सीबीएसई-मूल्यांकन रिपोर्ट
केंद्रीय माध्यमिक शिक्षा बोर्ड-सी.बी.एस.ई. ह आज बारहवीं कक्षा के लइका मनके परिणाम जारी करे बर अपन रिपोर्ट उच्चतम न्यायालय ल सौंपीन। रिपोर्ट के अनुसार बारहवीं कक्षा के परिणाम दसवीं अउ ग्यारहवीं के घटक तीस प्रतिशत म अउ बारहवीं के घटक चालीस प्रतिशत म आधारित होही।
कोरोना महामारी के बीच सी.बी.एस.ई. अउ सी.आई.एस.सी.ई. के कक्षा बारहवीं के परीक्षा ल रद्द करे के निरदेस के मांग करे वाले याचिका म सुनवाई करत हुए न्यायालय ह बतईन कि सी.बी.एस.ई. के लइका मन जउन कि मूल्यांकन तरीका ले संतुष्ठ नइ हे, ओमन ल महामारी के स्थिति सामान्य होय म परीक्षा देके अवसर दे जाही।
उच्चतम न्यायालय ह हाल ही म कक्षा बारहवीं के बोर्ड परीक्षा के संबंध म एक ठिन याचिका उपर सुनवाई करत हुए बोर्ड ल दू हफ्ता के भीतर रणनीति तैयार करे के निरदेस दे रिहीन।
मुख्यमंत्री-बयान
मुख्यमंत्री भूपेश बघेल ह कहिन हे कि प्रदेस म स्वास्थ्य अधोसंरचना ल मजबूत बनाय अउ दूरिहा के जगह तक अच्छा उपचार व्यवस्था उपलब्ध कराय खातिर राज्य सरकार ह हरसंभव प्रयास करही। ओमन ह कहिन हे कि कोरोना के दूसर लहर के बेरा मिले अनुभव ल देखत हुए सरकार ह गांव ले लेके जिला मुख्यालय तक सरकारी अस्पताल म व्यवस्था ल मजबूत करे के काम सुरू कर दीन हे।
श्री बघेल ह राज्य के सबो जिला चिकित्सालय अउ विकासखंड स्तरीय अस्पताल मन ल सर्वसुविधा युक्त बनाय खातिर जिला कलेक्टर मन ल पन्द्रह दिन म कार्ययोजना तैयार करके प्रस्तुत करे के निर्देश दीन हे। ओमन ह कहिन कि सबो सरकारी अस्पताल मन म चैबीस घंटा इलाज के सुविधा होवय। संगेसंग सबो म स्त्री रोग, शिशु रोग, निश्चेतना, पैथालाॅजी, मेडिसीन अउ सर्जरी के स्नातकोत्तर चिकित्सक उपलब्ध कराय के प्रयास करे जाय अउ जिहां स्नातकोत्तर चिकित्सक नइ होही, उहां ए बिसय म प्रसिक्षण प्राप्त चिकित्सक मनके व्यवस्था करे जाय। श्री बघेल ह बतईन कि स्वास्थ्य अधोसंरचना ल मजबूती देके काम सबले पहिली प्राथमिकता के संग करे जाही, ताकि कोरोना के तीसर लहर के स्थिति बने म ओखर ले पूरा ताकत के संग निपटे जा सकय।
कोरोना समाचार
प्रदेस म अब तक नौ लाख तिरसठ हजार ले जादा लोगन कोरोना ले ठीक होगे हे। एमा ले एक लाख तिरसठ हजार मरीज मन ह अस्पताल म अउ करीबन आठ लाख मरीज मन ह होम आइसोलेशन म रहि के कोरोना ल मात देहे।
ऐति, प्रदेस म कोरोना ले बचाव बर अब तक तिहत्तर लाख बत्तीस हजार टीका लगाय गेहे। उहें, टीका के दूसर डोज के मामला म छत्तीसगढ़ ह देस म दूसर स्थान म हवय। पैंतालीस बछर ले जादा आयु वर्ग के लोगन के टीकाकरण म घलो छत्तीसगढ़ ह देस के पहिली तीन ठिन राज्य म सामिल हवय। राज्य म पैंतालीस बछर ले जादा उमर के अठहत्तर प्रतिशत लोगन मन ल कोरोना ले बचे के पहली टीका लगाय जा चुके हे। उहें, शत-प्रतिशत फ्रंटलाइन वर्कर मन ल अउ इंक्यानवे प्रतिशत स्वास्थ्य कर्मी मन ल टीका के पहली खुराक दे जा चुके हे।
ओति, रायगढ़ जिला के धरमजयगढ़ विकासखंड के दुर्गापुर गांव म अट्ठारह बछर ले जादा उमर के सबो लोगन मन ल टीका लगाय जा चुके हे।
इही बीच, विधानसभा अध्यक्ष डाॅक्टर चरणदास महंत ह आज कोरोना संक्रमण ले बचाव खातिर वैक्सीन के दूसर डोज लगवाईन। ए मउका म डाॅक्टर महंत ह प्रदेसवासी मन ले टीका लगवाय के अपील करीन। ओमन कहिन कि टीका लगाय के बाद घलो कोरोना ले बचे खातिर जारी करे गे दिसा-निरदेस के पालन करे जाना चाहिए।
