प्रधानमंत्री गरीब कल्याण योजना
केन्द्रीय मंत्रिमंडल ह प्रधानमंत्री गरीब कल्याण योजना के चैथा चरण म पांच अउ महीना बर उपरहा अनाज के आवंटन ल मंजूरी दे दे हवय। राष्ट्रीय खाद्य सुरक्षा अधिनियम म ए बछर जुलाई ले नवंबर के बीच प्रत्यक्ष लाभ अंतरण म अवइया लाभार्थी मन ल हरेक व्यक्ति ल हर महीना पांच किलो अनाज मुफत म दे जाही। ए फइसला ले इक्यासी करोड़ पैंतीस लाख लोगन ल उपरहा अनाज मिलही। केन्द्र सरकार ह ए योजना बर पूरा खर्चा उठाही अउ राज्य अउ केन्द्रसासित प्रदेस मन ल एमा कोनों मदद नइ करना पड़ही। गेहूं या चावल लेना हे त फइसला खाद्य अउ सार्वजनिक वितरण विभाग ह करही।
मुख्यमंत्री-निर्देश
प्रदेस म होवत सरलग बरसा ले देखत मुख्यमंत्री भूपेश बघेल ह सबो जिला कलेक्टर मन ल संभावित बाढ़ प्रभावित इलाका म राहत अउ बचाव के उपाय के बेवस्था करे के निरदेस दीन हे। ओमन किहीन कि बाढ़ के स्थिति म कोनों भी प्रकार के परेसानी ले निपटे बर पूरा तैयारी होना चाही। संगेसंग संभावित बाढ़ प्रभावित इलाका मन म आपदा प्रबंधन दल ल घलो तैयार राखे जाय। नदी, नाला के जलस्तर म निगरानी राखत एखर जानकारी कंट्रोल रूम म दे जाना चाही। श्री बघेल ह कलेक्टर मन ल बाढ़ म प्रभावित क्षेत्र म स्कूल अउ नजदीक के भवन म अस्थाई राहत सिविर बनाय के निरदेस दीन हे।
वर्चुअल योग मैराथन-वल्र्ड रिकार्ड
अंतर्राष्ट्रीय योग दिवस के मउका म राखे गे वर्चुअल योग मैराथन म सबले जादा पंजीयन बर छत्तीसगढ़ ल गोल्डन बुक आॅफ रिकार्ड म सामिल करे गेहे। ए उपलब्धि बर गोल्डन बुक आॅफ वल्र्ड रिकार्ड ह ‘‘मोस्ट पीपल रजिस्टर्ड फाॅर ए वर्चुअल योगा मैराथन‘‘ बर छत्तीसगढ़ सरकार के समाज कल्याण विभाग ल सर्टिफिकेट आॅफ एक्सीलेंस ले नवाजे हे। महिला अउ बाल विकास मंत्री अनिला भेंडिया ह काली मुख्यमंत्री भूपेश बघेल ले भेंट करके ओमन ल प्रमाण पत्र दीन।
ए मउका म मुख्यमंत्री ह छत्तीसगढ़ के जनता ल योग बर जागरूक रेहे बर बधाई दीन हे। खबर के मुताबिक मैराथन म भाग ले बर इकचालीस हजार ले जादा लोगन मन आॅनलाइन पंजीयन कराय रिहीन।
श्यामाप्रसाद मुखर्जी-पुण्यतिथि
भारतीय जनसंघ के संस्थापक अउ शिक्षाविद् डाॅक्टर श्यामाप्रसाद मुखर्जी के पुण्यतिथि ल आज भारतीय जनता पार्टी ह बलिदान दिवस के रूप म मनावत हे। ए मउका म प्रदेसभर म कतकोन कारीकरम कराय जावत हे। राजधानी रईपुर के शारदा चैक म श्री मुखर्जी के प्रतिमा म पुष्पांजलि के कारीकरम राखे गीस। एखर बाद भाजपा कार्यालय म संगोष्ठी कराय गीस। एमा भाजपा के राष्ट्रीय महामंत्री अउ राज्यसभा सांसद दुष्यंत कुमार गौतम ह मुख्य वक्ता के रूप म सामिल होईन।
