कोरोना समाचार/टीकाकरण
प्रदेस म कोरोना संक्रमण के दर लगातार घटत हवय। राज्य म पाॅजिटिविटी दर गिरके दू दशमलव एक प्रतिशत रह गे हवय। काली होय करीबन 35 हजार सैंपल मनके जांच म 741 लोगन मन ह संक्रमित पाय गीन। ओमन ल मिलाके प्रदेस म कोरोना संक्रमित मरीज मनके संख्या अब 9 लाख 85 हजार ले जादा होगे हवय। एमा ले 9 लाख 56 हजार ले जादा लोगन मन स्वस्थ घलो चुके हे। अभी के स्थिति म करीबन 16 हजार मरीज मनके इलाज आने-आने अस्पताल अउ होम आइसोलेनश म चलत हवय।
उहें, प्रदेस म अब तक जम्मों आयु वर्ग के पात्र लोगन मन ल 72 लाख 16 हजार ले जादा कोरोना के टीका लगाय जा चुके हे।
इही बीच, कोरोना संक्रमण के मामला म आय कमी के बाद म प्रदेस के आने-आने जिला म जम्मों व्यवसायिक प्रतिष्ठान अउ दुकान मन ल खोले के अवधि म लगातार छूट दे जावत हे। दुरूग, राजनांदगांव, महासमुंद, जांजगीर-चांपा अउ कोंडागांव जिला म अब ले रतिहा 8 बजे तक दुकान मन खुलही। उहें, रईपुर अउ रायगढ़ जिला म दुकान मन ल बिहनिया 6 ले संझा 7 बजे तक खोले जाय के अनुमति दे गे हवय अउ रविवार के पूरा लाॅकडाउन रइही।
प्रधानमंत्री गरीब कल्याण अन्न योजना
भारतीय खाद्य निगम-एफ.सी.आई. ह प्रधानमंत्री गरीब कल्याण अन्न योजना के तहत जम्मों राज्य अउ केन्द्रसासित प्रदेस मन ल 70 लाख टन ले अधिक मुफ्त खाद्यान्न के आपूर्ति कर दे गे हवय। प्रधानमंत्री नरेन्द्र मोदी ह सोमवार के घोसना करे रिहीन कि देस म करीबन 80 करोड़ लोगन मन ल नवंबर तक ए योजना के लाभ दे जाही। ए योजना के तहत राष्ट्रीय खाद्य सुरक्षा अधिनियम 2013 के तहत जम्मों लाभार्थी परिवार के सदस्य मन ल हर माह 5 किलोग्राम चाउर या गेहूं मुफ्त प्रदान करे जाथे।
केन्द्रीय उपभोक्ता मामला अउ सार्वजनिक वितरण मंत्रालय ह बतईन हे कि केन्द्र सरकार ह प्रधानमंत्री गरीब कल्याण अन्न योजना के तहत खाद्य सब्सिडी, अंतर्राज्यीय परिवहन अउ वितरक मनके लाभ समेत वितरण के सब्बो खरचा वहन करही।
मुख्यमंत्री-लोकार्पण
मुख्यमंत्री भूपेश बघेल ह आज रईपुर म वर्चुअल माध्यम ले मुंगेली अउ बेमेतरा जिला म आने-आने विकास कार्य के लोकार्पण अउ भूमिपूजन करीन। एमा मुंगेली जिला म करीबन 276 करोड़ रूपिया अउ बेमेतरा जिला म 172 करोड़ रूपिया के लागत के आने-आने विकास कार्य सामिल हवय।
सेल चेयरमेन
स्टील अथाॅरिटी आॅफ इंडिया लिमिटेड-सेल ह वित्तीय बछर 2020-21 के चैथा तिमाही के संगेसंग वार्षिक वित्तीय परिणाम मनके घोसना करीन हे। सेल ह कोरोना संक्रमण के चलत उतपन्न चुनौती मनके बावजूद वित्तीय बछर 2021 म सभी मानक मन म बढ़िया प्रदर्सन करे हे।
सेल के अध्यक्ष सोमा मंडल ह बतईन हे कि कंपनी ह वित्तीय बछर 2021 के दउरान उत्पादन अउ वित्तीय प्रदर्शन म एक साथ बढ़ोतरी दर्ज करे हे। टीम ‘‘सेल‘‘ ह पहिली छमाही के दउरान गंभीर चुनौती मनके बीच एकजुटता ले काम करीन हे। सेल अध्यक्ष ह किहीन हे कि वित्तीय बछर 2021 के दूसर छिमाही म आर्थिक गतिविधि मन म सुधार के चलत स्टील के मांग म उछाल देखे ल मिले हे। कंपनी ह परिचालन दक्षता म सुधार के संगेसंग बाजार के मांग के अनुसार उत्पादन ल बढ़ाय म ध्यान केन्द्रित करीन, जेखर ले कंपनी ल बढ़िया प्रदर्सन करे म मदद मिलीस।
भाजपा-बयान