उहें, प्रदेस म काली पांच सौ तिहत्तर झिन नवा कोरोना संक्रमित मरीज मनके पहिचान करे गेहे। रईपुर म काली बीस झिन नवा मरीज मिले हे। प्रदेस म अभू तक नौ लाख अट्ठयासी हजार सात सौ पैंतालीस झिन कोरोना मरीज मनके पहिचान करे जा चुके हे। अभू के बेरा म ग्यारह हजार ले जादा कोरोना संक्रमित मरीज मनके इलाज आने अस्पताल अउ होम आइसोलेशन म चलत हे उहें, प्रदेस म काली कोरोना ले बारह झिन लोगन के मउत घलो होय हे।
भाजपा-जनजागरण अभियान
भाजपा के राष्ट्रीय उपाध्यक्ष अउ पूर्व मुख्यमंत्री डाॅक्टर रमन सिंह ह राज्य के वित्तीय स्थिति उपर श्वेत पत्र जारी करे के मांग करीन हे। प्रदेस म कांग्रेस सरकार के ढाई बछर के कार्यकाल पूरा होय म भाजपा के वरिष्ठ नेता मन ह आज रईपुर के प्रदेस भाजपा कार्यालय म पत्रकार मन ले गोठबात करीन। ए मउका म डाॅक्टर सिंह ह कहिन कि राज्य सरकार सबो क्षेत्र म असफल रेहे हे, जेखर सेती सरकार ह अपन करे गे काम के जानकारी दे ले बचत हवय। ओमन ह सरकार उपर पाछु ढाई बछर म पन्द्रह हजार करोड़ रूपिया के कर्ज लेके आरोप लगाईन हे।
उहें, भाजपा के प्रदेश अध्यक्ष विष्णुदेव साय ह कहिन कि राज्य सरकार ह जनता ले करे गे वादा ल पूरा करे म विफल रेहे हे।
ऐति, महासमुंद, दुरूग, राजनांदगांव अउ बिलासपुर समेत प्रदेस के आने-आने जिला म भाजपा युवा मोर्चा ह राज्य सरकार के कथित वादाखिलाफी ल लेके प्रदर्सन करीन। उहें, कांग्रेस कार्यकर्ता मन ह पेट्रोल-डीजल के बाढ़त दाम के विरोध म प्रदर्सन करीन। ए बेरा म कांग्रेस सदस्य मन ह भाजपा युवा मोर्चा के कार्यकर्ता मन ल सांकेतिक पेट्रोल अउ गैस के खाली सिलेंडर ल घलो भेंट करीन।
इही बीच, कांग्रेस कार्यकर्ता मन ह कथित महंगाई के विरोध म काली अट्ठारह जून के सांकेतिक चक्काजाम करके प्रदर्सन करही। उहें, बीस जून के महिला कांग्रेस कार्यकर्ता मन ह प्रदर्सन करही।
मुख्यमंत्री-लोकार्पण/भूमिपूजन
मुख्यमंत्री भूपेश बघेल ह काली अट्ठारह के कोरबा अउ जांजगीर-चांपा जिला ल करीबन दू सौ चैंतीस करोड़ रूपिया के दू सौ इकहत्तर ठिन आने-आने विकास कार्य के सौगात दींही। मुख्यमंत्री ह अपन रायपुर स्थित कार्यालय म आयोजित वर्चुअल कार्यक्रम म के माध्यम ले कोरबा जिला म लगभग एक सौ ग्यारह करोड़ रूपिया के लागत के एक सौ सत्ताईस ठिन विकास कार्य के अउ जांजगीर चांपा जिला म लगभग एक सौ तेईस करोड़ रूपिया के एक सौ चवालीस ठिन आने-आने निर्माण कार्य के लोकार्पण अउ भूमिपूजन करही।
जानबा के अनुसार मुख्यमंत्री ह पाछु कुछु दिन ले हर रोज वर्चुअल कार्यक्रम केे माध्यम ले प्रदेस के आने-आने जिला म विकास अउ निर्माण कार्य के भूमिपूजन अउ लोकार्पण करत हे। अभू तक नौ ठिन वर्चुअल कार्यक्रम के माध्यम ले मुख्यमंत्री ह अट्ठारह ठिन जिला पांच हजार दू सौ बीस करोड़ ले जादा के विकास कार्य के सौगात दे चुके हे।
गृह मंत्री-आपदा प्रबंधन
गृह मंत्री ताम्रध्वज साहू ह बाढ़ संभावित जिला म बचाव अउ राहत बर सबो जरूरी तैयारी सुनिश्चित करे के निर्देश दीन हे। आज अपन रायपुर स्थित निवास कार्यालय म नगर सेना के वरिष्ठ अधिकारी मनके संग बाढ़ आपदा प्रबंधन के तैयारी के समीक्षा के बेरा ओमन ह जिला सेनानी मन ल जलाशय मनके भरे अउ ओवरफ्लो होय म पानी छोड़े के पहली जानकारी बर कलेक्टर अउ जल संसाधन विभाग के अधिकारी मनके संपर्क म रेहे के निरदेस दीन।
मौसम
प्रदेस म अवइया चैबीस घंटा के दौरान आने-आने जगह म गरज-चमक के संग हल्का ले मध्यम पानी गिरे के संभावना हे।
मौसम विभाग ले मिले जानकारी के अनुसार उत्तर-प्रदेश, बंगाल अउ ओखर तीर-तार म एक ठिन चक्रीय चक्रवाती घेरा बने होय हे। उहें, दक्षिण पूर्वी उत्तरप्रदेश अउ ओखर ले लगे बिहार, झारखंड के ऊपर कम दबाव के क्षेत्र स्थित हवय, जेखर असर ले प्रदेश म एक-दू ठिन जगह म जादा पानी गिरे अउ कुछु जगह म बहुत जादा पानी गिरे के आसार हे।