प्रधानमंत्री-टाॅयकैथाॅन प्रतिभागी
प्रधानमंत्री नरेन्द्र मोदी ह काली टाॅयकैथाॅन-दू हजार इक्कीस के प्रतिभागी मन ले वीडियो कान्फ्रेंसिंग के माध्यम ले गोठबात करही। टाॅयकैथाॅन के उद्देश्य भारत म खिलौना उद्योग ल बढ़ावा देना हे। ए बछर पांच जनवरी के शिक्षा मंत्रालय, महिला अउ बाल विकास मंत्रालय, सूक्ष्म, लघु अउ मध्यम उद्योग मंत्रालय डी.पी.आई.आई.टी., वस्त्र मंत्रालय, सूचना अउ प्रसारण मंत्रालय अउ ए.आई.सी.टी.ई. ह संयुक्त रूप म टाॅयकैथाॅन के सुरूवात करे रिहीन।
देसभर ले करीबन एक लाख बीस हजार प्रतिभागी मन ह एखर बर सत्रह सौ ले जादा विचार दे हवय। एमा ले एक हजार पांच सौ सड़सठ विचार ल चैबीस जून तक होवइया तीन दिन के आॅनलाइन टाॅयकैथाॅन ग्रैंड फिनाले बर चुने गे हवय।
मन की बात
प्रधानमंत्री नरेन्द्र मोदी सत्ताईस जून के आकाशवाणी म ‘‘मन की बात‘‘ कारीकरम म जनता ले अपन विचार साझा करही। ‘‘मन की बात‘‘ कारीकरम के ए ह अठहत्तरवां कड़ी होही। प्रधानमंत्री ह कारीकरम के अवइया श्रृंखला म लोगन ले अपन विचार साझा करे बर किहीन हे।
एखर बर लोगन नमो ऐप या माईजीओवी ओपन फोरम म अपन विचार साझा कर सकत हे। ओमन ह टोल फ्री नंबर – एक आठ शून्य शून्य – एक एक – सात आठ शून्य शून्य म घलो डायल कर सकत हे अउ प्रधानमंत्री बर अपन संदेस हिन्दी या अंग्रेजी म रिकार्ड करा सकत हे।
अस्पताल सुविधाएं
छत्तीसगढ़ सरकार, प्रदेस म अंतर्राष्ट्रीय स्तर के स्वास्थ्य सुविधा बनाय के सुरूवात करइया हे। एखर बर राज्य सरकार ह नवा रायपुर म पच्चीस एकड़ भूमि आरक्षित करे के निरदेस दीन हे। एखर उपयोग अंतर्राष्ट्रीय सुविधा वाले कोनों बड़े प्राईवेट अस्पताल बनाय बर करे जाही। जिहां राज्य के योजना म मरीज मनके इलाज हो सकही। नवा रायपुर म अंतर्राष्ट्रीय स्तर के निजी अस्पताल बनाय ले छत्तीसढ़ के संगेसंग पड़ोसी राज्य मन ल घलो एखर फायदा मिल सकही। ए अस्पताल म गंभीर मरीज मन बर एयर एम्बुलेंस के सुविधा घलो दे जाही।
मुख्यमंत्री भूपेश बघेल ह प्रदेस के मुख्य सचिव ल स्वास्थ्य विभाग ले पन्द्रह दिन के अंदर एक्सन प्लान बनाय बर किहीन हे। ओमन किहीन कि ए अस्पताल म मल्टी आॅर्गन ट्रांसप्लांट के सुविधा के संगेसंग मल्टी सुपर स्पेशलियटी सुविधा के बेवस्था घलो करे जाही। ए अस्पताल म पन्द्रह सौ बिस्तर के बेवस्था करे जाही, जिहां पचास प्रतिशत मरीज मनके इलाज डाॅक्टर खूबचंद बघेल योजना या आयुष्मान भारत योजना म कराय जाना घलो जरूरी होही।
