मुख्यमंत्री-स्वास्थ्य
प्रदेश के गांव मन म घलो अब प्राईवेट अस्पताल खोले जाही। एखर बर प्राईवेट जघा ल राज्य सरकार डहार ले अनुदान दे जाही। मुख्यमंत्री भूपेश बघेल ह गांव-गतौरी मन म स्वास्थ्य सुविधा ल अउ मजबूती दे बर प्राईवेट जघा ले मदद ले बर केहे हे। मुख्यमंत्री ह किहीन कि ग्रामीण इलाका मन म बिसेसज्ञ डाॅक्टर मनके सेवा मिल सकय, एखर बर जम्मों सरकारी अस्पताल मन म स्वास्थ्य सेवा के विस्तार करे जाही। मुख्यमंत्री ह उद्योग विभाग ल अवइया दस दिन के भीतर एखर कार्ययोजना तियार करे बर केहे हे।
इही बीच, मुख्यमंत्री ह काली बड़का अधिकारी मनके बइठका लेके फ्लेगशिप योजना के कामकाज के समीक्षा करीन। मुख्य सचिव ह बतईन कि प्रदेस म स्वामी आत्मानंद इंग्लिश मीडियम स्कूल के माध्यम ले जइसे पढ़ई-लिखई के विकास करे गेहे। अइसने, स्वास्थ्य बर घलो जिलावार योजना तियार करे के बात केहे हे।
कोरोना टीकाकरण
प्रदेस म कोरोना संक्रमण ल रोके बर सरकार डहार ले तय करे गे जम्मों उमर के लोगन मन म टीका लगाय के काम जोरदरहा चलत हे। पाछु पांच दिन म सात लाख सत्तर हजार आठ सौ चार लोगन मन ल टीका लगाय जा चुके हे। काली पच्चीस जून के दू लाख एक हजार सात सौ तिहत्तर लोगन मन ल टीका लगाय गीस। पहिली अउ दूसर डोज ल मिलाके प्रदेस म अब तक चैरासी लाख अठहत्तर हजार ले जादा टीका लगाय जा चुके हे। छत्तीसगढ़ ह ए मामला म देस के कई ठिन बड़का राज्य मन ले आगू हे।
ऐति, प्रदेस म लोगन मन ह टीका लगवावय, एखर बर कतकोन कदम उठाय जात हे। बलरामपुर जिला म राष्ट्रीय ग्रामीण आजीविका मिशन-बिहान के माईलोगिन मन ह लोगन मन ल कोरोना ले बाचे अउ टीकाकरण बर जागरूक करत हे। ए माईलोगिन मन ह घर के दीवार अउ प्रमुख भवन मन म कोरोना ले जुड़े जानबा लिखत हे।
कोरोना समाचार
प्रदेस म कोरोना संक्रमण म सरलग सुधार होवत हे। राज्य म कोरोना संक्रमण के दर एक दशमलव एक प्रतिसत पहुंच गेहे। मार्च के आखिरी हफ्ता म प्रदेस के पाॅजिटिविटी दर आठ दसमलव पांच प्रतिसत रिहीस। प्रदेस म कोरोना संक्रमण के सुरूवात ले लेके अब तक नौ लाख बहत्तर हजार ले जादा लोगन मन संक्रमण ले ठीक हो चुके हे।
ऐति, बिलासपुर जिला प्रसासन ह कोरोना संक्रमण के स्थिति म सुधार ल देखत लाॅकडाउन के नियम म छूट देहे। जिला कलेक्टर ह आदेस जारी करके दुकान मनके खोले के बेरा ल बढ़ा देहे। अब जम्मों परकार के दुकान मन रतिहा आठ बजे तक खुलही। इतवार के घलो लाॅकडाउन नइ राहय। उहें, धमतरी जिला म जम्मों हाट बाजार मन ल खोले के मंजूरी दे देहे।
कोविड-दवाई आपूर्ति
