लोकवाणी
मुख्यमंत्री भूपेश बघेल ह आज प्रसारित मासिक रेडियोवार्ता – लोकवाणी- के माध्यम ले कीहिन कि राजीव गांधी किसान न्याय योजना ह किसान मनके विकास म बहुते जादा मदद करत हे। किसान मनके हित ल देखत ये योजना के विस्तार ल अउ बढ़ाय गेहे।
मुख्यमंत्री ह कीहिन कि प्रदेश म दू साल के भीतर किसान मनके संख्या ह पांच लाख पचास हजार बाढ़ गेहे। दू हजार बीस म शुरू करे गे ये योजना ले अठारा लाख पैंतालिस हजार किसान मन ल पांच हजार छै सौ अठाइस करोड़ रूपिया के भुगतान करे गेहे। उंहें दू हजार इक्कीस म बाईस लाख किसान मन ल पहिली किस्त म पंद्रा सौ करोड़ रूपिया भुगतान करे गेहे। श्री बघेल ह यहू कीहिन कि मुख्यमंत्री वृक्षारोपण प्रोत्साहन योजना के तहत किसान मनके आय म बढ़ोत्तरी होही अउ कृषि वानिकी ल बढ़ावा मिलही। श्री बघेल कीहिन कि राज्य म कोरोना संक्रमण ल रोके खातिर सरकार डहार ले सरलग प्रयास करे जात हे। जेखर ले संक्रमण म कमी आय हे।
मुख्यमंत्री लोकार्पण
मुख्यमंत्री भूपेश बघेल ह आज रायपुर म राखे गे एक ठन वर्चुअल कार्यक्रम म रायपुर जिला म पांच सौ इकसठ करोड़ बत्तीस लाख रूपिया के लागत ले बनइया तीन सौ इंक्यानबे ठन विकास काम के लोकार्पण अउ भूमिपूजन करीन। ए दउरान श्री बघेल ह बाल आश्रम म बनाये गे नेमीचंद श्रीश्रीमाल अउ गोविंदलाल वोरा के मूर्ति के अनावरण करीन।
ए मउका म श्री बघेल ह कीहिन कि राजधानी होय के सेती रायपुर के अउ जादा विकास करे जात हे। श्री बघेल ह जिला म कोरोना संक्रमण म कमी आय के सेती लोगन मन ल बधाई दीन हे।
उंहें काली एक ठन वर्चुअल कार्यक्रम के माध्यम ले मुख्यमंत्री ह बीजापुर अउ सुकमा जिला म करीबन तिरालिस करोड़ आठ लाख रूपिया के लागत ले बनइया एक सौ चार ठन विकास काम के भूमिपूजन अउ लोकार्पण करीन। श्री बघेल ह कीहिन कि राज्य सरकार डहार ले आदिवासी मनके हरएक प्रकार के मदद करे जाही।
उंहें जगरगुंडा म तीस बिस्तर वाला अस्पताल बनाये के घोषणा घलो करीन। संगेसंग गंगालूर क्षेत्र के दस ठिन ग्राम पंचायत म लाल पानी के समस्या ल खतम करे खातिर राज्य सरकार डहार ले पांच करोड़ रूपिया खर्चा करके मशीन लगाये जाही।
कोरोना समाचार/टीकाकरण
प्रदेस म कोरोना संक्रमण के दर लगातार घटत हवय। राज्य म पाॅजीटीव दर ह गिरके दू दशमलव ले नीचे आगे हे। काली कोरोना संक्रमण के आठ सौ तेरा नवा मामला आगू आय हे। एला मिलाके प्रदेश म संक्रमित मरीज के संख्या ह नौ लाख छियांसी हजार ले जादा होगे हे। एमा ले नौ लाख अंठावन हजार ले जादा लोगन मन ह स्वस्थ होगे हे। अभी करीबन पंद्रह हजार मरीज मनके इलाज ह अस्पताल अउ होम आइसोलेशन म चलत हवय।