हाथी उत्पात
कोरबा जिला के कटघोरा वनमंडल के एतमानगर परिक्षेत्र म ए बखत करीबन चालीस हाथी के दल ह घूमत हे। मिले जानकारी के अनुसार एमा ले सात झन हाथी के दल मानिकपुर गांव के तीर डेरा जमाम हे। ए हाथी मन ह पाछु रतिहा बरहाढांड अउ मानिकपुर गांव म घुस के तीन ठन मकान ल तोड़ दीन, जेखर ले लोगन मन डर गे हवय। वन विभाग ह ग्रामीण मन ल सावधान रेहे के सलाह दीन हे।
मौसम
भारतीय मौसम विभाग ह केहे हे कि देस म ए बछर मानसून के दौरान अभी तक इकतीस प्रतिशत ले जादा बरसा होय हे। मौसम विभाग के अनुसार इक्कीस जून तक तेरह दशमलव सात-आठ मिलीमीटर बरसा दर्ज करे गीस। जउन ह सामान्य ले दस दशमलव शून्य-पांच मिलीमीटर जादा हे।
आकाशवाणी ले बात करत भारतीय मौसम विभाग के महानिदेशक ह किहीन कि पश्चिमी विक्षोभ के सेती पश्चिमी हिमालयन क्षेत्र अउ उत्तर पश्चिमी इलाका मन म अवइया पांच दिन म तेज बरसा के संभावना हे। मौसम विभाग ह छत्तीसगढ़ संघरा ओड़िसा, पश्चिम बंगाल, सिक्किम, झारखंड अउ बिहार के कतकोन इलाका म अवइया पांच दिन म तेज बरसा के अनुमान लगाय हे।
इही बीच, छत्तीसगढ़ म अवइया चैबीस घंटा के दउरान हल्का ले मध्यम बरसा होय के संग गरज-चमक के साथ छींटा पड़े के संभावना हे। उहें, प्रदेश के एक दू जगह म भारी बरसा अउ आकाशीय बिजली गिरे के चेतावनी घलो दे गे हवय। सरगुजा अउ बिलासपुर संभाग के अधिकांश जगह म बरसा हो सकत हे।
मौसम विभाग के अनुसार एक ठिन द्रोणिका दक्षिण-पश्चिम बिहार ले दक्षिण छत्तीसगढ़ तक बने हे। संगेसंग ऊपरी हवा के चक्रीय चक्रवाती घेरा दक्षिण-पश्चिम बिहार अउ ओखर ले लगे पूर्वी उत्तरप्रदेश के उपर बने हे। एखर प्रभाव ले प्रदेस म कोनों-कोनों जगह म बरसा होवत हे।
अउ अब थोरकुन समाचार सार म-
– राज्यपाल अनुसुईया उइके अउ विधानसभा अध्यक्ष डाॅक्टर चरणदास महंत ह कबीर जयंती के मउका म प्रदेसवासी मन ल बधाई अउ सुभकामना दीन हे। राज्यपाल ह किहीन कि भक्तिकाल के महान कवि के संग संत कबीर दास समाज सुधारक घलो रिहीन।
– उहें, राज्यपाल ह रानी दुर्गावती के बलिदान दिवस के मउका म ओमन ल नमन करीन अउ किहीन कि रानी दुर्गावती के पूरा जीवन समाज बर प्रेरणा हे। ओमन ले धैर्य अउ साहस के सीख मिलथे।
– मुख्यमंत्री भूपेश बघेल ह काली रईपुर के निवास कार्यालय ले जल जीवन मिशन के प्रचार वाहन ल हरा झंडा देखाके रवाना करीन।
अउ
– रईपुर पुलिस ह आठ किलो गांजा के संग एक झन अंतर्राज्यीय गांजा तस्कर ल गिरफ्तार करे हे।