छत्तीसगढ़ मेडिकल सर्विसेस कापोर्रेशन लिमिटेड-सी.जी.एम.एस.सी. ह पाछु बछर पांच सौ छियासी करोड़ रूपिया के आठ सौ तैंतीस प्रकार के दवई अउ आने जरूरी जिनीस ल बिसा के प्रदेस के आने-आने स्वास्थ्य संस्थान मन म दे हवय। निगम के मुताबिक कोरोना संक्रमण ल रोके बर अउ इलाज म उपयोग होवइया दवई, किट अउ आने-आने जिनीस के करीबन चार सौ संतानवे करोड़ रूपिया के दवई ल बिसा के स्वास्थ्य संस्थान म दे गीस।
राजनांदगांव-मलेरिया
राजनांदगांव जिला म मलेरिया, डेंगू अउ डायरिया के बचाव बर स्वास्थ्य विभाग ह तियारी सुरू कर देहे। एखर बर आंगनबाड़ी कार्यकर्ता अउ मितानिन मन ल परसिक्षण दे जाही। मलेरिया ले बचाव बर जउन जघा म ए बीमारी हो सकथे, उहां बिसेस अभियान चलाय के संगेसंग जन-जागरूकता रैली, नाटक, बैनर-पोस्टर अउ नारा लिखे के निरदेस दे गेहे।
अंतर्राष्ट्रीय नशा निरोधक दिवस
आज अंतर्राष्ट्रीय नशा निरोधक दिवस हरय। ए मउका म आज अइसन लोगन मनके प्रसंसा करे जात हे, जउन मन ह समाज ले ए समस्या ल खतम करे बर सरलग परयास करत हे।
प्रधानमंत्री नरेन्द्र मोदी ह ट्वीट करके किहीन कि लोगन मनके जान बचाय बर करे गे अइसन परयास ह बड़का मायने राखथे। प्रधानमंत्री ह जम्मों लोगन मन ले नसीला पदार्थ ले जुड़े जानबा ल साझा करे के संगेसंग ‘‘नशा मुक्त भारत‘‘ बनाय के आह्वान करीन।
मन की बात
प्रधानमंत्री नरेन्द्र मोदी ह काली बिहनिया ग्यारह बजे आकाशवाणी ले ‘‘मन की बात‘‘ कारीकरम म अपन विचार राखही। आकाशवाणी अउ दूरदर्शन के जम्मों नेटवर्क ह एखर प्रसारण करही। ए प्रसारण ल आकाशवाणी समाचार के वेबसाइट अउ मोबाइल ऐप म घलो सुने जा सकथे। आकाशवाणी, दूरदर्शन समाचार, प्रधानमंत्री कार्यालय अउ सूचना प्रसारण मंत्रालय के यू-ट्यूब मन म घलो एखर प्रसारण होही। हिन्दी म प्रसारण के तुरते बाद ‘‘मन की बात‘‘ कारीकरम के क्षेत्रीय भासा म घलो प्रसारण होही। क्षेत्रीय भासा मन म रतिहा आठ बजे एक घांव फेर ए कारीकरम ल सुने जा सकही।
पैन/आधार-समय सीमा
केन्द्र सरकार ह पैन नंबर ल आधार के संग जोड़े के बेरा ल तीस सितंबर तक बढ़ा देहे। वित्त मंत्रालय ह हरेक मनखे बर अपन इनकम के जानकारी अउ पैन आवंटन ले जुड़े अरजी म आधार संख्या ल लिखना जरूरी कर देहे।
उहें, केन्द्रीय वित्त राज्यमंत्री अनुराग ठाकुर ह बिना ब्याज के ’’विवाद से विश्वास’’ भुगतान करे के बेरा ल घलो इकतीस अगस्त तक कर देहे। ओमन घोसना करीन कि कोरोना के इलाज म होय खरचा उपर अउ कोरोना ले होय मउत के एवज म मिले अनुग्रह रासि उपर कोनों परकार के कर नइ ले जाय।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव ह काली रतिहा साढ़े सात बजे आकाशवाणी रईपुर ले प्रसारित बिसेस कारीकरम ‘‘हमर ग्राम सभा‘‘ म कोरोना संक्रमण ले बचाव के संगेसंग राज्य सासन के नीति, योजना अउ कारीकरम मनके जानबा दीही। ए कारीकरम ल मीडियम वेव नौ सौ इक्यासी किलोहर्ट्ज म सुने जा सकथे। ए कारीकरम ल प्रदेस स्थित आकाशवाणी के जम्मों केन्द्र मन ह रिले करही।