उहें, कोरोना टीकाकरण अभियान ह घलो जोरशोर ले चलत हे। जेमा अब तक करीबन नौ लाख पच्चीस हजार सात सौ चार झन मनखे मन ल टीकाकरण लगाये गेहे।
मुख्यमंत्री-सिलगेर बातचीत
मुख्यमंत्री भूपेश बघेल ह रायपुर के अपन निवास कार्यालय म राखे गे एक ठन वर्चुअल कार्यक्रम म बस्तर के सिलगेर म आंदोलन खतम होय के बाद उंहा के गांव वाले मन संग गोठबात करीन। ए दउरान श्री बघेल ह सिलगेर म होय घटना बर दुख प्रगट करीन अउ ओमन कीहिन कि राज्य सरकार ह आदिवासी मनके हरसंभव मदद करही।
ओमन यहू कीहिन कि जिला के गंाव-गंवई म स्कूल भवन, सड़क अउ सोलर पंप लगाये के काम करे जात हे। ए दउरान सांसद दीपक बैज अउ बस्तर विकास प्राधिकरण के उपाध्यक्ष विक्रम शाह मंडावी ह घलो मुख्यमंत्री ले भेंट करीन अउ गांव वाले मन ल मदद देके बात कीहिन।
ओति सुकमा म मूलवासी बचाव मंच ह सिलगेर कैम्प के विरोध म आंदोलन ल जारी राखे के बात कीहिन। ए संबंध म उंखर मन डहार ले एक ठन पोस्टर घलो जारी करे गेहे। मंच डहार ले दावा करे गेहे कि कोरोना सावधानी के संगेसंग सत्ताईस जून तक धरना प्रदर्शन अउ अठाईस जून के सारकेगुड़ा म एक ठन जनसभा के कार्यक्रम करे जाही।
गरीब कल्याण योजना
दुर्ग जिला म प्रधानमंत्री गरीब कल्याण योजना के तहत आर्थिक रूप ले कमजोर वर्ग के मनखे मन ल पांच किलो मुफत म अनाज देवाय जात हे। एखर ले गरीब मनखे मन ल सरकार डहार ले मदद मिलत हे।
केंद्र सरकार के ए योजना के तहत मुफत म अनाज पवइया अजय साहू ह बताइन कि कोरोना काल म ओमन ल राशन अनाज मिले ले अब्बड़ मदद मिले हे।
उंहें एक झिन अउ हितग्राही ललित साहू ह बताइन कि केंद्र सरकार डहार ले मिलइया ए योजना ले ओमन ल बढ़िया राहत मिले हे।
सेल अध्यक्ष मुलाकात
स्टील अथाॅरीटि आॅफ इंडिया लिमिटेड के अध्यक्ष सोमा मंडल ह रायपुर म मुख्यमंत्री भूपेश बघेल ले भेंट करीन। ए दउरान मुख्यमंत्री ह श्रीमती मंडल ले सेल के अधिकारी मनके पे रीविजन अउ कर्मचारी मनके वेज रीविजन ल लागू करे के मांग करीन। उंहें श्री बघेल ह बीएसपी कंपनी म भर्ती के दउरान छत्तीसगढ़ के मूल निवासी मन ल प्राथमिकता देके बात कीहिन। संगेसंग कौशल उन्नयन अउ प्रशिक्षण देके बात घलो कीहिन।
शासकीय कर्मचारी उपस्थिति
राज्य सरकार ह कोरोना संक्रमण म सुधार ल देखत अब राज्य के जम्मों सरकारी कार्यालय मन म काली चैदह जून ले जम्मों श्रेणी के अधिकारी कर्मचारी मन ल जरूरी रूप ले उपस्थित होय के निर्देश जारी करे हे। सामान्य प्रशासन विभाग डहार ले ए संबंध म जम्मों विभाग, कलेक्टर अउ विभाग अध्यक्ष मन ल निर्देश जारी कर दे गेहे।
