महतारी दुलार योजना
मुख्यमंत्री भूपेश बघेल ह किहीन हे कि कोरोना महामारी ले अपन अभिभावक मन ल खो चुके लइका, जउन मन निजी स्कूल म पढ़त रिहीन हे उंखरों पढ़ाई के खर्चा छत्तीसगढ़ सरकार उठाही। अइसन लइका मन ल राज्य सरकार द्वारा शुरू करे गे महतारी दुलार योजना के लाभ मिलही। श्री बघेल ह किहीन कि अइसन लइका जउन मन निजी स्कूल मन म पिछले एक साल से पढ़त हे, उही निजी स्कूल में या स्वामी आत्मानंद इंग्लिश मीडियम स्कूल म पढ़ सकथे, उंखर फीस राज्य सरकार वहन करही।
गौरतलब हे कि महतारी दुलार योजना के तहत छात्र मन ल कक्षा पहली से आठवीं तक पांच सौ रूपिया हर माह अउ नवमीं से बारहवीं तक एक हजार रूपिया हर माह छात्रवृत्ति दे जाही।
मुख्यमंत्री-भूमिपूजन
मुख्यमंत्री भूपेश बघेल ह आज वर्चुअल माध्यम ले रायगढ़ अउ जशपुर जिला म अलग-अलग विकास कार्य के लोकार्पण अउ भूमिपूजन करीन। रायगढ़ जिला म तीन सौ आठ करोड़ इकतीस लाख रूपिया के लागत के अलग-अलग विकास कार्य के सिलान्यास अउ लोकार्पण करीन। अइसने, जशपुर जिला म मुख्यमंत्री ह दू सौ तिरासी करोड़ सत्तर लाख रूपिया के लागत के पांच सौ पचयासी विकास कार्य के लोकार्पण अउ भूमिपूजन करीन।
उहें, मुख्यमंत्री ह काली सरगुजा अउ बलरामपुर-रामानुजगंज जिला म तीन सौ चैबीस करोड़ बयालीस लाख रूपिया ले जादा के विकास कार्य मनके सौगात दीन।
पर्वतारोहण अकादमी
मुख्यमंत्री भूपेश बघेल ह किहीन कि प्रदेस म एडवेंचर स्पोटर््स ल बढ़ावा दे बर जल्द ही पर्वतारोहण अकादमी सुरू करे जाही। ये अकादमी बस्तर म सुरू होही। मुख्यमंत्री ह ये घोषणा आज रायपुर स्थित निवास कार्यालय म छत्तीसगढ़ के युवा पर्वतारोही नैना सिंह धाकड़ से मुलाकात के दौरान करीन। नैना सिंह ह मुख्यमंत्री ह बतईन कि ओला एक जून के दुनिया के सबले ऊंचा चोटी माउंट एवरेस्ट फतह करे म सफलता मिले हे। मुख्यमंत्री ह ए उपलब्धि बर नैना सिंह ल बधाई दीन अउ किहीन कि एखर से छत्तीसगढ़ के गौरव बढ़े हे।
कोरोना समाचार
प्रदेस म कोरोना के हालात तेजी से सुधरत हे। राज्य म पाॅजिटिविटी दर गिरके डेढ़ प्रतिसत ले नीचे आ गेहे। काली कोरोना संक्रमण के चार सौ उनसठ मामला सामने आय हे। एला मिलाके प्रदेस म कोरोना संक्रमित मरीज मनके संख्या करीबन नौ लाख सत्यासी हजार होगे हे। एमा ले लगभग नौ लाख साठ हजार लोगन मन स्वस्थ हो चुके हे। वर्तमान म तेरह हजार ले ज्यादा मरीज मनके इलाज अलग-अलग अस्पताल अउ होम आइसोलेशन म चलत हे।
इही बीच, राजभवन म आज प्रार्थना सभा के आयोजन करे गीस। ए दौरान कोरोनाकाल म दिवंगत होय फ्रंटलाइन वारियर्स अउ आने लोगन मन ल राज्यपाल अनुसुईया उइके सहित सबो अधिकारी अउ कर्मचारी मन ह दू मिनट के मौन धारण करके श्रद्धांजलि दीन।
