हो सकही।
इही बीच प्रदेश म कोरोना संक्रमण के स्थ्तिि म सरलग सुधार देखे जात हे। राज्य म कोरोना संक्रमण के दर घटके शून्य दशमलव नौ प्रतिशत पहुंच गेहे। काली प्रदेश म कोरोना के दू सौ चंवालिस नवा मामला सामने आय हे। प्रदेश म अभी कोरोना के सक्रिय मामला छै हजार पांच सौ छियानबे हे।
मुख्यमंत्री घोषणा
मुख्यमंत्री भूपेश बघेल ह चारागाह निर्माण, हाट बाजार क्लिनिक बर वाहन, गौठान मन म मल्टी एक्टिविटी सेंटर बर शेड निर्माण अउ देवगुड़ी निर्माण के काम बर डीएमएफ मद ले करे जाय के घोषणा करीन।
श्री बघेल ह आज अपन निवास कार्यालय म आयोजित खनिज विकास विभाग के समीक्षा बैठक म कीहिन कि हाल ही म प्रदेश के आने-आने जिला म करे गे कतकोन घोषणा उपर अमल बर डीएमएफ के राशि के उपयोग करे जा सकही।
मोहल्ला कक्षा
प्रदेश के स्कूल शिक्षा मंत्री डॅाक्टर पे्रमसाय सिंह टेकाम ह मोहल्ला कक्षा लेवइया हर जिला के छत्तीस-छत्तीस शिक्षक मन ल पुरस्कृत करे के घोषणा करे हे। ओमन ह पढ़ई तुंहर द्वार कार्यक्रम के दूसर साल के शुरूआत के पहिली समग्र शिक्षक डहार ले आयोजित वर्चुअल कार्यक्रम ल संबोधित करत कीहिन कि वेबिनार म नवाचारी शिक्षक मनके माध्यम ले लईका मनके पढ़ई के समस्या के हल खोजे के प्रयास करे गेहे।
ओमन कीहिन कि लाॅकडाउन के ए दूसरा सत्र हरय अउ अभी अनुमान नइ लगाय जा सकय कि स्कूल कब खोले जाही। डॅाक्टर टेकाम ह कीहिन हे कि वर्तमान परिस्थिति ल देखत अउ अच्छा काम करना होही। संगेसंग काम के तरीका म बदलाव लाना पड़ही। स्कूल शिक्षा मंत्री ह कीहिन कि शिक्षक मनके नवाचार ल अब लईका के सुधार के दिशा म परयोग करे के जरूरत हे। ओमन कीहिन कि नवाचारी शिक्षक के पहल देखे ले ए साल के शुरूआत म ही लइका मन म आवत बदलाव उपर सरलग नजर राखे जाही।
ओमन ह शिक्षक मनले लइका के पढ़ई ल रूचिकर बनाये खातिर आने-आने विकल्प ल देखे बर अउ ओमा ले अपन परिस्थिति के अनुरूप विकल्प के उपयोग करके आगू आय के आग्रह करीन। ए वेबिनार म बैंसठ हजार ले जादा शिक्षक मन ह भाग लीन। उंहें स्कूल शिक्षा मंत्री ह बाईस नवाचारी शिक्षक के अनुभव घलो सुनीन।
अउ अब थोरकुन समाचार सार म-
– दंतेवाड़ा जिला म चलाये जात लोन वर्राटू अभियान ले प्रभावित होके एक ठिन इनामी सहित तीन माओवादी मन ह पुलिस के सामने आत्मसमर्पण करीन।
अउ
– सूरजपुर पुलिस ह अपहरण के मामला म कार्रवाई करत मध्यप्रदेश, बिलासपुर, सरगुजा संग आने जिला मन ले पांच नाबालिक बालिका मन ल बरामद करे हे। संगेसंग ये मामला म सात झिन आरोपी ल गिरप्तार करे गेहे।