पौधा तुंहर द्वार
‘‘पौधा तुंहर द्वार‘‘ योजना के तहत अब एके ठिन मोबाइल नंबर ल लगाय म मुफत म घर बइठे पौधा दे जाही। एखर बर वन विभाग डहार ले बिसेस पहल करत वाट्एऐप नंबर – सात पांच आठ सात शून्य – एक एक छह एक चार जारी करे हे। ए नंबर म कोनों भी मनखे मन मैसेज भेज के अपन घर मुफत म पौधा मंगवा सकथे। ए योजना म रईपुर वनमंडल डहार ले इकतीस जुलाई तक मुफत म पौधा दे जाही।
उहें, कोंडागांव जिला म स्थित आई.टी.बी.पी. कैम्प म पौध रोपण अभियान के तहत वन महोत्सव के आयोजन करे गीस।
धमतरी-रेललाइन निर्माण
धमतरी ले कल्ले तक बर बड़का रेललाइन बनाय के तियारी सुरू होगे हे। रेलवे अधिकारी के टीम ह धमतरी रेलवे स्टेसन जाके जघा के निरीक्षण करीन। रईपुर-धमतरी के बीच छोटे रेललाइन बंद होय के बाद अब धमतरी ले कल्ले तक करीबन पचपन किलोमीटर के बड़का रेललाइन बर पटरी बिछाय के काम सुरू होही।
ऐति, दक्षिण-पूर्व-मध्य रेलवे रईपुर रेलमंडल के यात्री मन बर लखनऊ-रईपुर-लखनऊ स्पेशल रेलागड़ी के सुविधा दे जात हे।
माओवादी-समाचार
नारायणपुर जिला म तीन झिन माओवादी मन ह पुलिस के आगू आत्मसमर्पण करे हे। ए माओवादी मन ह राज्य सरकार के पुनर्वास नीति ले प्रभावित होके पुलिस अधीक्षक मोहित गर्ग के आगू आत्मसमर्पण करीन।
उहें, तेलंगाना के कोत्ताकुड़म पुलिस अधीक्षक के आगू एक झिन माओवादी दंपत्ति ह घलो आत्मसमर्पण करे हे।
ऐति, माओवादी कमांडर हरिभूषण के बाद उंखर गोसईन के घलो मउत होय के खबर हे।
अउ अब थोरकुन समाचार सार म-
– तीन ठिन केन्द्रीय कृषि कानून ल रद्द करे के मांग ल लेके आज किसान संगठन मन ह रईपुर म प्रदर्सन करीन।
– शिक्षा के अधिकार अधिनियम के तहत प्रदेस म एसो छह हजार छह सौ बाईस प्राईवेट स्कूल मन म तिरासी हजार ले जादा सीट म लइका मन ल प्रवेस दे जाही।
– नगरीय प्रसासन मंत्री डाॅक्टर शिवकुमार डहरिया ह आज अपन निवास कार्यालय ले प्लास्टिक मुक्त अभियान के सुरूवात करीन।
– कोरबा जिला म रद्दा बनाय के काम म लगे दू झिन लोगन मनके टरक के चपेट म आय ले मउत होगे।
– धमतरी जिला म रेती के अवैध परिवहन के मामला म खनिज विभाग ह अड़तालीस ठिन गाड़ी वाले मनके खिलाफ कार्रवाई करे हे।
अउ
– कोंडागांव जिला म पुलिस ह टोनही प्रताड़ना के मामला म तीन झिन आरोपी मन ल गिरफ्तार करे हे।