ओति, आॅक्सफेम इंडिया ह मिशन संजीवनी के अंतर्गत छत्तीसगढ़ ल चिकित्सकीय उपकरण प्रदान करे हे। ए चिकित्सकीय उपकरण ल स्वास्थ्य मंत्री टी.एस. सिंहदेव ह अपन रायपुर स्थित निवास स्थान से हरी झंडी दिखा के रवाना करीन। एखरे तहत दू ठिन अस्पताल मन म पांच सौ सत्तर लीटर क्षमता के दू आॅक्सीजन प्लांट स्थापित करे जाही। उहें, चिकित्सकीय उपकरण म पैंतीस पीएचसी म आॅक्सीजन सिलेंडर, आॅक्सीजन कंसंट्रेटर, पेशेंट माॅनिटर, आठ सौ पीपीई किट अउ पांच हजार आशा वर्कर्स मन बर पांच हजार मेडिकल किट सहित दूसर सामग्री सामिल हे।
उहें, छत्तीसगढ़ मरार पटेल समाज ह कोरोना के दउरान दिवंगत होय समाज के बत्तीस लोगन के परिजन मन ल पांच-पांच हजार रूपिया के सहायता रासि प्रदान करे हे।
विश्व रक्तदाता दिवस
आज विश्व रक्तदाता दिवस आय। हर साल आज के दिन ल दुनिया ह सुरक्षित रक्तदान अउ रक्त के अव्यव मन ल मानव सरीर म सुरक्षित ढंग से चढ़ाय के बारे म जागरूकता पैदा करे बर मनाय जाथे।
छत्तीसगढ़ म घलो रक्तदान दिवस म अलग-अलग कार्यक्रम आयोजन करे जात हे। एखर तहत स्वास्थ्य विभाग द्वारा जन-जागरूकता अभियान चलाके लोगन मन ल रक्तदान करे बर प्रेरित करे जात हे। आज राज्य के अलग-अलग जिला म युवा मन रक्तदान करीन।
महासमुंद म जिला भर से आय कई युवा मन जिला अस्पताल म कोरोना गाइडलाइन के पालन करत हुए रक्तदान करीन। ये दौरान महासमुंद के नगर पालिका अध्यक्ष प्रकाश चंद्राकर ह रक्तदान करे बर आय युवा मन ल सम्मानित करीन। प्रदेश के अलग-अलग जिला म घलो रक्तदान सिविर आयोजित करे के खबर हे।
एमओयू
छत्तीसगढ़ राज्य लघु वनोपज संघ ह कोदो-कुटकी के बेहतर प्रसंस्करण कार्य बर भारतीय मिलेट अनुसंधान संस्थान के संग समझौता करे हे। ये संबंध म काली एमओयू उपर हस्ताक्षर करे गीस। एखरे तहत राज्य लघु वनोपज संघ, भारतीय मिलेट अनुसंधान संस्थान के तकनीक के इस्तेमाल करके लंबा समय तक उपयोग आने वाला खाद्य पदार्थ मन ल विकसित करे म सक्षम होही। ये खाद्य पदार्थ मन ल राज्य सरकार के प्रतिष्ठित ब्रांड ‘‘छत्तीसगढ़ हर्बल्स‘‘ के तहत बेचे जाही। कोदो अउ कुटकी के ये मूल्य संवर्धन कार्य छत्तीसगढ़ के किसान मन ल बेहतर लाभ प्रदान करही।
टूलकिट मामला-हाईकोर्ट
छत्तीसगढ़ उच्च न्यायालय ह टूलकिट मामला म भाजपा के राष्ट्रीय उपाध्यक्ष अउ पूर्व मुख्यमंत्री डाॅक्टर रमन सिंह अउ भाजपा के राष्ट्रीय प्रवक्ता संबित पात्रा के खिलाफ दर्ज एफ.आई.आर. उपर आगामी सुनवाई तक रोक लगा देहे।
गौरतलब है कि टूलकिट मामला म दस्तावेज साझा करे ल लेके पूर्व मुख्यमंत्री डाॅक्टर रमन सिंह अउ राष्ट्रीय प्रवक्ता संबित पात्रा के खिलाफ राजधानी रायपुर के सिविल लाईन्स सहित अलग-अलग थाना म एफ.आई.आर. दर्ज कराय गेहे, जेला रद्द करे के मांग ल लेके बिलासपुर हाईकोर्ट म याचिका लगाय गेहे।