भारतीय जनता पार्टी के प्रदेश अध्यक्ष विष्णुदेव साय ह छत्तीसगढ़ के कांग्रेस सरकार के ढाई बछर के कार्यकाल ल विफल बतईन हे। श्री साय ह आज दुरूग म पत्रकार मन ले गोठबात करत किहीन कि राज्य सरकार के ढाई साल के कार्यकाल ल जनता के साथ वादा खिलाफी करे अउ अराजकता के काला अध्याय के रूप म जाने जाही। ओमन बतईन कि भाजपा कार्यकर्ता जनता के बीच जाके राज्य सरकार के विफलता मन ल उजागर करही।
जानबा के मुताबिक भाजपा ह आज ले 17 जून तक राज्य सरकार डहार ले जनता ले करे गे वादा ल पूरा न करे के खिलाफ आंदोलन सुरू करे हे।
लोकवाणी
मुख्यमंत्री भूपेश बघेल के मासिक रेडियो वार्ता ‘‘लोकवाणी‘‘ के 18वां कड़ी के प्रसारण काली 13 जून के करे जाही। मुख्यमंत्री लोकवाणी म ए बखत ‘‘राजीव गांधी किसान न्याय योजना‘‘ के विस्तार उपर प्रदेसवासी मन ले गोठबात करही। लोकवाणी के प्रसारण छत्तीसगढ़ स्थित आकाशवाणी के जम्मों केन्द्र, एफ.एम. रेडियो अउ क्षेत्रीय समाचार चैनल डहार ले बिहनिया साढ़े 10 बजे ले 11 बजे तक होही।
बाल श्रम निषेध दिवस
आज विश्व बाल श्रम निषेध दिवस हवय। ए बछर के बिसय हे – ‘‘अभी कार्रवाई करें, बाल श्रम समाप्त करें‘‘।
ए मउका म जारी यूनिसेफ अउ अंतर्राष्ट्रीय श्रम संगठन के एक ठिन रिपोर्ट म केहे गेहे कि जम्मों विश्वभर म बाल श्रमिक मनके संख्या बाढ़के 16 करोड़ होगे हवय। पिछले 4 बरस म एमा 84 लाख लइका मन अउ जुड़ गे हवय। अंतर्राष्ट्रीय श्रम संगठन ह बछर 2002 म विश्व बाल श्रम निषेध दिवस मनाय के सुरूआत करे रिहीस।
ऐति, छत्तीसगढ़ म घलो विश्व बाल श्रम निषेध दिवस के मउका म आने-आने कारीकरम आयोजित करे जावत हे। दुरूग जिला म जिला विधिक सेवा प्राधिकरण, श्रम विभाग, महिला अउ बाल विकास विभाग अउ पुलिस प्रसासन डहार ले बाल श्रम के रोकथाम खातिर अभियान चलाय गीस।
आईसीएआई अधिवेशन
इंस्टीट्यूट आॅफ चार्टर्ड एकाउंटेंट्स आॅफ इंडिया के ‘‘चैलेजिंग द चैलेंज्स‘‘ बिसय म रईपुर म तीन दिवसीय राष्ट्रीय अधिवेशन के आयोजन करे जावत हे। मुख्यमंत्री भूपेश बघेल ह ए अधिवेशन के वर्चुअल उद्घाटन करत किहीन कि आई.सी.ए.आई. ह बड़ सम-सामयिक बिसय ल गोठबात खातिर चुने हे। ओमन किहीन कि वर्तमान समय म बड़ अकन चुनौती मन हमर सामने मौजूद हवय, जेखर निदान हमन दृढ़ इच्छाशक्ति अउ सही फैसल लेके कर सकत हन। मुख्यमंत्री ह किहीन कि वर्तमान म कोरोना संक्रमण, जलवायु परिवर्तन, पर्यावरण प्रदूषण, उघोग, व्यवसाय, किसान मनके आर्थिक स्थिति के संगेसंग आने-आने अउ कई कठिन चुनौती हवय। ए अधिवेशन म देसभर ले करीबन 6 हजार चार्टर्ड एकाउंटेंट मन ह वर्चुअल रूप ले सामिल होवत हे।
माओवादी समाचार
दंतेवाड़ा जिला म लोन वर्राटू अभियान के तहत 5 झिन माओवादी मन ह किरंदुल थाना प्रभारी के समक्ष आत्मसमर्पण कर दीन हे। ए माओवादी मन बड़ समय ले दरभा डिवीजन एरिया कमेटी के तहत माओवादी संगठन म सक्रिय रिहीन।
उहें, बीजापुर जिला म घलो एक माओवादी दंतत्ति ह पुलिस के आगू आत्मसमर्पण कर दीन। ए माओवादी मन उपर कई ठिन हिंसक वारदात मन म सामिल रेहे के आरोप हवय।
ऐति, राजनांदगांव जिला म मानपुर पुलिस ह माओवादी मनके एक झिन सहयोगी ल गिरफ्तार करे हे। एखर पास ले पुलिस ह बड़ मात्रा म बम बनाय के सामान घलो बरामद करे हे।
गांजा-बरामद