निर्देश म केहे गेहे कि जम्मों सरकारी कार्यालय मन म अधिकारी अउ कर्मचारी मन ल कोरोना गाईड लाइन के नियम के पालन करे बर पड़ही।
दुर्घटना
गरियाबंद जिला म काली रतिहा होय एक ठन सड़क हादसा म पांच झिन माइलोगिन के मउत होगे, उंहें सात झन मनखे मनह घायल होगे।
मिले खबर के मुताबिक गरियाबंद जिला म मालगांव के एकेच परिवार के मनखे मन ह अभनपुर के खट्टी गांव म दशगात्र कार्यक्रम म जावत रीहिन, तभे राजिम के कोपराबस्ती के तीर ए गाड़ी ह पेड़ ले टकरा गे। ए गाड़ी म बारह झन मनखे ह बइठे रीहिन। ए हादसा म पांच झिन माइलोगिन मनके परान छूटगे । उंहें छै झिन घायल लोगन मन ल रायपुर के अंबेडकर अस्पताल म भर्ती कराय गेहे।
मलेरिया मुक्त बस्तर अभियान
संयुक्त राष्ट्र विकास कार्यक्रम – यू.एन.डी.पी. अउ नीति आयोग डहार ले बस्तर संभाग म राष्ट्रीय स्वास्थ्य मिशन के तहत चलाये जात मलेरिया उन्मूलन अभियान के बड़ाई करीन हे।
नीति आयोग डहार ले सौंपे गे अपन रिपोर्ट म केहे गेहे कि आकांक्षी जिला बीजापुर अउ दंतेवाड़ा म ए अभियान के बहुतेच अच्छा परिणाम आगू आय हे। बीजापुर जिला म मलेरिया के मामला म इकहत्तर प्रतिशत अउ दंतेवाड़ा जिला म चैवन प्रतिशत के कमी आय हे। रिपोर्ट म यहू केहे गेहे कि मलेरिया ल खतम करे खातिर देश के अउ आंकाक्षी जिला मन म अइसने ढंग के अभियान चलाना चाही।
खबर के मुताबिक बस्तर अउ सरगुजा संभाग ल मलेरिया मुक्त करे खातिर राष्ट्रीय स्वास्थ्य मिशन के तहत अभियान चलाये जात हे, जेखर ले मलेरिया के मामला म कमी आय हे।
कंाग्रेस प्रवक्ता प्रशिक्षण
प्रदेश कंागे्रस कमेटी डहार ले संचार विभाग के सदस्य सुशील आनंद शुक्ला ल मुख्य प्रवक्ता बनाये गेहे। संगेसंग पांच झन विधायक मन ल प्रवक्ता के पद घलो दे गेहे। आज जारी आदेश के मुताबिक भिलाई विधायक देवेंद्र यादव, गुंडरदेही विधायक कुंवरसिंह निषाद, कसडोल विधायक शकुंतला साहू, महासमुंद विधायक विनोद चंद्राकर अउ चंद्रपुर विधायक रामकुमार यादव ल संचार विभाग म प्रवक्ता के पदभार सौंपे गेहे।
उंहें कांग्रेस संगठन डहार ले रायपुर म मास्टर ट्रेनर प्रवक्ता अउ कार्यकर्ता मन बर प्रशिक्षण कार्यक्रम काली ले करे जाही।
अब पेस हे मौसम के हाल –
छत्तीसगढ़ म मानसून सक्रिय होगे हे। एखर प्रभाव ले राजधानी रायपुर के संगेसंग राज्य के कतकोन जगा म बरसा होवत हे।
मौसम विभाग के मुताबिक निम्न दाब के क्षेत्र ह उत्तर पश्चिम बंगाल के खाड़ी अउ ओखर ले लगे उत्तरी उड़ीसा तट के संगेसंग पश्चिम बंगाल तट के उपर बने हवय। एखर प्रभाव ले अवइया चैबीस घंटा के दउरान राज्य के कोनो जगा म मध्यम ले भारी बरसा होय के संभावना हे।