मानव तस्करी
कोरिया जिला म मानव तस्करी के मामला सामने आए हे। जिला के पुलिस ह घुटरीटोला चेकपोस्ट करा जांच के दउरान एक वाहन म आठ झिन लइका मन ल बरामद करीन। ये लइका मन ल मैनपाट क्षेत्र ले जबलपुर ले जाय जावत रिहीस। पुलिस, सबो लइका अउ वाहन चालक ल खोंगापानी चैकी ले जाके पूछताछ करत हे।
घटना के जानकारी मिलते ही स्थानीय विधायक अउ सरगुजा विकास प्राधिकरण के अध्यक्ष गुलाब कमरो ह खाद्य मंत्री अमरजीत भगत ल एखर जानकारी दीन। श्री भगत ह मामला के गंभीरता ल देखत हुए सरगुजा पुलिस अधीक्षक ल जांच करे के निरदेस दीन।
हाथी हमला-मौत
जशपुर जिला म हाथी के हमला म एक महिला सहित दू झिन लोगन के मउत होगे। मिले जानकारी के मुताबिक तपकरा के जंगल म वनोपज के तलाश म गे दू ग्रामीण उपर हाथी ह हमला कर दीस। ये हमला म दूनों ग्रामीण मनके मउका म ही मउत होगे। वन विभाग ल घटना के जानकारी दे दे गेहे। पुलिस जांच म जुटे हुए हे।
अंतर्राष्ट्रीय योग दिवस
अंतर्राष्ट्रीय योग दिवस के अवसर म इक्कीस जून के राज्य म छत्तीसगढ़ वर्चुअल योग मैराथन के आयोजन करे जाही। एला लेके प्रदेसवासी मन म खासा उत्साह देखे जात हे। मैराथन म सम्मिलित होय बर अब तक दू लाख ले जादा लोगन मन ल आॅनलाइन पंजीयन कराय हे। मैराथन म हिस्सा ले बर प्रतिभागी मन काली पन्द्रह जून तक आॅनलाइन पंजीयन करा सकथे।
इही बीच, गृह मंत्री ताम्रध्वज साहू ह किहीन हे कि योगासन अउ प्राणायाम लोगन मनके जीवन म बेहद उपयोगी हे। ओमन किहीन कि योगासन अउ प्राणायाम करके सरीर म आॅक्सीजन के स्तर ल बढ़ाय जा सकथे।
बाल अधिकार संरक्षण आयोग
राष्ट्रीय बाल अधिकार संरक्षण आयोग ह सोशल मीडिया माध्यम ले कोविड महामारी के दउरान अनाथ होय लइका मन ल गोद ले बर सोशल मीडिया उपर डाले जावत पोस्ट के जानकारी आयोग के संग साझा करे बर केहे हे। ये निर्णय आयोग ह सोशल मीडिया पोस्ट म लइका मन ल गोद लेके संदेस के खिलाफ मिले सिकायत के बाद ले हे। आयोग ह फेसबुक, ट्वीटर, वाट्सऐप अउ टेलीग्राम ल लिखे पत्र म केहे हे कि अइसन पोस्ट के जानकारी कानून प्रवर्तन अधिकारी मन ल अउ आयोग ल दे जाना चाही।
कम्युनिटी पुलिसिंग
नारायणपुर जिला म माओवाद प्रभावित क्षेत्र के ग्राम बेचा में पुलिस अउ जनता के बीच आपसी सामंजस्य स्थापित करे अउ ग्रामीण मनके समस्या के निराकरण करे बर कम्युनिटी पुलिसिंग कार्यक्रम के आयोजन करे गीस। ये कार्यक्रम म बस्तर रेंज के पुलिस महानिरीक्षक सुंदरराज पी., बस्तर कलेक्टर रजत बंसल, कोंडागांव कलेक्टर पुष्पेन्द्र कुमार मीणा अउ पुलिस अधीक्षक मोहित गर्ग शामिल होईन।
कार्यक्रम म अधिकारी मन ह ग्राम बेचा के अलावा कड़ेनार, टेटम अउ पासपास के ग्रामीण मन से बातचीत कर उंखर समस्या सुनीन अउ मउका म ही उंखर निराकरण घलो करीन।