बिलासपुर पुलिस ह तखतपुर थाना क्षेत्र के ग्राम खपरी के एक ठिन गोदाम म छापा मारके 10 क्विंटल गांजा जब्त करे हे। जब्त करे गे गांजा के अनुमानित कीमत करीबन 1 करोड़ रूपिया बताय जावत हे। जिला के पुलिस अधीक्षक प्रशांत अग्रवाल ह बतईन कि मुखबिर ले मिले सूचना के आधार म ए कार्रवाई करे गीस। ए मामला म मोपका निवासी एक झिन आरोपी ल गिरफ्तार करे गेहे, जेखर ले पुलिस पूछताछ करत हवय।
मुख्यमंत्री-वर्चुअल चर्चा
मुख्यमंत्री भूपेश बघेल ह रईपुर स्थित अपन निवास कार्यालय म आयोजित करे गे वर्चुअल कारीकरम म आने-आने योजना मन ले लाभान्वित हितग्राही मन ले चर्चा करके ओमन ल मिलत फायदा के जानकारी लीन। ए मउका म राजनांदगांव जिला के ग्राम रेंगाकठेरा के किसान भागवत वर्मा ह बतईन कि किसान न्याय योजना के तहत उंखर खाता म 1 लाख 85 हजार रूपिया जमा होय हे। मुख्यमंत्री ह योजना के जानकारी देवत बतईन कि अगर किसान ह धान के फसल के स्थान म दूसर फसल लगाथे, त ओमन ल अब 10 हजार रूपिया प्रतिएकड़ के इनपुट सब्सिडी मिलही। ओमन हितग्राही मन ल मुख्यमंत्री वृक्षारोपण प्रोत्साहन योजना अउ गोधन न्याय योजना के जानकारी घलो दीन।
राम वनगमन पर्यटन परिपथ
राज्य सरकार के महत्वाकांक्षी ‘‘राम वन गमन पर्यटन परिपथ‘‘ परियोजना के तहत चिन्हांकित जगह मन म करे जावत विकास कार्य ल निर्धारित समय-सीमा म पूरा करे जाही। छत्तीसगढ़ पर्यटन मंडल के प्रबंध संचालक यशवंत कुमार ह पदभार ग्रहण करे के बाद अधिकारी मनके बइठका लेके ए संबंध म आवश्यक निरदेस दीन। ओमन मंडल के, ट्राइबल टूरिज्म सर्किट, बुद्धिस्ट सर्किट सिरपुर अउ प्रसाद योजना के आने-आने योजना के तहत, मां बम्लेश्वरी मंदिर डोंगरगढ़ के बूता म तेजी लाय बर किहीन। श्री कुमार ह कोरोना संक्रमण ल धियान म राखत वर्तमान म घरेलू पर्यटन डहार पर्यटक मन ल प्रेरित करे के बिसेस प्रयास करे जाय म घलो जोर दीन हे।
अंतर्राष्ट्रीय योग दिवस
अंतर्राष्ट्रीय योग दिवस के मउका म 21 जून के, राज्य म छत्तीसगढ़ वर्चुअल योग मैराथन के आयोजन करे जाही। एला लेके प्रदेसवासी मन म बड़ उछाह देखे जावत हे। मैराथन म सामिल होय बर अब तक 40 हजार ले जादा लोगन मन ह आॅनलाइन पंजीयन कराय हे। मैराथन म हिस्सा ले खातिर प्रतिभागी मन 15 जून तक आॅनलाइन पंजीयन करा सकत हे।
उहें, बिलासपुर कलेक्टर ह वर्चुअल योग मैराथन म सामिल होवइया प्रतिभागी मन ले 15 जून तक 3 ठिन यौगिक अभ्यास मनके 5 मिनट के वीडियो क्लिप बनाके ई-मेल म भेजे के निवेदन करे हे।
अउ अब जानथन मौसम के हाल..
दक्षिण-पश्चिम मानसून के छत्तीसगढ़ म प्रवेस करे के संगेसंग प्रदेस के कई जगह म बारिस के सुरूवात होगे गे हवय। पाछु 24 घंटा के दौरान राजधानी रईपुर समेत प्रदेस के कई ठिन जगह मन म हल्का ले मध्यम बारिस दर्ज करे गीस।
मौसम विभाग के मुताबिक निम्न दाब के क्षेत्र, उत्तर-पश्चिम बंगाल के खाड़ी अउ उंखर ले लगे उत्तरी ओड़िसा तट अउ पश्चिम बंगाल तट के उपर स्थित हवय, जेखर अधिक प्रबल होके पश्चिम-उत्तर-पश्चिम दिसा म आगू बाढ़त ओड़िसा, झारखंड अउ उत्तर छत्तीसगढ़ डहार अवइया दू-तीन दिन म आगू बाढ़य के संभावना हे। एखर प्रभाव ले अवइया 24 घंटा के दउरान प्रदेस के आने-आने जगह मन म मध्यम ले भारी वर्षा हो सकत हे। उहें, एक-दू जगह मन म गरज-चमक के संग बिजली गिरे के चेतावनी घलो दे गे हवय।